Troa Xome La Ita Ne Thup Celë e 29 Maac Me Wiike Cili
‘Catre Jë Troa Qaja La Wesi Ula I Akötresie’
“Hna atiqa angat’ asë hnei Uati Hmitöt, ame hnei angate hna qaja la wesi ula i Akötesie hnene la cat.”—ITE HU. 4:31.
1, 2. Pine nemen matre loi e tro sa thele aqane troa hetre thangane la huliwa ne cainöje së?
KÖNI drai qëmekene troa meci hnei Iesu, hnei nyidrëti hna qaja, kowe la itretre dreng, ka hape: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj; ame hna traqapi la pun.” Thupene la mele hmaca i Iesu nge qëmekene tro nyidrëti a elë hnengödrai eë, hnei nyidrëti hna amekötine kowe la itre hlue i nyidrë troa ‘inine la nöjei nöj’ asëjëihë, me ini angatr troa trongëne la nöjei ewekë asëjëihë lo hnei nyidrë hna ahnithe koi angatr.’ Hnei nyidrëti hna ahnithe amë koi angatr, ka hape, tro nyidrëti a ce me angatr “ngöne la nöjei drai asëjëihë uti hë la pune la fene hnengödrai.”—Mat. 24:14; 26:1, 2; 28:19, 20.
2 Ame së, Itretre Anyipicine i Iehova, tre, easa catre troa xome la ketre huliwa hna nyiqaane hë ngöne lo hneijine i Iesu. Pëkö ketre huliwa ka hamë mel, tune la huliwa ne troa cainöjëne la Baselaia me inine la itre atr. Drei la enyipiewekëne tro sa thele matre troa hetre thangane la huliwa ne cainöje së! Tro sa ce wange ngöne la hna cinyihane celë la aqane troa xatua së troa catre cainöj hnene la hna nue la Uati Hmitrötr troa eatrongë së. Tro pë hë la lue hna cinyihane ka troa xulu a amamane la aqane troa xatua së hnene la uati hmitrötre i Iehova, troa maca troa hamë ini me catre pala hi troa cainöj.
Nyipi Ewekë Tro Sa Catr
3. Pine nemen matre nyipi ewekë tro sa catr ngöne la huliwa ne cainöjëne la Baselaia?
3 Ketre manathithi ka tru la troa xome la huliwa hnei Akötresie hna hamëne koi së, ene la troa cainöjëne la Baselaia. Ngo eje hi laka, thaa ka hmaloi kö e itre xaa ijin troa xome la huliwa cili. Ngacama hetre itre xaa atr ka kapa hnyawa la maca ka loi ne la Baselaia i Akötresie, ngo nyimutre catre kö la itre ka mele tune lo itre atr ne la hneijine i Noa. Öni Iesu, ka hape: “Tha ’te kö angate uti hë traqa ha la iwë, me cengöne thei angat’ asë pi.” (Mat. 24:38, 39) Nge, hetrenyi mina fe la itre atr ka ihnyima sai me ka icilekeu me easë. (2 Pet. 3:3) Maine jë tro fe a xulu la icilekeu qaathene la itre ka mus, me itre sine ce ini me easë, maine itre sine huliwa së maine itre sinee së pena. Ketre, hetre isa sipu hnepe ngazo së, tune la troa meije troa cainöj, me xou pena troa thipetriji së hnei itre xan. Nyimutre la itre ewekë ka ajolë së troa “amamane” me “cate” troa qaja la Wesi Ula i Akötresie. (Efe. 6:19, 20) Nyipi ewekë tro pala hi sa catr, maine thaa ajane kö së troa hmacahmaca troa qaja la Wesi Ula i Akötresie. Nemene la ka troa xatua së troa hetrenyi lai thiina ka catr?
4. (a) Nemene la aliene la hna hape troa catr? (b) Hna tune kaa matre catre jë Paulo cainöje kowe la angetre Thesalonika?
