Isine Jë Matre Troa Tingetinge Me Pë Ethane La Ekalesia

E NÖJEI macatre, itre thauzane lao atr ka tro kowe la uma i Iehova, ene la hmi ka pë ethan, tune la hna perofetane hë hnei Tusi Hmitrötr. (Mika 4:1, 2) Ketre madrine ka tru koi së troa kepe angatr ngöne “la ekalesia i Akötesie”! (Ite hu. 20:28) Hetre madrine i angatr troa ce nyihlue i Iehova me easë, me ce mele me easë hnine la paradraiso ne la u. Jëne la uati hmitrötr me hna trongëne la itre eamo ne la Wesi Ula i Nyidrë, easa atreine ce mele tingetinge me pë ethan ngöne la ekalesia.—Sal. 119:105; Zaka. 4:6.

² Easa “xetëne la ate ka hnyipixe” la easa trongën la itre trepene meköti ne la Tusi Hmitrötr. (Kol. 3:10) Easa elë hune la itre hnepe ihmönyinyi së me itre aqane mekune ka isazikeu. Hnene laka, easa goeëne la itre ewekë ceitu me aqane goeën Iehova, haawe, easa atreine cile kowe la itre jëne gomegom ne la fene celë. Ketre, hetrenyi la cas the së, ene la lapa ne la itre trejin e cailo fen.—Ite hu. 10:34, 35.

³ Ame itre xa ijin, kola traqa la itre jol ka thë la tingeting memine la casi ne la ekalesia. Nemene la kepine lai? Pine laka, tha hna trongëne kö la itre eamo ne la Tusi Hmitrötr. Loi e tro palahi sa isi memine la itre aja ka ngazo ka eje the së. Pëkö ketre e easë ka pë engazon. (1 Ioane 1:10) Maine troa tria hnene la ketre trejin, tro lai a löth la ekalesia hnene la aqane ujë i angeic. Tro fe së lai a akötrë ketre hnene la itre ithanata së me aqane ujë së, nge tha hna thë kö. Maine pena, easë la hna akötrën hnene la hna qaja hnei ketre maine hna kuca pena. (Rom. 3:23) Ame e cili, nemene la nyine tro sa kuca?

⁴ Jëne la ihnimi Iehova, Nyidrëti a wangatrune la itre ewekë cili. Kola hamëne hnene la Wesi Ula i Nyidrë la itre eamo ngöne la aqane troa ujë, e traqa ju la itre jol. Itre qatre thup a hamëne la ixatua ka ijij koi së, isa ala cas. E tro sa trongëne la itre eamo i angatr hna nyitrepene hnene la Tusi Hmitrötr, tro hë së a imelekeu hmaca memine la itre trejin. Ketre, tro së lai a amadrinë Iehova. E tro sa kapa la ihaji ke, hetre ngazo hne së hna kuca, loi e xecie koi së laka, hatrene ihnimi Iehova hi lai koi së la kola ameköti së.—Ite edomë 3:11, 12; Heb. 12:6.

AQANE TROA SEIJOLENE LA ITRE HNEPE IHMÖNYINYI

⁵ Tha tro kö sa sesëkötre la kola traqa la itre hnepe ihmönyinyi maine itre jole ka co thene la itre atrene la ekalesia. Loi e troa canga nyinyin itre ej cememine la hni ka ihnim. (Efe. 4:26; Fil. 2:2-4; Kol. 3:12-14) Tro kö nyipunieti a isa öhne laka, ame la itre jole ka traqa koi nyipunie memine la ketre trejin, troa nyinyine lai, e hna trongëne la eamo hna hamëne hnei Peteru, kola hape, “tro nyipunie a ihnimikeu cat ; ke tro ha he la ite ngazo ka nyimute hnene la ihnim.” (1 Pet. 4:8) Öni Tusi Hmitrötr: “Menu hë shë asë ngöne la ite ewekë ka nyimute”. (Iako. 3:2) Maine tro sa trongëne la Wathebo Ka Sisitria, ene la troa kuca koi itre xan la hne së hna ajane troa kuca koi së, tro së lai a nue la tria ne la trejin me thëthëhmine lai.—Mat. 6:14, 15; Mat. 7:12.

