Troa Xome La Ita Ne Thup Celë e 28 Juun Me Wiike Cili
Itre Trahmanyi Fe, Nyipunieti Kö a Drengethenge La Musi Keriso?
“Keriso la he ne la nöjei trahmany.”—1 KOR. 11:3.
1. Hnei Iehova hna eköthe tune kaa la itre hnei Nyidrë hna xup ka inamacan?
KOLA qaja ngöne Hna Amamane 4:11, ka hape: “Ijiji enëtilai Iehova Akötesi hun, troa kapa la nyine atrun, me nyine adraiën, me men; ke hnei enëtilai hna xupe la nöjei ewekë asëjëihë, nge thatraqane la aja i enëtilai it’ ej, nge hna xupe fe.” Pine laka Iehova Akötresie la Atre Xupe la nöjei ewekë asë, haawe, Nyidrëti hi la Atre Musi Cil Ka Sisitria e koho hnengödrai me e celë fen, nge ka draië catre Nyidrë hune la nöjei ewekë hna xup. Hnene laka “tha qa thei [Iehova] kö la menumenu, ngo loi la tingeting,” haawe, hnei Nyidrëti hna isa ami göhnene la itre hnei Nyidrëti hna xup ka inamacan. (1 Kor. 14:33) Thaa kolo hmekuje kö a mama ngöne la aqane eköthe Nyidrë la nöjei angela i Nyidrë, ngo ngöne mina fe la göhmeku i Nyidrë qa ngöne la Hupuna i Nyidrë, lo “haetra ne la nöjei hna xup’ asë.”—Kol. 1:15; Is. 6:1-3; Heb. 12:22, 23.
2, 3. (a) Drei la pane hna xupe hnei Iehova? (b) Nemene la göhnë hna cilën hnene la Hupuna xajawa ne la Tretretro?
2 Qëmekene tro Akötresieti a xupe la nöjei ewekë asë, ka mele kö Nyidrë qaane ekö. Ame la pane hnei Nyidrëti hna xup, tre, ene lo angela hna hën, ka hape, “Logo,” pine laka nyidrëti hi lo ka Nyi Trenge Ewekë i Iehova. Hna xupe pë hë la itre xaa ewekë jëne lai Logo. Thupene lai, hnei nyidrë hna traqa e celë fen ceitu me ketre atr ka pexej, nge hna hë nyidrëti pë hë, ka hape, Iesu Keriso.—E jë la Ioane 1:1-3, 14.
3 Nemene la hna qaja hnene la Itre Hna Cinyihan göne la göhmeku i Akötresie memine la Hupuna neköne haetra i Nyidrë? Paulo aposetolo a qaja koi së me cinyihan, ka hape: “Ajange tro nyipunie a ate laka, Keriso la he ne la nöjei trahmany; nge trahmanyi la he i fö; nge Akötesieti la he i Keriso.” (1 Cor. 11:3) Keriso a lapa fene la musi ne la Tretretro i nyidrë. Maine kola ajane troa tingeting me tro loi la mele ne la itre hnei Akötresieti hna xup ka inamacan, nyipi ewekë troa hetre musi me idrengethenge. Nyipi ewekë mina fe tro la atr ka ixatua troa ‘xupe la nöjei ewekë asëjëihë’ a hane drengethenge la musi Akötresie.—Kol. 1:16.
4, 5. Nemene la mekuna i Iesu göne la göhnë i nyidrë xajawa i Iehova?
4 Nemene la mekuna i Iesu göne la troa drengethenge la musi Iehova me göi troa traqa e celë fen? Kola qaja hnene la Itre Hna Cinyihan, ka hape: “Ca pengö i [Keriso Iesu] me Akötesie, ngo tha mekune kö [Iesu] laka kola ënö la kola cei tune me Akötesie. Ngo hnei nyidëti hna aipië nyidëti kö, me xome la pengö i hlu, nge hna longëtine mate ate. Nge mama ha laka pengöne atë hë nyidë, ame hnei nyidëti hna aipië nyidëti kö, me denge thenge uti hë la mec, ene la meci [“hune la sinöe ne iaxösisi” MN].”—Fil. 2:5-8.
