Hna Hnaho Angatr Nyine Nöje Hna Iëne i Akötresie
“Hnei Iehova Akötesi ‘ö hna ië eö mate nöje atu ka co i Nyidrë.”—DEUTERONOMI 7:6.
1, 2. Nemene la huliwa ka tru hnei Iehova hna kuca thatraqane la nöje i Nyidrë, nge nemene la hna isisinyikeu kow hnei angetre Isaraela me Akötresie?
Ame lo macatre 1513 M.P.K., hnei Iehova hna isisinyikeu memine la itre hlue i Nyidrë e celë fen matre hna ahnyipixene la aqane imelekeu i angatr me Nyidrë. Ame la macatre cili, hnei Nyidrëti hna thaipiën la ketre nöje ka tru ka musinëne ngöne la ijine cili la fene hnengödrai, me thepe angetre Isaraela qa hnine la ithahluë. Pine laka Nyidrëti la ka thepe angatr, Nyidrëti hë la Ate Iamele nge ewekë i Nyidrëti angatr. Qëmekene troa nue amacai angatr, Akötresieti a qaja koi Mose ka hape: “Qa ngöne lai qaja jë eö kowe la nöjei nekö i Isaraela, ka hape, Iehova ni, nge tro ni a tro sai nyipunie qa hnine la ite huliwa ka hace i angete Aigupito, nge tro ni a thepe nyipunie qa ngöne la huliwa i angat, nge tro ni a amele nyipunie hnene la ime hna xejë memine la thupen’atraqat; nge tro ni a xomi nyipunie nyine nöjeng, nge tro ni a Akötesi nyipunie.’ ”—Esodo 6:6, 7, ithuemacanyi; 15:1-7, 11.
2 Thaa hmitre ju kö thupene lo hna tro sai angatr qaa Aigupito, nge angetre Isaraela a lö jë kowe la ketre isisinyikeu me Iehova Akötresi angatr. Thaa Iehova hmaca kö a troa ce huliwa me itre atr, maine itre fami maine itre lapa pena, ngo nöje pe hnei Nyidrëti hna eköth thatraqai Nyidrë e celë fen. (Esodo 19:5, 6; 24:7) Nyidrëti a hamë angatre pi la trenge wathebo matre amekötine trongën la aqane mele i angatre o drai, nge ame la ewekë ka sisitria catr tre, ene la aqane troa hmi koi Nyidrë. Öni Mose koi angatr: “Ke eka la kete nöje ka tru ka hete Akötesie ate eashenyi angat, tui Iehova Akötesi shë ngöne la nöje i ewekë asë hne shë hna xëwe fë koi Nyidë? Nge eka la nöje ka tru ka hete wathebo, me ite hna amekötin ka meköt, tune la nöje i wathebo asë celë lo hnenge hna amë qëmeke i nyipunie ngöne la drai celë?”—Deuteronomi 4:7, 8.
Hna Mala angatre hnine la Nöje ne la itretre anyipicin
3, 4. Nemene la sipu kepine matre hetrenyi jë la nöje i angetre Isaraela?
3 Itre hadredre lao macatre thupen, Iehova hmaca a amekunëne jë la itretre Isaraela jëne Isaia perofeta, la sipu kepine matre hetrenyi jë la nöje i angatr. Öni Isaia: “Nge enehila dei la hna ulatine hnei Iehova, ate xupi ’ö, Iakobo, nge ate kuci ’ö, Isaraela, ka hape: The xou kö, ke ase hë ni itö eö, hnenge hna hëne la ëje i ’ö, ke atengë hë eö. Ke ini Iehova Akötesi ’ö Kahmitöte i Isaraela, at’ amele eö ; . . . Tro fë pi la ite nekönge trahmanyi qa ga nanyi ; me ite nekönge jajinyi qa ngöne la ite cane la fene hnengödrai, angat’ asëjëihë lo hna atë hui angate la ëjeng ; lo hnenge hna xupe nyine atrunyi ni, lo hnenge hna lo me kuca. Nyipunie la itete anyipici ni, öni Iehova, nge hluenge lo hnenge hna iën, . . . Hnenge hna xupe la nöje ce thatraqai ni, tro angat a amamane la lolong.’ ”—Isaia 43:1, 3, 6, 7, 10, 21.
