TANE MEKUN 35
Iehova a Wangatrune La Itre Hlue i Nyidrë Ka Hni Ka Ipië
“Iehova . . . a xajawatine la ka ipië.”—Sal. 138:6.
NYIMA 48 Ce Trootro Jë Së o Drai Me Iehova
MEKUN KA TRUa
1. Nemene la aqane goeëne Iehova la itre atr ka hni ka ipië? Qejepengöne jë.
IEHOVA a hnime la itre atr ka hni ka ipië. Angatr hmekuje hi la ka ijij troa imelekeu hnyawa me Iehova. Ketre, Nyidrëti a “ate hmekune la ate pi tru e ga nany.” (Sal. 138:6) Ajan asë hi së troa amadrinë Iehova, me acatrene la aqane imelekeu së me Nyidrë. Celë hi matre, nyipiewekë tro sa hni ka ipië.
2. Nemene la hne së hna troa ce ithanatan ngöne la tane mekun celë?
2 Ame ngöne la tane mekun celë, easa troa sa la köni hnying: (1) Nemene la aliene la kola hape, troa hni ka ipië? (2) Pine nemene matre loi e tro sa hetre hni ne ipië? (3) Eu la kola jole koi së troa hni ka ipië? Maine tro sa amamane laka, ka hni ka ipië së, tro hë sa amadrinë Iehova me kepe thangane qa ngön.—Ite edomë 27:11; Is. 48:17.
ALIENE LA KOLA HAPE, TROA HNI KA IPIË
3. Nemene la aliene la kola hape, troa hni ka ipië?
3 Ame kowe la atr ka hni ka ipië, tre, ka sisitria catre kö itre xan hui angeic. Tha ka pi mama kö angeic. Ame koi angeic, ka draië catre kö Iehova hui angeic. Ketre, trotrohnine hi angeic la enyipiewekëne la göhnë ne la itre xan. Atre hi angeic laka, ka nyipiewekë catre kö itre xan hui angeic.—Fil. 2:3, 4.
4-5. Pine nemene matre thatreine kö troa qaja ka hape, ka hni ka ipië la itre xan?
4 Ame itre xan, angatr a qaja ka hape, itre ka hni ka ipië angatr, ngo tha mama kö. Maine jë, ka pë mej me ka lapa thaup angatr. Maine pena, angatr a metrötrë itre xan ke, hna ini angatr hnei kem me thin. Ngo ame pe, itre atr ka pi mama angatr. Tro kö a mama e ketre ijin, la nyipi pengöi angatr.—Luka 6:45.
5 Ame pena itre xan, angatr a qaja la itre mekun ka ej e kuhu hni angatr. Ngo tha kolo kö lai a hape, itre ka pi mama angatr. (Ioane 1:46, 47) Ame pe, nyipiewekë tro angatr a thupën, matre tha tro kö a pi mama fë la itre hnei angatr hna atrein. Loi e tro sa nyipici me hetre hni ne ipië.
Tha hnei Paulo kö hna mekun ka hape, sisitria kö nyidrë hune la itre xan (Wange ju la paragarafe 6)d
6. Thenge la hna qaja ngöne 1 Korinito 15:10, nemene la ini hne së hna xom qa ngöne la tulu i Paulo aposetolo?
6 Hanawang la tulu i Paulo aposetolo. Hnei Iehova hna ië nyidrë, matre troa eköth la itre ekalesia ka hnyipixe ngöne la itre traon. Tru catre kö la itre huliwa hna kuca hnei Paulo, hune la itre xaa aposetolo i Iesu. Ngo, tha hnei nyidrëti kö hna mekun ka hape, ka sisitria kö nyidrë hui angatr. Öni nyidrë: “Eni la aposetolo ka co catr ne la nöjei aposetolo, nge tha ijije kö troa hë ni ka hape, aposetolo, ke hnenge lo hna axösisine la ekalesia i Akötresie.” (1 Kor. 15:9) Thupene lai, öni Paulo ka hape, hnene la ihnimi gufa i Iehova, matre lolo la aqane imelekeu i nyidro. Ngo tha hnene kö laka, ka catre huliwa nyidrë hui itre xan. (E jë la 1 Korinito 15:10.) Paulo la ketre atr ka hni ka ipië. Ame lo nyidrëti a cinyiany koi angetre Korinito, tha hnei nyidrëti kö hna qaja atrune la itre huliwa i nyidrë, ngacama hna xöjetriji nyidrë hnene la itre xaa atrene la ekalesia!—2 Kor. 10:10.
