Ita Ne Thup göi 7 DISEBA
Nyima 09 me 12 Qene Drehu
Pëkö Ka Sihngödri Kowe La “Lue Ine Xajawa” I Iehova
“Lue ine xajawa i [Iehova] a tupathe la ite nekö i ate.”—SAL. 11:4.
1. Nemene pengöne atr la hne së hna ajane troa easenyi kow?
Tune kaa la aqane goeëne nyipunie la itre atr ka thele troa atrepengö nyipunieti hnyawa? Ame la nyipunieti a hnyingë angatr la mekuna i angatr, tre, thaa hnei angatre kö hna juetrëne koi nyipunie. Maine nyipunieti a aja ixatua, thaa angatre kö a cipaane koi nyipunie. E aja eamo hë nyipunie, tre, tro angatr a hamëne ej cememine la ihnim. (Sal. 141:5; Gal. 6:1) Hapeu, thaa madrine kö nyipunieti troa easenyi kowe la itre atr ka tune lai? Ame Iehova memine la Hupuna i Nyidrë, tre, celë hi hnei nyidroti lai hna ajan. Thaa hane fe kö itre atr thele troa atrepengö së tui nyidro; ke, ketre mekune ka pë kö thoi ngön la ka upi nyidro, ene la troa xatua nyipunieti troa “xölehuje la nyipi mel.”—1 Tim. 6:19; Hna ama. 3:19.
2. Iehova a waipengö së tune kaa?
2 Hnei Davita atre cinyihane la itre Salamo, hna amamane la aja ka eje ekuhu hni Iehova troa atrepengö së ngöne la angeic a qaja, ka hape: “Ame la lue ine xajawa i nyidëti [Iehova] a tupathe la ite nekö i ate.” (Sal. 11:4) Nyipici, thaa Akötresieti kö a nango goeë së hi, ngo Nyidrëti pe a waipengö së. Hnei Davita fe hna cinyihane, ka hape: “Hnei cilieti hna tupathe la hning nge hna wai ni e jid . . . Nge pëkö ngazonge hna öhn.” (Sal. 17:3) Celë hnyawa hi lai ka amamane laka, atre hi Davita la etrune la aqane waipengöi angeice hnei Iehova. Atrehmekune hi angeic laka, troa akötr hnei Iehova nge thaa tro kö Nyidrëti a madrin, e tro angeic a lapa mekune la itre ewekë ka ngazo, maine akökötrene la itre aqane kuci ngazo ekuhu hni angeic. Nyipunieti kö a hane goeë Iehova tune la aqane goeë Nyidrëti hnei Davita, laka Akötresieti ka mel?
Iehova e Goeëne La Hni Së
3. Kola mama tune kaa thei Iehova laka hna tuluthe la aqane waiewekë i Nyidrë göne la itre tria së?
3 Ame la hnei Iehova hna pane goeën, tre, ene la atr ka ej e kuhu hni; Nyidrëti a goeëne la pengöne la hni së. (Sal. 19:14; 26:2) Thaa Nyidrëti kö a lapa fë la itre hnepe tria hne së hna kuca. Drei la ceitune i Sara föi Aberahama; thaa hnei eahlo kö hna qaja asë la mekuna i eahlo, ngo atrehmekune hi la angela ka nyi ngönetrei ne atr, laka, kola xou me hmahma hnei Sara. Haawe, hna nango wenë la aqane mekune i Sara hnene lai angela. (Gen. 18:12-15) Ame pena la Iobu qatr a “jele meköti nyidëti kö hui Akötesie,” thaa hnei Iehova kö hna cile troa amanathithi Iobu, ke, atrehmekune hnyawa hi Nyidrë, ka hape, tru catre la hna akötrë Iobu hnei Satana. (Iobu 32:2; 42:12) Ketre, thaa hnei Iehova kö hna dreng akötrëne la itre trenge ithanata ka nyipici hna qaja hnene lo sine föe ne Sarepeta koi Elia perofeta. Trotrohnine hi Akötresieti laka, eahlo a thë fë hni, ke, meci hë la nekö i eahlo ka caas.—1 Ite Jo. 17:8-24.