4 Pine laka hna ati ëje i angatr hnene la atresiwa i Iehova, haawe, tro la itretre Isaraela a anyipicin la Musi Nyidrë qëmekene la nöjei nöj. Tro angatr a ketre nöj hna ‘xupe nyine atrunyi Iehova.’ Hnëqa i angatre troa ‘qaja amamane la lolo i Iehova’ memine la itre huliwa nyine hain, ene la aqane thepe angatr qaathene la itre ithupëjia me angatr, me troa atrun la ëje ka hmitrötre i Nyidrë. Tro ha qeje angatr ka hape nöje ka anyipici Iehova.
5. Kola hapeu la hna hape Isaraela la ketre nöj hna saenën?
5 Ngöne la hnaalevinene hadredr lao macatre M.P.K, hnei joxu Solomona hna amamane laka hnei Iehova hna xome ketrepengönëne la nöje Isaraela qa ngöne la itre xaa nöj. Ngöne la thithi nyidrëti koi Iehova, öni nyidrë: “Ke hnei enëtilai, Joxu Iehova hna ië angate nyine zi enëtilai qa ngöne la nöjei nöje asëjëihë.” (1 Ite Joxu 8:53) Ketre, lolo catre la aqane imelekeu ne la itretre Isaraela, angatr isa alacaas me Iehova. Ngöne la qaan, hnei Mose hna hape koi angatr: “Nyipunie la ite neköi Iehova Akötesi nyipunie . . . . Ke nöje ka hmitöt’eö koi Iehova Akötesi eö.” (Deuteronomi 14:1, 2) Matre ame la itre neköne la itretre Isaraela, tre, thaa nyipi ewekë kö tro hmaca angatr a saenëne la mele i angatre koi Iehova. Hna hnaho angatr matre itre atrene hë angatr la Nöje hna iëne i Akötresie. (Salamo 79:13; 95:7) Ame la itre xötre atr thupen, tre, hna ini angatre la itre wathebo i Iehova nge nyipi ewekë catr tro angatr a thupëne itre ej, pine lo isisinyikeu ka othi angatre koi Iehova.—Deuteronomi 11:18, 19.
Isa qanyi angatre kö isa iën
6. Nemene la hnene la Itretre Isaraela hna troa iën, angatr isa alacaas?
6 Ngacama hna hnahone la itretre Isaraela hnine la nöje hna iën, isa qanyi angatre kö troa ketre sipu mekun troa nyi hlue i Akötresie. Qëmekene tro angatr a lö kowe la Nöje Hna Thingehnaean, hnei Mose hna qaja koi angatr ka hape: “Ini a hëne la hnengödrai memine la fene ngöne la drai celë troa anyipicine göi nyipunie, laka ase hë ni amë qëmeke i ’ö la mele me mec, nge manathithi me hnëjin, ngöne hi lai iëne jë la mele mate mele eö memine la itre matra i ’ö ;mate tro eö a hni Iehova Akötesi ’ö, me denge thenge la aqane ula i nyidë, me fede koi nyidë, ke nyidëti la mele i ’ö, nge ate amamane la ite drai ’ö, mate tro eö a lapane la nöje hnei Iehova hna sisinyi kowe la ite xötapane i ’ö, ene Aberahama me Isaaka, me Iakobo, troa hamë angat.” (Deuteronomi 30:19, 20) Haawe, isa qanyine kö la itretre Isaraela, angatr isa alacaas, troa iën troa hnimi Iehova, troa drenge la hna qaja hnei Nyidrë, me troa fedre koi Nyidrë. Pine laka sipu hnei angatre kö hna ië ewekë, haawe, ketre sipu tro kö angatr a kepe thangane la aqane axecië mekune i angatr.—Deuteronomi 30:16-18.
