Troa Xome La Ita Ne Thup Celë e 7 Juun Me Wiike Cili Nyima 116 Me 19

Hnëqa Ne La Uati Hmitrötr Ngöne La Kola Eatrëne La Aja i Iehova

“Tro . . . la tenge ewekënge kola tropi qa ngöne la qeng . . . a kuca la ajang, me eate ngöne la ewekë hnenge hna up’ eje kow.”—IS. 55:11.

1. Amamane jë la eisapengönene la troa eköth amë la itre ewekë memine la troa thele troa eatrëne la ketre aja.

PANE mekune jë nyipunie laka kola isa hnëkë la lue trahmanyi troa xomi kar. Hetrenyi ketre la ketre map ka qeje pengön me amamane hnyawa la gojenyi hnei angeic hna troa xom matre traqa pi kowe la ketre götran. Ame ketre, tre, ka mama cile hnyawa la gojenyi angeic ngöne la mekuna i angeic, hetrenyi mina fe la itre xaa hmene gojenyi hnei angeic hna atre. Ka hnëkë angeic matre e traqa ju la ketre jol, tre, atreine hi troa cile kow. Kolo mina fe a mama la eisapengönene la isa aqane hnëkë nyidro, laka, ketre a eköthe amë la itre ewekë, nge ketre a thele troa eatrëne la ketre aja. Ijije troa aceitunëne la itre ewekë hne së hna eköthe amë memine la ketre map ka qeje pengöne hnyawa la ketre gojeny; ngo ame la aja hne së hna thele troa eatrën, tre, eje ngöne la mekuna së, ngo thaa hna qaja mekötine hnyawa kö la aqane troa eatrëne lai.

2, 3. (a) Nemene la aja i Iehova, nge nemene la hnei Nyidrëti hna kuca ngöne lo kola eni wathebo hnei Adamu me Eva? (b) Pine nemene matre loi e tro sa catre mele thenge la aja i Iehova, laka, kola mama trootro?

² Ame la Iehova a mekune troa aejëne la aja i Nyidrë, thaa hnei Nyidrëti kö hna eköthe amë hë la itre ewekë, ngo ketre aja pe hnei Nyidrëti hna troa eatrëne trongëne ngöne la itre hneijin. (Efe. 3:11) Ame la aja cili, tre, kolo aja i Nyidrëti ekö ngöne la qaane kowe la nöjei atr asë me kowe la ihnadro, ene la troa aparadraison la ihnadro matre tro la itre atr ka pexej a mele tingeting me madrin uti hë epine palua. (Gen. 1:28) Ame lo Adamu me Eva a eni wathebo, hnei Iehova hna cile kowe la jole cili me canga hnëkëne amë la itre ewekë matre troa eatr pala hi la aja i Nyidrë. (E jë la Genese 3:15.) Hnei Iehova hna ahnithe laka, tro la föi Nyidrë ngöne la götrane la ua a hamëne la ketre “matran,” maine Hupuna ka troa lepe apaatrenyi Satana, memine la nöjei akötr asë hnei angeic hna kuca.—Heb. 2:14; 1 Ioane 3:8.

³ Pëkö ketre men e hnengödrai maine e celë fen, ka atreine troa sewe Akötresie troa eatrëne la aja i Nyidrë. (Is. 46:9-11) Pine nemene matre easa qaja la mekune celë? Pine laka ka hetre thangane la uati hmitrötre i Iehova. Hnene la trenge catre cili, matre jelenyipine jë së laka, tro ha “eate” la aja i Akötresie. (Is. 55:10, 11) Pine laka kola amamane trongëne hnei Akötresie la aja i Nyidrë, haawe, nyipi ewekë tro sa mele thenge la aja cili. Tro sa kapa elany la itre manathithi ka tru, e hna eatre la aja cili. Ketre, kola acatrene la lapaune së hnene la aqane huliwane Iehova la uati hmitrötre i Nyidrë. Qa ngöne lai, loi e tro sa ce wange la hnëqa ne la uati hmitrötr ngöne lo hneijine ekö, me ngöne la hneijine së enehila me ngöne la itre drai elany, ngöne la aqane troa eatrëne la aja i Iehova.

