Ita Ne Thup göi 4 MAAC
Nyima 5 me 21 Qene Drehu
Xatuane Jë La Itre Xaa Atr Troa Drengethenge La Itre Ini Qa Hnine La Tusi Hmitrötr
“Nge it’ eje ngöne la hnadro ka loi, la angete denge la wesi ula fë la hni ka loi me nyipici, me kapa, me wa, nge tha sixele kö.”—LUKA 8:15.
1, 2. (a) Nemene la kepin matre kuca jë la itus Nemene la nyipi ini ini hna hamën hnei Tusi Hmitrötr? (b) Ame ngöne lo itre hnepe macatre ka ase hë, tune kaa la aqane amanathithine Iehova la trenge catre hna kuca hnene la nöje i Nyidrë matre troa inine la itre xaa atr?
HNENE la ketre Temoë i Iehova föe hna qaja aloine la itus Nemene La Nyipi Ini Hna Hamën Hnei Tusi Hmitrötra; öni eahlo ka hape: “Ketre itusi ka lolo catr. Kola piine ej hnene la itre ka ini tusi me eni. Ketre tunge mina fe. Jëne la itusi celë, atreine hi troa nyiqaane inine la Tusi Hmitrötr memine la itre atr ngöne la easë ngöne la qene qëhnelö i angatr.” Hna qaja mina fe la itusi cili hnene la ketre qatr ka cainöj, ka hape: “Ame ngöne lo fifitre lao macatre ne eni petre kö a hane catre xome la huliwa ne cainöj, hnenge hna madrine troa xatuane la itre atr ka ala nyim troa atre Iehova. Ngo nyipici laka, ame la itusi celë hna hnëkëne göi troa etid, tre, ka ketrepengöne kö ej. Lolo catr la itre iatr e hnine la itus.” Tune kaa fe la aqane goeëne nyipunie la itus Ini Tusi Hmitrötr? Hna hnëkëne la itusi cili, matre troa xatua së troa trongëne la hna amekötine hnei Iesu, kola hape: “Qa ngöne lai, trojë nyipunie a inine la nöjei nöj’ asëjëihë, . . . ini angate jë troa trongëne la nöjei ewekë asëjëihë lo hnenge hna ahnithe koi nyipunie.”—Mataio 28:19, 20.
2 Eje hi lai laka, atraqatr la madrin e kuhu hni Iehova ngöne la Nyidrëti a öhne la 6.6 milio lao Temoë i Iehova, angatr a hmalahnine troa drengethenge la hna amekötine hnei Iesu, ene la troa inine la itre atr. (Ite Edomë 27:11) Nge Iehova a amanathithine la trenge catre hnei angatr hna kuca. Drei la ketre ceitun, ame ngöne la macatre ne huliwa 2005, hna cainöjëne la maca ka loi ngöne la 235 lao nöj, nge hna xomiujine la 6 061 500 la etid. Ene pe nyimutre la itre atr ka ‘denge qa thei hun, thaa hnei nyipunie hna kapa kösë tenge ewekë i ate, ngo wesi ula i Akötresie.’ (1 Thesalonika 2:13) Ame ngöne lo lue macatre ka ase hë, 500 000 nge sin la etrune la itre ka xötrei atre la nyipici me trongëne la itre hna amekötine hnei Iehova, me nue la mele i angatr troa nyihlue i Nyidrë.
3. Nemene la itre hnying göne la itus Ini Tusi Hmitrötr hna troa ce wange ngöne la hna cinyihane celë?
3 Madrine fe kö epuni troa inine la Tusi Hmitrötr memine la ketre atr ngöne la itusi cili? Ame ngöne la fen asë, hetrenyi pala kö la itre atr ka “hni ka loi me nyipici” ene lo itre ka drenge la wesi ula i Akötresie, itre ka troa “kapa, me wa, nge tha sixele kö.” (Luka 8:11-15) Tro sa ce wange la aqane troa xome la itus Ini Tusi Hmitrötr, matre troa inine memine la itre atr. Tro sa ce wange la köni hnying: (1) Nemene la aqane tro sa nyiqaane inine la Tusi Hmitrötr memine la ketre atr? (2) Nemene la itre aqane troa ini ka hetre thangane ka loi? (3) Tune kaa la aqane tro sa ixatua matre thaa tro hmekuje kö a hnainin la atr ngo tro fe angeic a atreine hane hamëne la ini qa hnine la Wesi Ula, ene la Tusi Hmitrötr?
