Iehova a e “La Itre Pene He i Nyipunie.”
“Tha mala kö la kete (sisi) hune la hnadro e tha musi kö la Tetetro i nyipunie. Ngo asesë hë e la ite pene he i nyipunie.”—MATAIO 10:29, 30.
“ENI a xëwe koi cilie, ngo tha shama nieti kö hnei cilie; ini a cil (thith) nge cilieti pe a hnaea (thaa dei) nieti hi. Cilieti pena a ujë me axösisi ni; cilieti a weji ni fë la themie (ime) i cilie ka catr.” Hace la atre ithanata tune lai, nge thaa sesëkötre kö së! Paatre hë la itre mo ne mele angeic, hetre ketre pengöne hulö ka thapa la melene la itre neköi angeic, nge kolo fe ha xuji angeice hnene la ketre meci ka sis. Iobu la ëje ne la trahmanyi cili, nge ame la akötre ka axösisi angeic tre hna cinyihane ngöne Tusi Hmitrötr thatraqai së.—Iobu 30:20, 21, Bible en français courant.
2 Ame la itre aqane ithanata i Iobu, tre, kösë pi lo ase hë angeice nuetriji Iehova, ngo thaa eje kö. Iobu pe a ithanata cememine la hni angeic ka akötr. (Iobu 6:2, 3) Thatre kö angeic laka Satana la atrekë zöne la itre itupath, matre upe zöne menu Akötresieti pena ha me hape, Nyidrëti la ka nuetriji angeic. Iobu a xëwe koi Iehova me hape: “Ngöne nemene laka cilieti a juetrëne la xajawa i cilie, me mekune laka ithupëjia ha ni me cilie?”a—Iobu 13:24.
3 Ame enehila, nyimutre la itre hlue i Iehova ka thue pala hi la itre hnënge pengöne akötr qa ngöne itre isi, me politik, maine itre aqane holehole ne la nöj, me itre sa me wene me itre xa ka tun, me qatre trootro, me itre pengöne mec, me pë ewekë, me cainöj ne la maca ka loi hna wathebone hnei mus, me itre xaa kepine ju kö. Ketre tui epuni fe, hmezi hë epuni hnene la itre akötre ka isa pengön. Ene pe epuni a mekun e itre xaa ijin, ka hape, ma Iehova a juetrëne koi ni la iqëmeke i Nyidrë. Atre hnyawa hi nyipuneti lo hna qaja hnei Ioane 3:16: “Ke hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas.” Ketre, maine epuni a thue la akötr nge pëkö ixatua ka mama, ma tro epuni a hape: ‘Ma nyipi hnimi ni jë kö hnei Akötresie? Hane jë kö Nyidrëti wanga atrehmekune la ewekë ka traqa koi ni? Xomexatua ni fe kö hnei Nyidrë?’
4 Pane ce wange ju së la ka traqa koi Paulo aposetolo. Hnei angeic hna cinyihane ka hape: “Hna hamë ni la kete ka ithinyine ngöne la ngönetei, ene la maca i Satana troa kulupi ni.” Nge öni angeice mina fe ka hape: “Nge a köni a xëwe ni koi joxu fë la ewekë cili, mate pat’eje theng.” Ngacama drenge hi Iehova la xëwe i angeic, ngo Nyidrëti a amamai Paulo laka thaa jëne itre iamamanyikeu kö la troa xatua angeic. Loi pe, tro Paulo a mejiune kowe la mene i Akötresie matre xatua angeice thue la “ka ithinyine ngöne la ngönetei.”b (2 Korinito 12:7-9) Tui Paulo maine jë nango qea la jole hnei epuni hna cile kow. Maine jë epuni hë a nyiqaane luelue, me hape, ‘Ma ame jë laka pëkö ixatua i Iehova ngöne la akötreng, tre, ma thaa Nyidrëti kö a hane hnehengazo ni, nge maine jë thaa semesine ni pena kö hnei Nyidrë?’ Ohea! Iehova a wanga atrune la itre hlue i Nyidrë, angatr isa alacaas, nge hna amamane lai hnei Iesu kowe la itre aposetolo, tha qea kö thupene lo hna ië angatr. Pane ce wange ju së la aqane tro la itre trenge ewekë i nyidrë a xatua së pena ngöne la hneijine së.