Hnëqa Ne La Uati Hmitrötr Ngöne Lo Hneijine Ekö

4. Hnei Iehova hna qaja amamane trongëne tune kaa la aja i Nyidrë?

⁴ Ame ngöne lo hneijine ekö, thaa hnei Iehova kö hna aca tro amamane ju hi la aja i Nyidrë; ohea, hnei Nyidrëti pe hna amamane trongëne ej. Ame petre kö ekö, tre, ketre “ewekë ka sihngöd” lo Matran hna thingehnaean. (1 Kor. 2:7) Thaa 2 000 ju kö lao macatre, nge kolo hmaca ha amexeje lo lai matran hnei Iehova. (E jë la Genese 12:7; 22:15-18.) Hnei Iehova hna thingehnaeane koi Aberahama la ketre ewekë, laka, troa eatr ngöne la fene hnengödrai asë. Kola mama hnyawa ngöne la trenge ewekë celë hna hape, “qa thene la matra i ’ö,” laka, ame lo lai Matran, tre, ketre atr ka troa xulu qaathei Aberahama. Ka xecie koi së, laka, hnei Satana hna thele jëne matre thaa tro pi kö a mama la ewekë cili. Eje hi laka casi hi la hna thele hnene la atre Icilekeu, ene la troa lepe apaatrene maine troa apuingazone pena la matra i Aberahama matre thaa tro kö a eatr la aja i Akötresie. Ngo pë ju kö thangane la trenge catre i angeic, pine laka, catrehnine kö la huliwa ne lo ua i Akötresie. Hna tune kaa lai?

5, 6. Hnei Iehova hna huliwane tune kaa la ua i Nyidrë, matre thaa hane ju kö ketr lo ketre ne la angetre sin lo Matran?

⁵ Hnei Iehova hna upe la ua i Nyidrë matre troa thupëne la itre atr angatr isa ala cas, itre xötre atr ka xulu qa thene la Matran. Hnei Iehova hna qaja koi Aberama (Aberahama), ka hape: “Ini la pete i eö.” (Gen. 15:1) Ka hetre aliene la trenge ewekë. Pane ce wange jë së la ewekë ka traqa ngöne lo macatre 1919 M.P.K., macatre ne kola pane lapalapa hnei Aberahama me Sara e Gerara. Hnene laka thatre kö Abimeleke joxu ne Gerara , laka, föi Aberahama lae Sara, xomi Sara jë hi hnene lai joxu nyine föe i nyidrë. Hapeu Satana jë kö la qaane la jole cili, matre sewe Sara troa hamë matra i Aberahama? Thaa hna qaja kö hnei Tusi Hmitrötr. Ngo kolo pe a qaja hnene la Wesi Ula, ka hape, hnei Iehova hna xatua nyidro. Hnei Nyidrë hna hmekë Abimeleke ngöne la ketre pu, matre thaa tro pi kö nyidrë a ketri Sara.—Gen. 20:1-18.

⁶ Thaa cili hmekuje kö la ijine kola thupë nyidro hnei Iehova. Nyimutre la itre ijine amele Aberahama me lapa i nyidrë hnei Iehova. (Gen. 12:14-20; 14:13-20; 26:26-29) Qa ngöne lai, hnene la atre cinyihane la salamo hna qaja göi Aberahama me itre matra i nyidrë, ka hape: “Tha hnei nyidëti [Iehova] kö hna nue la kete troa qana angazo angat; nge hna shewe ite joxu pi angat; kola hape: ‘The kete kö la ite sianang, nge the angazone kö la ite perofetang.’ ”—Sal. 105:14, 15.