Ka hni ka ipië Karl F. Klein, atrene la Lapa Ne Xomi Meköt (Wange ju la paragarafe 7)
7. Nemene la aqane amamane hnene la ketre trejin ka hlemu laka, ka hni ka ipië nyidrë? Qaja jë la ketre ceitun.
7 Hnei Karl Frederick Klein, ketre atrene la Lapa Ne Xomi Meköt, hna hane amamane laka, ka hni ka ipië nyidrë. Hnei nyidrëti hna qaja amamane la itre tria i nyidrë, memine la itre jol hna cile kow. Ame lo macatre 1922, hnei nyidrëti hna nyiqaane cainöje trootro ngöne la itre hnalapa. Ngo jole catr koi Karl troa cainöj, matre tha hnei nyidrëti kö hna pane cainöj ngöne la lue macatre. Thupene lai, ame lo nyidrëti a huliwa ngöne la Bethela, hna hamë eamo koi nyidrë hnene la ketre trejin. Hnei Karl hna elëhni, matre nyidrëti a hnehengazo me wezipo. Ame hë e thupen, loi hmaca ha Karl, matre hna hamë nyidrëti la itre hnëqa ka tru. Drei la ketre tulu ne hni ka ipië! Tha hnei Karl Klein kö hna juetrëne la itre tria i nyidrë, ngacama ketre atr ka hlemu nyidrë. Celë hi matre, tha thëthëhmine kö la itre trejin la tulu i Karl Frederick Klein.b
KEPIN MATRE LOI E TROA HETRE HNI NE IPIË
8. Nemene la hna qaja ngöne 1 Peteru 5:6, ka amamane la enyipiewekëne troa hni ka ipië matre amadrinë Iehova?
8 Ame la pane kepin matre easa hetre hni ne ipië, tre, matre troa amadrinëne la hni Iehova. Celë hi la hna qaja hnei Peteru aposetolo. (E jë la 1 Peteru 5:6.) Hnene la itus, “Viens, suis-moi” hna qejepengöne la itre trengewekë i Peteru. Kola hape: “Poizin la troa pi mama, nge ka hetre ethane catr. Ketre, wanamamike la atr ka pi mama xajawa i Iehova Akötresie. Ngo ame la atr ka hni ka ipië, tre, ka sisitria angeic koi Iehova, ngacama tha ka hlemu kö angeic koi itre xan. . . . Maine tro sa hni ka ipië, tro hë [Iehova] a amanathithi së.”c Pëkö ketre ewekë ka sisitria hune la troa amadrinëne la hni Iehova!—Ite edomë 23:15.
9. Pine nemene matre maine tro sa hni ka ipië, tro ha easenyi së hnene la itre xan?
9 Nyipici laka, easa amadrinë Iehova ngöne la easa hni ka ipië. Ngo hetre itre xaa manathith hne së hna kapa qa ngön. Maine jë tro la itre xan a easenyi koi së. Pane mekune jë la itre atr hne së hna ajane troa ce tro memin. (Mat. 7:12) Tha ajane kö së troa ce tro memine la itre atr ka imusinë, maine ka catre fë mekun, nge tha hane kö kapa la mekuna itre xan. Ngo madrine së troa ce tro memine la itre ka “ce akötr, me ihnimikeu tune la itre trejin, me iutipinekeun, me ipië.” (1 Pet. 3:8) Celë hi aqane ujë ne la itre ka hni ka ipië. Drei la madrine ka tru e tro sa amamane la thiina cili!
10. Pine nemene matre hmaloi kowe la itre ka hni ka ipië, troa xomihnine la itre jol ngöne la mele i angatr?
10 Maine tro sa hni ka ipië, tro ha lolo la mele së. Ame itre xaa ijin, tha ka meköti kö la aqane ujë ne la itre xan koi së. Öni Solomona, joxu ka inamacan, ka hape: “Hnenge hna öhne la ite hlue kola ti hos, nge ite joxu a trongë hnadro kösë ite hlue.” (Ate cai. 10:7) Ame itre xaa ijin, tha wangatrune kö la itre ka huliwa hnyawa, ngo kolo pena a qaja aloine la itre xan. Ngo Solomona a ithuecatre koi së troa xomehnöthe la elëhni, me kapa la itre ewekë ka traqa ngöne la mele së. (Ate cai. 6:9) Maine tro palahi sa hni ka ipië, tro ha hmaloi koi së troa xomihnine la itre jol hne së hna cile kow ngöne la mele së.
