Hnëqa Ne La Atre Thupëne La Sirkoskripsio

Hnene pala hi la Itre Hna Cinyihane Qene Heleni hna qeje ëje i Banaba me Paulo aposetolo; kolo lue atre thup ka wange trongëne la itre pane ekalesia ekö. Pine nemene matre nyidroti a iwai trootro? Nyidroti a akötrehnine troa hetre mele ka loi thene la itre trejine Keresiano. Paulo a qaja la aja i angeice me hape: “Tro hmaca kö nyisho a wange la ite tejine . . . maine hapeu angatr.” Tha hnei angeice kö hna xouene la enanyine la itre gojeny, ngacama traqa koi itre hadredre lao kilomet nyine trongëne matre troa ithuecatre kowe la itre trejin. (Ite Huliwa 15:​36) Ka ceitune hnyawa hi lai memine la aja ka eje thene la itretre thup ka iwai trootro enehila.

Angatr a traqa koi huni troa ithuecatr. Tro la atre thupëne la sirkoskripsio a wange trongëne la truedre lao ekalesia. Nge ngöne la ijine cili, ca wiike ne tro angeic a ce huliwa me eahun; alu pala hi e nöjei macatre. Ka hetre thangane catre koi huni la atreine ka eje thene la lue atre thupe cili, memine la lue ifënekö i nyidro, maine lue ka faipoipo. Aja i angatre troa atrepengöne la itre thöthi me itre ka tru catre hë, me troa ce huliwa me eahuni ngöne la hna cainöje trootro, me ce tro me eahuni kowe la itre atr ka ini Tusi Hmitrötr me eahun. Hnene la itretre thup ka iwai trootro cili hna ce tro memine la itre qatre thup kowe la itre hnalapa ne la itre atr troa hamë ixatua, nge angatre fe a hamëne la itre cainöje ka ithuecatr ngöne la itre ijine icasikeu me ijine asabele.​—Ite Huliwa 15:35.

Angatr a nyipiewekëne asë la nöjei atr. Itretre thupëne la sirkoskripsio a xatuane la itre atrene la ekalesia troa imelekeu hnyawa me Iehova. Angatr a icasikeu memine la itre qatre thupe me itre drikona, matre troa ce wange la itre hna kuca ha ka loi hnei angatr, me hamëne la itre eamo nyine xatua angatr troa eatrëne la isa hnëqa i angatr. Angatr a xatuane la itre pionie göi troa hetre thangane ka loi ne la hnei angatr hna cainöje trootro; nge madrine catr angatre troa atre la itre ka hnyipi lö, me thele troa atrepengöne la aqane kökötre angatre ngöne la götrane la ua. Hnene la isa ala cas e angatr hna isa hamëne gufa angatre kö matre tune la “ate ce huliwa . . . koi [hun].” (2 Korinito 8:​23) Ketre tulu ka loi koi huni la lapaune me elolone la aqane imelekeu i angatre me Akötresie.​—Heberu 13:⁠7.

• Pine nemene matre kola wange trongëne la itre ekalesia hnene la itretre thupën la sirkoskripsio?

• Tro nyipunieti a kepe thangane tune kaa qa ngöne la hna iwai trootro hnei angatr?