4, 5. Hna mama tune kaa ngöne la aqane ujë i Iehova koi Abimeleke laka, Akötresieti ka thiina ka lolo Nyidrë?
4 Pine laka öhne hi Iehova la itre aliene hni ne la atr, haawe, hnei Nyidrëti fe hna hane mekune la itre ka thaa hane kö hmi koi Nyidrë. Pane ce wange jë së la itre aqane ujë i Nyidrëti koi Abimeleke, joxu ne Gerara, ketre traon e Filisiti. Thatre kö Abimeleke laka, ka faipoipo Aberahama me Sara, haawe, xomi Sara jë hi hnei nyidrë matre troa föe i nyidrë. Ngo thaa hnei Abimeleke petre kö hna thele troa ce meköle me Sara nge öni Iehova jë hi koi angeic ngöne la pu e jidr, ka hape: “Ate hi ni laka hnei’ö hna kuca lai ngöne la hni’ö ka nyipici; nge hnenge hna xome cipa eö wanga troa ngazo koi ni; qa ngöne lai tha hnenge kö hna nue eö pi troa kete angeic. Nge enehila nue hmaca pi kowe la trahmanyi la fö; ke perofeta angeic, nge tro angeic’ a thithi sai’ö, mate mele eö.”—Gen. 20:1-7.
5 Maine tro sa pane mekun, tre, ijije hi tro Iehova a ahnëjinë Abimeleke, pine laka ketre atr ka thili kowe la itre idrola. Ngo öhne hi Iehova, ka hape, thaa hna thë kö hnei Abimeleke, nge ka hni ka nyipici angeic. Haawe, pine la ewekë celë nge pine fe la thiina ka lolo i Iehova, hnei Nyidrëti hna qaja kowe lai joxu la nyine troa kuca “mate mel.” Hapeu, celë kö la Akötresieti lai hnei nyipunieti hna ajane troa nyi hluen?
6. Hnei Iesu hna nyitipune tune kaa la Tretretro i nyidrë?
6 Hnei Iesu hna nyitipune hnyawa la Tretretro i nyidrë; hnei nyidrëti hna thele troa goeëne la itre thiina ka loi ka eje thene la itretre drei nyidrë, me nue la itre tria i angatr. (Mareko 10:35-45; 14:66-72; Luka 22:31, 32; Ioane 15:15) Ame la aqane ujë i Iesu, tre, kolo hi a jele nyipicine la hnei nyidrëti hna qaja ngöne Ioane 3:17, kola hape: “Tha hnei Akötesieti kö hna upe la Neköne kowe la fene hnengödrai troa ahnëjinëne la fene hnengödrai; ngo loi pe troa amelene hnei nyidë.” Eje hi lai laka, ka jui nge ka cile huti la ihnimi Iehova me Iesu koi së itre atr. Ame la aja i nyidro, tre, ene la tro sa mel. (Iobu 14:15) Celë hi ihnimi lai ka troa xatua së troa trotrohnine la kepine matre Iehova a waipengö së, memine fe la aqane goeë së hnei Nyidrë, nge ngöne fe la aqane ujë i Nyidrë kowe la itre ewekë hnei Nyidrëti hna öhn.—E jë la 1 Ioane 4:8, 19.
Itre Hna Waipengöne Cememine La Ihnim
7. Nemene la ka upi Iehova troa waipengö së?
7 Drei lai mekune ka menu, ene la troa goeë Iehova ceitune me ketre polis, atre alamekëne qa koho hnengödrai la itre ngazo asë hne së hna kuca! Satana hi lo lai ka goeë së tune lai, atre jele ngazo së me catre fë, ka hape, itre ka mele caasi së. (Hna ama. 12:10) Angeice mina fe a qaja menune, ka hape, itre aliene hni ka ngazo la ka upi së troa kuca la itre ewekë xajawai Akötresie. (Iobu 1:9-11; 2:4, 5) Önine la atre cinyihane la Salamo göi Akötresieti, ka hape: “IA fe Joxu, maine tro cilieti a ati hatene la ite ngazo, dei la ate troa cil?” (Sal. 130:3) Atre asë hi së la aqane troa sa kowe la hnyinge celë, Pë kö caa atr ka troa cil! (Ate cai. 7:20) Ngo ame Iehova, tre, Nyidrëti a goeë së cememine la utipin; Nyidrëti a goeë së ceitun memine la keme maine thine pena, ka ajane troa thupëne la itre neköi nyidro qa ngöne la itre jole ka tru ka traqa koi nyudreni enehila. Nyidrëti pala hi a hmekë së göne la itre menu me itre hnepe kucakuca së, matre aijijë së tro sa isa neëne itre ej, ketre, wanga hetre ethanyine jë itre eje elanyi kowe la mele së.—Sal. 103:10-14; Mat. 26:41.
