Meken 125

Akötre Hune La Sinöe

LUE ka atrekënö hna ce ea me Iesu troa humuth. Kola pane cile hnene la ka ala nyimu e Gologotha, kola hape, hne Zi ne la inehenatr, ketre götrane ka thaa nanyi kö qa ngöne la traon.

Hna una la itre iheetre ne la ange hna oth. Thupene lai, hna hamë nyidrëti la waina hna ithuenyiköne me muro. Maine jë hna hnëkëne lai hnene la itre föe ne Ierusalema, nge thaa hna thipëne kö hnene la itretre Roma la nyine iji cili, ka troa apaatrene la akötre thene la itre hna troa athipe hune la itre sinöe. Nge ase hë Iesu dreme tupath, thaa hnei nyidrëti kö hna ij. Pine nemen? Maine jë, pine laka, nyidrëti a ajane troa cile kowe la ketre ewekë ka tru, ka troa tupathe la lapaune i nyidrë, nge nyipi ewekë koi nyidrëti troa hmekëne la nöjei götrane la ngönetrei nyidrë.

Kola ameköle Iesu hune la sinöe, lue ime i nyidrëti e hune la he i nyidrë. Ame hnene la itre sooce hna jei faone la lue wanakoime me lue ca i nyidrë. Atraqatre catre la akötre i nyidrë, ngöne la kola thine axulune la ijöne memine la itre none i nyidrë. Nge ame la kola acile la sinöe, e cili kola akötre catre hnei Iesu pine laka, kola hace ipië hnei nyidrë, ene pe kola kuie lo itre ka akötre hna jei faon. Ngo thaa hnei Iesu kö hna thele troa kuca la ketre ewekë, ngo nyidrëti pe a thithi thatraqane la itre sooce i Roma; öni nyidrë: “Kakati fe, nue angate pi; ke tha ’te angate la hnei angate hna kuca.”

Pilato a cinyihane jë ngöne la ketre sine inehe hna atë hune la sinöe, kola hape: “Iesu Ate Nazareta, Joxu i Angete Iuda.” Kola mama laka, Pilato a cinyihane tune lai, ke thaa nyidrëti hmekuje kö a ajane troa amamane la ipië i nyidrë koi Iesu, ngo nyine tro fe a amamane laka cane methi nyidrëti la itretre huje ne Iudra, angetre uku nyidrë troa hamëne la pune koi Iesu, ene la troa humuthi nyidrë. Hnei Pilato hna ujëne lai kowe la köni qene hlapa, matre tro asë hi la nöjei atr a e, ngöne qene heberu, me qene heleni, me qene latë, ene lo qene hlapa hna ithahnatane atrun.

Thaa madrine kö Kaiafa, me itre xaa tane i angetre huj. Kösë kola angazone hnene la ewekë hna cinyihan, lo aja me pi hune i angatr. Haawe, angatre a icilekeu me qaja ka hape: “The cinyihane kö, Joxu i angete Iuda, ngo loi pe, lo hnei nyëne hna qaja, ka hape, Ini la Joxu i angete Iuda.” Kola elëhni hnei Pilato pine laka, hna eatrongë nyidrë hnene la itretre huj troa ce thë la ngazo, matre nyidrëti a sa cememine la elëhni me hape: “Ame la hnenge hna cinyihane, te, ase hë ni cinyihan.”

Kola icilenyi la itretre huje memine la ka ala nyimu ngöne la hnë troa ihumuth, nge angatre a thele troa jele thoine lo lai hna cinyihan. Angatre a xome hmaca lo itre trenga thoi hna qaja qëmeke i angetre isenyin. Celë hi matre kola qaja angazonyi Iesu hnene la itre atr ka tro ngöne la gojeny; angatre nangenang, me qaja ka hape: “We, hmunë ate troa kenithe la ēnē, me acile hmaca ngöne la köni drai, amele hmunë jë kö; maine Nekö i Akötesie hmunë, te, utipi qa ngöne la [“sinöe,” MN ].”