Aqane Troa Nyiqaane Inine La Tusi Hmitrötr Memine La Ketre Atr
4. Pine nemen matre kola luelue hnene la itre xaa atr troa inine la Tusi Hmitrötr, nge tune kaa la aqane tro sa xatua angatr matre thaa tro kö angatr a luelue?
4 Maine troa upi epuni troa sasaithe la ketre hneopegejë ka tru, maine jë tro epuni a thipën. Ngo maine hna xome la itre etë ka tru matre troa nyi jë i epun, nge matre tro epuni a atreine tro qa ngöne la ketre götrane kowe la ketre, haawe, maine jë thaa tro hë epuni a luelue troa sasaithe la itim. Ceitune hi lai memine la atr ka luelue troa inine la Tusi Hmitrötr. Maine jë tro angeic a mekune ka hape tru catre pala ha la traem me trenge catr hna troa xome thatraqane lai ini tus. Nemene la aqane tro sa xatua angeic matre thaa tro kö angeic a luelue? Maine tro sa xome la itre hnepe aqane troa hamë ithuemacany, ijije hi tro sa xome la itus Ini Tusi Hmitrötr matre troa xatuane la ketre atr troa inine pala hi la Wesi Ula i Akötresie. Maine tro sa hnëkë hnyawa, tro ha ceitune lo lai itre ietë hna trane trongëne nyine jë së memine la itre iwai hmaca ka troa iothekeu angeice hnyawa me Iehova.
5. Pine nemen matre nyipi ewekë tro sa e la itus Ini Tusi Hmitrötr?
5 Ngo, qëmekene tro sa xatuane la ketre atr troa kepe thangane ka loi qa ngöne la itus Ini Tusi Hmitrötr, nyipi ewekë tro sa pane atrepengöne hnyawa la itus. Hane kö së e la itus qa ngöne la qaan uti hë la pun? Hnene la lue trefëne hna xometrongëne ngöne la nyidroti a tro troa pane mano, nge hnei nyidroti hna nyiqaane e ej ngöne la nyidroti e ezine hnagejë. Hnene la ketre föe ne cili ka salemë ewekë kowe la itre ka ngenu, hna easenyi nyidro, ene pe eahlo a öhne la taan la itus Nemene La Nyipi Ini Hna Hamën Hnei Tusi Hmitrötr? Öni eahlo kowe la lue trefëne ka hape, itre hnepe hawa qëmekene tro eahlo a traqa, hnei eahlo hna thithi fë la hnyinge cili, me sipo Akötresie troa sa lai hnying. Hnene la lue trefën hna madrine troa hamëne kowe la föe la ketre itus. Hane kö së ‘thele traeme’ ne troa e la itusi cili, maine jë troa nyi hnaaluene e hmaca, maine ngöne la easë a itreqe ngöne ketre hna isa pui, maine ngöne la kola mano ngöne la hna huliwa maine ngöne hna ini? (Efeso 5:15, 16) Maine hne së hna kuca tune lai, tro hë së a atrepengöne hnyawa la itusi cili, ketre, tro fe hë së a hane xome la nöjei ijine troa ithanatane la itre aliene ej kowe la itre xaa atr.
6, 7. Tune kaa la aqane tro sa xome la itus Ini Tusi Hmitrötr matre troa nyiqaane inine la Tusi Hmitrötr memine la itre xan?