7. Nemene la aqane thupëne Iehova la nöje i Isaraela?

⁷ Hnei Iehova hna huliwane mina fe la ua i Nyidrë matre troa thupëne lo nöje Isaraela ekö, ke, celë hi nöje lai hna troa fetra qa ngön hnene lo Matran hna thingehnaean. Hnei Iehova hna hamëne jëne la ua i Nyidrë la Trenge Wathebo koi angetre Isaraela, ene lo itre ka troa sajuëne la nyipi hmi me thupëne la angetre Iudra qa ngöne la nöjei iajojezi ngöne la götrane la ua, ngöne la thiina me ngöne la ngönetrei. (Eso. 31:18; 2 Kor. 3:3) Ame ngöne lo hneijin ne lo Angetre Amekötin, hnei Iehova hna xome la ua i Nyidrë matre troa hamë mene ne la itre xaa trahmany ka troa thapa la nöje i Isaraela qaathene la itre ithupëjia me angatr. (A. ame. 3:9, 10) Ame ngöne lo itre hadredr lao macatre qëmekene troa hnaho Iesu, lo pane götran ne la matra i Aberahama, nyipi ewekë troa thupëne la traon e Ierusalema me Betheleema memine la ēnē hnene la uati hmitrötr, ke, itre traone lai ka hetre hnëqane catr ngöne la kola troa eatr la itre hna perofetane göi Iesu.

8. Nemene la ka amamane laka hetre thangane la uati hmitrötr ngöne la mele ne la Hupuna i Akötresie me ngöne la huliwa ne cainöje i nyidrë?

⁸ Hetre thangane mina fe la uati hmitrötr ngöne la mele i Iesu me ngöne la huliwa ne cainöje i nyidrë. Pë petre kö ewekë ekö hna kuca hnene la uati hmitrötr, tune la troa xome la mele ne la ketre medrenge ka pexej nge ka thaa hane xeni pune kö lo ngazo me mec, me amë hnine la trengene hnaho ne la ketre jajinyi ka thaa pexeje kö, ene Maria. (Luka 1:26-31, 34, 35) Ame hë e thupen, hnene hmaca kö la ua hna thupë Iesu ngöne lo kola mekune troa humuthi nyidrë nge medrenge petre kö nyidrë. Mat. 2:7, 8, 12, 13) Ame lo kola thötre lao macatre i Iesu, hnei Akötresieti hna ië nyidrë jëne la uati hmitrötr matre troa cilëne hnei nyidrëti la therone i Davita, nge matre troa ahnithe la ketre hnëqa nyine tro nyidrëti a kuca, ene la troa cainöj. (Luka 1:32, 33; 4:16-21) Hnene la uati hmitrötr hna hamë mene i Iesu matre troa kuca la itre iamamanyikeu, tune la troa aloine la itre ka wezipo, me ithuane la ka ala nyim, me amelene hmaca la itre ka mec. Ame la itre huliwa ka sisitria cili, tre, itre ej a nyihatrene la itre manathithi hne së hna troa kapa elany fene la musi Iesu.

9, 10. (a) Hna mama tune kaa la thangane la uati hmitrötr thene lo itre pane hlue i Iesu? (b) Nemene la ewekë ka mama ngöne lo hneijine i Iesu, nge ka eatrëne la aja i Iehova?

⁹ Qaane lo Penetekos 33 M.K., hnei Iehova hna xome la ua i Nyidrë matre troa iëne la hnaaluene götran ne la matra i Aberahama, nge nyimutre e angatr la itre ka thaa xulu kö qaathene la matra i Aberahama. (Rom. 8:15-17; Gal. 3:29) Kola mama hnyawa la thangane la uati hmitrötr thene lo itre pane Keresiano, nge kola aijijë angatr troa catre cainöj me hamë mene i angatr matre troa kuca la itre huliwa ka tru. (Ite hu. 1:8; 2:1-4; 1 Kor. 12:7-11) Kola amamane hnene la uati hmitrötr, jëne la itre ahnahna celë hna hamëne kösë iamamanyikeu, laka, hetrenyi la ketre aqane tro Iehova a eatrëne la aja i Nyidrë. Thaa Iehova hmaca kö a xome lo itre hna amekötine ekö göi troa hmi hnine la ēnē e Ierusalema. Ngo Nyidrëti a kapa la ekalesia ne Keresiano hna hnyipi eköth. Nge qaane ju hi la ijine cili, Iehova ha xome lai ekalesia hna iën matre troa eatrëne la aja i Nyidrë.