5 Hnei Iesu pala hi hna drengethenge la aja ne la Tretretro i nyidrë, cememine la hni ka ipië. Öni nyidrëti, ka hape: “Tha ’teine kö ni troa kuca xanëne la kete ewekë; . . . ini a hnyingën’ amekötin; ke tha thele kö ni la ajang, ngo loi la aja i nyidëti ate upi ni.” (Ioane 5:30) Öni nyidrëti mina fe, ka hape: “Ini a kuca pala hi la nöjei ewekë nyine amadi [Tretretrong].” (Ioane 8:29) Ame ngöne lo pune la mele i Iesu e celë fen, hnei nyidrëti hna thithi kowe la Tretretro i nyidrë, ka hape: “Ase hë ni atrunyi cilie e celë fen; ase hë ni umuthe la huliwa hnei cilieti hna nunuë nie troa kuca.” (Ioane 17:4) Kola mama hnyawa, laka, thaa jole kö koi Iesu troa atrehmekune me kapa, laka, kola musinë nyidrë hnei Akötresie.
Kola Amanathithine La Hupuna Hnene La Hna Drengethenge La Tretretro
6. Nemene la itre thiina ka lolo hnei Iesu hna melën?
6 Ame lo Iesu e celë fen, nyimutre la itre thiina ka lolo hnei nyidrëti hna eën. Ame ngöne la itre thiina cili, tre, kolo fe a qaja la ihnimi ka tru i nyidrë kowe la Tretretro. Öni nyidrë, ka hape: “Ini a hnine la Tetetro.” (Ioane 14:31) Hnei nyidrëti mina fe hna amamane la etrune la ihnimi nyidrë kowe la itre atr (E jë la Mataio 22:35-40.) Ame Iesu, tre, ka thiina ka lolo nyidrë me ka iwangatruny, nge thaa ka calogitre kö nyidrë me canga elëhni. Öni nyidrëti, ka hape: “Trohemi koi ni, nyipunieti asë ange ka huliwa me hace, nge tro ni a amanonyi nyipunie. Xomejë la nyine isilikeunge hui nyipunie me inine theng; ke menyike ni, nge ipië la hning; nge tro nyipunieti a öhne la hna mano thatraqane la ite u i nyipunie. Ke uqa la nyine isilikeung, nge maloe la ehnefeng.” (Mat. 11:28-30) Ame la nöjei pengöne atr hna aceitunën me itre mamoe nge hna wajahuj me axösisin, tre, hna akeukawane la itre hni angatr hnene la itre thiina ka lolo ka eje thei Iesu memine la maca i nyidrë ka hamë ithuecatr.
7, 8. Thenge la Wathebo, nemene la hna wathebone troa kuca hnene la föe ka neni la hni, nge hnei Iesu hna ujë tune kaa koi nyiidro?
7 Tro sa pane ce wange la aqane ujë i Iesu kowe la ketre föe. Kola mama ngöne la aqane trongene la mele ne la atr, laka, nyimutre la itre trahmanyi ka qana angazone la itre föe. Mama hnyawa hi la aqane ujë cili thene lo itre hene ne hmi ekö e Isaraela. Ngo ame Iesu, hnei nyidrëti pala hi hna metrötrëne la itre föe. Kola mama hnyawa lai ngöne la aqane ujë i nyidrë kowe la ketre föe, laka, truelofe hë lao macatre ne neni la hni nyiidro. “Tru la aköte i nyido” qaathene la itre ka trene drösinöe, nge ase hë nyiidro hamëne la nöjei ewekë hnei nyiidro hna hetreny matre troa aloine la meci nyiidro. Ngacama atraqatre la trenge catre hnei nyiidro hna kuca, ngo kolo pala hi a “tru trotro la mec” i nyiidro. Ame fene la Trenge Wathebo, ka pui ngazo nyiidro. Nge ame la atr ka ketri nyiidro, tre, ka tro fe hë angeic a hane pui ngazo.—Lev. 15:19, 25.
8 Hnene la föe hna drei mejen, laka Iesu a aloine la itre mec, ene pe hnei nyiidro hna lö hnine la ka ala nyim ka cile xötreithi nyidrë, me hape: “Maine tro ni a kete hi la ixete i nyidë, tro ni a mel.” Ame ju hi la nyiidro a ketri Iesu, ene pe paatre pi hi la meci nyiidro. Atre hnyawa hi Iesu laka hna wathebo nyiidro troa ketr la ixetre i nyidrë. Ngo thaa hnei nyidrëti kö hna wesitrë nyiidro. Hnei nyidrëti pe hna thiina ka loi koi nyiidro. Trotrohnine hnyawa hi Iesu la akötr hnei nyiidro hna melëne ngöne la itre macatre, nge atrehmekune hi nyidrë, laka, nyiidro a aja ixatua. Qa ngöne lai hnei Iesu hna qaja koi nyiidro cememine la utipin, ka hape: “Nekönge fe, melë hë nyipo hnene la lapaune i nyipo. Trojë memine la manathith, melë hë nyipo.”—Mar. 5:25-34.