4 Ame la aliene la hnëewekë qene Heleni, hna hape, “cate” tre, kola qaja la ketre atr ka “thaa xou kö troa qaja mekötine la itre ewekë, me qaja la nyipici, nge thaa jole kö troa trotrohni angeic.” Ka ihmeku hnyawa la hnëewekë cili memine la “ka thaa cile hnö, me ka mejiun, . . . me ka thaa xou kö.” Ame la troa catr, tre, thaa kolo kö lai a hape, troa catre fë mekun maine troa calogitr pena. (Kol. 4:6) Ngacama tro sa catr, ngo aja së fe troa lapa iloi memine la nöjei atr asë. (Rom. 12:18) Ketre, nyipi ewekë tro sa tuluthe hnyawa la aqane catre së troa cainöjëne la Baselaia i Akötresie memine la troa maca troa ithanata, matre thaa tro kö sa akötrëne menune la itre xaa atr. Eje hi lai laka, maine easa ajane tro sa catr, nyipi ewekë tro sa thele troa eëne la itre xaa thiina ka loi. Ngo thatreine kö tro sa catr hnene la sipu trenge catre së. Thupene la hna ‘angazo Paulo memine la itre sine tronge i nyidrë e Filipi,’ hna tune kaa matre ‘catre pi’ kö angatr cainöje koi angetre Thesalonika? Öni Paulo e cinyihan, ka hape: “Göi [Jëne] Akötesi shë.” (E jë la 1 Thesalonika 2:2.) Ketre, ijije tro Iehova Akötresie a lepe trije la itre ewekë hne së hna xouen, me acatrenyi së.
5. Tune kaa la aqane xatua Peteru me Ioane me itre xaa hlue i Iesu ju kö hnei Iehova, matre catre pi kö angatr?
5 Ngacama kola icilekeu me Peteru me Ioane lue aposetolo hnene “la itete musi [ne la nöj] me ite qat, me angete cinyihany,” ngo hnei nyidro hna qaja, ka hape: “Maine meköti xajawa i Akötesie troa dei nyipunie, ma Akötesie? Ke tha ’teine kö nyiho troa tha qaja la nöjei ewekë hnei nyiho hna goeëne me deng.” Thaa hnei nyidroti kö hna thithi matre tro Akötresieti a apaatrene la icilekeu, ngo hnei nyidroti pe memine la itre xaa hlue i Iehova kö, hna sipo Nyidrë ka hape: “Iehova fe, da xajawatineju la ite iaqounyi angat, nge hamënejë kowe la ite hlue i cilie, troa qaja la wesi ula i cilie hnene la cate asë.” (Ite Hu. 4:5, 19, 20, 29) Nemene la aqane sa hnei Iehova la thithi angatr? (E jë la Ite Huliwa 4:31.) Hnei Nyidrëti hna xatua angatr jëne la uati hmitrötre i Nyidrë matre tro angatr a catr. Ketre, ijije mina fe tro la ua i Akötresie a hane xatua së ngöne la götrane cili. Haawe, tune kaa la aqane tro sa kapa la uati hmitrötre i Akötresie, me nue ej troa eatrongë së ngöne la huliwa ne cainöje së?
Aqane Tro Sa Eënyine La Thiina Ka Catr
6, 7. Nemene la aqane tro sa kapa mekötine la Uati Hmitrötre i Akötresie? Hamëne jë la itre ceitun.
6 Maine easa ajane troa kapa mekötine la uati hmitrötre i Akötresie, haawe nyipi ewekë tro sa sipone ej. Hnei Iesu hna qaja kowe la itre atr ka drei nyidrë, ka hape: “Maine nyipunie ite ka menu a wangate hmekune troa hamëne la ite ewekë ka loi kowe la ite nekö i nyipunie, hawe, tha tro kö la Tetetro i nyipunie e koho hnengödrai a hamëne la Uati Hmitöte koi angete sipo anganyidë!” (Luka 11:13) Eje hi laka, loi e tro pala hi sa sipone la Uati Hmitrötr jëne la thith. Maine easa xou troa xome la itre xaa aqane cainöj, tune la troa cainöj e cahu gojeny, me ngöne la nöjei ijin, maine pena ngöne la hna huliwa i maseta, haawe, loi e tro sa sipone la ua i Iehova jëne la thith, me sipone mina fe matre tro Nyidrëti a hamë së la trengecatr.—1 Thes. 5:17.