¹⁰ Hetrenyi la itre aqane huliwane Iehova la uati hmitrötre i Nyidrëti ekö matre troa eatrëne trongëne la aja i Nyidrë; tune la troa thupën me hamë men me iëne la itre atr. Ngo tune kaa fe ngöne la hneijine së? Tune kaa la aqane xome Iehova enehila la ua i Nyidrë, matre troa sajuëne la aja i Nyidrë? Nyipi ewekë troa sa la itre hnyinge cili, ke, easa ajane troa mele thenge la ua. Qa ngöne lai, loi e tro sa pane ce wange la fao lao götran, Iehova a huliwane ngön la ua i Nyidrëti enehila.

Hnëqa Ne La Uati Hmitrötr Ngöne La Hneijine Së Enehila

11. Nemene la ka amamane laka, uati hmitrötr la ka acatrene la thiina ka pë ethan thene la nöje i Akötresie, nge tro sa amamane tune kaa laka, easa ce huliwa memine la ua cili?

¹¹ Ame la hnapan, tre, uati hmitrötr a acatrene la thiina ka pë ethan ngöne la nöje i Akötresie. Nyipi ewekë troa thiina ka wië la itre atr ka trene hnëqa ngöne la kola kuca la aja i Iehova. (E jë la 1 Korinito 6:9-11.) Hetrenyi la itre xaa Keresiano enehila, laka, itre ka catre kuca ekö lo itre huliwa ka ngazo, tune la kuci ngazo me nyi xetë me qene sodoma. Ame la itre huliwa celë ka ngazo, tre, itre ka fetra qa ngöne la itre aja ka catre lapane la hni. (Iako. 1:14, 15) Ngo ame pe, tre, hnene la itre atr cili hna “ahmitötë” angatr; kola hape, hnei angatre hna saze me wenë amekötine la itre ewekë ngöne la mele i angatr matre troa amadrinë Akötresie. Nemene la ka aijijëne la ketre atr ka hnimi Akötresie troa cile catr kowe la aja troa kuca la itre ewekë ka ngazo? Kola qaja ngöne 1 Korinito 6:11, ka hape, “Ua i Akötesi shë.” Maine tro pala hi sa thiina ka wië, haawe, easë hi lai a nue la ua cili troa eatrongëne la mele së.

12. (a) Thenge la hna meköle goeëne hnei Ezekiela, tune kaa la aqane eatrongëne Iehova la organizasio i Nyidrë? (b) Tro sa amamane tune kaa laka, easa ce huliwa memine la ua?

¹² Ame la hnaaluene götran, tre, ene laka Iehova a xome la ua i Nyidrë matre troa eatrongëne la organizasio i Nyidrë, thenge la sipu aja i Nyidrë. Ame ngöne lo hna meköle goeëne hnei Ezekiela, kola nyihatrene la ketre götran ne la organizasio i Iehova e koho hnengödrai, hnene la ketre ikariota ka catr nge ka nyinyape pala hi troa eatrëne la aja i Iehova. Nemene la ka upe la ikariota troa xome la ketre gojeny? Uati Hmitrötr. (Ezek. 1:20, 21) Thaa tro pi kö sa thëthëhmin, ka hape, ka lue igötranen la organizasio i Iehova, ketre e koho hnengödrai nge ketre e celë fen. Maine kola elemekene la itre ewekë e koho hnengödrai hnene la uati hmitrötr, ketre kolo mina fe a hane tune e celë fen. Maine tro sa drengethenge me nyipici kowe la itre hna amekötine hna hamëne hnene la götran ne la organizasio i Akötresie ka eje e celë fen, tre, easë hi lai a cengöne nyinyape memine la ikariota i Iehova e koho hnengödrai, me ce huliwa memine la uati hmitrötre i Nyidrë.—Heb. 13:17.