9. Nemene la aqane ujë i Iesu ngöne la kola thele hnene la itretre dreng troa sawa la itre nekönatr troa tro koi nyidrë?
9 Thaa jole mina fe kö kowe la itre nekönatr troa ce lapa me Iesu. Ame lo ketre ijin ngöne lo kola traqa fë la itre nekönatr koi Iesu, hnene lo itretre drei nyidrë hna sewe nyudren troa tro koi nyidrë, ke, angatr a mekune laka kola ajolë nyidrë hnene la itre nekönatr. Ngo thaa celë kö la mekuna i Iesu. Kola qaja koi së hnei Tusi Hmitrötr, ka hape: “Ngo xajawatinë hë Iesu, ame hna aköte nyidë, nge öni nyidë [kowe la itretre dreng], ka hape, Nuepi la ite nekönat’ e troa tro koi ni, nge the shewe nyudeni kö; ke ite ka tune lai la baselaia i Akötesie.” Ketre, “nyidëti a xepe angat, me ati ime hui angat, me amanathithinyi angat.” Thaa hnei Iesu hmekuje kö hna nue la itre nekönatr troa tro koi nyidrë, ngo hnei nyidrëti mina fe hna kepe nyudreni hnyawa.—Mar. 10:13-16.
10. Nemene la ka aijijë Iesu troa hetrenyi lo itre thiina hnei nyidrëti hna melën?
10 Nemene la ka aijijë Iesu troa hetrenyi lo itre thiina hnei nyidrëti hna melën e celë fen? Qëmekene tro nyidrëti a traqa e celë fen, nyimutre la itre macatre ka thatrehmekun ne ce mele nyidrë memine la Tretretro i nyidrë e koho hnengödrai, me inine la itre jë i Nyidrë. (E jë la Ite Edomë 8:22, 23, 30.) Ame e koho hnengödrai, hnei nyidrë hna goeëne la ihnimi Iehova ngöne la aqane musinëne Nyidrë la nöjei hna xup asë, nge celë hi la aqane ujë hnei nyidrëti hna xom. Maine thaa ka idrengethenge ju Iesu, hapeu tro kö nyidrëti a atreine ujë tune lai? Eje thene la “Logo” la madrin atraqatr troa drengethenge la Tretretro i nyidrë; ketre tui Iehova mina fe, laka, eje thei Nyidrë la madrine troa hetrenyi la ketre Hupuna ka idrei. Ame ngöne lo Iesu e celë fen, hnei nyidrëti hna melëne hnyawa la itre thiina ka lolo ne la Tretretro i nyidrë e koho hnengödrai. Drei la ketre manathithi ka tru hna hamë së troa drengethenge Iesu, lo Joxu hna acile hnei Akötresie troa musi ngöne la Baselaia e koho hnengödrai!
Nyitipune Jë La Itre Thiina i Keriso
11. (a) Drei la hne së hna thele troa nyitipun? (b) Pine nemene matre nyipi ewekë tro la itre trahmanyi a thele troa nyitipu Iesu e hnine la ekalesia?
11 Loi e troa catre nyitipune hnene la nöjei atrene la ekalesia i Keresiano la itre thiina i Keriso, nge troa mama hnyawa lai thene la itre trahmany. Hne së hë lo hna e ngöne la Tusi Hmitrötr, ka hape: “Keriso la he ne la nöjei trahmany.” Pine laka hnei Keriso hna nyitipune la He i nyidrë ene la nyipi Akötresie, haawe, loi e tro mina fe la itre Keresiano trahmanyi a thele troa nyitipune la he i angatr, ene Keriso. Ame la Paulo aposetolo a xome la hmi i Keresiano, tre, hnei nyidrëti hna kuca tune lai. Hnei nyidrëti hna ithuecatre kowe la itre Keresiano, ka hape: “Nyitupu ni jë nyipunie, tunge koi Keriso.” (1 Kor. 11:1) Nge öni aposetolo Peteru, ka hape: “ Hna hë nyipunie kowe lai; ke hnei Keriso hna xomi aköte thatraqai nyipunie, kola hamë tulu thatraqai nyipunie, mate tro nyipunie a xöte thenge la ite thupa ca nyidë.” (1 Pet. 2:21) Hetrenyi la ketre kepin matre nyipi ewekë troa nyitipu Keriso hnene la itre trahmany. Angatr elany la itre ka troa xome la hnëqa ne qatre thup me drikona. Hnene laka atraqatre la madrine i Iesu troa nyitipu Iehova, haawe, loi e tro mina fe a eje thene la itre Keresiano trahmanyi la madrine troa nyitipu Keriso me xome la itre thiina i nyidrë.