8. Tune kaa la aqane inine Iehova me hajine Nyidrë la itre hlue i Nyidrë?
8 Kola mama la ihnimi Akötresie ngöne la aqane haji së me ini së hnei Nyidrë, hna jëne la Itre Hna Cinyihane memine fe la göxeni ne la ua hna hamëne hnene la “hlue ka nyipici me ka inamacan.” (Mat. 24:45; Heb. 12:5, 6) Iehova fe a hamë së la ixatua i Nyidrë jëne la ekalesia i Keresiano memine “la ite ahnahna kowe la nöjei ate” hnine ej. (Efe. 4:8) Ketre, Iehova a goeëne la aqane ujë së kowe la ini hnei Nyidrë, Tretretro së hna hamën, nge Nyidrëti pala hi a thele troa xatua së. Kola qaja ngöne Salamo 32:8, ka hape: “Tro ni a ini ’ö me köjane koi ’ö la jëne qâ i’ ö troa trongën; tro ni a haji’ ö me alamekë eö.” Drei la enyipiewekëne la tro pala hi sa drei Iehova! Loi e tro pala hi së a hetre hni ka ipië xajawa i Iehova me atrehmekune laka, Nyidrëti hi la Atre Hamë Ini koi së me Tretretro së.—E jë la Mataio 18:4.
9. Nemene la itre thiina, nyine tro sa thipetrij, nge pine nemen?
9 Ame ngöne ketre götran, epi thaa tro kö sa axetine la itre hni së, hnene la pi tru, me pë lapaun, maine pena “hnene la tenge iaö ne la ngazo.” (Heb. 3:13; Iako. 4:6) Kola cia la itre thiina ka ngazo celë thene la atr ka akökötrene la itre mekune me aja ka ngazo e kuhu hni angeic. Maine jë göi tro fe angeic a xanadrone la ketre eamo ka loi hna hamëne koi angeic qa hnine la Itre Hna Cinyihan. Ame ngöne itre xaa ijin, pine la aqane lapaane la hni angeice hnene la thiina ka ngazo, haawe, tro hë angeic a ujë ceitune me ketre ithupëjia me Akötresie; drei hë la ketre ewekë ka nyipi iaxoueny! (Ite edomë 1:22-31) Tro sa pane ce wange la ceitune i Kaina, neköne haetra i Adamu me Eva.
Pëkö Ewekë Ka Sihngödri Koi Iehova Nge Tro Kö Nyidrëti a Nyi Thupen
10. Pine nemene matre thaa kapa kö Iehova la huuje i Kaina, nge tune kaa la aqane ujë i Kaina?
10 Ame lo Kaina me Abela a isa huujëne koi Iehova la huuje i nyidro, thaa hnei Nyidrëti hmekuje kö hna thele troa atre la aliene la huuje i nyidro, ngo ene mina fe la aliene hni nyidro. Mama pi hi laka hnei Akötresieti hna kapa madrine la huuje i Abela, lo hna hamëne cememine la hni ka lapaun; ngo thaa kapa madrine pë hë Nyidrëti la huuje i Kaina, ke, hna öhne ngöne la hni angeice laka, atr ka pë lapaun. (Gen. 4:4, 5; Heb. 11:4) Thaa hnei Kaina kö hna thele troa xomi ini qa ngöne lai me saze la aqane ujë i angeic, ngo hnei angeice pe hna nue troa kökötr e kuhu hni angeic la elëhni i angeic koi Abela jini angeic.—Gen. 4:6.