“The qou kö”—Pine nemen?
5 Hna kapa hnei itre aposetolo la men atraqatr qaathei Iesu, cememine fe lo “musi hune lo nöjei ua ka ngazo, mate helë nyuden, nge troa aloine la ite meci asë me ite ka kucakuca asë.” Ngo eje hi laka, thaa hape kö tro ha paatre ngöne la mele i angatr la itre itupathi me iangazo. Ohea, Iesu pe a fe amamane hnyawa la nöjei ewekë ka troa traqa koi angatr. Ngo hnei nyidrëti pe hna ithuecatr, me hape: “The qou kö e angete humuthe la ngönetei ngo tha ’teine kö troa humuthe la u fe; loi e troa qoue anganyidë ate ateine troa ahnëjinëne la ngönetei memine la u e gena.”—Mataio 10:1, 16-22, 28.
6 Lue ceitun hna hamëne hnei Iesu kowe la itre aposetolo göi tro angatr a trotrohnine la kepine matre thaa tro kö angatr a xou. Öni nyidrë koi angatr: “Hapeu, tha hna itöne kö la lue sisi thupene la asari? Nge tha mala kö la kete hune la hnadro e tha musi kö la Tetetro i nyipunie. Ngo ase hë e la ite pene he i nyipunie. Celë hi mate the qou kö, ke nyipunie e koho hune la nöjei sisi ka kösau.” (Mataio 10:29-31) Wangatrehmekune ju së laka, Iesu a acaasine e celë la tha qouene la iangazo memine la mejiune së koi Iehova, laka Nyidrëti a thupë së isa ala caas. Nyipici, hetrenyi fe thei Paulo aposetolo la lapaune cili. Angeic a cinyihane ka hape: “Maine xöle së Akötesie, dei la sa së? Nge nyidëti ate tha cipane kö la Hupuna i nyidë, ngo hna nue nyidëti thatraqai së asë, hapeu, tha tro kö nyidëti a ce hamëne gufane me nyidë la nöjei ewekë asë koi shë?” (Roma 8:31, 32) Kösau ju hë la nöjei itupath hna troa cile kow, loi e xecie hnyawa fe koi nyipunie, laka, Iehova a thupë nyipunie isa ala caas, e hnei nyipunieti hna lapa qale nyipici pala hi koi Nyidrë. Loi e tro sa ce wange la itre eamo i Iesu kowe la itre aposetolo i nyidrë, matre mama hnyawa pi koi së la pengöne cili.
Thupene La Caa Sisi
7 Ame la lue ceitune i Iesu, tre, kola qeje pengöne la aqane wanga atrunyi së hnei Iehova, easë isa ala caas, itre hlue i Nyidrë. Pane ce wange jë së lo pengöne la itre sisi. Ngöne lo hneijine i Iesu, hna majemin troa öni la itre sisi, ngo kola methin̈ene itr’ej pine laka itre ka angazoi hlapa. Mana pi hë matre co catre la thupene itr’ej, matre kola itöne itr’ej a tha faifi ju kö lao faraig enehila. E lue faraig, tre, tha foa kö ngo faif lao sisi; ame pë hë lai hnaafaifine waco, tre, hna nyi hneane pë hë, tune pi lo pëkö ca thupen’ej!—Luka 12:6.
8 Pane mekune ju fe së la aqane co wen ne la waco ka mana cili. E troa aceitunën’ej memine la itre xaa waco, ame la sisi, tre, ngacama qatrë hë ngo etrune eje hë lai. Ketre, ame la hnepehnëewekë qene heleni ka ujëne la “sisi” ngöne Mataio10:29, tre, kola qaja hmekuje hi lo itre pengöne sisi ka co. Mama hi e celë la aja i Iesu, ene la tro la itre aposetolo a mekun la ketre neköi waco ka pëkö ca pengön. Tune la hna qaja hnene la ketre itus, “Tha Iesu hmekuje kö a qaja la ecoconia ne la neköi waco, ngo memine fe la aqane xom’ahmaloeëne la mele ne ej ngöne la ijine cili!”
