Loi e Ka Mama La Aja Së Kowe La Ene i Akötresie
1 Ngöne la itre drai ne cinyihane la Tusi Hmitrötr, ke, hnei Iehova hna isapui kowe la nöje i nyidrë tro angatr’a icasikeu palahi ngöne la ene i nyidrë. (Lev. 23:2) Ame la itre icasikeu cili, ke, nyine xatua angatre matre lapa huti la itre mekuna i angatre ngöne la wesi ula i Akötresie, me thue ijine i angatre troa thele la itre nyipi mekune, me itronyi troa ithahnataane la trenge wathebo i Iehova. Tiqa ha la he i angatre hnene la itre mekune i Akötresie, ene pe hetrenyi jë angatre la itre manathithi ka nyimutre qa thene la ua. Kolo itre ijine cili la ka thue madrine së. Tro la itre hna amekötine celë a eköthe la caasi memine fe la hmi ka wië. Hawe, tro fe së enehila a icasikeu ngöne la ene i Iehova, ke, ketre ewekë ka sisitria catr.
2 Tro Së a Amamane Tuneka Ka Hape Easë a Kapa Madrine La Itre Icasikeu? Kola mama ngöne la itre xaa ekalesia laka kola uti la etrune la itre atrene la icasikeu. Nyipici, ame itre xaa ijin, nyipi tha ijiji së kö troa sin, qa ngöne la itre jol. Ngo hapeu, nue kö së la itre hnepe jole ka pëkö pengöne troa thingigojenyi së troa sine lapaane la itre icasikeu? Ame itre xan, ke, angatr’a lapa hnalapa pine laka kola nango akötre la he, maine angatre pena a kucakuca hna huliwa la drai ka pexej. Ame itre xan, ke, angatr’a mekune ka hape qa i angatre troa kapa la itre sine i angatre ka tha hmi kö, la kola traqa troa iwai. Ame itre xan, kola paatre ngöne la itre ijine icasikeu, pine laka angatr’a pi goeëne la porogarame ne televizio, maine ketre elo pena. Kola mama ngöne la itre ijine celë laka tha ihmeku kö la mekune së memine la aja ka eje e kuhu hni ne la itre nekö i Kora, öni angatr: “Kola awe la unge me hmanono a pi tro kowe la ite hnahage i Iehova.”—Sal. 84:2.
3 Ngacama, kola mana la xeni ne la ua ngöne la itre ijine icasikeu, jole koi itre xane troa drenge hnyawaan. Ketre mekune i angatre kö, ene la itre hnei angatre hna troa kuca o drai, maine kolo pena a meköl. Tru la itre ka wangatrehmekune laka loi e troa xomi not, matre tro palahi a hlë la mekune i angatr, me xatua angatre troa drenge hnyawaane la hna qaja. Nge, tro fe la itre mekune hna hamën’a lapa huti ngöne la mekune i angatr. E hune lai, loi e tro së a hnëkëne hnyawaane, matre tro së a kepe thangane ka loi qa ngöne la itre icasikeu, nge tro fe së a “nyipiine catëne” la itre hna inin.—Heb. 2:1.
4 Itre nekönatre me itre ka tru, tro asëhi a kapa la ini hna hamëne ngöne la hna icasikeu. E tro la itre keme me thin’a hamëne la itre nyine elon, maine itre itusi ne nyihane nyine tro angatr’a lapa thaup, ke, pëkö hna troa trotrohnine hnene la itre nekönatr. Luzi kö la hna ini e tro la nekönatr’a elo, me ithahnata, me sue, maine kuca la itre xaa ewekë ka troa ajolëne la itre atrene la icasikeu troa dreng. E atrehmekune hi la itre nekönatre ka hape tro palahi a ce tro me angatre hnene la itre keme maine thine koi kabine, ke, tha tro hmaca kö angatr’a tro lapa.
5 Nyipiewekë Catre Troa Aeatrëne La Hawa: Ame itre xaa ijin, ke, hna traqa la itre ewekë matre kola ajolë së troa aeatrëne la traeme ne reinio, ngo ame la troa majemine traqa hmiitr, me traqa thupene la nyima ne katik, memine la thith, ke, kolo lai a wangacone la ehmitrötrene la itre icasikeu, nge kolo lai a wange sixane la itre xan. Loi e tro së a mekune laka ame la itre nyima ne katik, memine la troa ce thithe memine la itre trejin, ke, itre götrane lai ka nyipiewekë catre ne la hmi së. Ame la traqa hmitr, ke, kola amamane ka hape, tha hnalapa ka canga hnëkë kö. E hna majemine eatrëne la traem, ke, kolo lai a amamane laka hetre metrötre së, nge easë a kapa madrine la itre icasikeu.
6 Kola easenyi la drai, nge kola sisitria la tro së a icasikeu lapa. (Heb. 10:24, 25) Loi e tro së a amamane la aja së qa ngöne la hna nyipiine la itre icasikeu lapa, me hnëkën’itr’ej, me aeatrëne la traem, me drenge hnyawaan, me troa trongëne la itre hna inin.