11. Hna mama tune kaa thei Kaina la hni ka iaö, nge nemene la ini hne së hna troa xome qa ngöne lai?
11 Öhne hi Iehova la aqane kökötre la thiina ka ngazo cili ngöne la hni Kaina, nge Nyidrëti a ithanata hnyawa me angeic matre amamai angeice laka, e troa kuca la loi, tre, troa kepe angeic. Ngazo pe, hnei Kaina hna dreisimine la eamo hna hamëne hnene la Atre Xup i angeic, ene pe, angeic a humuthe ju la jini angeic. Hna mama la aliene hni Kaina ngöne la aqane ujë i angeice ka pi tru, ngöne lo Akötresieti a hnyinge koi angeic, ka hape: “E ka Abela jini’ö?” Öni angeice sa ka hape: “Tha’te kö ni; ini la ate thupëne la jining?” (Gen. 4:7-9) Drei la aqane iaö ne la hni, nge göi tro fe ej a thipetrije la eamo hna hamëne mekötine hnei Akötresie! (Iere. 17:9) Celë hi matre, loi e tro sa xomi ini qa ngöne la ewekë ka traqa koi Kaina, nge epi tro sa canga lepe trije la itre mekune memine la itre aja ka ngazo qa ngöne la hni së, wanga tro itre ej a kökötr, nge e cili tro hë sa thatreine troa xomihnine itre ej. (E jë la Iako. 1:14, 15.) Maine kola hamë së la ketre eamo qa hnine la Tusi Hmitrötr, epi tro sa xöle kapa me goeëne pala hi itre ej ceitune me ketre hatrene la ihnimi Iehova.
Pë Kö Ngazo Hna Kuca Juetrëne Nge Ka Sihngödri Koi Iehova
12. Tune kaa la aqane ujë Iehova ngöne la kola kuca la ngazo hnene la ketre atr?
12 Itre xan a mekune laka, maine pëkö atr ka öhnyi angatr e kuca la ngazo, tre, thaa tro kö angatr a xeni pune la huliwa i angatr. (Sal. 19:12) Thaa tro pi kö sa mekune tune lai. “Leulawa me mamapi hë la nöjei ewekë asëjëihë kowe la lue xajawa i nyidë, ene lo hne shë hna troa isa amamai thina kow.” (Heb. 4:13) Iehova la Atre Amekötine ka goeëne la itre aliene hni së, nge tro kö Nyidrëti a nyi thupene kowe la itre ngazo hna kuca; hatrene hi la meköti i Nyidrëti lai ka pë ethan. Ame Akötresie, tre, “ate utipine me ka ihnim, ate xomi hni ahoean, nge ka tru loi me nyipici.” Ngo “tha trojë kö a jele pë ngazone la ite ka ngazo,” ene la itre ka thaa ietra kö; ketre ceitune mina fe kowe la itre ka “kuca la ngazo memine la aja kow,” maine pena, kola mama ngöne la aqane ujë i angatr laka, ka iaö me qene atrekënö. (Eso. 34:6, 7; Heb. 10:26) Mama ha ekö la ewekë cili ngöne la aqane goeëne me aqane ujë i Iehova koi Akana me Anania me Safaira.
13. Hna uku Akana tune kaa hnene la mekune ka ngazo troa thixötr?
13 Hnei Akana hna nyipi ena la hna amekötine hnei Iehova, ngöne la hna xome la itre trenga mo qa ngöne la traone Ieriko, me juetrëne itre ej hnine la uma ne heta i angeic; hnepe lapa i angeice fe la ka ce thë me angeice la ngazo. Ame la kola mama la ewekë ka ngazo hnei angeice hna kuca, öhne hë Akana la etrune la ngazo i angeic, öni angeic: “Nyipici ngazo la thinange xajawa i Iehova.” (Ios. 7:20) Hnei Akana hna tui Kaina, ene laka hnei angeice hna nue la ngazo troa kökötre ngöne la hni angeic. Ame göi Akana, tre, meciune la pane ewekë ka uku angeice troa ujë qene atrekënö. Pine laka trenga mo i Iehova asë hi la itre ewekë hna thapa qa Ieriko, haawe mama hnyawa pi hi laka, hna atrekënö Nyidrë hnei Akana; nge ame la pun, tre, hna apaatrenyi angeic memine la hnepe lapa i angeic.—Ios. 7:25.
