Aqane Troa Mele Tingeting Me Itre Sinee

Ame la epon a ase ikötresae, tre ketre hnepe lapa ha epon. Maine nyipici laka tro pala hi epon a hnime me metrötrëne la keme me thine i epon, ngo ame hë la hna troa pane wang atrun, tre föe hmunë. Ewekë lai ka jole e itre xa ijin, kowe la itre sinee i epon. Ngo tro ha xatua epon hnene la Tusi Hmitrötr, matre tro pala hi epon a mele tingetinge memine la itre sinee i epon, me acatrene fe la imelekeu i epon lue trefën.

1 AQANE TROA GOEË KEME ME THIN

ÖNI TUSI HMITRÖTR: “Metötëneju la keme me thine i ’ö.” (Efeso 6:2) Tru ju hë epun, ngo tro pala hi epun a metrötrëne la keme me thine i epun. Mekune kö ka hape, ka hetre keme me thinene fe lai föi epun, nge qâ i angeice fe troa hnime la keme me thine i angeic. Pine laka “tha ate ikucanyi [zalu] kö la ihnim,” haawe the mekune kö ka hape, tro ha ajojezi epun hnene la imelekeu i föi epun me keme me thine i angeic.—1 Korinito 13:4; Galatia 5:26.

NYINE KUCA:

• The lapaa atrune kö, tune lo troa qaja ka hape “Catrë lapaa qeje ni hnene la itre sinee i ’ö;” maine pena, “Thine i ’ö pala hi a lapaa qaja angazone la itre hnenge hna kuca”

• Thele jë pe troa goeëne la itre sinee i föi epun, tune la aqane goeëne i angeic

2 QANYI EPON AMEKÖTIN

ÖNI TUSI HMITRÖTR: “Tro la trahmanyi a nue la keme i angeice me thine i angeic, me fede kowe la fö’ i angeic ; nge tro nyidoti a ca ngönetei.” (Genese 2:24) Ame la itre xa keme me thin, tre ngacama ka faipoipo hë la nekö i nyidro, ngo ame koi nyidro tre qâ i nyidro pala hi troa ameköti angeic, nge ijije tro nyidro a hane lö hnine la mele ne la nekö i nyidro.

Qâ i epon troa ce axeciëne la aqane tro la isa keme me thine i epon a hane lö hnin la itre jole i epon, nge tro fe a thuemacanyi angatr. Troa qaja mekötine la mekuna i epon, ngo tha tro pe a catrehnine la aqane qaja. (Ite Edomë 15:1) Tro la ipië, me menyik, me xomi hni ahoeany a xatua epon troa imelekeu hnyawa memine la itre sinee i epon, me isa catre “xomi hni . . . ngöne la ihnim.”—Efeso 4:2.

NYINE KUCA:

• Maine ketre e epon a öhne laka, tru pala ha la hnene la keme me thine hna lapaa lö hnin la mele i epon, ce ithanatane jë epon, ngöne la ketre ijine ka ijij

• Ce wange ju la aqane tro epon a nyinyine la ewekë cili