ITRE IJINE THA KA HMALOI KÖ TROA HNI KA IPIË
Pine nemene matre jol e troa hni ka ipië? (Wange ju la paragarafe 11-12)e
11. Nemene la nyine tro sa kuca, ngöne la kola hamë eamo koi së?
11 Ijije hi tro sa amaman e nöjei drai laka, ka hni ka ipië së. Loi e troa hetre hni ne ipië ngöne la easa kapa la ketre eamo. Tha tro kö sa thëthëhmine laka, kola haji së ke, hne së hna tria. Ngo ame itre xaa ijin, canga tro hi sa thipetrije la eamo hna hamën. Maine pena, tro sa xöjetrije la atr ka eamo së me qaja angazone la aqane hamën angeic la eamo. Maine tro sa hni ka ipië, tro ha lolo la aqane ujë së.
12. Thenge la hna qaja ngöne Ite Edomë 27:5, 6, pine nemene matre loi e tro sa hetre hni ne ole kowe la ka hamë eamo koi së? Qaja jë la ketre ceitun.
12 Ame la atr ka hni ka ipië, tre, hetre hni ne ole i angeic kowe la itre eamo hna hamën. Hanawang la ketre ceitun. Pane mekune jë laka, easa ithanata memine la itre trejin ngöne la hna icasikeu. Thupene lai, ketre trejin a qaja ka hape, hetre mutine xen ka fedr ngöne la itre nyö së. Ngacama easa hmahma, ngo easa olene kowe lai trejin. Maine ju, tro fe la itre xaa trejin a canga qaja koi easë. Ketre tune fe, loi e tro sa amamane la hni ne ole së me hni ne ipië së, ngöne la kola hamë eamo hnene la ketre trejin. Loi e tro sa goeë angeic ceitu me ketre sinee së, ngo tha ketre ithupëjia kö me easë.—E jë la Ite Edomë 27:5, 6; Gal. 4:16.
Pine nemene matre loi e troa hni ka ipië, ngöne la kola hamë hnëqa kowe la itre xan? (Wange ju la paragarafe 13-14)f
13. Nemene la aqane tro sa hni ka ipië ngöne la kola hamë hnëqa kowe la itre xan?
13 Ngöne la kola hamë hnëqa kowe la itre xan. Öni Jason: “Ame la kola hamë hnëqa kowe la ketre trejin, eni a hnying ka hape, hnauëne laka, tha hane kö angatr ië ni?” Maine jë, hne së fe hna hane mekun tun. Nyipici laka, tha ka ngazo kö troa thele troa catre huliwa i Iehova. (1 Tim. 3:1) Ngo loi e tro sa thupën, wanga troa kökötre la pi mama e kuhu hni së. Maine jë, tro hë sa mekun laka, easë hi la ka ijij troa xome la ketre hnëqa e hnine la ekalesia. Maine pena, tro la ketre trejin föe a qaja ka hape, ‘Föeng hmekuje hi la ka ijij troa xome la hnëqa celë!’ Ngo maine ka hni ka ipië së, tha tro kö sa mekune tun.
14. Nemene la ini hne së hna xom qa ngöne la aqane ujë i Mose, ngöne la kola ce thawa la hnëqa i angeic memine la itre xan?
14 Hanawang la aqane ujë i Mose, ngöne lo kola kapa ekö hnei itre xan la ketre hnëqa. Nyipici laka, ka tru koi Mose troa elemekene hnyawa la nöje Isaraela. Ngo tune kaa la aqane ujë i Mose ngöne lo Iehova a aijijëne la itre xan, troa hane kuca la hnëqa i angeic? Tha hnei angeice kö hna akötr me wesitr. (Num. 11:24-29) Hnei Mose hna hni ka ipië me nue la itre xan troa hane amekötine la nöj. (Eso. 18:13-24) Haawe, ijije hë troa canga nyinyine la itre jol ke, tru catre hë hnei atr ka iameköti. Eje hi, ame la ka nyipiewekë koi Mose, tre, troa xatuane la nöje Isaraela, ngo tha ene kö la troa hetre hnëqa ka tru. Drei la ketre tulu ka lolo koi së enehila! Tha tro kö sa thëthëhmine laka, Iehova a wangatrune la itre ka hni ka ipië. Ngacama ‘ka draië Iehova, ngo öhne hi Nyidrëti la atr ka hni ka ipië.’—Sal. 138:6.