14, 15. Pine nemene matre meköti tro Akötresieti a ahnëjinë Anania me Safaira, nge nemene la ini koi së?
14 Ame ekö e Ierusalema, hna sine la pane ekalesia i Keresiano hnei Anania me Safaira. Thupene la Penetekos ne lo macatre 33 M.K, hna xawane la itre hnepe mani thatraqane la itre ka xötrei hmi; itre ka mele angatr ngöne la itre götrane gaa nany ngo angatr petre kö e Ierusalema. Ame lai manie cili, tre, hnene la itre atr hna hamëne qa kuhu hni. Hnei Anania hna salemëne la ketre hlapa; ngo hna mekune troa hamëne hi la sine la manie hna kapa. Ngazo pe, hnei Anania me föe i angeci hna ce thë troa thoi, me hape, hnei angeice hna hamën asë lo trenge mani. Kola mama hnyawa e celë laka, hnene lai lue trefëne hna thele troa atrunyi nyidro hnene la itre atrene la ekalesia. Ngo hnei nyidroti hna ujë qene atrekënö. Jëne la ketre iamamanyikeu, hnei Iehova hna qajaqaja koi Peteru la ngazo i Anania. Kei ju hi Anania e cili, nge paatre pi hi la hnamano i angeic. Thaa hmitre ju kö nge ketre meci pi fe hi Safaira.—Ite Hu. 5:1-11.
15 Ka hekö hë la thiina ka ngazo cili e kuhu hni i Anania me Safaira. Hnei nyidroti hë hna eköthe la thoi e kuhu hni nyidro matre troa iaöne la itre aposetolo. Ame la ewekë ka ngazo catr, tre, ene la hnei nyidroti hna ‘thoi kowe la Uati Hmitöt i Akötresie’. Kola amamane hnyawa hnene la aqane ujë i Iehova laka, Nyidrëti a thupëne la ekalesia qa ngöne la iajojezi ne la itre ka mele thoi. Nyipici, “nyine qouene la troa kei kowe la lue themie i Akötesie ka shewengönie.”—Heb. 10:31.
Loi e Tro Pala Hi a Mele Nyipici
16. (a) Satana a thele tune kaa troa ajojezine la nöje i Akötresie? (b) Nemene la itre nyinyithiina i Satana ka troa ajojezine la itre atr ne la götrane hnei nyipunieti hna mele ngön?
16 Satana a thele la itre jëne iajojezi matre thaa tro hmaca kö a kepe së hnei Iehova. (Hna ama. 12:12, 17) Kola mama hnyawa la itre nyinyithiina i Satana ngöne la fene hna haöthe hnene la kuci ngazo me iakötrë. Thaa jole hë troa öhne la kuci huliwa ka sis ngöne la itre ordinatör memine la itre xaa ewekë ju kö. Epi thaa tro kö sa kei kowe la itre itupathi Satana. Loi pe, epi troa caasi la mekune së me Davita, atre cinyihane la Salamo, ka hape: “Tro ni a inamacane ngöne la gojenyi ka meköt. . . . Tro ni a tro hnine la umange memine la hninge ka meköt.”—Sal. 101:2.
17. (a) Pine nemene matre Iehova a qajaqaja la itre ngazo hna kuca juetrën, ngöne la traeme hnei Nyidrëti hna sa? (b) Nemene la hne së hna catre troa kuca?