6 Ame ngöne la easa cainöje fë la itus, ka lolo catre troa xome la itre iatr, me itre xötr, me itre hnying ne la götrane 4, 5, me 6. Drei la ketre ceitun: maine jë tro sa nyiqaane ithanata me hnyinge ka hape, “Eje hi laka, nyimutre catre la nöjei jole ka eje the së enehila, matre hapeu, tro sa thele ekaa la nyin la itre jole cili?” Thupene la hna sa hnene lai atr, e jë la 2 Timoteo 3:16, 17, nge qeje pengöne jë la nyipi nyin hna hamëne hnei Tusi Hmitrötr thatraqane la itre jol ne la itre atr. Thupene lai, amamane jë koi angeic la itre götrane 4 me 5, nge hnyingëne jë koi angeice ka hape: “Ame ngöne cahu itre iatr ne la itre götrane celë, nemene la ka akötrë epuni catr?” Ame ngöne la kola amamane koi epuni hnene lai atr la caas, nue angeice pi troa xolouthe la itus nge epuni pena a e hnine la Tusi Hmitrötr la ketre xötr ka ihmeku memine lai iatr. Thupene lai, e jë la götrane 6, nge hnyinge jë kowe lai atr ka hape, “Ame ngöne lai sikisi lao hnying hna hamëne e cahu fene la götrane celë, nemene la hnei epuni hna ajan tro nyiso a ce ithanatan?” Ame la kola köjane hnene lai atr, amamane jë koi angeic la mekene ne la itus ka sa lai hnying, hamëne ju koi angeic la itus, nge isapui ju matre troa iwai hmaca, me ce ithanatane lai hnying.
7 Ame caha aqane nyiqaane ithanata, tre, ijije hi troa kuca ngöne la faifi lao menetr. Ngo ame ngöne lai itre hnepe menetre cili, atre hë së la itre aja ka eje thene la atr, tro fe hë së a e me hamëne la itre ini qa ngöne la lue xötr, me isa pui me nyitrepene la ketre iwai hmaca. Ngacama xoxopatre hi la ijine easa porotrike me angeic, ngo ame pe, maine jë pëkö hnepe ijine ka tune lai hnei angeic hna hane melën ekö; kösë ketre ijine kola ithuecatr me akeukawane la hni angeic. Haawe, maine ame la epuni a iwai hnyawa, tre, ngacama hetre jole i angeice ju hë, ngo tro hmaca angeice lai a xome la itre xaa hnepe menetr matre troa ithanata me epun, me hane feke ca matre troa xötrëne ‘la gojenyi ne tro kowe la mel.’ (Mataio 7:14) Kola tro la itre drai, nge kola kökötre mina fe la aja e kuhu hni ne lai atr, nge kola troa nango qea fe la itre ijine ini tus. Atreine hi troa traqa kowe lai, e hne së hna sipone troa lapa me inine la Tusi Hmitrötr ngöne la ketre ijin ka nango qea.
Nemene La Itre Aqane Troa Hamë Ini Ka Lolo Catr
8, 9. (a) Tune kaa la aqane tro sa hnëkëne la itre hnainin troa cile hnyawa kowe la itre itupath hnei angeic qëmeke kow? (b) Troa xome ekaa la itre jiane huliwa ka catre catre matre troa acatrene la lapaune së?
8 Ame hë la kola nyiqaane drengethenge hnene la ketre atr la hna inine hnei Tusi Hmitrötr, tro hë angeic a cile kowe la itre jole ka sewe angeic troa kökötr. Hna qaja hnei Paulo ka hape: “Tro ha axösisi angat ‘ or ’ ? asë angete ajane troa lapa fë la thina ka ijiji Akötesie thei Keriso Iesu.” (2 Timoteo 3:12) Hnei Paulo hna aceitunën la itre itupathi cili memine la ketre eë ka dreuthe la itre jiane kuci uma ka saqe mel, ngo cile pe kö la itre uma hna kuca hnei itre jiane huliwa tune la itre gool, me sileva, me itre etë ka catre catr. (1 Korinito 3:10-13; 1 Peteru 1:6, 7) Maine easa ajan troa xatuane la itre ka inine la Tusi Hmitrötr troa eëne la itre thiina ka lolo matre troa cile catr ngöne la itre itupath, haawe, nyipi ewekë tro sa xatua angatr troa eköthe la mele i angatr hnene la itre nyine acili uma ka thaa mele nyimenyime kö.
9 Kola aceitunën hnene la atre cinyihane la Salamo la “wesi ula i Iehova” memine “la sileva hna deuth’e kuhu hnadro a luengemene la o deuth.” (Salamo 12:6) Eje hi lai laka, e hnine la Tusi Hmitrötr la itre jiane huliwa ka sisitria nyine troa xome matre troa eköthe me acatrene hnyawa la lapaun. (Salamo 19:7-11; Ite Edomë 2:1-6) Nge kola amamane hnene la itus Ini Tusi Hmitrötr koi së la aqane troa huliwane hnyawa la itre xötr ne la Tusi Hmitrötr.