⁶ Maine epuni a öhne laka, hna akötrën la ketre trejin hnene la itre ithanata i epun, maine aqane ujë i epun, loi e troa canga sipu thele troa iloi. Ka hetre ethane lai kowe la aqane imelekeu i epun me Iehova. Hetre eamo hnei Iesu hna hamën kowe la itretre drei nyidrë, kola hape: “Qa ngöne lai maine eö a tro fë pi la ahnahna i ’ö kowe la ita ne huj, nge eö lai a hnine la tejine me eö a hete aköte göi ’ö; amëju pë hë e cili fene la ita ne huje la ahnahna i ’ö, nge trojë eö a pane iloi me tejine me eö, ame hna tropi troa hujëne la ahnahna i ’ö.” (Mat. 5:23, 24) Maine hna trotrohnine menune la itre trenge ithanata me aqane ujë i epun, haawe, nue gojenyine pi la iloi. E tro sa imelekeu hnyawa memine la itre trejin asë ne la ekalesia, tha tro kö së lai a trotrohnine menune la itre ithanata me itre aqane ujë i angatr. Ketre, canga tro hi së lai a thele nyin la itre jol ka fetra qa ngöne laka, itre atr ka ngazo së.

HAMËNE JË LA ITRE EAMO KA IJIJ NE LA TUSI HMITRÖTR

⁷ Ame itre xa ijin, itre qatre thup a hamë eamo kowe la ketre trejin matre troa wenë amekötine la aqane mekuna i angeic. Tha ewekë ka hmaloi kö lai. Öni Paulo aposetolo kowe la itre keresiano ne Galatia, ka hape: “Ange tejine fe, maine hna xome cilë kete ate hnene la menu, qâ i nyipunie ite ate ne u, troa kapa hmaca la ate ka tune lai ngöne la hni ka menyik.”—Gal. 6:1.

⁸ Maine tro la itre qatre thup a thupëne hnyawa la hnënge mamoe, tha tro kö lai a hetre ethanyin kowe la aqane imelekeu ne la itre trejin me Iehova. Ketre, tha tro kö lai a traqa la itre jol ka tru. Itre qatre thup a isine matre tro angatr a eatrën la hna thingehnaeane göi angatr hnei Iehova jëne Isaia, kola hape: “Tro la ate a tune la nyine zaene la eny, me hnapo ene la wene, tune la ite di ngöne la ga qaqacile, tune la ga xapo ne la giti atraqate ngöne la nöje ka kucakuca.”—Is. 32:2.

ATIHATRENE JU LA ITRE KA QALI THIINA

⁹ Hnei Paulo hna hmekën la itre trejin laka, hetre itre xan ka troa ajojezi angatr ngöne la ekalesia. Öni Paulo: “Eëhuni a ahnithe koi nyipunie ange tejin . . . Iananyipi nyipunie memine la ite tejin asëjëihë ka qali thina ka tha xöte thenge la hna inine lo hnei angate hna kapa qa the hun.” Hnei nyidrëti hna qeje pengöne la aliene la itre trengewekë celë, me hape: “Nge maine kete ate a tha denge thenge kö la tenge ewekë huni ngöne la tusi celë, ati hatene ju la ate cili, nge the ce me angeice kö, mate hmahmapi angeic. Ngo the meku angeice kö kösë ithupëjia, ngo hajineju kösë kete tejin.”—2 Thes. 3:6, 14, 15.

¹⁰ Ngacama pëkö ngazo ka tru hna kuca hnene la ketre trejin, ngo ame pe, angeic a methinën la itre trepene meköti Iehova nyine ameköti së, ijije troa upetröneë angeic pine lai. Kola qaja la trejin ka geny, maine ka ixöjetrij, maine ka dro. Angeic a “lö hnine menun la ifekë huliwan.” (2 Thes. 3:11, MN) Maine pena, kola qaja la atr ka thele troa hetre mo jëne itre xan, maine ka kuca la itre nyine iamadrinë ka ngazo. Tro la aqane ujë cili a adrone la ekalesia. Ketre, tro fe lai a löthe la itre xa trejin.