7 Celë hi la ewekë hna kuca hnene la ketre Keresiano föe, Rosa la ëjen.a Ame ngöne la ketre drai ne Rosa a huliwa, hnene la ketre atre hamë ini ka ce huliwa me angeic hna e la ketre rapor ka xulu qa ngöne la ketre uma ne ini, göne la aqane qanangazone la itre nekönatr. Pine laka atraqatre la akötr me elëhni ka eje thene lai föe ka hamë ini, ene pe eahlo a hokötr, ka hape, “Nemene jë elanyi la pengöne la fene celë?” Kola atrehmekune hnyawa hnei Rosa, laka, celë hi ketre ijine lai ka sisitria troa cainöje kowe la föe. Haawe, nemene hë la hnei angeic hna kuca matre troa hetre trenge catr troa ithanata? Öni Rosa, ka hape: “Hnenge hna thithi koi Iehova me sipone la ua i Nyidrë matre troa xatua ni.” Ene pe angeic a cainöje jë kowe lai föe, me isa pui me eahlo matre troa qeje pengöne hnyawa me sa lo lai hnying. Tro mina fe sa ce wange la pengö i Milan, ketre nekö jajinyi ka faifi lao macatre nge ka mele e Neweiok. Öni nyën, ka hape: “Qëmekene tro ni a tro troa ini, hnenge pala hi memine la thineng hna thithi koi Iehova.” Nemene la hnei nyidroti hna sipone ngöne la thith? Nyidroti a sipone la trenge catr ka ijij matre tro Milan a atreine cile catr me qaja pala hi la Akötresi nyën! Önine la thine i nyën, ka hape: “Celë hi la ka xatua Milan troa qeje pengöne hnyawa la mekuna i nyën, göne la troa atrune la itre drai ne mala memine la itre feet ka tru, me thupëne matre thaa tro kö a hane sine la itre feet cili.” Hapeu, thaa itre ceitun kö lai ka amamane laka, ijije hi tro la itre thithi së a xatua së matre tro sa catr?
8. Nemene la ini hne së hna xom qaathei Ieremia perofeta, ngöne la aqane troa catr?
8 Loi e tro mina fe sa mekune hnyawa la ewekë ka xatua Ieremia perofeta troa catr. Ame ngöne lo Iehova a acili Ieremia troa perofeta ne la nöjei ethen, tre, hnei angeice hna sa, ka hape: “Hana xajawatin, tha ’teine kö ni troa ewekë, ke nekönate ni.” (Iere. 1:4-6) Ngo thupene lai, hnei Ieremia hna cile hut me catr troa cainöj, ngacama nyimutre ju hë la itre atr ka goeë angeic ceitu me ketre atr ka qejeqeje hulö pala hi. (Iere. 38:4) Traqa koi 65 lao macatre ne angeice a catre tro fë la itre iameköti Iehova. Kola hlemu loi hnei Ieremia e Isaraela hnene laka ketre atr ka thaa xou kö nge ka catre cainöje angeic; celë hi matre ame ngöne lo 600 lao macatre thupen, hetrenyi la itre xaa atr ka mekun ngöne la angatr a goeëne la aqane catre cainöje Iesu, laka, mele hmaca ha Ieremia. (Mat. 16:13, 14) Hnei Ieremia perofeta, lo atre cile hnö ngöne lo xötrei, hna elë hune tune kaa la xou i angeic? Öni angeic ka hape: “Ej’ e kuhu hninge [la Wesi Ula i Akötresie] kösë eë ka mele hna thinge hnine la ite juneng; nge huliwa ni troa acatei hni, te, tha ’teine kö.” (Iere. 20:9) Eje hi, hnene laka hetre emenene la Wesi Ula i Iehova thei Ieremia, ene pe kola uku angeic troa ithanata.
