Ini 3

Drei Lae Iesu Keriso?

Pine nemene matre kola hë Iesu ka hape, neköne “haetra” i Akötresie? (1)

Pine nemene matre hna hë nyidrë ka hape “Logo”? (1)

Pine nemene matre traqa pi Iesu e celë fen, ceitu me atr? (2-4)

Pine nemene matre kuca jë nyidrëti la itre iamamanyikeu? (5)

Nemene la hna troa kuca hnei Iesu ngöne la itre drai ka troa xulu? (6)

1. Hnei Iesu hna mele e koho hnengödrai, tune la ketre ua qëmekene la tro nyidrë a traqa e celë fen. Nyidrëti ekö la pane xupuana i Akötresie, celë hi matre kola hë nyidrëti ka hape neköne “haetra” i Akötresie. (Kolose 1:15; Hna Amamane 3:14) Iesu hmekuje la Nekö i Akötresie hnei Nyidrëti hna sipu xupe caasin. Ame pë hë lo nöjei ewekë e hnengödrai, me e celë fen, ke, hnei Iehova hna xupe itre eje jëne Iesu, ene lo “ate xup.” (Ite Edomë 8:22-31; Kolose 1:16, 17) Hnei Akötresieti fe hna acilë nyidrë, matre troa ukeineqë i Nyidrë ka sisitria. Celë hi kepine matre hna hë Iesu ka hape “Logo.”​—Ioane 1:1-3; Hna Amamane 19:13.

2. Hnei Akötresieti hna upe la Hupuna i Nyidrë kowe la fen, matre Nyidrëti a amë ju la mele i angeice ngöne la itrengene hnaho i Maria. Qa ngöne lai, thaa ketre atr kö qa la fene la keme i Iesu. Celë hi kepine matre thaa hane fe kö ketri nyidrë hnene la ngazo, ngo atr ka pexeje nyidrë. Köni kepine matre hna upi Iesu kowe la fene hnei Akötresie: (1) Troa ini së la nyipici göi Akötresie (Ioane 18:37), (2) Troa cile huti uti hë la pun, me hamëne koi së la tulu ka loi nyine troa xötrethenge (1 Peteru 2:21), me (3) troa hujëne la mele i nyidrë, matre troa thepe së qa ngöne la ngazo me mec. Pine nemene matre ketre ewekë lai ka sisitria catre koi së?​—Mataio 20:28.

3. Hnene la pane atr, Adamu hna ena lo wathebo i Akötresie, celë hi matre Tusi Hmitrötr a hëne lai ka hape “ngazo.” Qa ngöne lai, hnei Akötresieti hna ahnëjinë angeic, meci la pune koi angeic. (Genese 3:17-19) Thaa qea ju kö, nge thaa cile huti kö angeice ngöne la itre tulu i Akötresie ka draië, haawe, thaa ketre atr ka pexeje hmaca kö angeic. Ene pe, qatre trootro pi hi angeic, me mec. Ngo angeice a hamëne ju pe la ngazo kowe la nöjei xötre nekö i angeic. Celë hi matre easë a qatre trootro, me wezipo, me mec. Troa amelene hmaca tuneka la nöjei atr?​—Roma 3:23; 5:12.

4. Atr ka pexeje Iesu tui Adamu. Loi pe, thaa ceitu i nyidrëti kö me Adamu, pine laka hnei nyidrëti pala hi hna idrei, ngacama hna traqa koi nyidrë la ketre itupathi ka tru kö hune la nöjei itupath. Ngo loi pe, ijije tro nyidrëti a hujëne la mele i nyidrë ka pexej, matre nyine nyithupene lo mele hna angazone hnei Adamu. Celë hi ini lai hna qaja hnei Tusi Hmitrötre ka hape “thupene mel.” Nge tro ha thapa la itre nekö i Adamu, qa ngöne la hnëjine memine la mec. Ame asë hi la nöjei atr ka lapaune koi Iesu, ke, tro ha senge la itre ngazo i angatr, nge tro fe angatre a hetrenyi la mele ka thaa ase palua kö.​—1 Timoteo 2:5, 6; Ioane 3:16; Roma 5:18, 19.

5. Ngöne lo Iesu petre kö e celë fen, ke, hnei nyidrëti hna amelene la itre ka wezipo, me ithuane la itre ka mecijin, me lepe athaupune la itre wene. Hnei nyidrëti fe hna amelene la itre ka mec. Nemene la kepine matre nyidrëti a kuca la itre iamamanyikeu? (1) Atraqatre la utipine i nyidrë kowe la itre atr ka akötr, nge hetre aja i nyidrëti troa xatua angatr. (2) Hnene la itre iamamanyikeu i nyidrë hna anyipicine laka, nyidrëti hi la Hupuna i Akötresie. (3) Itre eje a amamane la hna troa kuca hnei nyidrë kowe la itre atr ka idrei, e cile jë nyidrëti troa Joxu, me musi hune la fene asë.​—Mataio 14:14; Mareko 2:10-12; Ioane 5:28, 29.

6. Hna meci hnei Iesu, nge hna amele nyidrëti hmaca hnei Akötresie tune la ketre ua, nge hnei nyidrëti hna bëeke hmaca hnengödrai eë. (1 Peteru 3:18) Qa ngöne lai, hnei Akötresie hna acili nyidrë troa Joxu. Easenyi catre hë tro Iesu a apaatrene la nöjei mec, me akötre qa ngöne la fene celë.​—Salamo 37:9-11; Ite Edomë 2:21, 22.

[Iatr ne la götran 7]

Ame fe la aliene la cainöje trootro i Iesu, ke, ene la troa inine la itre atr, me troa kuca la itre iamamanyikeu, me troa hujëne la mele i nyidrë thatraqai së