“Hmekëne Ju”
1 Ame la Iesu a qaja la trenge ewekë celë, hne së hna e ngöne Mataio 26:38-41, ke, nyidrëti a easenyi trootro kowe la ketre ijine akötre ka tru ne la mele i nyidrë e celë fen. Ketre ijine lai ka sisitria catre ngöne la mele ne la atr. Kolo ijine lai ka aijijëne la atr troa hetrenyi la mel. Drei lai kepine matre nyipiewekë kowe la itretre drei Iesu tro palahi a “hmek.”
2 Ame enehila, easë a melëne la ijine tro Iesu a traqa kösë atre iamele, me atre troa apatrene la itre atr ka ngazo. Maine itre keresiano ka hmeke së, me atrehmekune hë së laka saqe hë lo ijine hna sa, tha ijije kö troa sili lue im, me tro hi a lapa treqene la iamele. Atre hnyawa hi së laka tro palahi së a hmek. Celë hi matre, nyipiewekë koi së troa “huliwa me cat” ngöne la hnëqa së koi Iehova. (1 Tim. 4:10) Hapeue së isa alacas? Hmeke fe kö së?
3 Loi e Tro Së a Isa Waipengö Së: Hnei Iesu hna thuemacanyi së ka hape: “Wange kö nyipunie.” (Luka 21:34, 35) Loi e tro së a ketre waipengö së hnyawa matre “pë ethan, me pë gelen . . . qëmeke ne la xöte ka qaliqali me ka ena.” (Fil. 2:15) Hapeu, tuneka la mele së e nöjei drai, tune kö la aqane mele ne la keresiano ka xötrethenge la tulu i Iesu, me trongëne la itre trepene meköti hna amë hnine la Wesi ula i Akötresie? Tha tro kö së a xötrengethenge la itre aqane ujë ka tha ijije kö kowe la keresiano, ene lo itre aqane ujë hna trongëne hnene la fene ka “meköle thene la ate ka ngazo.” (1 Ioane 5:19; Rom. 13:11-14) Ame la easë a xome la itre hna cinyihane troa isa waipengö së, hapeu, itre ka hmeke kö së tune lo aqane ini së hnei Iesu?
4 Tro la itre qatre thup’a aeatrëne hnyawaane la itre hnëqa i angatre ngöne la ekalesia, me atre hnyawa ka hape qa i angatre troa amamai Akötresie la aqane thupë ka loi angatre la itre mamoe. (Heb. 13:17) Hnëqa ne la itre keme ne fami troa eatrongëne la itre atrene la lapa i angeice ngöne la itre jë i Iehova. (Gen. 18:19; Ios. 24:15; ce wange ju me 1 Timoteo 3:4, 5.) Hawe, e hne së asë hna trongëne la hna amekötiine hnene la itre hna cinyihan, ene la troa ihnimekeu, drei hi lai manathithi atraqatr! Celëhi aqane troa atrehmekune la itre nyipi keresiano.—Ioane 13:35.
5 Mejë Jë Troa Thuemacane La Itre Xan: Ame la kola upi së troa hmek, ke, tha eje kö la tro së a isa waipengö së hmekuj. Ngo, hetre ketre hnëqa së, ene la troa inine la itre xane matre tro fe angatr’a hane itretre drei Iesu. (Mata. 28:19, 20) Tro la ihnimi së kowe la atre ka lapa easenyi së a upi së troa catre ithuemacany, matre ijije tro fe angatr’a hane itre thelene la isi ka troa traqa kowe la fene hnengödrai celë. Celë hi hnëqane la nöjei keresiano asë. Nge ketre götrane lai ka sisitria ngöne la hmi së. (Rom. 10:9, 10; 1 Kor. 9:16) Ame itre xaa ijin, ke, easë a itrohnyi memine la itre atr ka drenge hi, ngo pëkö hna qaja, ame itre xan, ke, ka icilekeu catre memine la hnëqa ne iamele. Ngo ame pe, qa së troa catre ngöne la huliwa cili, ngacama nyimutre la itre atr ka thatre kö la aliene la ithuemacanyi hne së hna trofë. (Ezek. 33:8, 9) Tro la sipu ihnimi së koi Akötresie, memine la ihnimi së kowe la itre atr ka lapa ezi së a thuecatre së.
6 Tha ijine tro hmaca kö la a thele la itre nyine amadrinën. Tha tro kö së a nue la itre ejolene la fene troa amenu së, wanga xötrethengene jë së la itre aja ne la fen celë, nge jötre pi së hnen’itr’ej. (Luka 21:34, 35) Maine atrehmekune hë së laka saqe hë la itre drai, ke, ame la itre nyine kuca, tha tro kö a amë kowe la drai elany. Saqe catre hë la ijine tro Iesu a nyipune kowe la fene ka ngazo celë. Tro pe hi a mele hmekuje hnene lo itre ka hlë, me hnëkë, me hmek. E maine easë a drengethenge la itre hna amekötiine hnei Iesu, me “kötene la nöjei ewekë asë celë,” hawe, drei lai manathithi atraqatr!—Luka 21:36.