13, 14. (a) Drei la itre atrene la “xöte celë” hna qaja hnei Iesu? (b) Hamëne jë la ketre ceitun ka amamane la ixatua qaathene la uati hmitrötr göne la troa trotrohnine la itre nyipici qa hnine la Tusi Hmitrötr. (Wange ju la itre mekun hna eköhagen, hna hape “Hapeu, Nyipunieti Kö a Xötrethenge La Aqane Kökötr La Lai?”)

¹³ Ame la hnaakönine götran, tre, ene laka Iehova a xome la uati hmitrötr matre troa xatua së troa trotrohnine la itre trenge nyipici qa hnine la Tusi Hmitrötr. (Ite edomë 4:18) Hna xome pala hi la zonale celë hnene la “hlue ka nyipici me ka inamacan” matre troa amamane trootro la itre nyipici qa hnine la Tusi Hmitrötr. (Mat. 24:45) Drei la ketre ceitun, tro sa pane ce ithanatane la aqane trotrohnine së la itre atrene “la xöte celë” lo hna qaja hnei Iesu. (E jë la Mataio 24:32-34.) Nemene xötr la hnei Iesu hna qaja? Kola qeje pengöne hnene la hna cinyihan, hna hape, “La présence du Christ : que signifie-t-elle pour vous? “ (hlepëti hmaca i Iesu, nemene la aliene lai koi nyipunie?) ka hape, thaa Iesu kö a qaja lo itre atr ka ngazo, ngo nyidrëti pe a qaja lo itretre drei nyidrë hna iën hnene la uati hmitrötr.a Tro hmekuje hi lo itre hna iën ngöne lo hneijine i Iesu me ngöne la hneijine së, a öhne la hatren me hane wanga atrehmekune la aliene la kola hape, “celë hë [Iesu] e qëhnelö.”

¹⁴ Nemene la aliene la trenge ewekë cili koi së? Ngacama thatreine kö së troa qaja hnyawa la eqeane la mele ne la “xöte celë,” ngo loi e tro pala hi sa hnehene la itre xaa aliene la hnëewekë, hna hape, “xöte”: Hna lapaa qaja la itre atr ka isapengöne la itre macatre nge ka mele ngöne la ketre hneijin, laka, thaa ka qea menu kö ngo ka hetre pun. (Eso. 1:6) Haawe, tro sa trotrohnine tune kaa la aliene la itre hnëewekë i Iesu, göne la “xöte celë”? Nyidrëti hi a qaja la xötre ne la itre hna iën ka troa mel, qaane ju hi lo ijine kola nyiqaane mama la hatrene la hlepëti Iesu ngöne lo macatre 1914, uti hë elanyi la kola troa nyiqaane la akötr atraqatr. Haawe, hetre qaane la xötre cili, nge ketre tro ha hetre pun ne ej. Kola mama hnyawa ngöne la aqane eatre la itre hatren, laka, easenyi catre hë la akötr atraqatr. Maine tro pala hi sa hmek, eje hi lai laka tro pala hi sa kapa la itre nyipici qa hnine la Tusi Hmitrötr, me drengethenge la kola eatrongë së hnei uati hmitrötr.—Mar. 13:37.

15. Nemene la ka amamane laka, uati hmitrötre la ka hamë trenge catre së troa cainöjëne la maca ka loi?

¹⁵ Ame la hnaafoane götran, tre, kola hamë trenge catre së hnene la uati hmitrötr troa cainöjëne la maca ka loi. (Ite hu. 1:8) Drei la ka atreine kuca matre troa haöthe la fen asë hnene la maca ka loi? Pane mekune jë nyipunieti la ewekë cili. Maine jë nyipunie la ketre atr ka xou ekö troa ithanata nge ka hane mekun, ka hape, ‘Thatreine kö ni troa hane cainöje elany ngöne itre hnalapa trootro!’ Ngo ame hë enehila, tre, ketre trejine hë nyipunie ka catre xome la huliwa cili.b Nyimutre la Itretre Anyipicine i Iehova ka mele nyipici me catre pala hi cainöj ngacama kola icilekeu me axösisi angatr. Uati hmitrötre i Akötresie hmekuje hi la ka hamë trenge catre së troa cile kowe la itre jole ka tru, me aijijë së troa kuca la itre ewekë hne së hna thatreine kuca hnene la sipu trenge catre së. (Mika 3:8; Mat. 17:20) Maine tro pala hi sa catre cainöj, haawe, easë hi lai a ce huliwa memine la ua cili.

