Meken 80

Itre Hnahage Memine La Ate Thupë Mamoe

ELË hë Iesu Ierusalema eë troa atrune la pui ne xeni hmekune la alöat, me Hanoukkah, kola amekunëne la kola nue hmaca pi la ēnē koi Iehova. Ame ngöne la macatre 168 M.P.K., kola e la 200 lao macatre qaane lo kola xome la traone hnei Anetioka IV Epifane, me angazone la ēnē memine la tane huj. Ngo köni macatre thupene lai, hna thepe Ierusalema hmaca, me hamëne hmaca la ēnē koi Akötresie. Celë hi matre, ngöne la nöjei macatre, kola atrune me amekunëne hmaca la ijine cili.

Kola atrune la pui ne xeni hmekune la alöat, e 25 kislev, treu ngöne la idrai i angetre Iudra, ka ihmeku memine la pune la treu nofeba, memine la qaane la treu diseba, ene e ngöne la idrai së. Haawe, hna e pe hi la 100 nge hetre munën, la itre drai qëmekene la paseka macatre 33 M.K.; ketre paseka hna thaa troa thëthëhmin. Pine laka, drai hnötre la ijine cili, haawe, kola qaja hnei Ioane aposetolo ka hape, “hnaihedrö.”

Iesu a hamëne la ketre ceitun, kola qaja la köni hag, memine la hnëqa hnei nyidrëti hna troa xom, ene la atre thupë mamoe ka sisitria. Ame la pane hag, ke, kola nyihatrene la isisinyikeu ne la Trenge Wathebo i Mose. Ceitune la Trenge Wathebo memine la ketre hag, ka shewe angetre Iudra troa hane mele thenge la itre thiina ka ngazo hna majemine kuca hnene la itre atr hna thaa hane kö kapa ngöne la isisinyikeu ka ketre pengöne i Akötresie. Iesu a qaja ka hape: “Nyipici, nyipici, ini a qaja koi nyipunie, Ame la ate tha hane lö ngöne la qanahage ne la hnahage ne mamoe, ngo elë pe ngöne la kete gojenyi kö, angeice la ate kë ’nö me ate thöe. Ngo ame la ate lö ngöne la qanahag, angeice la ate thupë mamoe.”

Hna traqa hnene la itre xaa atr, me uune ka hape, angatre hi lo Mesia, nge Keriso, ngo thaa angatre kö lo nyipi atre thupë mamoe hnei Iesu hna qeje pengöne tune la, hna hape: “Kola thawa koi angeice hnene la ate thupë qanahag; nge dengë hë la aqane ewekë i angeice hnene la nöjei mamoe; nge angeic’ a hëne la ite ëjene la nöjei mamoe i angeice kö, me tro sai angate pi kowe kuhu. . . . Tha tro kö angate a xöte thenge la trehnyiwa, ngo troa köt’ e angeic; ke tha dengate hmekune kö angate la aqane ewekë ne la ite tehnyiwa.”

Ame la “ate thupë qanahag” ne la pane ihag, ke, Ioane bapataiso. Hnei angeice hna ‘thawa’ koi Iesu la gojeny, me amamane koi nyidrë la itre mamoe, ene la itre atr, hnei nyidrëti hna troa engëne trongën. Ame la itre mamoe celë hnei Iesu hna hëne thenge la isa ëje i angatr, me eatrongëne e trön, ke tro pena ha ami angatre hnine la ketre hnahag. Celë hi hna qaja hnei Iesu, kola hape: “Nyipici, nyipici, ini a qaja koi nyipunie, ini la qanahage ne la nöjei mamoe,” kola hape, qanahage ne la ketre ihage ka hnyipixe. Tro ha lö hnine la ihage ka hnyipixe cili, ngöne la Iesu a troa ami trepene la isisinyikeu ka hnyipixe memine la itretre drei nyidrë, nge qaa hnengödrai, tro pë hë nyidrë a atë hui angatre la uati hmitrötre ngöne la paseka hnapin.

