Meken 110

Iesu a Umuthe La Huliwa Ne Cainöj Ngöne La Ēnē

IESU a traqa tixenuë ngöne la ēnē. Maine tro sa uthe la köni drai, hna troa sisedrëne hnene la kola kootrë nyidrë me humuthi nyidrë, eje hi laka, nyidrëti hi la a umuthe la huliwa ne cainöje i nyidrë, e celë fen. Ngo qëmekene la itre ewekë cili ka troa traqa, nyidrëti pala hi a jele ngazone catrëne la itretre cinyihane me itre Faresaio.

Akönia qaja hmaca Iesu ka hape: “Ekölö hi ni nyipunie, angete cinyihanyi me angete Faresaio, itete thoi!” Nyidrëti a pane qaja la hleuhleu me pune koi angatr, pine laka, angatre a hnea la “hutröne la inege memine la cei, ngo ame la hnin, te, tiqa ha hnei ënö me pi xen.” Matre nyidrëti a hape koi angatr, troa “pane hnea la hnine la inege memine la cei, matre hane wië fe la trön.”

Thupene lai, nyidrëti a qaja jë la pune ka ngazo kowe la itretre cinyihan, me itre Faresaio, pine la aqane pui ngazo me sisi la itre thiina i angatr, a kola thele troa zae hnine la aqane hmi thoi angatre koi Akötresie. Öni nyidrëti koi angatre ka hape: “Cei tui nyipunie me ite hua hna awiëwiën, kola mingeminge hi la trön; ngo ame la hnin, te, tiqa ha hnei nöjei june wezipo me ka sisi asë.”

Kola mama hnyawa fe la aqane hmi thoi angatr, qa ngöne laka, angatre a canga xupe la itre hua ne la itre perofeta, me thaipine itre ej, matre troa amamane koi itre atr la itre huliwa ka loi hnei angatre hna kuca. Ngo tune la hna qaja hnei Iesu, angatre la itre “nekö ne la angete humuthe la nöjei perofeta.” Eje hi laka, troa hetre pune ka ngazo, kowe la atre qaja amamane la aqane mele thoi angatr.

Öni Iesu e qaja catrëne la pune koi angatr, kola hape: “Ite une nyipunie me ite nekö i vaipa, tro nyipunie a kötene tune ka la hnëjin’ e gena?” Ame la gena, celë hi ketre hnathupe hna xome nyine hnë trije la nöjei ewekë ne Ierusalema, nyine dreuthe trij. Iesu a hmekëne la itretre cinyihan, me itre Faresaio ka hape, pine laka, angatre a catre fë la aqane iakötrë i angatr, haawe, tro ha apaatrenyi angatr, epine palua.

Iesu a qaja koi angatre la pengöne la itre ka tro fë maca i nyidrë, kola hape: “Tro hë nyipunie a humuthe me [“athipe hune la sinöe,” MN ] ite xan’ e angat; nge tro hë nyipunieti a thaucë ite xane ngöne la ite sunago i nyipunie, me weje qa ngöne la kete lapa kowe la kete lapa; mate traqa pi koi nyipunie la madra i Abela thina ka meköti uti hë la madra i Zakaria, nekö i Barakaia [hna hëne ka hape, Iehoiada ngöne la hnaaluene tusi Aqana lapa ite joxu], ene la hnei nyipunieti ha humuthe akawane la ēnē memine la ita ne huj. Nyipici, ini a qaja koi nyipunie, tro ha traqa la nöjei ewekë asë cili kowe la xöte celë.”

Pine laka, hnei Zakaria hna qaja angazone la aqane ujë ne la itre tane i angetre Isaraela, haawe, “hnei angate hna thi june i nyidë, me trânyi nyidë hnei etë ngöne la hnahage ne la ēnē i Iehova thenge la musi joxu.” Ngo tune la hna perofetane hnei Iesu, tro Isaraela a nyithupene la madra ne la atr ka meköti hna anenin. Hna eatre pë hë lai, 37 lao macatre thupen, ngöne lo 70 M.K., ngöne la kola troa apaatrene e Ierusalema hnene la itre sooce ne Roma, nge hetre caa milio nge sin, la etrune la itretre Iudra hna humuth.