9 Ame la ceitune i Iesu göne la itre sisi, tre, kola amaman la ketre ewekë ka tru alien: ame la ka pëkö ca thupene kowe la itre atr, tre, ka tru alamekene pe ej qëmeke i Iehova Akötresie. Nge Iesu fe a amamane hnyawan la nyipici cili ngöne la nyidrë a hape, thaa Iehova kö a sixane la nekö i sisi ngöne la ej a “mala . . . e kuhu hnadro” nge tha atre kö Nyidrë.c Mama hi la ini celë koi së: maine Iehova Akötresie a nyipi ewekëne la neköi waco ka coconia me ka pëkö pengön, drei jë kö la etrune aqane nyipi ewekëne Nyidrëti la itre aqane akötre ne la itre atr ka iëne troa nyi hlue i Nyidrë!
10 Thupene jë hi la ceitun göne lo itre sisi, öni Iesu: “Ngo asesë hë e la ite pene he i nyipunie.” (Mataio 10:30) Xoxopatre hi la hna ithanata celë, ngo jui catre pe la mekun, nge ej’a akökötren la ini ngöne la ceitune i Iesu göne la itre sisi. Pane ce wange ju së: Kola mekune ka hape, 100 000 lao pene he ne la atr. Ka ceitune asë hi itre ej, nge kösë thaa hna wanga atrune pe kö la ketre hui ketre. Ngo ame pe, tre, hna atrehmekune me isa e asë la nöjei pene he hnei Iehova Akötresie. Maine eje hi lai, hapeu, tro pe kö a hetrenyi la ketre götrane ne la mele së ka troa sihngödre koi Nyidrë? Nyipici, trotrohnine hnyawa hi Iehova la isa pengöne mele së isa alacaas, itre hlue i Nyidrë. Eje hi, Nyidëti “a wange la hni.”—1 Samuela 16:7.
11 Thaa trehnyiwa kö Davita ene la itre itupath, celë hi matre mejiune angeic laka, Iehova a xajawati angeic. Hnei angeic hna cinyihane ka hape: “Iehova fe, hnei cilieti hna thelethele ni me ate hmekunyi ni. Cilieti a atrehmekun la e lapa ni, nge e cile ni; cilieti a trotrohnine la mekunenge e ga nanyi.” (Salamo 139:1, 2) Epuni fe, loi e troa eje mina fe la mejiune cili thei epun, laka, Iehova a atrehmekunyi nyipunie isa ala caas. (Ieremia 17:10) The mekune kö ka hape wanamamike pala ha epun koi Iehova. Mama asë hi koi Nyidrë!
“Nengenenge Ju La Itre Tenge Timidrange Kowe La Ge i Cilie”
12 Atrehmekunyi së hi isa alacaas hnei Iehova, easë itre hlue i Nyidë, nge Nyidrëti mina fe a wang’atrune la itre akötr hne së hna thu. Ame la ceitun, tre ene lo kola thahluë angetre Isaraela, matre Iehova a qaja koi Mose ka hape: “Öhnë hë ni la aqan’angazone la nöjeng e Aigupito, nge dengë hë ni la latesi angate hnene la tixene huliwa ke ate kö ni la aköte i angat.” (Esodo 3:7) Keukawa pi hë e tro sa mekun laka, maine easë a akötr fene la iangazo, thaa sihngödri kö nge drenge hi Iehova la itre xëwe së! Nyidrëti a semesinene la itre akötre së.
13 Ame la aqane thupëne i Iehova la angetre ajan troa fedre koi Nyidrë, tre easa öhne fe ngöne la aqane hniine Nyidrëti ekö la nöje Isaraela. Ngacama ame la itre akötre i angatr, tre, sipu thangane kö la aqane ujë ka menu i angatr, kola cinyihane hnei Isaia göi Iehova ka hape: “Tha ithupëjia nyidrë me angate ngöne la ite aköte i angat.” (Isaia 63:9) Ketre tui nyipunie itre hlue i Iehova, loi e troa xecie hnyawa koi nyipunieti laka, e nyipunieti a akötr, akötre fe Iehova! Hapeu, thaa celë kö la ka troa upi së troa cile kowe la nöjei itupath, me catre kuca la hne së hna atrein ngöne la easë a nyi hlue i Nyidrë?—1 Peteru 5:6, 7.