Kola caasi hnene la itre tane i angetre huj, me itre sine ce tro i angatr, me caasi memine la itre ka ihnyima sai, nge angatre a qaja ka hape: “Hnei nyëne hna amele ite xan, ngo tha’ teine pena kö amele nyëne fe. Maine nyëne la Joxu i angete Isaraela, loi e utipi enehila qa ngöne la [“sinöe,” MN ] nge tro sha lapau nyën. Hnei nyëne hna lapaune koi Akötesie; loi e tro anganyidëti a amele nyën’ enehila maine anganyidëti a aja nyën; ke ase hë nyëne qaja ka hape, Ini la Nekö i Akötesie.”

Kola hane löthe fe la itre sooce hnene la aqane ujë cili, matre angatre fe a hane hnyima sai Iesu. Angatre a hamë waina ka megi, maine jë angatre a amë easenyine la qe i nyidrë, ngo thaa ketr kö la ukeineqë i nyidrë ka qaqacile hë. Angatre a hnyima sai nyidrë me hape: “Maine eö la joxu i angete Iuda, amele eö jë.” Kolo fe a hane hnyima sai Iesu hnene lo lue ka atrekënö hna athipe ezi nyidrë, caasi ngöne la götrane maca, nge ketre ngöne la götrane mi. Pane mekune ju së! Iesu hi lo atr ka tru ne la nöjei atr asë, nge hnei nyidrëti hna ce xupe me Iehova la itre ewekë asë, ngo nyidrëti a nue troa qanangazo nyidrë tune lai!

Kola xome hnene la itre sooce la ipelewe i Iesu, me thawa foane itre ej. Angatre a uthidrönegötiëne jë, matre troa atre la itre atrekë trenga mon. Thaa hna cane kö la ipelewe ka tru alameken. Itre sooce a ce ithahnatane me hape: “The tro kö sha kuie iej, ngo loi pe troa uthidrönegötiëne mate ate jë la atekë nyin.” Thatre kö angatre ngo kolo hi lai a eatrëne lo hna qaja hnei Tusi Hmitrötre ka hape: “Hnei angate hna thawa la ite ixeteng, me uthidrönegötiëne la ipeleweng.”

Ngo kolo ha atrehmekune hnyawa hnene la ketre atrekënö laka, nyipici, ketre joxu Iesu. Qa ngöne lai, angeice a wesitrëne la sine ce tro i angeice me hape: “Tha qou i ’ö kö e Akötesie, nge ce hnëjinë hë eö me nyidë? Nge meköti la hnëjine i nyisho, ke hna nyi thupene koi nyisho ka ijije memine la hnei nyisho hna kuca; ngo pëkö menu i nyidëti la.” Angeice a ujë koi Iesu me sipone ka hape: “Mekune ju koi ni e traqa ha cilieti kowe la baselaia i cilie.”

Iesu a sa koi angeice ka hape: “Nyipici ini a qaja koi ’ö ngöne la drai celë, Tro eö a ce me ini ngöne la paradraiso.” Troa eatre la hna thingehnaeane celë, ngöne la Iesu, Joxu ne hnengödrai, a troa amelene hmaca qa hna meci la atrekënö celë ka ietra, matre tro angeice a hane mele ngöne la Paradraiso e celë fen; celë hi Paradraiso la hna troa nyihnyawane hnene la itre thelene la isi e Amagedo, memine la itre ka troa ce tro me angatr. Mataio 27:33-44; Mareko 15:22-32; Luka 23:27, 32-43; Ioane 19:17-24.

▪ Pine nemene matre Iesu a thipëne troa iji la waina hna ithuenyiköne hnei muro?

▪ Pine nemene matre kola cinyihane la ketre xötre hnëewekë me amë hune la sinöe i Iesu, nge nemene la hna iwesitrë pin hnei Pilato memine la itre tane i angetre huj?

▪ Nemene la ketre aqane akötrë Iesu hune la sinöe, nge qa ngöne nemene matre kola akötre tune lai?

▪ Tune kaa lo aqane eatre la hna perofetane hë, göi itre iheetre i Iesu?

▪ Nemene la aqane ujë la mekune ne la ketre atrekënö, nge tune kaa la aqane tro Iesu a eatrëne la sipo i angeic?