12, 13. Tune kaa la aqane tro la itre qatre thup a thupëne la itre mamoe hna ahnithe koi angatr?
12 Hnëqa ne la itre qatre thup e hnine la ekalesia ne Keresiano troa inine troa nyitipu Iesu. Hnei Peteru hna hamëne la eamo celë kowe la itre qatre thup, kola hape: “Ithu ane jë la hnënge mamoe i Akötesie thei nyipunie, me thupën, the göi mus, ngo loi e göi aja kö, thenge Akötesie; nge tha göi hete mo, ngo loi pe göi hni ka ajan; kete the qene joxune la ite qâ i nyipunie, ngo loi nyine tulu ne la hnënge mamoe.” (1 Pet. 5:1-3) Thaa tro pi kö la itre qatre thup Keresiano a musi me iwajahuj, maine troa thiina ka ngazo maine troa iakötrë pena. Maine tro angatr a xome la tulu i Keriso, tro hë angatr a catr troa ihnim me iwangatruny, me hetre hni ka ipië me thiina ka loi ngöne la aqane tro angatr a thupëne la itre mamoe hna ahnithe koi angatr.
13 Ame la itre ka elemekene la ekalesia, tre, thaa itre ka pexeje kö angatr, nge loi e tro pala hi angatr a lapa mekune lai. (Rom. 3:23) Qa ngöne lai, nyipi ewekë tro angatr a thele hnyawa troa atrepengöi Iesu, me nyitipune la ihnimi nyidrë. Nyipi ewekë fe tro angatr a sine thele la aqane ujë i Akötresie me Keriso kowe la itre atr, me catre troa nyitipu nyidro. Kola ithuecatre koi së hnei Peteru, ka hape: “Nge nyipunie asëjëihë oteëneju la thina ka ipië hnei kete me kete; ke Akötesie a thipe tije la itete pi tru, me hamëne la ihnimi gufa koi angete ipië.”—1 Pet. 5:5.
14. Tune kaa la aqane tro la itre qatre thup a atrune la itre xan?
14 Nyipi ewekë tro la itre trahmanyi hna acile hnine la ekalesia a eëne la itre thiina ka lolo ngöne la angatr a thupëne la itre mamoe i Akötresie. Kola qaja ngöne Roma 12:10, ka hape: “Ihnimikeuneju tune la aqane ihnimi tejin. Pi pa troa atrune la kete.” Itre qatre thup me itre drikona a atrune la itre xan. Tune la nöjei Keresiano asë, nyipi ewekë tro la itre trahmanyi cili a neëne troa ‘kuca la ketre ewekë thenge la ikucanyi me pi tru; ngo loi pe tro angatr a isa mekune memine la hni ka ipië, laka sisitria kö la itre xan hui angatr.’ (Fil. 2:3) Loi e tro pala hi la itre ka elemeken la ekalesia a ujë me mekune, ka hape, ka draië catre kö la itre xan hui angatr. Maine tro la itre trahmanyi cili hna acil a ujë tune lai, haawe, tro hë angatr a trongëne la eamo hna hamëne hnei Paulo, kola hape: “Qa shë angete ateine troa xatuane la ite ka kucakuca me tha ’tein, nge the amadi shë kö. Tro asë sha isa amadinëne la ate easheny, mate loi angeic, me keukawa. Ke ame Keriso, te, tha hna amadi nyidëti kö.”—Rom. 15:1-3.
‘Atrune Jë La Föe’
15. Tro la itre trahmanyi a ujë tune kaa kowe la itre föe i angatr?
15 Tro sa pane ce wange la eamo hna hamëne hnei Peteru kowe la itre trahmanyi ka faipoipo hë. Hnei angeice hna cinyihan, ka hape: “Loi e tune lai nyipunie ange trahmany, ce lapaju me angate thenge la inamacan, nge atrunejë la fö, ke nyidoti la inege ka kucakuca.” (1 Pet. 3:7) Ame la troa atrune la ketre atr, tre, kolo lai a hape, troa wanga atrune la itre aja ka eje thei angeic. Qa ngöne lai, loi e tro nyipunieti a wanga atrune la itre mekun me itre aja ka eje thene lai atr, nge e pëkö ewekë ka nyi ejolen, loi e troa kapa la mekuna i angeic. Celë hi la aqane tro la trahmanyi a ujë kowe la föe i angeic.