¹¹ Tro la itre qatre thup a pane xatuan la atr qali thiina, ene la troa hamë angeic la itre eamo ne la Tusi Hmitrötr. Ngo, e methinëne palahi angeic la itre trepene meköti Iehova hna amexeje lapan koi angeic, loi e tro la itre qatre thup a mekune troa cile fë la ketre cainöj nyine hmekën la ekalesia. Matre, loi e tro angatr a atreine waiewekë, me waipengöne lai jol ka traqa. E ketre jole ka tru palaha, tro angatr e cili a cile fë la cainöj nyine hmekën la ekalesia. Tro la ka cile fë cainöj a hamën la itre eamo ka ijij, nge ka ihmeku memine la thiina ka qali, ngo tha tro pe a qaja la ëjene lai atr. Matre, ame la itre ka atre la pengöne lai jol hna amexej ngöne la cainöj, loi e tro angatr a tuluthe la aqane tro angatr a ce mel memine lai atr cili. Ngo eje hi laka, angatre palahi a iöhny me angeic ngöne la itre ijine huliwa i Akötresie, kola ‘hajin kösë kete tejin.’

¹² Easa ajane matre tro la aqane ujë ne la itre atrene la ekalesia a ahmahmane lai ka qali thiina, me upi angeic troa ujë. E mama ha laka, ase hë angeic nue la thiina i angeic, haawe, tha nyipiewekë hë troa xome ceitu angeic me ketre hna atihatren.

AQANE TROA UNIJOLEN LA NGAZO HNA KUCA KOI SË

¹³ E hne së hna elë hune me nue la ngazo hna kuca koi së, tha kolo kö lai a hape, easa thinge la lue meke së, maine kapa pena la ngazo hna kuca. Thatreine kö tro sa upe la nöjei ngazo hna kuca hnene laka, itre atr ka ngazo së. Ketre, tha loi kö troa thinge la lue meke së kowe la ngazo ka tru hna kuca. (Lev. 19:17; Sal. 141:5) Thenge la Trenge Wathebo i Mose, hetre itre ngazo ka tru kö hune la itre xa ngazo, tune mina fe thene la itre keresiano.—1 Ioane 5:16, 17.

¹⁴ Hnei Iesu hna amamane la aqane troa nyinyin la itre jole ka tru ka traqa thene la lue keresiano. Hanawang la nyine troa kuca, kola hape: “Maine tejine me eö a ngazo koi ’ö, [1] troja ithanatane acone me angeice nyipoti hmekuje hi; maine angeic’ a dei ’ö, ame hna lue tejine hmaca nyipo. Ngo maine tha denge kö angeic, [2] nyi xöle eö ju fe la ka ala casi maine ala lue, mate acatene la nöjei ewekë asë hna ce qaja hnei ala kön. Nge maine tro angeic’ a [iönin] me angat, [3] qaja jë kowe la ekalesia nge maine tro angeic’ a [iönin] memine la ekalesia fe, ame hna tui angeice koi ’ö la etheni me telona.”—Mat. 18:15-17.

¹⁵ Thupene lai, hnei Iesu hna hamëne la ketre ceitun hna cinyihane ngöne la Mataio 18:23-35. Kola mama laka, ame la ketre pengöne ngazo hna qaja ngöne Mataio 18:15-17; tre, jole göi manie, maine göi itre mo. Maine jë, tha hna të kö la ketre gufa, maine hna qene atrekënö pena. Ame la ketre ngazo hna qaja e cili, tre kola sili trengathoine la ketre trejin, nge kola adrone la pengöi angeic.

¹⁶ Maine mama hnyawa ha laka, hetre ngazo ka tune lai hna kuca koi eö hnene la ketre trejin, the saqe kö wange la itre qatre thup troa nyixölë eö. Öni Iesu lo, pane tro jë ithanata kowe lai atr ka ngazo koi eö. Thele jë troa nyinyine la jol, eö hmekuj memine lai atr. Nge the ithanatane kö koi ketre wanga hane jë löhnine menun. Tha hnei Iesu kö hna qaja ka hape, ‘Aca tro jë hi troa ithanata me angeic.’ Matre, e tha qaja amamane kö angeic la ngazo i angeic, maine qeje menu pena, loi e troa wai angeice hmaca e ketre ijin. Maine tro sa nyinyine la jol tune lai, tro angeice lai a madrine laka, tha hnei eö kö hna qajaqaja koi ketre la ngazo i angeic, me adrone la pengöi angeic ngöne la ekalesia. “Ame hna lue tejine hmaca [epon]” e cili.