7. Nemene la ewekë ka traqa thupene la hna meci hnene lo xötre i Iosua?
7 Kola mama hnyawa lo hneijine i Itretre Amekötin la eloin la itre thangan e troa mele nyipici maine engazone la troa mele iaö pena. Qëmekene troa xejë la hneijine cili, hnene la itretre Isaraela hna xötre thenge la tulu ka loi i Iosua nge hna amanathithi angatr. “Nge hna nyi hlue i Iehova hnene la nöjei ate ngöne la nöjei drai Iosua asëjëïhë, me nöjei drai asëjëihë ne la ite qate itetengekeu me Iosua, angete hane öhne la nöjei huliwa asëjëihë ka tru i Iehova, lo hnei nyidëti hna kuca thatraqai angete Isaraela.” Ngazo pe, itre macatre thupene la meci Iosua, “xulu hë la ketre xöte ka tha’te Iehova kö memine la ite huliwa hnei nyidëti hna kuca thatraqai angetre Isaraela. Nge hna kuca la ngazo xajawai Iehova hnene la ite neköi Isaraela.” (Angete Amekötin 2:7, 10, 11) Mama ha laka, hna xanadron hnene la xötr atr ka hnyipixe la edrö i angatr, ene la troa itre atrene la nöj hna saenën, nöje lo hna kuca kow’ ekö hnei Iehova Akötresie la itre iamamanyikeu nyine hain.—Salamo 78:3-7, 10, 11.
Angatr a mele thenge la hnei angatr hna sa xepu
8, 9. (a) Nemene la hna amekötin matre aijijëne la itretre Isaraela troa amamane la sa xepu i angatre koi Iehova? (b) Troa kuci nemene hnene la itre ka hamëne gufane la itre ahnahna e ajane angatr troa kepe thangane ka loi?
8 Nyimutre la itre ewekë hnei Iehova hna hnëkën thatraqane la lapa i angetre isaraela; itre jëne tro angatr a amamane ka hape angatr la nöje ka sa xepu koi Iehova. Drei la ketre ceitun: hnei Nyidrëti hna amekötine jëne la Trenge Wathebo la itre pengöne aqane troa huuj, maine itre ahnahna nyine hamën koi Nyidrë; ame la itre xaa huuj, tre hna athip nyine troa kuca, nge ame itre xan, tre qa kuhu hni. (Heberu 8:3) Ame la itre huuj cili tune la huuj ne dreuth, itre huuj ne xen hna hamëne qa kuhu hni matre ahnahna koi Iehova, tre, itre nyine amadri Nyidrë nge kola amamane fe la hni ne ole i angatr.—Levitiko 7:11-13.
9 Kola amadri Iehova hnene la itre huuj cili hna hamëne gufan. Hna qaja göne la itre huuj ne dreuth me huuj ne xen laka itre huuj “ka pui loi koi Iehova.” (Levitiko 1:9; 2:2) Ame ngöne la huuj ne ole tre, thatraqai Iehova la madra memine fe la giris ne la öni; nge ame la itre xaa sine ijön tre, hna öni pë hë hnene la itretre huuj memine la atre hamëne lai öni. Nge ame la ce xeni cili, tre hatrene hi la imelekeu ka tingetinge i angatre me Iehova. Hna qaja hnene la Trenge Wathebo ka hape: “Nge maine tro nyipunie a hujëne la huje ne ole koi Iehova, qai nyipunie troa hujën’ej mate troa kapa aloinyi nyipunie.” (Levitiko 19:5) Ngacama hna hnahone asë hi la Itretre Isaraela hnine la nöje ka sa xepu koi Iehova, ngo ame pe koi itre ka amamane jëne la itre ewekë hnei angatr hna huujën laka angatre fe a nyihlue i Iehova hnene la hni ka pexej, tre, hna ‘kepe angatr’ nge ‘atraqatr la manathithi hna kapa’—Malaki 3:10.
