Ita Ne Thup göi 07 Juun
Nyima 16 me 07 Qene Drehu
Hnei Iobu Hna Atrune La Ëje i Iehova
“Loi e qaja aloine la atesiwa i Iehova.”—IOBU 1:21.
1. Drei la ka cinyihane la tusi Iobu, nge eue la kola cinyihane lai?
TRAQA koi 40 lao macatre i Mose ngöne lo ijine nyidrëti a kötre qaa Aigupito, ke kola thele troa humuthi nyidrë hnei Farao; ene pe nyidrëti a tro pi a tro Midiana eë. (Ite Hu. 7:23) Ame ngöne la lapa e cili, maine jë hnei nyidrëti hna drei mejene lo itre itupath ka traqa koi Iobu, ketre atr ka mele easenyi nyidrë ngöne la lapa e Uza. Ame pë hë ngöne la itre macatre thupen, hmekune lo kola umuthe la tronge i Mose memine la nöje i Isaraela ngöne la hnapapa, hnei angatre hna tro ezine lo nöje Uza. Nge e cili hi la Mose a atre la itre ewekë ka traqa ha koi Iobu. Tune la hna majemine kuca hnene la angetre Iudra, hnei Mose hna cinyihane la tusi Iobu, nge meci hë Iobu.
2. Tune kaa la aqane acatrene la lapaune ne la itre hlue i Iehova ngöne la hnedrai së hnene la tusi Iobu?
2 Kola acatrene la lapaune ne la itre hlue i Akötresie ngöne la hnedrai së, hnene la tusi Iobu. Hna tune kaa lai? Kola xatua së hnene la itre hna edromën troa trotrohnine la itre ewekë ka sisitria catr ka traqa e koho hnengödrai, memine la aliene itre ej me amamane la aqane isenyin la musi cile i Akötresie e koho hnengödrai me e celë fen. Ketre, jëne la edromë ne la tusi Iobu, trotrohnine hnyawa ha së la enyipiewekëne e troa pë ethan la mele së, nge kola xatua së mina fe troa atre hnyawa la kepine matre Iehova a nue e itre xaa ijin la itre hlue i Nyidrë troa akötr. Ketre, kola qaja amamane hnene la tusi Iobu laka, Satana nge Diabolo hi la Atre icilekeu me Iehova nge ithupëjia memine la nöjei atr asë. Kola amamane fe hnene la tusi celë laka, ngacama troa xulu la itre itupathi ka tru, ngo tui Iobu, ijije hi tro la itre atr ka thaa pexeje kö a nyipici koi Iehova. Loi e tro sa pane ce wange la itre xaa ewekë hna qeje pengöne ngöne la tusi Iobu.
Hna Tupathi Iobu Hnei Satana
3. Nemene la hne së hna atre göi Iobu, nge pine nemene matre hnei Satana hna tupathi angeic?
3 Iobu ekö la ketre atr ka trenamo nge ka tru ngöne la nöje i angeic, nge ketre tixene lapa lo lai ka atreine xome hnyawa la hnëqa i angeic e hnine la hnepe lapa i angeic. Angeice hi la ketre atr ka ijij troa hamë eamo kowe la itre ka aja ixatua. Ngo ame la ewekë ka sisitria catr, tre, ene laka ame Iobu, ke, ka xoue Akötresieti angeic. Iobu la ketre atr ka “nyipi loi thina me meköti [. . .], nge ate qoue Akötesie, me iananyine memine la ngazo.” Hnei Satana Diabolo hna tupathi Iobu, pine la aqane mele nyipici angeic koi Akötresie, ngo thaa pine kö laka ka trenamo maine ketre atr ka tru pena.—Iobu 1:1; 29:7-16; 31:1.