16. Nemene la ithuemacanyi hna hamëne hnene la Wesi Ula i Akötresie kowe la itre trahmany, göne la troa atrune la itre föi angatr?
16 Ame ngöne lo Peteru a upe la itre trahmanyi troa atrune la itre föe i angatr, tre, angeice fe a hmekë angatr, ka hape: “Mate tha tro kö a nyi jolene la ite thithi nyipunie.” (1 Pet. 3:7) Kola mama hnyawa e celë la aqane wanga atrune Iehova la aqane ujë ne la trahmanyi kowe la föe i angeic. Maine thaa angeice kö a atrune la föe i angeic, tro ha nyi jolene la itre thithi angeic. Ketre, thaa tro jë kö la itre föe a ujë hnyawa ngöne la kola atrunyi nyudreni hnene la itre föi nyudren?
17. Tro la trahmanyi a hnime tune kaa la föe i angeic?
17 Ame ngöne la götrane la troa hnime la föe hmunë, Wesi Ula i Akötresie a hamëne la eamo celë, ka hape: “Qâ ne la nöjei trahmanyi troa hnime la ite fö’ i angate tune la ite itei angate kö. . . . Ke pa pala kö ate xelene la ngönetei angeice kö; nge hna ithu ane me thupën’ ej, kete tui Keriso kowe la ekalesia . . . Loi e tro nyipunie a isa hnime föene tui nyipunieti kö.” (Efe. 5:28, 29, 33) Tro la itre trahmanyi a hnime tune kaa la itre föe i angatr? Hnei Paulo hna cinyihan, ka hape: “Ange trahmany hnimeju la ite fö’ i nyipunie, tune lo hnei Keriso hna hnime la ekalesia, me hamë nyidëti kö thatraqan’ ej.” (Efe. 5:25) Eje hi, loi e troa eje thene la trahmany la ajan troa nue la mele i angeic kowe la föe i angeic, tune la hnei Keriso hna kuca kowe la itre xan. Maine tro la Keresiano trahmanyi a thiina ka loi, me wanga atrun me hnime hnyawa la föe i angeic, me thaa sipu meku angeice kö, haawe, thaa tro ha jole kowe la föe i angeice troa drengethenge la musi angeic.
18. Nemene la ixatua hna kapa hnene la itre trahmany ngöne la aqane tro angatr a xome la itre hnëqa i angatr e hnine la faipoipo?
18 Hapeu, hace catre pala ha la hnëqa hna ahnith kowe la itre trahmanyi troa atrune la itre föe i angatr? Ohea, pine laka thaa tro kö Iehova a upi angatr troa kuca la ketre ewekë hnei angatre hna thatreine kuca. Ketre, hetrenyi thene la itre hlue i Iehova la ketre trenge catr ka sisitria catr e koho hnengödrai me e celë fen, ene la uati hmitrötre i Akötresie. Hnei Iesu hna qaja, ka hape: “Maine nyipunie ite ka menu a wangate hmekune troa hamëne la ite ewekë ka loi kowe la ite nekö i nyipunie, hawe, tha tro kö la Tetetro i nyipunie e koho hnengödrai a hamëne la Uati Hmitöte koi angete sipo anganyidë!” (Luka 11:13) Ame ngöne la itre thithi angatr, ijije hi troa sipo Iehova hnene la itre trahmanyi troa xatua angatr jëne la ua i Nyidrë, troa imelekeu hnyawa memine la itre xan, nge ene mina fe la itre föe i angatr.—E jë la Ite Huliwa 5:32.
19. Nemene la hne së hna troa ce ithanatan ngöne la hna cinyihane ka troa xulu?
19 Nyipici laka ketre hnëqa ka tru la hna xome hnene la itre trahmany, ene la troa inine la aqane troa drengethenge Keriso, me xötrethenge la aqane musi nyidrë. Ngo tune kaa fe la itre föe? Tro la hna cinyihane ka troa xulu a ithanatane la aqane tro la itre föe a goeëne la hnëqa hna amekötine koi nyudreni hnei Iehova.
Mekune Pala Kö Nyipunie?
• Nemene la itre thiina i Iesu nyine tro sa eën?
• Tro la itre qatre thup a ujë tune kaa kowe la itre mamoe?
• Tro la ketre trahmanyi a ujë tune kaa kowe la föe i angeic?