14 Ame la ka amamane koi Davita joxu laka, Iehova a wanga atrunyi nyidrë me ce akötre me nyidrë, tre easa öhne hnyawa ngöne Salamo 56. Hna sile eje hnei Davita ngöne lo ijine kötre nyidrë, ke kola pi humuthi nyidrë hnei Saulo joxu. Davita a pane kötre pi Gatha eë, ngo hna wangatrehmekunyi nyidrë e cili hnei angetre Filisiti, matre kola xou e xöleuthi nyidrëti ju hnei angatr. Öni nyidrë: “Nganga pala hi koi ni o drai la ite ithupëjiang; kösaue la angete ishi me ini.” Pine laka thaa nyidrëti kö ngöne la ga tregöl, Davita a ujë koi Iehova. Öni nyidrë: “O drai pala hi angat’a ujëne la tenge ewekëng”; nyine angazo ni la ite mekune i angat’asë.”—Salamo 56:2, 5.
15 Pane mekune hnyawa ju së la itre trengewekë ngöne la xötre 8, kola hape: “Ase hë cilieti e la ite hnenge hna tro menu; nenge ju la ite tenge timidange kowe la ge i cilie; hape u, tha it’eje kö ngöne la tusi cilie?” Ketri së pi hë hnene la aqane qeje pengöne la utipine i Iehova koi së! Maine easë a hnehengazo me hace hni, ijije tro sa xëwe latresi koi Iehova. Ketre hna tune hnei Iesu, ngacama ka pexeje nyidrë. (Heberu 5:7) Mama ha nge xecie hnyawa fe koi Davita laka, Iehova a goeë angeic nge tro Nyidrëti a mekune hmaca la itre akötre i angeic, matre tune kola thiane la ge matre nyi alien’ej hnene la itre trenge timidra maine sija pena itr’eje hnine la itus.d Tro nyipunie a mekune ka hape, nga ma tro ha tiqa la ge maine itre dröne pepa ne la tusi cili. Nge maine eje hi, madrine jë nyipunie. Tusi hmitrötr a akeukawanyi së ka hape: “Eashenyi Iehova koi angete thë fë hni; nge kola amele angete aköte (ua).”—Salamo 34:18.
Hane Jë Së Ce Tro Me Akötresie
16 Ame la kola hape Iehova a e ‘la itre pene he së’, tre, kola amamai së la aqane nyipi ewekë së me nyidrawa së hnene la Akötresieti hna aijijë së troa thili kow. Ngacama tro pala kö së a treqene la fene hnengödrai ka hnyipixe matre troa paatr la itre mec me itre akötre së, ngo Iehova a kuca la ketre ewekë nyine hain kowe la nöje i Nyidrë ka meköti enehila. Öni Davita e cinyihan: “Eje kö la ithanatacone me Iehova thei angetre xoue nyidë; nge tro nyidëti a amamai angate la isisinyikeu i nyidë.”—Salamo 25:14.
17 “Ithanatacone me Iehova.” Drei la ketre aqane wai ewekë hna thaa troa trotrohnine hne së itre atr ka ngazo! Ngo kola mama hnyawa laka, Iehova a könëne la itre ka xoue Nyidrë matre tro angatr a hane hunuma hnine la uma ne heta i Nyidrë. (Salamo 15:1-5) Nge nemene la aqane tro Iehova a kuca kowe la itre hnei Nyidrëti hna könën? Thenge Davita, Iehova a nyi jëne matre tro angatr’a atre la isisinyikeu i Nyidrë. Hetre mejiune i Iehova koi angatr, ene pe Nyidrëti a amamane la “hanengë i nyidë” kowe la itre perofeta i Nyidrë, matre atre angatr la aja i Nyidrë me aqane tro angatr’a mele thenge itr’ej.—Amosa 3:7.