4. Nemene la aliene la hna hape, mele ka pë ethan?
4 Kola mama ngöne la itre mekun ka nyiqaane la tusi Iobu, laka, kola icasikeu e koho hnengödrai hnene la itre angela asë xajawa i Iehova. Traqa ju fe hi Satana nyipine la icasikeu, nge hnei angeic hna jelengazo Iobu. (E jë la Iobu 1:6-11.) Ngacama hnei Satana hna amexeje la itre mo i Iobu, ngo ame la sipu hnei angeic hna thele troa tupath, tre, ene la mele i Iobu ka pë ethan. Ame la hnëewekë hna hape “mele ka pë ethan,” tre, kolo lai a qaja la ketre mele ka pë engazon, nge ka meköt. Nge ame la kola xome la hnëewekë cili ngöne la Tusi Hmitrötr, tre, nyine amamane la aqane hni ka pexeje ne la ketre atr koi Iehova.
5. Nemene la hnei Satana hna qajangazon thei Iobu?
5 Hnei Satana hna qeje engazon la aqane hmi Iobu koi Akötresie. Ame koi Satana, tre, tro pala kö Iobu a nyipici koi Iehova, e hnei Nyidrëti pala hi hna amanathithine me thupë angeic. Qa ngöne lai, hnei Iehova hna nue Satana troa tupathe lai atre cili ka mele nyipici, matre tro kö la mele i Iobu a ketre sipu jelethoi Satana. Haawe, thaa pexeje ju kö la caa drai nge kola atre hnei Iobu laka, hna atrekënö me humuthe la itre si angeic, nge ketre hna humuthe mina fe la itre hlue i angeic, nge meci asë hë lo treene lao nekö i angeic. (Iobu 1:13-19) Hapeu, hetre ethanyinë hë la mele i Iobu thupene la itupathi Satana? Kola amamane hnei Tusi Hmitrötr la aqane kapa Iobu la itre akötr hnei angeic hna cile kow; öni angeic, ka hape: “Hnei Iehova hna hamën, nge hnei Iehova hna xome hmaca; loi e qaja aloine la atesiwa i Iehova.”—Iobu 1:21.
6. (a) Nemene la ewekë ka traqa ngöne lo kola icasikeu hmaca e koho hnengödrai? (b) Drei mina fe la hnei Satana hna mekun, ngöne lo angeic a tupathe la mele i Iobu ka pë ethan koi Iehova?
6 Thupene jë hi lai, hna icasikeu hmaca e koho hnengödrai. Hnei Satana hmaca hna jelengazo Iobu, me hape: “Kupeine hnane la kupein, nge ite ewekë asë hna hetenyi hnene la ate tro angeic’ a hamëne hnane la mele i angeic. Ngo loi pe xejëjë enehila la ime i cilie, me lepe la ite june me ijö i angeic, nge tro angeic’ a jele ngazo cilie xajawa i cilie.” Easa goeëne laka hnei Satana hna jelengazone mina fe la itre xaa atr. Ame la angeic a qaja ka hape, “Ite ewekë asë hna hetenyi hnene la ate tro angeic’ a hamëne hnane la mele i angeic,” tre, thaa Diabolo hmekuje kö a tupathe la mele i Iobu matre troa angazone la aqane mele nyipici angeic koi Iehova, ngo ene mina fe la mele ne la nöjei “ate” ka thili koi Iehova. Haawe, hnei Akötresieti hna nue Satana troa lepi Iobu hnene la ketre mec ka ngazo. (Iobu 2:1-8) Ngo thaa pexeje pala kö la itre itupathi nyine tro Iobu a cile kow.