10. Tune kaa la aqan amamane i Iehova la wesitre i Nyidrë ngöne lo itre hneijine i Isaia me Malaki?
10 Ngazo pe, mama ha laka thaa hna nyipici kö koi Iehova hnei Isaraela, lo nöje ka sa xepu koi Nyidrë. Jëne la perofeta i Nyidrë, Isaia, Iehova a qaja koi angatr, ka hape: “Tha hnei ‘ö hna tro fë koi ni la ite mamoe i ‘ö nyine huje ne deuth, nge tha hnei ‘ö hna atrunyi ni hnene la ite huje i ‘ö ; tha hnenge hna ahacenyi ‘ö hnei ite huj, me asixelë eö hnei sinöe ka pui loi.” (Isaia 43:23) Ketre, ka gufa xajawai Iehova la itre huuj hna hamën, ngo thaa hnene kö la hni ka ajan me ihnim. Drei la ketre ceitun: köni hadredre lao macatre thupe i Isaia, ngöne la hneiijine i perofeta Malaki, hna hujëne hnei angetre Isaraela la itre öni ka thaa pexeje kö. Matre Malaki a qaja koi angatre ka hape: “ ‘Tha madi nyipunieti kö ni, öni Iehova ne sabaoth ; nge tha tro kö ni a kapa la huje i nyipunie.’ . . . ‘Nge hnei nyipunie hna tro fë la hna hej, me ka peje ca, me hna tithe hnei mec ; celë hi huje hnei nyipunie hna tro fë. Hapeu, tro ni a kapa lai qa thei nyipunie?’ öni Iehova.”—Malaki 1:10, 13; Amosa 5:22.
Iehova a nue trije la Nöje hna iën
11. Nemene la hna aijijëne ekö koi Isaraela?
11 Ame lo ijine kola xötrei sa xepu hnene la nöje Isaraela koi Iehova, hnei Nyidrëti hna thingehnaeane koi angatr ka hape: “Nge enehila, maine tro nyipunie a nyipi denge thenge la aqane ewekëng, me trongën la isisinyikeung, tro nyipunie a atu ka conge hune la nöje i nöje asë, ke ewekënge la fene hnengödai asë. Nge tro nyipunie a baselaia angete huj, me nöje ka hmitöte thatraqai ni.” (Esodo 19:5, 6) Tro ha cile nyipi angatre la Mesia hna thinge hnaean, nge tro nyidrë a pane aijijë angatre troa hane sine la musi ngöne la Baselaia i Akötresie. (Genese 22:17, 18; 49:10; 2 Samuela 7:12, 16; Luka 1:31-33; Roma 9:4, 5) Ngo thaa hna nyipici kö hnene la ka ala nyimu ne la angetre Isaraela kowe la sa xepu i angatr. (Mataio 22:14) Hnei angatre pe hna xelene la Mesia me humuthi nyidrë.—Itre Huliwa 7:51-53.
12. Kola amamane tune kaa jëne hnene la itre trenge ewekë i Iesu laka ase hë nue triji Isaraela lo nöje hna sa xepune koi Iehova?
12 Itre drai qëmekene tro Iesu a mec, hnei nyidrë hna qaja kowe la itre keme ne hmi angetre Iudra ka hape: “Tha hna e kö hnei nyipunieti la hna cinyihan, ka hape, ‘Ame la etë hna tije hnei angete xupi uma, te, ase hë kuca nyine sinete xomixöt; hna kuca lai hnei joxu, nge eësha goeëne me hain’? Qa ngöne lai, ini a qaja koi nyipunie, ka hape, tro ha xome qa thei nyipunie la baselaia i Akötesie, me hamën kowe la nöje ate wa wen’ ej.” (Mataio 21:42, 43) Hnei nyidrëti hna hamën la ketre ceitun nyine amamane laka, hnei Iehova hna thipetrije lo nöje ka sa xepu koi Nyidrë; öni Iesu: “Ierusalema, Ierusalema fe, ate humuthe la nöje i perofeta, me tranyi angate hna upe koi’ö, anyimua ajane hnenge troa icasinekeune la ite nekö i ’ö, tune la thine ne ha gutu kola hajuhajume la ite kuku fene la lue iape i nyiën, te, xele kö nyipunie! Hanawang, ase hë nue tije la uma i nyipunie nge pë hë alien.”—Mataio 23:37, 38.