¹⁷ Maine hna qaja amamane hnene la ka iakötrë la ngazo i angeic, me qeje menu, me isine troa amamane ka hape, menu hë angeic, haawe, hna hmaca hi e cili la jol ke, iloi hë epon. Ngacama ka tru ju hë la ngazo hna kuca, ngo ame pe, troa nyinyine lai hnene hmekuje hi lo lue atr hna ketr hnene la jol.

¹⁸ Ngo e tha iloi kö epon la epon a ithanata, epon hmekuj, loi e troa kuca lo hnei Iesu hna qaja. Öni nyidrë: “Nyi xöle eö ju fe la ka ala casi maine ala lue.” Nge, tro hmaca jë ithanata memine lai trejin. Loi e troa ce ngöne mekun hnei eö memine la atr ka ce tro me eö, ene la troa iloi memine la trejin. Loi e ketre atr angeic ka atrepengöne la ngazo hna kuca, ngo e pëkö ka atre, loi e tro eö a iëne la ketre maine luetre matre troa anyipicine la hna ithanata. Maine jë, hetre hnei nyidroti hna atreine kuca ngöne la itre jol ka tune lai, matre ijiji nyidroti hi troa anyipicine laka, hetre ngazo hna kuca. Maine lue qatre thup la lue hna iëne troa lue atre anyipicin, tha nyidroti kö e cili a nyitrengewekëne la ekalesia ke, tha hnei lapa ne la itre qatre thupe kö hna upi nyidro troa amekötine lai jol.

¹⁹ Eje hi laka, anyimua ithanata ha eö memine lai trejin (lo epon hmekuj, nge e thupene lai, ce eö hë memine la ala cas maine ala lu troa ithanata me angeic) nge, tha iloi pi kö epon. Nge ame koi eö, thatreine kö eö troa nue la ngazo i angeic, haawe, tro fë jë la jol kowe la itre qatre thup ne la ekalesia. The thëthëhmine kö laka, ame la aja i angatr tre, ene la troa tingetinge me pë ethane palahi la ekalesia. E ase hë thuemacane la itre qatre thup, haawe, ase hë eö lai kuca asë la hnei eö hna atrein. Nue pi pë hë tro angatr a amekötin, nge lapaune ju koi Iehova troa nyinyine lai jol. The nue kö tro la aqane ujë ne la ketre trejine a athixötrë epun, maine troa thapa la madrine i epuni troa nyihlue i Iehova.—Sal. 119:165.

²⁰ Itre qatre thup a thele troa atre la ewekë ka traqa. Maine mama ha koi angatr laka, hna kuca la ngazo hnene lai trejin koi eö, nge tha ietra kö angeic, nge pëkö hnei angeic hna kuca göi troa iloi, loi e tro la komite ne la itre qatre thup a upetröneë la atr ka ngazo qa ngöne la ekalesia. Angatre hi lai a thupëne matre tro palahi a pë ethan la ekalesia, memine la hnënge mamoe.—Mat. 18:17.

AQANE TROA AMEKÖTINE LA ATRE KUCA LA NGAZO KA SIS

²¹ Ame la itre xa ngazo ka tru hna kuca hnene la keresiano tune la kuci ngazo, me nyixetë, me ce meköle hnei lue trahmanyi maine lue föe, maine troa qaja angazo Akötresieti pena, maine troa hmi thoi, me kuci idrola, me itre xa ngazo ju kö ka tru catr tre, tha ijije kö koi angeic tro hi a qeje menu. (1 Kor. 6:9, 10; Gal. 5:19-21) Pine laka, tro lai a hetre ethane kowe la ekalesia, loi e troa qajaqaja la itre ngazo cili kowe la itre qatre thup matre tro angatr a ce wange la nyine troa kuca. (1 Kor. 5:6; Iako. 5:14, 15) Tro la trejin a easenyine la itre qatre thup matre troa qaja la ngazo i angeic. Maine pena, tro angeic a qajaqaja la hnei angeic hna atre göne la ngazo hna kuca hnei ketre. (Lev. 5:1; Iako. 5:16) Ngacama hetre ithuemacanyi hna kapa hnene la itre qatre thup göne la ngazo hna kuca hnene la trejin, ngo loi e tro la lue qatre thup a pane ketre sipu thel la ewekë ka traqa. Maine mama hnyawa ha ka hape, ka nyipici la hna qaja, nge hetre nyine anyipicin laka, hetre ngazo ka sis hna kuca, haawe, tro la lapa ne la itre qatre thup a acile la komite ne iameköti, nge ala kön la ka troa nyiatrene lai.