10. Tune kaa la aqane tro sa aciane la aja ne la hnainin troa wanga atrune la Tusi Hmitrötr?
10 Ame ngöne la ijine inine la Tusi Hmitrötr, amamane jë kowe la hnainin la itre xötr hna hamën ngöne la itre mekene la itus hna ce ithanatan. Xome jë la itre hnying matre troa xatuane la hnainin troa trotrohnine la itre xötr ka ijije me isa trongëne hnyawa itre ej. Thaa tro pi kö a qaja koi angeic la nyine tro angeic a kuca. Loi e tro pe a xötrethenge la tulu i Iesu. Ame ngöne la kola hnyinge koi nyidrë hnene la ketre atr ka atrepengöne hnyawa la Trenge Wathebo, öni nyidrëti e sa ka hape: “Nemene la hna cinyihane ngöne la wathebo? Hape ue la hnei ‘ö hna e?” Hna sa hnene la thupëtresiji jëne la itre xötr ne la Tusi Hmitrötr, nge hnei Iesu hna xatua angeic me amamane la aqane tro angeic a ketre trongëne la trepene meköt. Hnei Iesu fe hna hamën la ketre ceitun nyine ixatua kowe lai atr, matre tro angeic a öhne la aqane troa ketri angeic hnene la ini. (Luka 10:25-37) Nyimutre catr hnine la itus Ini Tusi Hmitrötr, la itre ceitun ka hmaloi troa trotrohnin; loi e tro sa xome itre ej matre troa xatuane la hnainin tro angeic a ketre trongën la itre trepene meköti ne la Tusi Hmitrötr.
11. Ije paragaraf hne së hna troa kuca ngöne la easa hamë ini kowe la hnainin?
11 Tune la aqane ahmaloeëne Iesu troa qejepengöne la itre mekune ka jol e troa trotrohnin, haawe, ame mina fe la itus, tre, hmaloi la aqane qeje pengöne nge thaa ka cili thenge kö la aqane qaja la itre mekun qa hnine la Tusi Hmitrötr. (Mataio 7:28, 29) Xome jë la tulu i nyidrë ngöne la easa inine la itre xaa atr. Hamëne hnyawa ju la ithuemacany, thaa tro kö a jole troa trotrohnin, nge loi e troa nyipici. Thaa tro kö a nyimenyime menu ngöne la kola inine la itre atr. Ngo tro pe a trotrohnine la hnainin, me mekune la hnei angeic hna atrein troa kuca, matre troa axeciëne la etrune la itre paragaraf nyine troa ce ithanatan ngöne la ijine ini tus. Atre hnyawa hi Iesu la itre ifego ne la itretre drei nyidrë, nge thaa hnei nyidrëti kö hna thuehnefë angatr me hamë itre xaa ithuemacanyi koi angatr nge thatreine pe angatr troa trotrohnine la alien ngöne la ijine cili.—Ioane 16:12.
12. Nemene la aqane troa xome la itre xaa mekun ngöne la pune la itus?
12 Hetrenyi e hnine la itus Ini Tusi Hmitrötr la itre xaa mekun laka 14 lao topik. Loi e troa pane atre hnei epuni la itre aja ka eje thene la hnainin, matre aijijë epuni troa atrehmekune la topik nyine troa xom matre troa hetre thangane ka loi koi angeic. Drei la ketre ceitun, maine kola öhne hnene la ketre hnainin la ketre topik ka jol e troa trotrohnin, maine hetrenyi pena la itre sipu hnyinge i angeic pine lo itre ini hna kapa ekö, maine jë troa canga amamane koi angeic la itre mekune ka ijij ngöne la pune la itus hna hape itre xaa mekun, nge nue angeice pi troa ketre wange la itre mekune cili. Ame pena ngöne la ketre götran, maine jë hnene la itre aja ka eje thene la hnainin, haawe ma tro epone a ce wange la itre mekun. Eje e hnine la itre xaa mekun, la itre topik ka tru hna xome qa hnine la Tusi Hmitrötr, tune la “ Hetrenyi Kö Thene La Atr La Ua Ka Thaa Meci Kö?” me “Loi e Troa Atreine Wanga Atrehmekun La “Babulona Atraqat.” Maine jë epuni a ajane troa ce ithanatane la itre topike cili memine la hnainin. Pine laka pëkö hnyinge göne lai itre topik hna ithanatan, haawe, nyipi ewekë tro sa atrepengöne hnyawa la itre topike cili, matre thaa jole koi së troa hnyinge hmekune itre ej.