Nöje hna saenën ka hnyipixe
13. Nemene la hna perofetane hnei Iehova ngöne la hneijine i Ieremia?
13 Ngöne la hneijine i Ieremia perofeta, hnei Iehova hna ahnithe la ketre ewekë ka hnyipixe göne la nöje i Nyidrë. Easa e ka hape: “ ‘Hanawang, troa traqa la ite drai, nge tro ni a kuca la isisinyikeu ka hnyipixe memine la lapa i Isaraela me lapa i Iuda, tha tune la isisinyikeu lo hnenge hna kuca me ite xötapane i angat, ngöne lo drai hnenge hna xom la ime i angate troa e angate qa ngöne la nöje Aigupito ; ngo hnei angate hna axeciëne la isinyikeung ; ame hneng hna thipe tiji angat, öni Iehova; Ngo dei la isisinyikeu tro ni a kuca memine la lapa i Isaraela, thupene la ite drai cili, öni Iehova, tro ni a amë la wathebong’e kuhu hni angat, me cinyihan’eje ngöne la hni angat, nge tro ni a Akötesi angat, nge tro angat’a nöjeng.’ ”—Ieremia 31:31-33.
14. Eu nge nemene la trepen matre hetrenyi pi la nöje hna sa xepune i Iehova? Qeje pengöne jë la nöje ka hnyipixe cili.
14 Ame la trepene la isisinyikeu ka hnyipixe cili, tre, hna eköthe lo macatre 33 M.K., lo kola meci hnei Iesu nge thupene lai, nyidrëti a tro fë kowe la Tretretro i nyidrë la thupene mel, ka nyipi ewekë ne la madra hna neng. (Luka 22:20; Heberu 9:15, 24-26) Ngo eje hi, laka, hna nyiqaane eköth la isisinyikeu ka hnyipixe la kola nenge la Uati Hmitrötr lo macatre 33 M.K. ne Penetekos, nge hna nyiqaane hi e cili la nöje ka hnyipixe, ene la “Isaraela i Akötesie.” (Galatia 6:16; Roma 2:28, 29; 9:6; 11:25, 26) Hna cinyihane hnei aposetolo Peteru kowe la itre keresiano hna iën ka hape: “Ngo xöte hna iëne nyipunie, me xötete huje joxu, me nöje ka hmitöt, me xöte hna itön ; mate amamane pi hnei nyipunie la nöjei thina ka loi nyidë ate hë nyipunie qa ngöne la jidi kowe la lai nyidë nyine hain; lo ka tha nöje kö ekö, ngo nöje i Akötesie enehila.” (1 Peteru 2:9, 10) Ase hë umuthe lo aqane imelekeu ka ketre pengöne i Iehova memine lo Isaraela ngöne la ngönetrei. Ketre tune mina fe lo itre manathithi koi angeic, laka, hna nue pena ha kowe la Isaraela ngöne la ua, la ekalesia ne la itre keresiano, ene ‘la nöje ka wa wen ne’ la Baselaia ne la Mesia ke ase hë thipetrije lo Isaraela ngöne la ngönetrei.—Mataio 21:43.
