“Eje Hi Lo Lai Hnenge Hna Ajan”

Celë hi mekuna ne la ketre nekö jajinyi ka 13 lao macatre, ngöne la kola nyi ahnahna koi nyëne la ketre neköi kuli. Hna qaja hnene la ketre föe ka huliwa ngöne biero, ka hape, ame la ahnahna ka sisitria hnei eahlo hna kapa, tre, ordinatör hna hamëne hnene la keme i eahlo, lo eahlo a ini. Önine la ketre trahmanyi ka xötrei faipoipo ka hape, ahnahna ka sisitria la tusi hna sipu cinyanyine hnene la föe i angeic, göne la ca macatre ne faipoipo i nyidro.

Ame e nöjei macatre, kolo palahi a nue traem me trengecatr hnene la itre atr troa thele la ahnahna ka “sisitria,” thatraqane la ketre sinee ngöne la ketre ijine ka ketrepengön. Ame la itre ka nyi ahnahna, ke aja i angatr troa drenge la itre hna qaja e caha hun. Nge tune kaa epun? Epuni kö a ajane troa hamën maine kapa pena la itre ahnahna hna wangatrune catrën?

Ijije hi tro sa madrin, ke hetre thangane la easa kapa la ahnahna maine pena ngöne la easa hamëne ej. Kola qaja hnei Tusi Hmitrötr, ka hape: “Sisitia la manathithi e troa hame hune la troa kapa.” (Ite Huliwa 20:35) Nyipici laka tro sa madrin, la easa öhne la kola nyipiewekëne la ahnahna hnene la atr ka kapa.

Nemene la nyine tro sa kuca, matre tro sa madrin maine pena lai atr ka nyi ahnahna? Maine tha öhne kö së la ahnahna ka “sisitria,” nemene la nyine tro sa kuca, matre troa wangatrune lai ahnahna?