18 Eje hi, keukawa pi hë e tro sa atre laka ijije fe tro së itre atr ka ngazo a hane isilixelë memine la Kasisitia, Iehova Akötresie. E tro sa mekune hnyawan, celë hnyawa hi la aja i Nyidrë. Öni Tusi Hmitrötr ka hape, “Eashenyi jë koi Akötesie, nge tro nyidëti a eashenyi koi nyipunie”. (Iakobo 4:8) Aja i Iehova tro sa acatren la aqane imelekeu së me Nyidrë. Mama ha jëne laka ase hë Nyidrëti hnëkën matre troa ijije la imelekeu cili. Hna nyi jëne lai hnene la mele hna hujën hnei Iesu, matre ijije tro së a hane enehmu ne la Akötresie Kasisitia. Öni Tusi Hmitrötr: “Easha aja nyidë ke pai nyidëti hnimi shë.”—1 Ioane 4:19.
19 Kolo hmaca kö a acatrene catrën la itre aqane imelekeu së me Iehova, ngöne la easë a xomihnineahoean la nöjei akötr ka isapengön. Hna cihnyihane hnei Iakobo, ketre atre dreng ka hape: “Loi e huliwa apexejene la xomi hni, mate pexeje me meköti nyipunie, nge pëkö ewekë ka pat.” (Iakobo 1:4) Nemene la “huliwa” hna aeatrën e tro sa xomihnine la itre itupath? Mekune ju së lo “ka ithinyine la ngönetei” i Paulo. Nemene la thangane la hna xomihni hnei Paulo? Öni Paulo e qaja göne la angeic a cile kowe la itre jol: “Qa ngöne lai madin’ataqate ni troa selëne ngöne la ite kucakucang, matre hnene hung la mene i Keriso. Celë hi mate madine jë ni la nöjei kucakuca, me ite hna angazon, me ite hna pë ewekë, me ite hna axösisin, me hnehengazo pi Keriso; ke e kucakuca ni, celë hi ijine cate ni.” (2 Korinito 12:9, 10) Kola atrehmekune hnei Paulo laka, Iehova a hamën la trengecatr ka ijij matre troa atreine troa xomihni; ame itre xaa ijin kola hamën la “la etrune la men, ngo tha qa the huni kö”. Celë hi ixatua lai ka aeashenyi angeice catr koi Iesu me koi Iehova Akötresie.—2 Korinito 4:7; Filipi 4:11-13.
20 Maine jë Iehova a nue aqeane la itre akötre i epun. Nge e hape eje hi, hniine ju nyipunieti la hna thinge hnaeane celë kowe la itre ka hetre xoue Nyidrë: “Tha tro jë kö ni a nue eö, nge tha tro jë kö ni a tiji ö.” (Heberu 13:5) Ijije fe tro nyipunie a kapa la ixatua cili memine la nyine aupun. Ase hë Iehovah e “la ite pene he i nyipunie.” Öhne hi Nyidrëti la xomi akötre i nyipunie. Drenge hi Nyidrëti la akötre thei nyipunie. Nyidrëti a nyipine catrë nyipunie. Nge thaa tro jë kö Nyidrëti a “thëthëhmine la huliwa i nyipunie memine la ihnimi hnei nyipunieti hna amanane kowe la atesiwa i Nyidë.”—Heberu 6:10.
Nyine Amekune hmaca?
• Nemene la itre kepin ka upe la atr troa mekun ka hape ase hë nuetriji angeic hnei Akötresie?
• Nemene ini tro sa kapa qa ngöne la ceitune i Iesu göne lo itre sisi, memine lo itre pene he?
• Kola hapeu la kola trengene la itre trenge timidra i ketr’atr hnine la “ge” i Iehova maine hnine “itusi” Nyidrë?
• tro sa hane kapa madrine tune kaa la “isilixelë me Iehova”?