Iesu a amamane hnyawa la hnëqa i nyidrë, me qaja ka hape: “Ini la qanahag, maine kete ate a löjë theng, tro angeic’ a mel, me löjë me löpi, me öhne la xen. . . . Traqa ha ni mate tro angat’ a hetenyi la mel, nge troa hetenyi atraqat. . . . Ini la ate thupën’ aloin, nge wangate hmekune kö ni la ite mamoenge, nge kete wangate hmekunyi ni kö hnei angat. Tetetroti a wangate hmekunyi ni, kete tung’ a wangate hmekunyi Tetetro; nge ini a hamëne la melenge nyine göline la nöjei mamoe.”

Qëmekene lai, hnei Iesu hna pane akeukawane la hni ne la itretre drei nyidrë; öni nyidrë: “Hnënge mamoe ka xalaithe fe, the qou kö, ke aja i Tretretro i nyipunie troa hamë nyipunie la baselaia.” Troa lö hnene la hnënge mamoe ka xalaith, ene lo 144 000, hnine la hnahage ka hnyipixe cili, maine hnine la hnaaluene hnahag. Ngo Iesu a hane qaja fe ka hape: “Hetenyi hë ni la ite xa mamoe kö, tha sine kö la hna axö celë, ijije tro ni a thei angate fe, nge tro angat’ a denge la aqane ewekëng; mate casi hi la hna axö mamoe, nge casi hi la ate thupën.”

Pine laka, hetrenyi la “ite xaa mamoe kö,” ka “tha sine kö la hna axö celë,” haawe, tro kö a hetrenyi la ketre, ene la hnaakönin. Ame la lue hna axö öni celë, maine lue ihag, ke isa hetre hna thingehnaeane kowe lue ej. Tro la “hnënge mamoe ka xalaith” ne la ketre hna axö öni, a ce musi me Keriso e hnengödrai, nge ame la “ite xaa mamoe kö” ne la ketre hna axö öni, ke nyudrene a troa mele hune la ihnadro hna troa aparadraison. Ngacama hna isa amë lue eje hnine la lue hna axö öni ka isa pengöne kö, ngo thaa hna izalukeu, maine mekune pena hnei ketre ka hape, kola iwangatrehmekuny, ke, tune la hna qaja hnei Iesu, ka hape, “casi hi la hna axö mamoe” nge “casi hi la ate thupën.”

Ka hmala la atre thupe ka sisitria, ene Iesu Keriso, troa hamëne la mele i nyidrë kowe la itre mamoe ne la lue hna axö öni cili. Öni nyidrëti ka hape: “Ini a hamëne hnenge kö, hetenyi hë ni la mene troa hamëne la meleng, nge hetenyi hë ni la mene troa xome hmaca. Celë hi wathebo hnenge hna kapa qa thei Kaka.” Ene pe isazikeu ju hi la mekune i angetre Iudra.

Nyimutre la itre atr ka qaja ka hape: “Thei angeice la demoni, nge hmo hë angeic; ue lae nyipunie a dei angeic?” Ngo itre xane a sa ka hape: “Ame la, te, tha ite tenge ewekë ne la ka hete demoni.” Haawe, angatre a mekune hmaca lo aqane aloine Iesu lo ka timek, a lue treu hë enehila, matre angatre a qaja ka hape: “Ateine la ite demoni troa fē la ite lue meke ne la ite timek?” Ioane 10:1-22; 9:1-7; Luka 12:32; Hna Amamane 14:1, 3; 21:3, 4; Salamo 37:29.

▪ Nemene la pui ne xeni hmekune la alöatr, nge eu la kola atrune ej?

▪ Nemene la pane hna axö mamoe, nge drei la atre thupë qanahagen?

▪ Nemene la aliene la hna hape, kola thawa fe hnene la atre thupë qanahage kowe la atre thupë mamoe, nge hna amë ekaa la itre mamoe?

▪ Drei la ka nyialiene la lue hna axö öni ne la atre thupë mamoe ka sisitria, matre ije hna axö mamoe hë e thupen?