17 Ame enehila, tre, thaa Iehova kö a kuca la itre iamamanyikeu nyine qajaqaja la itre ngazo ka tru hna juetrën, tune lo aqane ujë i Nyidrë ngöne lo itre hneijine ekö. Ngo öhne asë hi Nyidrë, nge tro kö Nyidrëti a amamane la itre ewekë hna kuca juetrën ngöne la ijine hnei Nyidrëti hna sa. Öni Paulo, ka hape: Kola mama la ite ngazo ne la ite xa ate, me tro pa kowe la amekötin; nge ame la ngazo i ite xan, te, kola xöte thenge angat.” (1 Tim. 5:24) Hnene la ihnimi Iehova matre Nyidrëti a qaja amamane la itre ewekë ka ngazo hna kuca. Iehova a hnime la ekalesia i Nyidrë nge Nyidrëti a ajane troa thupëne la ehmitrötrene ej. Ketre, Nyidrëti a utipine la itre ka kuca la itre ewekë ka ngazo ekö, ngo ka nyipi ietra ha enehila. (Ite edomë 28:13) Haawe, epi tro sa catre hetrenyi la hni ka pexeje xajawa i Akötresie me thipetrije la itre thiina ka ngazo.
Loi e Tro Pala Hi Sa Catre Hetrenyi La Hni Ka Pexej
18. Nemene la hnei Davita Joxu hna ajane tro la nekö i nyidrëti a atrehmekune göi Akötresie?
18 Öni Davita Joxu koi Solomona nekö i nyidrë: “Atejë la Akötesi ne la keme i hmunë, me nyi hlue i nyidë hnene la hni ka pexeje me u ka ajan, ke Iehova a thele la nöjei hni asë, me ate hmekune la nöjei mekun’ asë e kuhu hni.” (1 A. l.ite jo. 28:9) Ame la aja i Davita, tre, thaa ene hmekuje kö la tro la nekö i nyidrëti a lapaune hi koi Akötresie. Ngo nyidrëti fe a ajane tro Solomona a hane atrehmekune la aqane hane wangatrune Akötresie la itre hlue i Nyidrë. Nyipunieti fe kö a hane madrine laka Iehova a thele troa waipengöi nyipunie hnyawa?
19, 20. Thenge la hna qaja hnei Salamo 19:7-11, nemene la ka xatua Davita troa easenyi Akötresie, nge tro sa nyitipu Davita tune kaa?
19 Atrehmekune hi Iehova laka, ame la itre atr ka hetre hni ne ajan, tre, tro angatr a easenyi Nyidrë; nge tro fe a akeukawane la itre hni angatr hnene la hna atrehmekune la itre thiina ka loi i Nyidrë. Qa ngöne lai, ame la aja i Iehova, tre, ene la tro sa atre Nyidrë me atrepengöne hnyawa la itre thiina ka loi i Nyidrë. Tro sa atrepengöi Nyidrëti tune kaa? Hnene la hna inine la Tusi Hmitrötr me melëne la itre manathithi hnei Nyidrëti hna hamëne koi së.—Ite edomë 10:22; Ioane 14:9.
20 Nyipunieti kö a hane e o drai la Tusi Hmitrötr me atrehmekune laka, celë hi Wesi Ula i Akötresie? Nge nyipunieti kö a hane thithi troa sipo ixatua matre xötrethenge la hna qaja? Öhne fe kö nyipunie la enyipiewekëne troa mele thenge la itre trepene meköti qa hnine la Tusi Hmitrötr? (E jë la Salamo 19:7-11.) Maine tro nyipunieti a ujë tune lai, tro la lapaune i nyipunie memine la ihnimi nyipunie koi Nyidrë a kökötre pala hi. Ketre tro fe Nyidrëti a easenyi nyipunie kösë kola ie trootro me nyipunie. (Is. 42:6; Iako. 4:8) Nyipici, troa mama la ihnimi Iehova koi nyipunie hnene la Nyidrëti a troa amanathithi nyipunie me thupë nyipunie ngöne la götrane la ua; nge tro Nyidrëti a xatua nyipunie troa tro ngöne la gojenyi ka ilitr kowe la mel.—Sal. 91:1, 2; Mat. 7:13, 14.
Tro Nyipunieti a Sa Tune Kaa?
• Pine nemene matre Iehova a waipengö së?
• Nemene la ka kuca matre ithupëjia ha itre xan me Akötresie?
• Tro së a amamane tune kaa laka, ka mele Iehova koi së?
• Troa tune kaa matre hetrenyi pala hi së la hni ka pexej xajawa i Akötresie?