²² Itre qatre thup a thupën hnyawa la hnënge mamoe qa ngöne la nöjei ewekë ka troa angazone la aqane imelekeu i angatr me Iehova. Ketre, angatr a catr huliwane hnyawane la Wesi Ula Akötresie, matre troa amekötine la atre kei kowe la ngazo. Nge tro fe a xatua angeic troa imelekeu hmaca me Iehova. (Iuda 21-23) Ka ihmeku hi lai memine la itre hna amekötin hnei Paulo koi Timoteo, kola hape: “Ini a ahnith xönexönëne koi ‘ö xajawa i Akötesie, me Keriso Iesu, ate tro ha amekötine ange ka mele me ange ka mec, . . . Amekötinejë, ihajine jë, eamone jë memine la xomihni ahoeanyi, me ini.” (2 Tim. 4:1, 2) Tru pi hë la ijine troa eatrëne lai, ngo ketre igötranene lai ka tha hmaloi kö ne la huliwa ne la itre qatre thup. Tru la madrine ne la ekalesia la trengecatr hnei angatr hna kuca me wangatrunyi angatr.—1 Tim. 5:17.

²³ Ame la pane nyine troa thel hnene la itre qatre thup ngöne la nöjei jol ka traqa, nge hna anyipicin tre, ene la troa xatuane lai atr ka kei kowe la ngazo matre troa imelekeu hmaca me Iehova. E ka ietra hnyawa angeic, nge ijije tro angatr a xatua angeic, tro la ihaji hnei angatr hna hamën, ngöne la gaa co maine qëmekene la itretre anyipicin ngöne la ijine iameköti, a ameköti angeic. Nge ketre, tro fe a aciane la xou thene la itretre anyipicin. (2 Sam. 12:13; 1 Tim. 5:20) Ame ngöne la nöjei iameköti, hetre itre huliwa nyine tha tro kö a kuca hnene la atr hna hajin. Celë hi ka troa aijiji angeic troa ‘amekötine la itre gojenyi’ angeic. (Heb. 12:13) E mama ha laka, lolo trootro hë la aqane imelekeu i angeic me Iehova, haawe, tro ha nue angeic hmaca troa kuca lo itre huliwa cili.

TROA THUEMACANE LAKA HETRE ATR HNA HAJIN

²⁴ E xecie hë kowe la komite ne iameköti ka hape, ka ietra hnyawa ha la atr, ngo hlemu hë lai hna kuca ngöne la ekalesia, me e kuhu trön, nge loi e troa hmekëne la ekalesia göi angeic, haawe, troa ithuemacanyi ngöne la ijine icasikeu Mel Me Huliwa Ne Cainöj Ne La Keresiano. Troa qaja ka hape: “Hna ameköti [ëjene lai atr].” Tro la kordinatör ne la lapa ne la itre qatre thup a pane kapa lai.

EUE LA TROA UPETRÖNEË LA ATR?

²⁵ Ame itre xa ijin, kola kuca catrëne la ngazo hnene la atr, nge tha kapa kö la ixatua. Nge, ame ngöne la ijine iameköti tha nyipi mama kö la “ite thina ka cei tune memine la ietra.” (Ite hu. 26:20) Tune kaa ju hë e cili? Ame e cili, loi e troa upetröneëne qa ngöne la ekalesia la atre kuca la ngazo, ngo tha ka ietra kö. Tha angeice hë lai a sine la nöje i Iehova ka pë ethan. Patre hë qa ngöne la ekalesia la ka iajojezi matre ka pë ethan palahi ej, me hlemu loi. (Deu. 21:20, 21; 22:23, 24) Ame hë la Paulo a atre la thiina ka sis hna kuca hnene la ketre trejin ne Korinito, hnei angeic hna upe la itre qatre thup troa ‘nue lai atr koi Satana’ matre tro palahi a pë ethan la ekalesia. (1 Kor. 5:5, 11-13) Hetre itre atre fe hna upetröneëne hnei Paulo hna qaja, itre ka icilekeu memine la nyipici ngöne la hneijine i angeic.—1 Tim. 1:20.