Ini Hne Së Hna Xom Qa Ngöne La Aqane Ujë i Iobu
7. Tune kaa la aqane akötrë Iobu hnene la föe i angeic memine lo itre atr ka traqa matre troa wai angeic?
7 Ame ngöne lo qaan la itre itupathi Iobu, akötre catre kowe la föe i Iobu troa goeë angeic e akötr. Maine jë eahlo a hleuhleu catre hnene laka, meci hë la itre nekö i eahlo nge pë asë hë lo itre mo ne la hnepe lapa i eahlo. Nge hleuhleu me hace fe koi eahlo troa goeëne la föi eahlo hna tithe hnene la ketre meci ka ngazo. Öni eahlo ju pe hi koi Iobu, ka hape: “Hape u, tro pala kö nyipëti a cate ngöne la meköti nyipë? Jele ngazo Akötesieti jë nge meciju!” Thupene jë hi lai, traqa hmaca pi fe hi koi Iobu la köni thupëtresij, Elifaza me Biledad me Zofar, göi troa aupunyi angeic. Ngo thaa ka loi kö la aqane waiewekë i angatr, ene pe mama pi hi laka, “itete aupun’ ajojezine” angatr. Drei la ketre ceitun, hnei Biledad hna qaja koi Iobu ka hape, ame la kepine la meci ne la itre nekö i Iobu, tre, nyiudreni kö lai a xeni pune la itre ewekë ka ngazo hnei nyiudreni hna kuca. Hnei Elifaza hna thele jëne troa qaja koi Iobu ka hape, angeice kö a xeni pune la itre ngazo hnei angeice hna kuca ekö. Hnei Elifaza mina fe hna amenune la aqane waiewekë i Iobu, me hape, thaa nyipi ewekë kö koi Akötresie la thiina ka pë ethan ne la atr! (Iobu 2:9, 11; 4:8; 8:4; 16:2; 22:2, 3) Ngacama akötre la itre itupathi cili, ngo hnei Iobu pala hi hna catr matre troa pë ethan la mele i angeic. Nyipici laka, ngazo la aqane ujë i angeic ke hnei angeic hna thele troa “jele meköti [angeice] kö hui Akötesie”, ngo ame pe, tre, hnei angeice pala hi hna mele nyipici. (Iobu 32:2)
8. Nemene la tulu ka lolo hna hamëne hnei Elihu kowe la itre ka ajane troa ixatua enehila?
8 Thupene lai, easa atre la pengöi Elihu, ketre atr ka traqa mina fe troa wai Iobu. Hnei Elihu hna pane drenge la itre mekune hna hamëne hnei Iobu memine lo köni sinee i angeic. Ngacama ka co catre Elihu hune lai ala foa, ngo atraqatre la inamacane i angeic. Hnei angeice hna ithanata hnyawa koi Iobu cememine la metrötr, ngöne la kola hëne la sipu ëje i angeic. Hnei Elihu hna qaja aloinyi Iobu pine laka meköti la thiina i angeic. Ngo hnei angeice mina fe hna qaja ka hape, tru menu pala ha la hnei Iobu hna qaja atrune laka, ka pë ethane la mele i angeic. Thupene lai, hnei Elihu hna qaja la itre trengewekë ka akeukawane la hni Iobu me hape, ame la troa nyihlue i Akötresie cememine la nyipici, tre, celë hi ewekë lai ka sisitria. (E jë la Iobu 36:1, 11.) Drei la ketre tulu ka lolo catre kowe la itre ka ajane troa hamë ixatua ngöne la hneijine së! Hnei Elihu hna xomihni ahoeanyi me drenge hnyawa, me qaja aloine me hamë eamo ka ithuecatr.—Iobu 32:6; 33:32.
9. Hnei Iehova hna xatua Iobu tune kaa?
9 Thupene lai, hetre ewekë ka ketre pengöne catre hna troa melëne hnei Iobu, ngöne la kola ithanata koi angeic hnei Iehova! Önine la edromë, ka hape: “Iehova a wetë koi Iobu hnine la wene.” Jëne la itre hnying, hnei Iehova hna xatua Iobu cememine la hni ka menyik, troa amekötine la aqane waiewekë i angeic. Hnei Iobu hna kapa hnyawa la ihaji, me hape: “Wanamamike ni . . . Inieti a . . . ietra ngöne la xaxau me hnatesij.” Hnei Iehova fe hna wesitrëne lo köni sinee i angeic, ke, “thaa hnei [angat] hna qaja göi [Iehova] la ka meköt”. Ene pe hnei Iobu hna thithi thatraqai angatr. Thupene lai, “hnei Iehova hna ahmacanyi Iobu qa hna po, e kola thithi fë la ite sine i angeic, nge hnei Iehova hna hamëne koi Iobu la ite hnane me ite melene lo ite ewekë hnapan.”—Iobu 38:1; 40:4; 42:6-10.