9. Pine nemen matre ijije troa ketri së hnene la Wesi Ula i Akötresie tune la aqane ketri Ieremia?
9 Hnei Paulo aposetolo hna cinyihane ngöne la tusi nyidrë kowe la angetre Heberu, ka hape: “Mele la wesi ula i Akötesie, me men, me ka idei hune la taua ka lue qenön, kola thine me thupa luëne la hni me [“ua,” MN] memine la hna itö june la ngönetei me xetën, nge ate amekötine la ite mekune me ite aja ne la hni.” (Heb. 4:12) Ijije tro la maca maine Wesi Ula i Akötresie, a ketri së tune la aqane ketri Ieremia. The thëthëhmine kö së, laka, ngacama hna iëne la itre trahmanyi troa cinyihane la Tusi Hmitrötr, ngo thaa thangane kö la inamacane i atr, ke, ka xulu la Tusi Hmitrötr qaathene la Ua i Akötresie. Easa e ngöne 2 Peteru 1:21, ka hape: “Tha traqa kö la hna perofetan’ ekö ngöne la aja i ate, ngo hnei ite ate qa thei Akötesie hna ulatine thenge la hna upi angate hnene la Uati Hmitöt.” Maine tro sa xomi ijine hnyawa troa ketre sipu inine la Tusi Hmitrötr, tro ha tiqa la itre mekune së hnene la maca hna hamëne jëne la Uati Hmitrötr. (E jë la 1 Korinito 2:10.) Troa mama laka ame la maca cili, tre “kösë eë ka mel” e kuhu hni së, matre thatreine hë së lapa fë.
10, 11. (a) Maine easa ajane troa catre cainöj, tune kaa la aqane tro sa inine la Tusi Hmitrötr? (b) Qaja jë la ketre jëne tro sa akökötrene la aqane isa inine së la Tusi Hmitrötr.
10 Maine easa ajane troa ketri së hnene la hne së hna isa inine la Tusi Hmitrötr, haawe, loi e tro sa thele la aqane tro la maca ne la Tusi Hmitrötr a ketr la atr ka eje e kuhu hni së. Drei la ketre ceitun, hnei Ezekiela hna meköle goeëne la kola upi angeic troa xeni la tusi hna ewath; nge eje e hnine la tusi cili la ketre maca ka catr hnei angeice hna troa tro fë kowe la ketre nöj ka xele ma idrei. Tro Ezekiela a atrepengöne hnyawa la maca cili nge tro eje a mele e kuhu hni angeic. Maine tro angeic a ujë tune lai, tre, tro ha hnyapa la aqane tro angeic a tro fë la maca cili tune la hani.—E jë la Ezekiela 2:8–3:4, 7-9.
11 Ceitune hi la pengö së me Ezekiela. Nyimutre enehila la itre atr ka xele ma drenge la hnei Tusi Hmitrötr hna qaja. Maine easa ajane troa catre qaja la Wesi Ula i Akötresie, haawe, nyipi ewekë tro sa inine la Itre Hna Cinyihan, matre tro sa trotrohnine hnyawa me jele nyipicine ej. Loi e tro pala hi sa eatrëne hnyawa la porogarame ne ini Tusi së. Epi troa caasi la aja së memine la hna nyimane hnene la atre cinyihane la salamo, ka hape: “Iehova fe, gitinge me ate amele ni, nge nyine kapa xajawa i cilie la hna qaja hnene la ukeineqeng, memine la mekuna ne la hning.” (Sal. 19:14) Drei la enyipiewekëne tro sa xomi ijin troa sine thele la itre mekune hne së hna e, matre tro la itre nyipici qa hnine la Tusi Hmitrötr a ketr me lapane hnyawa la itre hni së! Eje hi laka, loi e tro sa catre troa akökötrene la aqane isa inine së la Tusi Hmitrötr.b
