Meken 92

Hnapine Tronge i Iesu e Ierusalema, Me Iamamanyikeu Ne La Treene Lao Lepera

IESU a atriane la mekune i angetre tane huj, me itre Faresaio troa humuthi nyidrë: nyidrëti a tro ananyi Ierusalema, me tro Eferaima eë, götrane ailopi ne Ierusalema, a 25 kilomet qa ngön. Nyidrëti a pane lapa e cili, ananyine la itre ithupëjia me nyidrë.

Ngo, easenyi hë la drai ne Penetekos ne macatre 33, nge Iesu hmaca a tro. Nyidrëti a Samaria thenge, me tro Galilaia eë. Hnapine tro pe hi nyidrë kowe la nöje cili qëmekene tro nyidrëti a mec. Qaa Galilaia, Iesu me itretre drei nyidrë a ce tro memine la itre xaa atr ka tro fe Ierusalema eë, göne la pui ne xeni ne la Penetekos. Angatre a xome la gojenyi ne tro Pere, ketre lapa ngöne la götrane ahië ne Ioridrano.

Ngöne la kola xötrei tro, ke, Iesu a lö ngöne la ketre lapa ne Samaria maine Galilaia, nge treene lao lepera a traqa itronyi me nyidrë. Kola ae trootro la itre xaa götrane la ngönetrei​—itre wanakoim, itre wanakoca, lue hnangenyë, ihnafij, me itre huneineqë. Kola qaja hnene la Trenge Wathebo i Akötresie thatraqane la itre lepera ka hape: “Tro angeic a hetëne la ukeineqë, me hë, ka hape, Pui ngazo hë ni, pui ngazo hë ni. Ngöne la ite drai asë hna tithi angeice hnene la mec, tro ha pui ngazo angeic. . . . Tro angeic’ a lapa cas.”

Hna metrötrëne la itre hna amekötine hnine la Trenge Wathebo hnene la itre lepera ka ala treen, angatre a lapa ananyi Iesu. Ngo, angatre a ewekë catre koi nyidrë me hape: “Iesue, Joxu fe, fetesi nyihunie!”

Öhnyi angatre hë hnei nyidrë, nyidrëti a ulatine koi angatre ka hape: “Ange troja amamai nyipunieti jë koi angete huj.” Nyidrëti a qaja lai pine laka, Trenge Wathebo i Akötresie a nue la itretre huje troa jele pui loine la itre lepera ka loi hë la mec, nge qa ngöne lai, kola nue angatre tro hmaca a hane ce mele memine la itre ka pë mecin.

Tru la mejiune ne lai treene lao lepera kowe la mene i Iesu troa aloine la itre mec. Ngacama thaa loi petre kö la meci angatr, angatre a canga tro kowe la itretre huj. Nge e cahu gojeny, kola nyijune la lapaune i angatre koi Iesu: angatre a nyiqaane öhne me drenge la kola loi trootro la meci angatr.

Ala naene lao lepera ka pui loi hë, angatre a sisedrëne la gojenyi angatr, ngo ame la hnaatreene lepera, ketre atre Samaria, ke, angeice a bëeke hmaca, me thele Iesu. Nemene la ka upi angeice troa ujë tune la? Tru la ihnimi me ole kowe la ewekë ka traqa koi angeice enehila. Angeice a qaja aloinyi Akötresie, me ewekë catr, nge ame la angeice a öhnyi Iesu, ke, angeice a kei qe ipië ngöne la lue fenie i nyidrë me ole koi nyidrë.

Iesu a sa ka hape: “Hape u, tha ala luepi kö la ite hna aloin? Nge e ka pe kö la ala ekengemen? Pëju kö xa hna öhne a hmaca troa qaja aloinyi Akötesie, ngo dei hmekuje pe hi la tehnyiwa.”

Nge nyidrëti a qaja kowe la atre Samaria ka hape: “Cilejë, trojë, melë hë eö hnene la lapaune i ’ö.”

Ngöne la easë a e la hna melëne hnene la ala treene lao lepera, memine la aqane aloinyi angatre hnei Iesu, loi e tro së a amë e kuhu hni së la ini nyine xom qa ngöne la hnyinge i nyidrë: “E ka pe kö la ala ekengemen?” Pëkö caa ole thene la ala naene lao trahmany, nge ketre ngazo lai ka tru xajawai Akötresie. Tune la atre Samaria, tro fe kö a hane hetrenyi the së la ole kowe la itre ewekë hne së hna kapa qa thei Akötresie, tune la hna thingehnaeane ka troa eatr, ene la mele ka thaa ase palua kö ngöne la fene hnengödrai ka hnyipixe me ka meköt? Ioane 11:54, 55; Luka 17:11-19; Levitiko 13:16, 17, 45, 46; Hna Amamane 21:3, 4.

▪ Hnei Iesu hna atriane tune kaa la mekune i angatre troa humuthi nyidrë?

▪ Ekaa la traone hnei Iesu hna tro kow, nge hnei nyidrëti hna kaa thenge?

▪ Pine nemene matre itre lepera a lapa ananyine la itre atr, nge pine nemene matre Iesu a qaja koi angatre troa tro kowe la itretre huj?

▪ Nemene la ini hne së hna xome qa ngöne la ini cili?