Tune Kaa Fe La Ejuine La Ihnimi Së Koi Iehova?
10. Pine nemene matre thaa hnei Iehova kö hna thele troa thatre Satana maine apaatrenyi angeice pena?
10 Iehova la Atre Xup me Atre Musi hune la nöjei hna xupe asë. Thaa hnei Nyidrëti kö hna thinge la lue meke i Nyidrë lo ijine kola silitrengathoi Nyidrë hnei Satan. Ngo hnei Nyidrëti hi hna nue troa pane hetre icilekeu, ke maine thaa semesine Satana ju hnei Nyidrë maine tro pena a apatrenyi angeice ekö, tre, thaa celë kö la nyine lai. Hnei Diabolo hna sili ewekë Iobu ketre hlue ka loi thiina, me hape, maine troa traqa elanyi kowe la mele i angeic la itre ejolene göi manie, canga tro hi angeic a nuetriji Iehova, thaa tro hë angeic a nyipici koi Nyidrë. Ngacama hna traqa koi angeice lai itupathi cili, ngo hnei Iobu pala hi hna nyipici. Thupene lai, hnei Satana hna qaja pitrun ka hape, maine kola akötre hnene la ketre atr ngöne la götrane la ngönetrei, haawe, tro hë angeic a kelikelë Akötresie. Hnei Iobu hna akötr, ngo hnei angeice pala hi hna catre matre thaa tro kö la itupath a hetre ethanyin kowe la mele i angeic. Haawe, ngacama ka thaa pexeje kö la atr cili, ngo hnene la aqane mele nyipici angeic hna amamane hnyawa laka ka sili trengathoi lae Satana. Nge tune ka fe lo itre xaa hlue i Akötresie?
11. Tune kaa la aqane amamane hnyawa Iesu, laka, ka thoi lae Satana?
11 Nyipici ngacama Satana a kuca asë la hnei angeic hna atrein matre troa tupathe la itre hlue i Akötresie, ngo maine tro angatr a catre thele troa pë ethane la mele i angatr isa ala caas, haawe, tro ha mama hnyawa laka, itre trengathoi hi lo itre hnei angeice hna qaja pitrun. Hnei Iesu hna traqa e celë fen me anyipicine hnyawa laka, ka thoi lae Satana. Iesu ekö la ketre atr ka pexej, ceitu memine lo pane keme së, ene Adamu. Hnene la aqane mele nyipici i Iesu uti hë la mec hna amamane hnyawa laka, ka thoi lae Satana nge ka nyi ewekëne angeice la itre atr matre troa iqajangazo.—Hna ama. 12:10.
12. Nemene la ewekë hna aijijëne la itre hlue i Iehova troa kuca, memine la hnëqa nyine tro angatr a xom?
12 Ngo Satana pala hi a tupathe la itre hlue i Iehova. Isa hnëqa së la troa mele nyipici nge isa hetrenyi së la itre ijine troa amamane laka, easa nyihlue Iehova hnene la ihnimi së koi Nyidrë, ngo thaa göi thupene kö. Tune kaa la aqane goeëne së la hnëqa cili? Easa goeëne lai ceitu me ketre hnëqa ka tru, ene la troa nyipici koi Iehova. Ketre, kola akeukawane la hni së hnene laka atre hi së ka hape, Iehova a xatua së troa xomihni ahoeane tui Iobu, nge Nyidrëti mina fe a ami ifegone la itre itupathi së ka traqa koi së.—1 Kor. 10:13.
