Meken 67

Thaa Xölehuji Iesu Kö Hnei Angatr

NGÖNE la pui ne xeni ne hunuma, kola upe pi la itre hlue hnene la itre hene hmi ne Iudra, troa xölehuji Iesu. Thaa hnei Iesu kö hna zae, ngo nyidrëti pala hi a iamamanyi me inine la ka ala nyim; öni nyidrë: “Tha hoea pe kö la hnenge hna troa ce lapa me nyipunie, nge ini ha tro koi nyidë ate upi ni. Tro nyipunie a thele ni, ngo tha tro kö a öhn; nge tha ’teine kö nyipunie troa tro kowe la hnenge hna troa lapa ngön.”

Thaa trotrohnine kö angetre Iudra la trenge ewekë celë, matre angatre a ihnyingënekeune ka hape: “E ka la hnei angeice hna troa tro kowe mate tha tro kö sha öhnyi angeic? Hape u, tro angeice kowe la nöjei ate hna isa ije thei angete Heleni, me ini angete Heleni? Nemene ewekë la hnei angeice hna qaja ka hape, Tro nyipunie a thele ni, ngo tha tro kö a öhn; nge tha ’teine kö nyipunie troa tro kowe la hnenge hna troa lapa ngön?” Eje hi laka, Iesu a qaja la nyidrëti a troa mec, memine la melehmaca me elelengë i nyidrë hnengödrai eë, götrane hna thatreine troa tro kow hnene la itre ithupëjia me nyidrë.

Traqa ha kowe la hna sevenene nge drai tixenuë ne la pui ne xen. Ame ngöne la nöjei hmakany, kola nenge ngöne la iwane la ita ne huj, hnene la atre huj, la timi hna jöe ngöne la ani e Siloama. Maine jë kola amekunëne hnei Iesu la itre atr ka drei nyidrë, matre nyidrëti a qaja ka hape: “Maine hete ate a pi iji, trohemi ma iji theng. Ame la ate lapaune koi ni, te, tro ha nenipi qa kuhu hni angeice la ite hneopegejë ka mele tune lo hna cinyihan.”

Nyipici, Iesu la a qaja la itre thangane la uati hmitrötr, thene la itre atr, laka, kola troa mama lai ngöne la ijine Penetekos ne la macatre thupen. Troa neni gala la itre tim, ngöne la kola troa nyiqaane cainöje hnene la itretre drei Iesu, ala 120 angatr. Ngo, uti hë ngöne la ijine celë, paatre petre kö la ua, ene laka, pë pala kö atre drei Keriso hna siëne hnei uati hmitrötr, nge hna iëne troa mele e koho hnengödrai.

Hetrenyi la itre atr ka kapa la ini hna hamëne hnei Iesu, matre angatre a qaane troa qaja ka hape: “Nyipici, perofeta nyidëti la,” kolo jë a mekune la perofeta ka tru catre kö hui Mose, ene lo perofeta hna thingehnaeane hë ka troa traqa. Itre xane a qaja ka hape: “Nyidëti la Keriso.” Ngo itre xane a icilekeu, me qaja ka hape: “Troa xulu la Keriso qa Galilaia? Hape u tha hna qaja kö ngöne la hna cinyihan, ka hape, Tro ha xulu la Keriso qa thei Davita, nge qa Betheleema, celë hi zi Davita?”

Ame hna isazikeu la mekune ne la itre atr göi nyidrë. Itre xane a ajane troa xölehuji Iesu, ngo pëkö ka li ime koi nyidrë. Ame la kola bëeke hnene la itre hlue nge paatre pë hë Iesu, haawe, kola hnyingë angatre hnene la itre tane huj, me itre Faresaio, ka hape: “Ue lae nyipunie laka tha tro sai angeice pi?”

Öni itre hlue ka hape: “Pëkö ate ewekë tune lai.”

Atraqatre la elëhni ne la itre hene hmi, matre angatre a qaja la itre ithahnata ka akötre nyine iahmahmany, me ixöjetrij, me iqaqa. Angatre a ithahnata angazonyi me hape: “Hape u, ase hë amenu nyipunieti fe? Hape u, hete kete tane me ate Faresaio a lapaune koi nyën? Ngo hnëjinë hë la nöje celë ka tha ’te kö la wathebo.”

Drenge hë Nikodemo, ketre Faresaio, nge tane i angetre Iudra (kola hape, atrene la icasikeu i angetre eman), angeice a cilëgöli Iesu. Ma mekune hi epuni lo, kolo ha lue macatre nge sin enehila, qaane lo ijine kola tro koi Iesu e hnenyipajidri hnene la atr celë, troa fe amamane la lapaune i angeic. Enehila, angeice a cile me qaja ka hape: “Hape ue la wathebo shë, hna nyi thupene kowe la ate nge tha pane dei angeice kö, mate atejë la hnei angeice hna kuca?”

Ame hna elëhni atraqatre hnene la itre Faresaio, pine laka, kola nyixölë Iesu hnene la ketre e angatr. Matre, öni angatre a ithahnata akökötrenyi me hape: “Qa i nyipëti fe Galilaia? Thele jë me ate; ke pëkö perofeta hna xulu qa Galilaia.”

Ngacama thaa hna qaja kö hnei Tusi Hmitrötre ka hape, hetre perofeta ka troa fetra qaa Galilaia, ngo eje pe a qeje Keriso kösë ka xulu qa ngöne la nöje cili pine laka troa hudrume e cili la “lai atraqat.” Eje hi laka, hna mala Iesu e Betheleema, nge matra i Davita nyidrë. Kola mama laka, ngacama atrepengöne hnyawa hi hnene la itre Faresaio la itre hna ithuemacanyi celë, ngo angatre kö a qeje trengathoi kowe la itre atr göi Iesu. Ioane 7:32-52; Isaia 9:1, 2; Mataio 4:13-17.

▪ Nemene la ewekë hna kuca ngöne la nöjei hmakanyi ne pui ne xen, nge tune kaa la aqane ahlëne Iesu la aja ne la itre atr kowe la ewekë cili?

▪ Pine nemene matre thaa xölehuji Iesu kö hnene la itre hlue, nge nemene la mekune ne la itre hene hmi?

▪ Drei lae Nikodemo, nemene la mekune i angeice göi Iesu, nge nemene la aqane ujë ne la itre xaa Faresaio koi angeic?

▪ Nemene la ka amamane ka hape, troa fetra la Keriso qaa Galilaia?