Foa Lao Atre Dreng Ka Troa Ee Atr

Thupene lo kola ase thele troa humuthi Iesu hnei angetre Nazareta, hnei nyidrëti hna kötr a tro Kaperenauma, ezine la Hnagejë Ne Galilaia, lo hna hëne fe, “hneopegejë ne Genesareta.” (Luka 5:1) Kolo hi lai a eatrëne lo hna perofetane hnei Isaia laka, tro la itre atr ne Galilaia ka mel ezine hnagejë, a öhne la lai atraqatr.—Isaia 9:1, 2.

Nge e Galilaia, Iesu pala hi a cainöjëne ka hape, “calemi hë la Baselaia ne hnengödrai.” (Mataio 4:17) Iöhnyi ju hi nyidrë memine la foa lao atre dreng. Hnei angatre hna ce tro me nyidrë, ngo ame lo angatr a bëeke qa Iudra, hnei angatre hmaca hna nyi ie. (Ioane 1:35-42) Ngo ijine hë tro angatr a xötrethenge Iesu o drai. Tro hë nyidrëti a ini angatr la aqane cainöj, ke huliwa i angatre lai e patre hë nyidrë.

Ame la Iesu a tro ngöne la ngönegejë, iöhnyi ju hi nyidrë me Peteru me Anederea, me itre xa sine huliwa i nyidro, angatr a nyihnyawa ifile. Iesu a tro ju koi angatr, me elë hune la he i Peteru. E cili, nyidrëti a sipo angeice ju troa nango ananyine la ngönegejë, nge nyidrëti a lapa ju me nyiqane inine la ka ala nyimu ka icilenyi. Nyidrëti a ini angatre jë la itre nyipici ka tru göne la Baselaia.

Thupene lai, öni Iesu jë hi koi Peteru: “Tro jë kowe la gaa jui, nge nue pi la itre ifile i nyipunie.” Ngo öni Peteru: “Atre Ini fe, hne huni hna huliwa ngöne la jidri ka pexej, nge pëkö ca tha hun. Ngo pine laka nyipëti a upi hun, tro huni a nue la itre ifile.”—Luka 5:4, 5.

Ame ju hi la angatr a ase nu, kola ha nyiqane tha zezene la itre ifile, ke tiqa pala ha hnei ie. Angatr a hëne jë la itre xa itre sine huliwa i angatr ngöne la ketre he, me sipo ixatua. Nge pine laka tiqa hnei ie, kola ha troa lö la lue he. Matre ame la Peteru a öhne lai, angeic a thili ju qëmeke i Iesu me hape: “Joxu, ananyi ni pi hnei nyipë, ke atre ka ngazo ni.” Matre öni Iesu jë hi: “The xou kö. Qaane enehila, tro pena ha eö a ea la itre atr.”—Luka 5:8, 10.

Öni Iesu jë hi koi Peteru me Anederea: “Xötrethenge ni jë, nge tro ni a amamai epon la aqane thele atr.” (Mataio 4:19) Ngo Iesu fe a hane hëne la lue xa ka nyi ie, ene Iakobo me Ioane, lue nekö i Zebedaio. Ame hnei angatr hna canga hmalahnin, me nuetrije la huliwa ne nyi ie, me xötrethenge Iesu o drai.