Meken 85

Kola Thele La Itre Atr Ka Ngazo Hna Amenun

IESU a catre thele la itre ka ajane troa nyihlue i Akötresie cememine la ipië. Haawe, nyidrëti a tro pi troa cainöjëne la maca ka loi kowe la nöjei atr asë, me kowe fe lo itre atr ka hlemu pine la itre ngazo ka tru hnei angatre hna kuca. Angatre hi itre ka ngazo, la angetre easenyi Iesu matre troa drei nyidrë hnyawa.

Kola qaja angazo Iesu hnei angetre Faresaio me angetre cinyihan, pine laka, nyidrëti a lapaa ithahnata memine la itre atr hna methinëne hnei angatr. Angatre a nyi ulili ka hape: “Kola kapa la ite ka ngazo hnene la ate celë, me ce xeni me angat.” Thaa angatre kö la ka troa ipië troa kuca la ewekë cili! Eje hi laka, angetre Faresaio me angetre cinyihane a xome la itre atr ka puafala ceitune memine la so ne dro, fene la lue hnatrapaca i angatr. Celë hi matre kola hë angatre ka hape ‛am ha·’aʹrets, “atr ne la nöj [ne la hnepadro],” kola amamane la aqane methinëne la itre ka puafala hnei angatr.

Ngo ame kö Iesu, ke, nyidrëti a goeëne la nöjei atr, cememine la metrötr, me lolo, me ihnim. Celë hi matre, ala nyimu la itre atr ka ipië, tune lo itre xane ka hlemu pine la itre ngazo i angatr, a kola ajane catrëne troa drei nyidrë. Ngo tune kaa la pengöne la aqane qeje engazo Iesu hnei itre Faresaio, ene laka, tru la loi hna kuca hnei nyidrëti kowe la itre hna jele pë eloin?

Iesu a sa thenge la mekune i angatre ka ngazo, jëne la ketre ceitun. Nyidrëti a tro thenge la mekune ne la itre Faresaio, kösë itre atr ka meköti angatre nge pëkö hnei angatre hna xouen pine laka hna thupë angatre hnei Akötresie, thaa ceitune kö memine la itre hna xele ma wang, ene la itre ‛am ha·’aʹrets hna amenun, nge luuzi hë; nyidrëti a qaja koi angatre ka hape:

“Dei e nyipunie tene mamoe ka haded, maine patë hë la kete e nyuden, hape u, tha tro kö angeic’ a nue pe la ekate nge ekeqaihano ngöne la hnapapa, me thele la ka pat, uti hë e öhnë hë ej? Nge öhnë hë, angeic’ a atë hune la hnaiape i angeic, me madin. Nge e traqa ha kowe la uma i angeic, angeic’ a hëne icasinekune la ite sine i angeic, me itete lapa eashenyi angeic, me qaja koi angat, ka hape, Ce madinejë me ini, ke öhnë hë ni la mamoenge ka pat.”

Thupene lai, nyidrëti a xomi ini qa ngöne lai, me hape: “Kete tune troa madine e hnengödrai ngöne la ietra ne la ate ka ngazo ka cas, hune la itete thina ka meköti ka ekate nge ekeqaihano, la ka tha ijiji angatre troa ietra.”

Itre Faresaio a mekune laka, itre ka meköti angatr, qa ngöne lai, thaa nyipi ewekë kö koi angatre troa hane ietra. Lue macatre hë enehila, hnene lo itre xane hna wesitre koi Iesu pine nyidrëti ce xeni me itre telona me itre ka ngazo, ngo hnei Iesu hna qaja koi angatre ka hape: “Tha traqa kö ni troa hëne la ite ka meköt, ngo ite ka ngazo.” Pëkö madrine e hnengödrai kowe la itre Faresaio ka mekune e kuhu hni angatre laka, itre ka meköti angatr, nge thaa nyipi ewekë kö troa hane ietra. Ngo hetre madrine e koho hnengödrai, ngöne la kola nyipi ietra hnene la itre ka ngazo.

Iesu a hamëne la ketre ceitune matre troa acatrene la mekun, ene laka, troa hetre madrine atraqatr e kola troa bëeke hmaca la itre atr ka ngazo hna amenun. “Nge dei la föe tene mani ka luepi, nge maine patë hë la kete, tha tro kö nyido a jinathe la lamepa, me thelethelëne la hnuma, me thele hnyawa uti hë e öhnë hë ej? Nge öhnë hë, nyidoti a hëne icasinekeune la ite sine i nyido, me hape, Ce madinejë me ini, ke öhnë hë ni la maninge ka pat.”

Iesu a hamëne la ini ka caas, me hape: “Ini a qaja koi nyipunie, kete tune la madine qëmeke ne la nöjei angela i Akötesie ngöne la ietra ne la ate ka ngazo ka cas.”

Easë a haine laka, tru la ihnimi ne la itre angela la kola bëeke la itre ka ngazo hna amenun. Ketre, ame la itre ‛am ha·’aʹrets celë ka ipië nge hna xele ma wang, ke, ijije tro angatre a hane sine la Baselaia i Akötresie e koho hnengödrai, qa ngöne lai, tro hë angatre a hane hetrenyi la ketre göhnë e koho hnengödrai, ka draië kö hune la itre angela! Ngo, thaa hna izalukeu kö, maine hace menu pena hnene la itre angela; angatre pe a ipië, me trotrohnine laka, loi e tro la itre atr ka ngazo cili a atreine cile kowe la itre itupathi me itre jole ka tru, ke, kolo hi lai a ini angatre matre troa hane nyihluei Akötresie e hnengödrai tune la itre joxu, me itretre huje ka utipine me ka tru ihnimin. Luka 15:1-10; Mataio 9:13; 1 Korinito 6:2, 3; Hna Amamane 20:6.

▪ Pine nemene matre Iesu a lapaa ithahnata kowe la itre atr ka hlemu pine la itre ngazo hna kuca, nge nemene la aqane xöjetriji nyidrë hnene la itre Faresaio?

▪ Tune kaa la aqane goeëne hnene la itre Faresaio, lo itre atr ka pë ewekë?

▪ Nemene la itre ceitune hna hamëne hnei Iesu, nge nemene la ini hna xome qa ngön?

▪ Pine nemene matre lolo e troa wang la kola madrine hnene la itre angela?