12. Pine nemen matre kola eatrongë së hnene la Uati Hmitrötr ngöne la easa sine la itre icasikeu i Keresiano?
12 Ame la ketre aqane tro sa kepe thangane qa ngöne la Uati Hmitrötre i Iehova, tre, ene la troa “imekunekeune mate troa aciane la ihnimi me ite huliwa ka loi, [nge] tha tro kö a tije la icasikeu shë.” (Heb. 10:24, 25) Maine easa ajane troa eatrongë së hnene la Uati Hmitrötr, loi e tro sa sine pala hi la itre icasikeu ne Keresiano me hane drenge hnyawa, me catre trongëne la itre ini hne së hna kapa. Hapeu, thaa Iehova kö a hamëne la Uati Hmitrötre i Nyidrë jëne la ekalesia?—E jë la Hna Amamane 3:6.
Itre Thangane La Hna Thele Troa Catr
13. Nemene la ini hne së hna kapa qa ngöne la aqane cainöje ne lo itre pane Keresiano?
13 Atraqatre catre kö la mene ne la uati hmitrötr e koho hnengödrai me e celë fen, nge ijije tro ej a thue trenge catre kowe la itre atr troa kuca la aja i Iehova. Hnene la emenene ej, ene pe hna aijijëne lo itre pane Keresiano troa catre xome hnyawa la ketre huliwa ne cainöj ka tru. Hnei angatre hna cainöjëne la maca ka loi “kowe la nöjei ate asëjëihë e celë fen.” (Kol. 1:23) Ame la easa öhne laka, itre ka “tha ’te tus me tha hna inin” la itre xan e angatr, mama hnyawa pi hi laka, hetrenyi la ketre trenge catre ka tru ka uku angatr.—Ite Hu. 4:13.
14. Nemene la ka troa xatua së troa “cate la hni” së?
14 Maine tro sa nue la uati hmitrötr troa eatrongë së ngöne la mele së, eje hi lai laka, tro fe ej a uku së troa catre cainöj. Tro hë la itre manathithi hne së hna kapa qa ngöne la hna catre sipone la ua jëne la thith, me isa catre ini Tus, me sine thele pala hi ngöne la thith la itre mekun hne së hna e, me catre sine la itre icasikeu ne Keresiano, a xatua së troa “cate la hni” së. (Rom. 12:11) Hanawange la hna qaja hnene la Tusi Hmitrötr, göne la ketre “ate Iuda, Apolo la ëjen hna hnahon’ e Alesanederia, ate ateine cainöj, [nge ka traqa e Efeso,]” kola hape: “Keukawa la hni angeic, ame hnei angeice hna ewekë me inine hnyawa la ite ewekë göi Iesu.” (Ite Hu. 18:24, 25) Maine ka “cate la hni” së, haawe, tro hë së lai a catre ngöne la kola cainöje ngöne itre hnalapa trootro, me ngöne la nöjei ijin.—Rom. 12:11.
15. Nemene la thangane hne së hna kapa qa ngöne la hna catre cainöje pala hi?
15 Hetre thangane ka loi hne së hna kapa qa ngöne la hne së hna catre pala hi ngöne la hna cainöje trootro. Kola lolo trootro la aqane ujë së, ke, trotrohnine hnyawa ha së la enyipiewekëne la huliwa hne së hna kuca memine la eloine eje koi së. Hnene laka hetre thangane la hne së hna cainöj, ene pe kola elë la madrine së, nge kola atraqatre mina fe la aja së kowe la huliwa.