Sa xepu ne la isa ala caas
15. Ngöne lo drai ne Penetekos 33 M.K., nemene la bapataiso hnei Peteru hna upe la itre ka drei angeic troa xom?
15 Thupene la Penetekos 33 M.K., tro la atre Iudra maine atre ethen a isa sa xepu koi Akötresie me xomi bapataiso “kowe la atesiwa i Tetetro, me Hupuna, me Uati Hmitöt.”a (Mataio 28:19) Ame ngöne la ijine Penetekos, hna qaja hnei Peteru kowe la angetre Iudra me itre ka ce hmi me angatr, ka hape: “Ietraju, mate isa bapataiso nyipunieti pi asë ngöne la atesiwa i Keriso, mate shenge tije pi la nöje i ngazo i nyipunie, nge tro nyipunie a hetenyi la ahnahna ene la Uati Hmitöt.” (Ite Huliwa 2:38) Hnëqa ne la itretre Iudra cili me itre sine hmi angatr troa amaman jëne la bapataiso, laka, thaa angatre hmekuje kö a nue la mele i angatr koi Iehova ngo angatre fe a kepe Iesu, pine laka jëne nyidrë, tro Iehova a köle trije la itre ngazo i angatr. Nyipi ewekë tro angatr a wang atrehmekunyi nyidrë kösë Atre huuje ka sisitria i Iehova nge Maseta i angatr, nge nyidrëti la he ne la ekalesia ne la itre keresiano.—Kolosse 1:13, 14, 18.
16. Ame ngöne la hneijine i Paulo, hna hane sine tune kaa la Isaraela ngöne la ua hnene la itre atr ka hetre hni ka ajan, ene la itretre Iudra me itre ethen?
16 Kola qaja hnei Paulo, itre macatre thupen, ka hape: “Ngo hnenge hna pane amamane koi angat’e Damaseko me Ierusalema memine la nöj’asë e Iuda, me angete etheni fe, mate tro angat’a ietra me ujë koi Akötesie me kuca la ite thina ka cei tune memine la ietra.” (Ite Huliwa 26:20) Nge ase hë angeice qeje pengöne hnyawane koi angatr—itretre Iudra me itre etheni fe—laka Iesu hi lo Keriso nge Mesia, haawe, Paulo a xatua angatre jë pena troa sa xepu me xome fe la bapataiso. (Ite Huliwa 16:14, 15, 31-33; 17:3, 4; 18:8) Hnene laka ujë hë angatre koi Akötresie, ame la itretre dreng ka hnyipixe cili, tre, angatr a sine lo Isaraela ngöne la ua.
17. (a) Nemene huliwa ne pelehatren ka easenyi hë troa umuth, nge nemene la ketre huliwa hna kuca fe ngöne la ijine cili? Nemene la ketre hnying hna xejë?
17 Ame enehila, thaa hmitre kö matre fenesi pi pelehatrene lo itre thelene lo Isaraela ngöne la ua. E ase hë lai, tro ha aijijëne lo “eketre lao angela” ka cilaxome lo itre enyi ne la iangazo ne la “akötr atraqatr” matre troa nue la eke enyi cili. Nge ame fe ngöne la ijine cili, tre, troa canga iacaasinekeune lo “ka alanyimu atraqatr”, itre ka mejiun troa mele epine palua e celë fen. Hnene la itre “xa mamoe kö” cili hna ketre sipu iëne troa lapaun “ngöne la madra ne la Arenio” me xomi bapataiso, hatrene ne la sa xepu i angatr koi Iehova. (Hna Amaman 7:1-4, 9-15; 22:17; Ioane 10:16; Mataio 28:19, 20) Nyimutre thei angatre la itre neköne hna hiane hnene la itre keme me thin keresiano. E maine nyipunie la itre thöthi cili, tro ha amadrinë nyipunie e troa e la hna qaja ngöne la ini ne la wiike hnapin.
[Ithueamacany]
a Wange ju la zonal Ita Ne Thup ne 15 Mei 2003, götrane 30-1.
Nyine Amekunën
• Pine nemene matre thaa tro kö a sa xepu koi Iehova hnene la itre neköne la itre Isaraela?
• Tune kaa la aqan amamane hnene la itretre Isaraela laka, angatr a mele thenge la sa xepu i angatre koi Iehova?
• Hna uëne matre nuetrije pi Iehova la nöje Isaraela lo hnei Nyidrëti hna iën, nge hna nyi hnan ej tune kaa?
• Qane lo Penetekos 33 M.K., nemene la hna troa kuca hnene la itretre Iudra me itre ethen matre troa hane sine la Isaraela ngöne la Ua?