Satana—Ketre Ithupëjia Ka Icilekeu Me Ka Iamenumenu
13. Nemene la itre ithuemacanyi göi Satana hna amamane hnene la tusi Iobu?
13 Hna hamë së hnene la itre Hna Cinyihan Qene Heberu la itre ithuemacanyi göne la itre nyinyithiina i Satana nyine hmahman, memine la aqane icilekeu i angeic me Iehova memine fe la aqane amenune angeic la nöjei atr asë. Ame ngöne la itre Hna Cinyihan Qene Heleni, hna amamane pala hi koi së la aqane icilekeu i Satana me Iehova, nge ame ngöne la tusi Hna Amamane, easa atre hnyawa laka easenyi hë troa anyipicine la musi cile i Iehova me lepe apaatrenyi Satana. Hnene la tusi Iobu hna akökötrene hnyawa la atrehmekune së, matre tro sa trotrohnine hnyawa la aqane icilekeu i Satana. Ame la Satana a sine la icasikeu e koho hnengödrai, tre, thaa göi tro kö a atrunyi Iehova. Ka iaö la aqane ujë i Diabolo, nge ka ngazo la itre mekune i angeic. Thupene la hnei Satana hna jelengazo Iobu, ene pe hna nue Satana pi hi troa tupathi angeic, “ame hnei Satana hna tropi qa ngöne la xajawa i Iehova.”—Iobu 1:12; 2:7.
14. Nemene la aqane ujë i Satana koi Iobu?
14 Haawe, kola qaja amamane hnyawa hnene la tusi Iobu laka, Satana hi la ithupëjia memine la nöjei atr asë nge ka pë ihnimi angeic. Hetrenyi la ketre hnepe ijin akawane lo icasikeu e koho hnengödrai hna qaja ngöne Iobu 1:6 memine lo hna qaja ngöne Iobu 2:1, ijine kola pane akötrë Iobu. Hnene la aqane mele nyipici Iobu hna aijijë Iehova troa sa koi Satana, ka hape: “Nge cate pala kö angeice ngöne la meköti angeic, nge hnei hmunë hna aeae eni troa apatenyi angeice, nge pëkö kepin.” Thaa hnei Satana kö hna kapa la mekun laka, itre trengathoi la hnei angeice hna qaja. Ngo hnei angeice pe hna sipone matre tro hmaca kö a tupathi Iobu, hnene la ketre aqane itupathi ka iakötre catr. Qa ngöne lai, hnei Diabolo hna tupathi Iobu ngöne la kola loi xölen la mele i angeic, me ngöne mina fe la angeic a puafala. Kola mama hnyawa laka, pëkö utipine i Satana kowe la itre puafala. Xele catre angeic ma wange la itre atr laka, ka pë ethane la mele i angatr. (Iobu 2: 3-5) Ngo hnene la aqane mele nyipici Iobu hna amamane laka, ka sili trengathoi lae Satana.
15. Nemene la itre aqane ujë ne la itre ka iamenumenu enehila, laka, ka ceitu me Satana?
15 Satana la ketre hna xup ka pane icilekeu me iamenumenu. Ame enehila, ceitune hi la itre aqane ujë ne la itre ka iamenumenu memine lo itre aqane ujë i Diabolo. Maine jë hna apoizinëne la itre mekune i angatr hnene la hna drenge la kola xöjetrije la itre atrene la itre ekalesia me itre qatre thup, maine pena lo Lapa Ne Xomi Meköt. Kola icilekeu fe hnene la itre xaa ka iamenumenu, ke, kola xele ma wang e troa xome la ëje i Akötresie, ene Iehova. Pëkö hni ne ajane i angatr troa atrepengöi Iehova maine pena troa nyihlue i Nyidrë. Ceitu memine la keme i angatr ene Satana, angatr a thele troa ananazijëne la lapaunene la itre atr ka pë ethane la mel. (Ioane 8:44) Celë hi kepin matre kola iananyi me angatr hnene la itre hlue i Iehova!—2 Ioane 10, 11.
