Meken 107

Ketre Ceitune Ngöne La Pui Ne Xeni Ne Faipoipo

MAMA ha la ngazo ne la itretre cinyihan, me itre tane i angetre huj, jëne la lue ceitune hnei Iesu hna hamëne, celë hi matre angatre a ajane troa humuthi nyidrë. Ngo thaa hnei Iesu kö hna hmaca e cili. Nyidrëti a hamëne hmaca koi angatre la ketre ceitun. Hanawange ej:

“Ame la baselaia ne hnengödrai, te, tune la kete joxu, ate nyikeine ne la faipoipo ne la nekö i nyidë. Ame hnei nyidëti hna upe la ite hlue i nyidë troa thenge la ite hna pane könëne kowe la nyikeine ne faipoipo; nge xele kö angate ma tro.”

Iehova Akötresie la Joxu, nge Nyidrëti la ka hnëkëne la pui ne xeni ne faipoipo, thatraqane la hupuna i Nyidrë, Iesu Keriso. Easenyi hë matre caasi pi hë la jajiny, ene la 144 000, itretre drenge hna iën, me Iesu e hnengödrai. Ame la itre jinine la Joxu, ke, ene lo angetre Isaraela hna isisinyikeu memin hnine la wathebo, ngöne la macatre 1513 M.P.K. Angatre hi lo hna mekune troa “musi nge itretre huj.” Ijine cili hi, lo kola könë angatre kowe la pui ne xeni ne faipoipo.

Ngo thaa hna drenge kö hnene la itre hna könën, la pane ihë, qëmekene lo hnijine li xaji, macatre 29 M.K., ngöne lo Iesu me itretre drei nyidrë (itre hlue ne la Joxu) a nyiqaane cainöjëne la Baselaia. Ngo thaa hna kapa kö hnene la itretre Isaraela, la ihë ne la itre hlue ngöne lo macatre 29 M.K. uti hë lo macatre 33. Qa ngöne lai, hnei Akötresieti hna hëne hmaca la nöje cili, tune la aqane qaja lai hnei Iesu ka hape:

“Hnei nyidëti hna upe hmaca ite xa hlue, kola hape, Qaja jë koi ite hna pane könën, ka hape, Hana wang, ase hë ni hnëkëne la nyikeineng; ase hë lepe la ite bolokenge me ite ka pipixenyë, nge asesë hë hnëkëne la nöjei ewekë; trojë fe kowe la nyikeine ne faipoipo.” Ame la hnaaluene nge hë tixenuë cili kowe lo itre hna könën, ke, hna nyiqaane mama ngöne la ijine Penetekos ne macatre 33, ngöne lo kola të hune la itretre drei Iesu hnene la uati hmitrötr, a uti hë lo 36 M.K.

Ngo, e cili fe, ala nyimu catre la itretre Isaraela ka thipetrije la ihë ne la Joxu. Iesu a qaja ka hape, “Angat’ a sixan, me isa tro, kete kowe la zi angeic, nge kete kowe la hna itö i angeic; nge ame hnene la thelene hna xölehuje la ite hlue i nyidë, me qana angazon, me humuth.” Öni nyidrëti fe ka hape: “Ame hnene la joxu hna elëhni, me upe la ite ishi nyidë, me deuthe tije la lapa i angat.” Celë hi ewekë ka traqa ngöne lo macatre 70 M.K., ngöne lo kola thë trije e Ierusalema hnene la itretre Roma, me apaatrene la itre ka ihumuth.

Thupene lai, Iesu a qaja la ewekë hna kuca fe hnene la Joxu, kola hape: “Ame hnei nyidëti [joxu] hna qaja kowe la ite hlue i nyidëti, ka hape, Ase hë hnëkëne la nyikeine ne faipoipo, ngo tha ijiji angate kö lo hna pane könën. Qa ngöne lai trojë nyipunie kowe la nöjei hnaijejea, nge ame angat’asë hnei nyipunie hna troa öhne thengejë fe kowe la nyikeine faipoipo.”

Ame la hna troa kuca, ke, ene la troa icasikeune asë la itre atr hna öhne ngöne la itre gojenyi e tröne la lapa hna mele ngön hnene lo itre hna könën; hna nyiqaane la huliwa cili, ngöne lo macatre 36 M.K. Ame la itre hna pane icasikeun, ke, Konelio ketre tane isi angetre Roma, memine fe la lapa i angeic; thaa angetre Iudra kö angatr, nge thaa hna peritomo angatre kö. Hna sisedrëne uti hë enehila la huliwa ne icasikeune lo itre atr ka nyihnane lo itre hna pane könën, angetre thipetrije la ihë.

Kola tiqa hnyawa la iuma ne faipoipo, ngöne la hnaa truedrene hadredrene macatre. Nge Iesu a qaja la ewekë ka traqa thupen: “Nge löjë la joxu troa wai angete lapa, nyidëti a goeëne la kete e cili ka pë ixete ne faipoipo. Öni nyidëti koi angeic, ka hape, We sineng, hna uë eö a löjë kowe la, nge pëkö ixete ne faipoipo? Ame hna lapa thaupuju angeic. Ame hnene la joxu hna qaja kowe la ite hlue, ka hape, Othi nyëne ju lue ca me lue im, me kuiënepi kowe kuhu ga jid; tro ha teije me kiki la inyö e cili.”

Ame la atr ka pëkö ixetre ne faipoipo, ke, kolo itre keresiano thoi ne la itre nöje ka uune ka hape, itre keresiano angatr. Thaa hnei Akötresieti kö hna hane kepe angatre tune lo aqane kapa Nyidrëti lo itretre nyihluei Nyidrëti hnyawa, itretre isaraela ngöne la götrane la ua. Ketre thaa hnei Nyidrëti kö hna sië angatre hnei uati hmitrötr, matre tro angatre a hane itre matrane la Baselaia. Qa ngöne lai, hna upetriji angatre e trön, ngöne la melöhlem, nge e cili troa apaatrenyi angatr.

Iesu a nyipune la ceitune i nyidrëti me hape: “Ke alanyimu la hna hën, ngo xalaithe hi la hna iën.” Nyipici, nyimutre la itretre Isaraela hna hëne troa itre atrene la föe i Keriso, ngo thaa ala nyimu kö angatr, ange hna iën. Kola mama laka, ala nyimu ngöne lo lai 144 000 lao atr hna könëne ka troa kapa la ahnahna e hnengödrai, thaa itretre Isaraela kö angatr. Mataio 22:1-14; Esodo 19:1-6; Hna Amamane 14:1-3.

▪ Drei ngöne la qaan, la itre hna könëne kowe la pui ne xeni ne faipoipo, nge eue la angatre a drenge la kola hë angatr?

▪ Eue la kola pane nyiqaane hëne la itre hna könën, nge drei la itre hlue hna upe troa ihë?

▪ Eue la hnaaluene ihë, nge thupene lai, drei la itre hna könën?

▪ Kola qeje drei hnene la atr ka pë ixetre ne faipoipo?

▪ Drei la itre hna hëne ka nyimutre, nge drei la itre hna iën, laka, xalaithe hi angatr?