Hace catre koi Iesu, ngöne la nyidrëti a mekune la ewekë ka akötre cili. Nyidrëti a qaja ka hape, “Ierusalema, Ierusalema fe, ate humuthe la nöjei perofeta, me trânyi angate hna upe koi ’ö, a nyimu ajane hnenge troa icasikeune la ite nekö i ’ö, tune la thine ne ha gutu kola hajuhajume la ite kuku fene la lue iape i nyën, te, xele kö nyipunie! Hana wang, ase hë nue tije la uma i nyipunie nge pëhë alien.”

Nge nyidrëti fe a qaja ka hape: “Tha tro hmaca kö nyipunie a öhnyi ni, uti hë la tro nyipunieti a qaja, ka hape, ‘Manathithi nyidë ate hlepëti ngöne la atesieti i anganyidë!’ ” Troa xulu la ijine cili, ngöne la hlepëti Keriso, ene lo ijine nyidrëti a troa löjë ngöne la Baselaia e hnengödrai, nge tro la itre atr a öhnyi nyidrë hnene la itre lue meke ne la lapaun.

Enehila, Iesu a tro kowe la ketre götrane hna ami hnen lo itre trengene ahnahna ngöne la ēnē, nge nyidrëti a goeëne la kola isa kuië manie hnene la ka ala nyim. Tru catre la manie hna kuiëne hnene la itre trena mo. Nge kola tro hnene la ketre sine föe ka pë ewekë, me kuiëne la lue manie ka co, ka pëkö pengön.

Iesu a hëne la itretre drei nyidrë, me qaja ka hape: “Nyipici ini a qaja koi nyipunie, ‘tru la hnene la sine föe ka pë ewekë celë hna kuiëne hui angat’ asë.” Angatre a ihnyingënekeune la aliene la trenge ewekë i Iesu. Öni nyidrëti jë hi koi angatre ka hape: “Hnei angat’ asë hna isa kuiëne kowe la tengene ahnahna qa ngöne la tiqa i angat; ngo hnei nyidoti ka pë ewekë hna kuiën’ asë la nune mele i nyido.” Thupene la hnei nyidrëti hna qaja lai, nyidrëti hi a tro palua qa hnine la ēnē.

Nge kola haine hnene la ketre drei nyidrë, la etrune memine la emingömingöne la ēnē, öni angeice ka hape: “Ate ini fe, hana wange la nöjei etë ka tru, me hna xupi etin!” Nyipici, atraqatre catre la itre etë ne la ēnē; e caa etë, kola e la 11 met nge hetre munëne la eqean, 5 met la eisaisan, nge 3 met la edraiën!

Öni Iesu koi angatre ka hape: “Hapeu, öhnë hë nyipunie la nöjei ewekë asë celë? Tha tro kö a hnene la kete etë hne la kete etë, ngo troa thë trij’ asë.”

Thupene la hnei nyidrëti hna qaja lai, kola thupa pi hnei Iesu me itre aposetolo i nyidrë, la hnathupe Kederon, me elë hune la wetre Elaio. Mama catre qaa lai, la emingömingöne la ēnē. Mataio 23:25–24:3; Mareko 12:41–13:3; Luka 21:1-6; 2 Aqane lapa ite joxu 24:20-22.

▪ Nemene la hnei Iesu hna kuca, ngöne la nyidrëti a traqa tixenuë hnine la ēnē?

▪ Kola mama tune kaa la aqane hmi thoi ne la itretre cinyihan, me itre Faresaio?

▪ Kola qeje nemene la “hnëjin’ e gena”?

▪ Pine nemene matre Iesu a qaja ka hape, sisitria kö la hna hamëne hnene la sine föe hune la itre trena mo?