16. Nemene la nyine tro sa kuca, e nanazije jë la trenge aja së kowe la huliwa ne cainöj?
16 Nemene la nyine tro sa kuca, maine kola nanazije la trenge aja së kowe la huliwa ne cainöj? Nyipi ewekë tro sa pane wange hnyawa la isa aqane mele së. Hnei Paulo hna cinyihan, ka hape: “Thelejë e kuhu ite hni nyipunieti kö, hape u, nyipunieti hë ngöne la lapaun; tupathi nyipunieti ju kö.” (2 Kor. 13:5) Isa thele jë, ka hape: ‘Hapeu, eje pala hi thenge la aja atraqatr? Eni kö a sipo Iehova la uati hmitrötre i Nyidrë jëne la thith? Itre thithinge kö a amamane laka, ini a lapaune koi Iehova, matre troa kuca la aja i Nyidrë? Itre eje kö a amamane la hni ne ole së kowe la huliwa ne cainöj hna ahnithe koi së? Tune kaa la porogarame i eni göne la troa sipu inine la Tusi Hmitrötr? Ije hawa hnenge hna xom matre troa sine thele la itre mekun hnenge hna e me hane dreng? Tune kaa la aqane thele ni troa kepe thangane qa ngöne la itre icasikeu ne la ekalesia?’ Maine tro epuni a mekune hnyawa la itre hnyinge celë, tro hë lai a xatua epuni troa atrehmekune la itre götrane nyine troa kökötre ngön, me thele troa amekötine itre ej.
Nue Pi La Uati Hmitrötre i Akötresie Troa Acatrenyi Epun
17, 18. (a) Nemene enehila la etrune la huliwa ne cainöj hna kuca e cailo fen? (b) Easa amamane tune kaa, laka, hetre “tenge cate” së troa tro fë la maca ka loi ne la Baselaia i Akötresie?
17 Thupene lo mele hmaca i Iesu, hnei nyidrëti hna qaja kowe la itretre drei nyidrë, ka hape: “Tro nyipunie a hete mene e hlepëtipi la Uati Hmitöte koi nyipunie; nge tro nyipunie a anyipici ni e Ierusalema, me Iuda asë, me Samaria, nge uti hë la cane la fene hnengödrai.” (Ite Hu. 1:8) Kola sisedrëne enehila la huliwa cili ngöne la fene hnengödrai asë. Kola e la sevene milio lao Itretre Anyipicine i Iehova ka catre tro fë la maca ne la Baselaia ngöne la 230 lao nöje nge sin, nge traqa koi 1,5 miliar lao hawa ne cainöje angatr ngöne la macatre. Drei la ketre manathithi ka tru troa hane catre xome la huliwa celë, huliwa hna thaa tro hmaca kö a kuca elany!
18 Ceitune hi la hneijine së enehila memine lo hneijine i Iesu ekö, laka, kola eatrëne la huliwa ne cainöj e cailo fen jëne la uati hmitrötre i Akötresie. Maine tro sa nue matre troa eatrongë së hnei uati hmitrötr, eje hi lai laka, tro hë sa hetre “tenge cat” ngöne la hna cainöj. (Ite Hu. 28:31) Qa ngöne lai, epi tro sa nue la uati hmitrötr troa eatrongëne la mele së, me catre tro fë la maca ka loi ne la Baselaia i Akötresie!
[Ithueamacany]
a Hna saze la itre ëj.
b Maine epuni a ajane troa kepe thangane ka loi qa ngöne la hnei epuni hna e me ketre sipu inine la Tusi Hmitrötr, wange ju la itus Tirez profit de l’École du ministère théocratique, ngöne la itre taan mekun hna hape, “Appliquez-vous à la lecture” me “Les bienfaits de l’étude” götrane 21-32.
Nemene La Hnei Epuni Hna Inin?
• Pine nemen matre nyipi ewekë tro sa catr ngöne la easa qaja la Wesi Ula i Akötresie?
• Nemene la ka xatuane lo itre pane Keresiano troa catre cainöj?
• Tro sa catre tune kaa?
• Nemene la eloine koi së e tro sa catr?