²⁶ Maine mama hnyawa ha kowe la komite ne iameköti laka, tha ietra palaha lai atr, haawe, loi e tro angatr a qaja koi angeic la hnei angatr hna axeciën, ene la troa upetröneë angeic, me amamane la kepine lai qa hnine la Tusi Hmitrötr. Tro fe angatr a thuemacanyi angeic ka hape, maine ame koi angeic, tria kö la aqane ameköti angeic hnei angatr, nge angeic a ajane tro angatr a wange hmaca la hna axeciën, haawe, loi e tro angeic a cinyiany, me qaja la kepine lai. Qaane la ijin kola thuemacanyi angeic la hna axeciëne hnene la komite, hna nue koi angeic la 7 lao drai thatraqane lai. Maine hetre tus hna kapa nyine wange hmaca la hna axeciën, tro la lapa ne la itre qatre thup a hëne la atre thupëne la sirkoskripsio. Nge, tro angeic a iëne la itre qatre thup ka maca troa nyiatrene la ketre komite ka troa amekötine hmaca lo lai jol. Tro angatr a isine troa ce ithanatane ngöne la wiik ne kapa lai tus. Maine troa wange hmaca lai jol, loi e troa uthe la drai hna sa göi troa thuemacane la ekalesia göi troa upetröneë. Ame ngöne la ijine cili, hna amekötine kowe la atre hna hajin ka hape, tha tro kö angeic a qeje mekun, me thith ngöne la ijine icasikeu, me xome la itre xa hnëqa.

²⁷ Ketre hatrene ihnim kowe la hna hajin la troa wange hmaca lai jol matre aijijë angeic troa qaja la mekuna i angeic. Matre, e patre kö angeic ngöne la ijine hna sa matre troa ce ithanatane hmaca, nge anyimua thele angeice hë, haawe, tro ha thuemacane la ekalesia ka hape, ase hë upetröneë angeic.

²⁸ E tha ajane kö la atr hna hajine troa wange hmaca la hna axeciën, tro hë la komite ne iameköti a amamane koi angeic la enyipiewekëne troa ietra, memine la itre nyine kuca matre tro hmaca kepe angeic ngöne la ijine ka ijij. Ka hetre eloine me hatren ne ihnim la troa ujë tune lai, me mejiune laka, tro angeic elanyi a ujë. Nge, ame hë e ketre ijin, tro hë angeic a bëeke hmaca kowe la organizasio i Iehova.—2 Kor. 2:6, 7.

TROA THUEMACANYINE LA KOLA UPETRÖNEË LA ATR

²⁹ E troa upetröneëne la atr hna hajin ka tha ietra qa ngöne la ekalesia, troa hetre hnepe ithuemacany hna hamën kowe la ekalesia, kola hape: “Tha Atre Anyipici Iehova ha [Ëjene la atr].” Tha tro kö a qejepengöne lai. Tro lai a hmekëne la itre trejin ne la ekalesia matre tha tro hmaca kö angatr a ce mel memine la atre cili. (1 Kor. 5:11) Tro la kordinatör ne la lapa ne la itre qatre thup a pane kapa lai.

KA SIPU TROTRIJ LA EKALESIA

³⁰ Ame la kola hape, “ka sipu trotrij la ekalesia,” kola qaja la hna axeciëne hnene la ketre atr hna bapataisone hë. Angeic a sipu nuetrij la itre trepene meköti Akötresie, me qaja ka hape, tha ajane hë angeic troa Atre Anyipici Iehova. Maine pena, angeic a sine la ketre organizasio ne fen ka isazikeu memine la hna inine hnene la Tusi Hmitrötr, matre angeic a treqene la iameköti Iehova Akötresie. Angeic e cili a nuetrij la göhne i angeic e hnine la ekalesia hnene la itre huliwa i angeic.—Is. 2:4; Hna ama. 19:17-21.