13. Nemene la aqane tro la thithi a acatrene la lapaune ne la ketre hnainin?
13 Kola qaja ngöne la Salamo 127:1, ka hape: “Maine tha xupe hnei Iehova la uma, Huliwa [“gufa,” MN] pi hë angete xup’ ej.” Qa ngöne lai, nyipi ewekë troa sipo ixatua koi Iehova jëne la thith, ngöne la easa hnëkë troa xomiujine la ini tusi ne la ketre atr. Loi e troa mama jëne la itre thithi së ngöne la qaan me pune la ini tus, laka, keukawa la aqane imelekeu së me Iehova. Ithuecatre jë kowe la hnainin troa thithi koi Iehova matre troa hetrenyi la inamacan troa trotrohnine la Wesi Ula i Nyidrë, memine la trenge catr troa trongëne la itre eamo ne ej. (Iakobo 1:5) Maine tro sa kuca tune lai, tro hë la hnainin a catr me xomihnine ahoeane la itre itupath, nge tro hë angeic a kökötre catr ngöne la lapaun.
Xatuane Jë La Itre Hnainin Troa Itre Ka Hamë Ini
14. Nemene la hna troa kökötre ngön hnene la itre ka inine la Tusi Hmitrötr?
14 Maine kola ajan hnene la itre atr hnei epuni hna ini Tusi Hmitrötr memin, troa drenge thenge la hna amekötin hnei Iesu kowe la itretre drei nyidrë, ene la troa drengethenge la “nöjei ewekë asë,” nyipi ewekë tro angatr a kökötre matre troa itretre inine la Wesi Ula i Akötresie, ene la tro angatr a hane hamëne hnyawa la ini qa hnine la Tusi Hmitrötr. (Mataio 28:19, 20; Ite Huliwa 1:6-8) Nemene la nyine tro sa kuca matre troa xatuane la ketre hnainin troa kökötre tune lai ngöne la götrane la ua?
15. Pine nemen matre loi e tro sa xatuane la hnainin troa sine la itre icasikeu ne la itre Keresiano?
15 Ame ju fe kö lo kola nyiqaane inine la Tusi Hmitrötr memine la ketre atr, hë angeice jë troa hane ce sin me epuni la itre icasikeu ne la ekalesia. Qaja jë koi angeic ka hape ame lai itre icasikeu, tre, celë hi hnë ini së matre tro së a itretre inine la Wesi Ula i Akötresie. Ame ngöne la itre xaa wiik, xome jë la itre hnepe menetr ngöne la pune la nöjei kola inine la Tusi Hmitrötr memine la ketre atr, matre troa qeje pengöne la porogaram ne ini ngöne la götrane la ua hne së hna kapa ngöne la nöjei icasikeu me ngöne la itre ijine asabele. Qaja jë la madrine së qa ngöne la itre manathithi hne së hna kapa ngöne la itre ijine cili. (Heberu 10:24, 25) Ame hë la kola hane nyiqaane sine lapaane hnene la hnainin la itre icasikeu, haawe, kösë tro fe hë angeic lai a hane atre hamë ini qa hnine la Wesi Ula i Akötresie.
16, 17. Nemene la itre xaa aja ka ijije troa eköth me eatrëne hnene la hnainin?
16 Xatuane jë la hnainin troa eköthe la itre mekune ka ijije tro angeic a eatrën. Drei la ketre ceitun: ithuecatre jë koi angeic troa ce thawa memine la ketre enehmu maine ketre sine la lapa pena, la ini hnei angeice hna kapa. Nge, upi angeice jë fe troa hane e asë la Tusi Hmitrötr. Maine tro sa xatua angeic troa eköth me amë pala hi la ketre ijine troa e la Tusi Hmitrötr, tro hë la hna majemine cili a hetre thangane fe elanyi thupene la hnei angeic hna xome la bapataiso. Ketre, hapeu matre troa pane xatua angeic troa hnehene la ketre xötr ne la Tusi Hmitrötr ka sa la ketre hnyinge ka tru qa hnine la ketre mekene la itus Ini Tusi Hmitrötr? Maine tro sa kuca tune lai, haawe, tro hë së a “[ketre atr] hna kapa aloine hnei Akötesie, nge ate kuci huliwa ka pë nyine ahmahman, kola thawa la wesi ula ka nyipici.”—2 Timotheo 2:15.