[Thying]
1, 2. (a) Pineu matre mekune jë Iobu laka ase hë nuetriji angeic hnei Akötresie? (b) Ame la aqane ithanata i Iobu tre itr’eje kö a amaman laka angeic a nuetriji Iehova? Qeje pengöne jë.
a Ame la itre aqane ithanata ka tun, tre qaathene fe la itre xaa atr ka meköt, Davita me itre neköi Kora.—Salamo 10:1; 44:24.
3. E traqa ju lepi së hnene la itre akötr, nemene la ka pane mama ngöne la mekune së?
4. Nemene pengöne hace ka hut hna thue hnei Paulo, nge nemene thangane eje elanyi the së e hane ju ketri së?
b Tha qaja amamane kö Tusi Hmitöt la pengöne “ka ithinyine ngöne la ngönetrei” Paulo. Ma hetre meci angeic ngöne la ngönetrei, tune maine hajihaji la lue mek. Ketre ame la hnepe hnëewekë” ka ithinyine ngöne la ngönetrei” tre, ma kolo jë a qeje ange aposetolo ka thoi me itre xa ka icilekeu me Paulo ngöne huliwa ne aposetolo me cainöje i angeic.—2 Korinito 11:6, 13-15; Galatia 4:15; 6:11.
5, 6. (a) Tune kaa la aqane xatuane Iesu la itre aposetolo matre thaa tro kö a xoue ne la itre itupathi ka calemi? (b) Hnei Paulo hna amamane tune kaa la mejiune i angeic laka tro Iehova a thupë angeic?
7, 8. (a) Nemene la aqane wai pengöne ekö la itre sisi lo ijine i Iesu? (b) Pine nemen matre, ngöne Mataio 10:29 kola amë la qene Heleni göne la ecoconia ne la itre “sisi”?
9. Nemene la mekune ka tru hna thele troa amamane hnyawa hnei Iesu jëne la ceitun ne lo itre sisi?
c Hnei itre xaa ka ini hna qaja ka hape ame la kola mala la waco e kuhu hnadro, tre, thaa kolo hmekuje kö a qaja la ej a mec. Angatr a qaja ka hape ame la hnëewekë ne la qene hlapa hnapan, tre, ma kolo pe a qaja lo kola të la waco hune la hnadro troa xen. Nyine tro hi lai a amamane hape Akötresieti a wanga atrehmekune me thupën la waco ngöne la nöjei jën’ eje o drai, tha ngöne caasi kö la ej’a mec.—Mataio 6:26.
10. Nemene la aliene la hna qaja: “Asesë hë e la ite pene he i nyipunie”?
11. Hna qaja amamane tune kaa hnei Davita la mejiune i angeic laka Iehova a hnii angeic?
12. Easa atre tune ka laka wanga atrehmekune hnyawa hi Iehova la itre akötre hna thë fë hnene la itre hlue i Nyidrë?
13. Nemene la ka amamane laka Iehova a nyipi utipin la itre hlue i Nyidrë?
14. Nemene itre pengöne ekö matre sile jë la Salamo 56?
15. (a) Kola hapeu hnei Davita la angeic a sipo Iehova troa trengen la itre trenge timidra hnine la ge maine hnine itusi pena? (b) Maine easa cile kowe la ketre jol ka troa apujene la lapaune së, nemene la ka troa xecie hnyawa koi së?
d Ngöne la itre drai hnapan, ame la itre inege, tre, hna kuca hnei kupeine öni hna jön, maine kupein ne mamoe, me gout maine kau. Hna nyi aliene itr’eje hnei melek, me batra, me foromage, maine timi pena. Ame itre xaa kupein, tre, hna hnëkën mekötine kö matre nyine trengene oel me waina.
16, 17. (a) Tro sa atre tune kaa laka Iehova a semesinene la itre jol hna cile kow hnene la nöje i Nyidrë? (b) Nemene la hna kuca hnei Iehova matre aijijëne la itre atr troa madrin ngöne la ithanatacon me Nyidrë?
18. Tro sa atre tune kaa laka, aja i Iehova hi la tro sa hane sinee i Nyidrë?
19. Nemen aqane tro la xomihni a acatrene la aqane imelekeu së me Iehova?
20. Tro sa atre tune kaa laka tro Iehova a xatua së me aupunyi së, e qëmekene la iakötrë?