³¹ Öni Ioane göne la itre ka nuetrij la lapaune i angatr ngöne la hneijine i angeic ka hape: “Hnei angate hna tropi qa the shë, ngo tha ite sine shë kö angat ; ke maine ite sine shë kö angat, maine ase hë angate cile huti the shë.”—1 Ioane 2:19.

³² Qëmeke i Iehova, tha ceitune kö la atr ka sipu trotrij la ekalesia memine la keresiano ka nanazij laka, tha ka cainöje trootro hmaca kö. Kola nanazije la atr ke, tha inine lapane hë angeic la Wesi Ula i Akötresie. Maine pena, hetre itre jol ka traqa koi angeic, maine icilekeu pena, matre patre hë lo trenge aja i angeic ekö troa nyihlue i Iehova. Tro la itre qatre thup, me itre xa trejin ne la ekalesia a hamëne palahi la ixatua ka ijij kowe la keresiano ka nanazij.—Rom. 15:1; 1 Thes. 5:14; Heb. 12:12.

³³ Maine ase hë axeciëne hnene la keresiano troa sipu trotrij la ekalesia, troa hetre hnepe ithuemacany hna hamën kowe la ekalesia, kola hape: “Tha Atre Anyipici Iehova ha [Ëjene la atr].” Tro sa ujë koi angeic ceitu memine la aqane ujë së kowe la atr hna upetröneë. Tro la kordinatör ne la lapa ne la itre qatre thup a pane kapa lai.

KOLA KAPA HMACA

³⁴ E mama hnyawa ha la itre hatrene ietra thene la atr hna upetröneë, maine ka sipu trotrij la ekalesia, nge hetre hnepe ijin angeic a amamane ka hape, ase hë angeic nuetrij la aqane mele i angeic ekö, haawe, tro hë lai a kepe angeic hmaca ngöne la ekalesia. Troa mama laka, hetre aja i angeic troa imelekeu hmaca me Iehova. Itre qatre thup a nue la itre hnepe ijin (nyimu treu, ca macatre, maine panacas pala kö, thenge kö la mele i angeic) kowe la hna upetröneë matre tro angeic a amamane la nyipi ietra i angeic. Ame la kola kapa hnene la lapa ne la itre qatre thup la tus ne sipo göi troa kepe angeice hmaca, loi e tro la komite ne iameköti hnapan a ithanata me angeic. Tro la komite cili a waipengöne hnyawa la itre nyine anyipicin thei angeic, ene la “ite thina ka cei tune memine la ietra.” Nge, tro ha axeciën e cili ka hape, tro ha kapa hmaca maine tha tro kö a kapa ngöne la ijine cili.—Ite hu. 26:20.

³⁵ Maine tro la atr hna upetröneë a sipone kowe la ketre ekalesia troa kepe angeice hmaca, tro la komite ne iameköti e cili a itronyi me angeic matre troa ce ithanatane la sipo i angeic. Thupene lai, tro la komite ne iameköti a thuemacane la lapa ne la itre qatre thup ne la ekalesia ka upetröneë angeic la mekuna i angatr ka hape, ijije hmaca ha troa kepe angeic. Tro la lue komite cili a ce huliwa matre troa xecie koi angatr ka hape, hetrenyi asë hi la itre mekune nyine anyipicin matre traqa pi kowe la hna axeciëne ka meköt. Ngo, qa ne la komite ne iameköti hnapane troa axeciëne troa kapa hmaca la atr. Maine patre hë lo itre xa atrene la komite hnapan, maine tha itre qatre thupe hë angatr, haawe, tro pë hë a upe la itre xa qatre thup ngöne la ekalesia hnapan troa nyihna i angatr.

TROA ITHUEMACANYINE LA KOLA KAPA HMACA LA ATR

³⁶ E xecie hnyawa ha kowe la komite ne iameköti laka, ka nyipi ietra la atr hna upetröneë, nge loi e troa kepe angeice hmaca, haawe, hetre ithuemacanyi hna hamëne kowe la ekalesia ka upetröneë angeic laka, kola kepe angeice hmaca. Maine ka sine angeic la itre icasikeu ngöne la ketre ekalesia, tro fe a qaja la ithuemacanyi e cili. Troa qaja ka hape: “Atre Anyipici Iehova hmaca ha [Ëjene la atr].” Tro la kordinatör ne la lapa ne la itre qatre thup a pane kapa lai.