17 Thaa easë hmekuje kö a troa inine la hnainin troa e gufane la itre xötr maine troa qaja ju la mekun, ngo loi e troa xatua angatre troa qejepengöne la aliene la xötre memine la topike hna ithanatan tune la angeic a troa sa kowe la itre ka hnyingë pengöne la lapaune i angeic. Troa pane kuca la itre hnepe iamacany matre nyine ixatua; maine jë tro sa elon la ketre sinee maine ketre atr ka huliwa pena, kola sipone koi angeic troa qeje pengöne la itre ini hnei angeice hna mejiune kow. Ame hë la kola sa hnene la hnainin, amamane jë koi angeic la aqane troa sa cememine “la menyik me qou.”—1 Peteru 3:15.
18. E atre cainöje hë la hnainin nge thaa hna bapataisone petre kö, nemene la ixatua hnei epuni hna troa hamëne koi angeic?
18 Ame hë thupen, maine jë ijije fe hë tro la hnainin a hane xome la huliwa ne cainöj. Amamane hnyawa jë laka, ketre hnëqa ka sisitria catr la troa hane kepe së troa xome la huliwa cili. (2 Korinito 4:1, 7) E ase hë la itre qatre thup ce amekötine laka tro ha hane cainöje la hnainin, haawe, xatua angeice jë troa hnëkëne la ketre aqane nyiqaane ithanata ka hmaloi, nge thupene lai ce cainöje jë. Catre jë troa ce huliwa pala hi me angeic ngöne la nöjei götran ne la cainöj, nge ini angeice jë la aqane troa hnëkë kowe lai, me hane iwai hmaca hnyawa fe. Troa hetre thangane catre koi angeic la sipu tulu së.—Luka 6:40.
“Tro Eö a Amele Eö Kö, Me Angate Fe Hna Dei ‘Ö”
19, 20. Nemene la aja nyine tro sa eatrën, nge pine nemen?
19 Eje hi lai laka, thaa huliwa ka co kö la troa xatuane la ketre atr troa “wangate hmekune la nyipici.” (1 Timoteo 2:4) Ngo, pëkö ewekë ka madrine ka tru hune la troa xatuane la ketre atr troa drengethenge la ini hna hamëne hnei Tusi Hmitrötr. (1 Thesalonika 2:19, 20) Nyipici, drei la ketre madrine ka tru, ene la troa “ce huliwa tro kö me Akötesie” ngöne la huliwa ne hamë ini e cailo fen!—1 Korinito 3:9.
20 Jëne Iesu Keriso me itre angela, easenyi hë tro Iehova a amekötine lo “angete tha denge thenge la maca ka loi ne la Joxu shë Iesu.” (2 Thesalonika 1:6-8) Matre nyipi ewekë troa thuemacane la itre atr, wanga troa meci hnei angatr. Ijije kö tro sa hane thele tro sa hane inine la Tusi Hmitrötr memine la ketre atr ngöne la itus Nemene La Nyipi Ini Hna Hamën Hnei Tusi Hmitrötr? Ame ngöne la nyipunie a xome la huliwa cili, tre, kolo hi lai a aijijën troa “amele eö kö, me angate fe hna dei ‘ö.” (1 Timoteo 4:16) Enehila hi la ijine tro sa xatuane la itre xaa atr, troa drengethenge la ini hna hamëne hnei Tusi Hmitrötr.
[Ithueamacany]
a Hna amamane hnene la Itretre Anyipici Iehova.
Nemene La Hne Së Hna Inin?
• Hna hnëkëne göi nemene la itus Ini Tusi Hmitrötr?
• Nemene la aqane tro sa nyiqaane inine la Tusi Hmitrötr memine la itre atr jëne la itus Ini Tusi Hmitrötr?
• Nemene la itre aqane troa inine la itre atr ka hetre thangane ka loi?
• Tune kaa la aqane troa xatuane hnei nyipunie la ketre hnainin matre tro angeic a atreine hane hamëne la ini qa hnine la Wesi Ula i Akötresie?