Hnëqa Ne La Uati Hmitrötr Ngöne La Itre Drai Elany

16. Pine nemen matre loi e tro sa mejiune laka, tro Iehova a thupëne la nöje i Nyidrë ngöne la akötr atraqatr?

¹⁶ Tro ha sisitria elany la itre aqane tro Iehova a xome la uati hmitrötre i Nyidrë matre troa eatrëne la aja i Nyidrë. Tro sa ce wange la aqane tro ej a thupë së. Tune lo hne së hna ce wange hë, hnei Iehova hna xome la ua i Nyidrë ngöne lo hneijine ekö matre troa thupëne la nöje Isaraela memine fe la itre atr, angatr isa ala cas. Qa ngöne lai, nyimutre la itre kepin ka upi së troa mejiune laka, tro Nyidrëti elany a xome la ua cili matre troa thupëne la nöje i Nyidrë ngöne la ijine akötr atraqatre ka calemi catr. Thaa nyipi ewekë kö tro sa thele me pi atre hnyawa la aqane tro Iehova elanyi a thupë së. Ijije pe tro sa mejiune hnyawa kowe la itre drai elany, me atrehmekune laka thaa tro kö a sihngödri la itretre hnimi Iehova xajawa i Nyidrë maine nanyi pena qaathene la uati hmitrötre i Nyidrë.—2 A. l. ite jo. 16:9; Sal. 139:7-12.

17. Tune kaa la aqane tro Iehova a xome la uati hmitrötre i Nyidrë ngöne la fen ka hnyipixe?

¹⁷ Tune kaa la aqane tro Iehova a xome elanyi la uati hmitrötre i Nyidrë ngöne la fene ka hnyipixe? Tro Iehova a xome la ua i Nyidrë, matre troa cinyihane la itre tus ka hnyipixe hna troa seluthe ngöne la fene ka hnyipixe. (Hna ama. 20:12) Nemene la aliene la itre tusi cili? Kolo hi lo itre hna amekötine hnei Iehova koi së, me thele the së elanyi ngöne la itre macatre ka ca thauzan. Hapeu, nyipunieti kö a hane lapa treqene me ajane troa waipengöne la aliene la itre tusi cili? Eje hi laka easa lapa treqene me mekune la fene ka hnyipixe elany. Thatreine kö tro sa qeje pengöne la mele ka lolo cili, ketre ijine tro Iehova a xome la uati hmitrötre i Nyidrë matre troa eatrëne hnyawa la aja i Nyidrë kowe la ihnadro me kowe la nöjei atr asë.

18. Nemene la hnei nyipunieti hna troa catre kuca?

¹⁸ The thëthëhmine kö së, laka, ka tro pala kö a eatr la aja i Iehova, ke Nyidrëti a xome la uati hmitrötre i Nyidrë, ene la trenge catre ka sisitria hune la nöjei men ka eje e koho hnengödrai me e celë fen. Nge hetre thangane fe la aja cili kowe la mele i nyipunie. Qa ngöne lai, catre pi nyipunie troa sipo Iehova la uati hmitrötre i Nyidrë me huliwa thenge la aqane eatrongë nyipunieti hnene ej. (Luka 11:13) Haawe, tro hë nyipunieti a kapa lo mel hnei Iehova ekö hna mekune troa hamëne kowe la nöjei atr asë, ene la mele ka epine palua ngöne la Paradraiso e celë fen.

[Ithueamacany]

Mekune Kö Nyipunie?

• Nemene la aqane xome Iehova la uati hmitrötre i Nyidrë ngöne lo hneijine ekö, matre tro pala hi a eatr la aja i Nyidrë?

• Tune kaa la aqane xome Iehova la ua i Nyidrë ngöne la hneijine së enehila?

• Tro Iehova a xome tune kaa elany la ua i Nyidrë matre troa eatrëne hnyawa la aja i Nyidrë?