15. Nemene la aqane saze la mele ne la itre xaa trejin?
15 Ngöne la kola saze la aqane mele së. Ame la itre xaa trejin ka huliwa i Iehova koi nyimu macatre, tre, hna saze la hnëqa i angatr. Ame lo macatre 2014, hnene la organizasio hna upe la itre trejin ka thupëne la distrik me itre föe i angatr troa saze hnëqa. Ketre, ame la kola traqa koi 70 lao macatre ne la trejin ka thupëne la sirkoskripsio, tha tro hmaca kö nyidrëti a xome la hnëqa cili. Ame fe lo itre trejin trahmany ka 80 lao macatre, tha tro hmaca kö angatr a hane xome la hnëqa ne kordinatör ne la lapa ne la itre qatre thup. Ketre, hna upe la itre xaa trejin ka huliwa ngöne Bethela matre troa pionie. Ngo ame itre xan, angatr a nue la hnëqa i angatr ke, hna tithi angatr hnei mec, maine pena kola aja ixatua hnene la itre sinee i angatr, maine itre xaa kepine ju kö.
16. Nemene la aqane hni ka ipië hnene la itre xaa trejin, ngöne la kola saze hnëqa?
16 Tha ka hmaloi kö kowe la itre trejin ka saze hnëqa. Ame itre xan, angatr a ajane troa xome lo huliwa i angatr hnapan ke, hnei angatr hna majemine kuca. Ketre hace ka tru koi angatr troa saze hnëqa. Ngo hnei angatr hna kapa hnyawa la hnëqa ka hnyipixe. Pine nemen? Tha hnene kö laka, hnei angatr hna sisinyi koi Iehova troa cilëne la ketre hnëqa. Ngo pine laka, tru la ihnimi angatr koi Iehova Akötresie. (Kol. 3:23) Ngacama kola saze hnëqa, ngo atraqatre la madrine i angatr troa nyihlue i Iehova cememine la hni ka ipië. Angatr a “nu asë koi [Iehova] la itre hnei [angatr] hna hnehengazon.” Xecie koi angatr laka, Iehova a meku angatr.—1 Pet. 5:6, 7.
17. Pine nemene matre tru la madrine së me hni ne ole së, ngöne la kola ithuecatre koi së hnei Tusi Hmitrötr troa hni ka ipië?
17 Atraqatre la madrine së me hni ne ole së ke, Tusi Hmitrötr a ithuecatre koi së troa hetre hni ne ipië. Nyimutre la itre manathith hne së hna kapa qa ngön. Maine tro sa hni ka ipië, tro ha hnimi së hnei itre xan. Tro fe sa atreine xomihnine la itre jol. Nge ame la ka sisitria catr, tro hë sa acatrene la aqane imelekeu së me Iehova, Keme së e koho hnengödrai. Ketre madrin ka tru troa atre laka, ngacama ‘Ka draië me Ka sisitia’ Iehova, ngo Nyidrëti a hnim me wangatrune la itre hlue i Nyidrë ka hni ka ipië!—Is. 57:15.
NYIMA 45 Mekuna Ne La Hning
a Nyipiewekë tro sa hetre hni ne ipië. Nemene la aliene la kola hape, troa hni ka ipië? Pine nemene matre loi e tro sa hetre hni ne ipië? Pine nemene matre jol troa hni ka ipië ngöne la kola saze la hnëqa së? Tro la tane mekun celë a sa la itre hnying.
b Wange ju la tane mekun, hna hape, “Jéhovah m’a traité d’une manière salutaire,” ngöne la Ita Ne Thup ne 1 Mei 1985, qene Wiwi.
c Wange ju la mek. 3, par. 23, qene Wiwi.
d GÖTRANE: Ame ngöne la uma ne la ketre trejin, Paulo aposetolo a ithanata cememine la hni ka ipië kowe la itre ka tru me itre nekönatr.
e GÖTRANE: Ketre trejin ka qatre hë a kapa la eamo hna hamën hnene la ketre trejine thöth.
f GÖTRANE: Tha hnene kö la trejin ka qatre hë hna piine la hnëqa hna athip kowe la trejine thöth.