NEKÖNATR HNA BAPATAISON A KUCA LA NGAZO KA SIS

³⁷ Loi e troa qajaqaja kowe la itre qatre thup la ngazo ka sis hna kuca hnene la nekönatr hna bapataisone hë. E kola waipengöne hnene la itre qatre thup la itre ngazo ka tune lai memine la nekönatr, loi e troa hane sine hnene la keme me thin. Tro nyidroti a ce huliwa memine la komite ne iameköti, ngo tha tro kö nyidro a sawa la nekönatr troa kapa la ihaji. Tune la aqane kuca kowe la itre ka tru ka kei kowe la ngazo, tro la komite ne iameköti a thel troa hajin me xatuane lai nekönatr troa ujë. Ngo, e tha ietra kö, troa axeciëne troa upetröneë nyën.

ATRE CAINÖJE THA HNA BAPATAISONE PETRE KÖ A KUCA LA NGAZO KA SIS

³⁸ Tune kaa e traqa ju kuca la ngazo ka sis hnene la atre cainöje tha hna bapataisone petre kö? Pine laka, tha hna bapataison angeic kö, tha ijije kö troa upetröneë angeic. Maine jë, tha trotrohnine hnyawa kö angeic la itre trepene meköt ne la Tusi Hmitrötr, haawe, tro la itre eamo hnei angeic hna kapa a aijiji angeic troa ‘amekötine la itre gojenyi’ angeic.—Heb. 12:13.

³⁹ Maine ase hë la lue qatre thup ithanata memine la atre cainöje tha hna bapataisone petre kö, me thel troa xatua angeic, ngo tha ietra kö, haawe, nyipiewekë troa thuemacane la ekalesia. Hetre ithuemacanyi hna hamëne kowe la ekalesia, kola hape: “Tha atre cainöje hmaca kö [Ëjene la atr].” Tro hë la ekalesia e cili a goeëne lai atre cili ceitu me atre ne fen. Ngacama tha hna upetröneë angeice kö, itre keresiano a thupëne hnyawa matre, tha tro kö a ce mel me angeic. (1 Kor. 15:33) Ketre, pëkö rapor ne hna cainöj hna troa kapa qaathei angeic.

⁴⁰ Ame hë e thupen, e ajane hmaca ha angeic troa xome hmaca la huliwa ne cainöj (ka tru maine nekönatr), tro la lue qatre thup a ce ithanata me angeic, me waipengöne hnyawa la mele i angeic. Maine angeic a melëne la itre hna amekötine thatraqane la atre cainöj, hetre hnepe ithuemacanyi hna hamëne kowe la ekalesia, kola hape: “Atre cainöje hmaca ha [Ëjene la atr].”

IEHOVA A AMANATHITHINE LA HMI KA TINGETING ME KA PË ETHAN

⁴¹ Itre atrene asë la ekalesia i Iehova a mele madrine hnine la paradraiso ne u hna hamën hnei Nyidrë. Hna aceitunëne la paradraiso cili memine la hnënge haö ka cia hlöeë. Nge kola neni la tim ka menyik, ene la itre trenge nyipici ne la Tusi Hmitrötr. Hetre hna hnëkëne fe hnei Iehova jëne la organizasio i Nyidrë hna musinëne hnei Iesu, matre tro palahi a acatrene la lapaune së. (Sal. 23; Is. 32:1, 2) Pine laka, easa mel hnine la paradraiso ne u, haawe, easa lapa tingeting ngöne la itre drai tixenuë celë ka gomegom.

⁴² E tro sa thel matre tro palahi a tingetinge me pë ethane la ekalesia, easë palahi lai a ahudrumene la lai ka eje the së, ene la itre nyipici göne la Baselaia. (Mat. 5:16; Iako. 3:18) Hnene laka, easa amadrinë Iehova, tro pala kö sa madrine elanyi la kola thel hnene la itre atr ka alanyimu troa atre Iehova, me ce nyihlue i Nyidrë me easë.