Hnei Iobu Hna Atrune La Ëje i Iehova
16. Tune kaa la aqane ujë i Iobu koi Iehova?
16 Hnei Iobu hna xome me atrune la ëje i Iehova. Ame ngöne lo kola thuemacanyi Iobu laka, meci hë la itre nekö i angeic, ngacama akötre koi angeic ngo thaa hnei angeice kö hna jele ngazo Akötresie. Ngacama hnei Iobu hna upezöne menu Iehova pine la itre akötre i angeic, ngo thaa hnei angeice fe kö hna hane qaja angazone la ëje i Nyidrë. Hnei Iobu hna qaja e thupen ngöne la ketre hna ithanata i angeic, ka hape: “Hana wang, ame la qoue Iehova, celë hi inamacan, nge ame la troa tije la ngazo, celë hi trotrohnin.”—Iobu 28:28.
17. Nemene la ka xatua Iobu troa thele pala hi troa pë ethan la mele i angeic?
17 Nemene la ka xatua Iobu troa thele pala hi troa pë ethan la mele i angeic? Kola mama hnyawa laka, qëmekene troa tupathi angeic, hnei Iobu hna pane acatrene la aqane imelekeu i angeic me Iehova. Ngacama thatreine kö tro sa anyipicine laka atrehmekune hi Iobu laka hnei Satana hna nyizö Iehova, ngo ame pe hnei Iobu pala hi hna catre mele nyipici. Öni angeic ka hape: “Tha tro kö ni a tije qaja la thinange ka pë ethan, uti hë meci hë ni!” (Iobu 27:5) Hnei Iobu hna akökötrene tune kaa la aqane imelekeu i angeic me Iehova? Nyipici, hnei Iobu hna hnine catrëne la itre ewekë hnei angeice hna dreng, göne la itre aqane imelekeu i Iehova me Aberahama me Isaaka me Iakobo, ene lo itre xaa sinee ne la hnepe lapa i angeic. Hnene mina fe la hnei angeice hna goeëne la itre ewekë hna xup, ene pe hnei angeic hna wanga atrehmekune la itre thiina i Iehova.—E jë la Iobu 12:7-9, 13, 16.
18. (a) Hnei Iobu hna amamane tune kaa la aqane inyipicikeu i angeic me Iehova? (b) Tune kaa la aqane tro sa nyitipune la tulu ka loi hna melëne hnei Iobu?
18 Ame la hnei Iobu hna inin, tre, eje hi lai la ka ahlëne e kuhu hni i angeic la aja troa amadrinë Iehova. Maine jë hnene la itre sinee i angeice hna kuca la ketre ewekë ka akötrë Iehova maine pena “hna jele ngazo [Nyidrëti] e kuhu hni angat,” haawe, thaa hnei Iobu kö hna cile troa huujëne la itre öni. (Iobu 1:5) Ngacama akötre catre la itre itupath, ngo hnei Iobu pala hi hna goeëne aloine la itre ewekë göi Iehova. (Iobu 10:12) Drei la ketre tulu ka lolo catr! Nyipi ewekë fe tro sa hane catre atrepengöi Iehova hnyawa memine la itre aja i Nyidrë. Loi e tro sa kuca la itre huliwa ngöne la ua ka troa ithuecatre koi së, tune la troa ini tus me sine la itre icasikeu, me thith memine fe la troa cainöjëne la maca ka loi; ke itre eje hi lai ka troa acatrene la aqane imelekeu së me Iehova. Ketre, easë mina fe a kuca la hne së hna atrein matre troa ahlemune la ëje i Iehova. Nge pine laka hna amadrinë Iehova hnene la mele i Iobu ka pë ethan, haawe, ketre kolo mina fe a amadrinëne la hni i Iehova hnene la mele ka pë ethan ne la itre hlue i Nyidrëti enehila. Tro pë hë sa ce ithanatane la mekune cili ngöne la hna cinyihane ka troa xulu.
The Thëthëhmine Kö!
• Pine nemene matre kola goeë Iobu hnei Satana Diabolo?
• Nemene la itre itupath hna melëne hnei Iobu, nge hnei angeice hna ujë tune kaa?
• Nemene la ka troa xatua së troa thele pala hi troa pë ethan la mele së ceitu me Iobu?
• Jëne la tusi Iobu, nemene la hne së hna atre göi Satana?