Tro Së a Isa Hamën’ Apexejenyi Së Kowe La Nöjei Huliwa Ka Loi
1 Hnene la ketre itusi ne fene hna qaja göi itre temoë i Iehova ka hape: “Nyipi jole e troa öhne thene la itre xaa gurupe la itre atr ka huliwa catre kowe la hmi i angatr, tune la itre temoë.” Pine nemene matre itre temoë i Iehova a catre huliwa, cememine la hni ka ajan?
2 Ame la kepin, ke, ene laka angatr’a wangatrune la ijine hne së hna melëne enehila. Hnei Iesu hna wangatrehmekune laka coco pe hi la ijine tro nyidrëti a afenesine la huliwa i nyidrë e celë fen. (Ioane 9:4) Ame enehila, ke, kola musi la hupuna i Akötresie e nyipine la nöjei ithupëjia me Nyidrë, hawe, kola trotrohniine hnene la nöje i Iehova laka coco pe hi la itre ijine tro angatr’a isa kuci huliwan. Ngo ame pe, tha hnei angatre kö hna wangacone la huliwa ka hmitrötr, ke, hnei angatre hna eatrëne palahi la huliwa cili. (Sal. 110:1-3) Pine laka, easë enehila a mele ngöne la ijine meledrai, kola aja nyimu ka troa menu, hawe, tro fe së a catre huliwaane thatraqane lai. (Mata. 9:37, 38) Qa ngöne lai, hnei angatre hna catre troa nyitipu Iesu, lo atre amamane la tulu ka pexeje göi troa kapa madrin, me canga trongëne la huliwa.—Ioane 5:17.
3 Ame la ketre kepine matre itre temoë i Iehova a huliwa tune ngöne la hni ka pexeje koi Iehova, ke, ene laka tha ka ceitu kö la organizasio i angatre e celë fene hnengödrai memine la itre xaa hmi. Tha hane kö la itre hmi upe la itre atr i angatre troa hamëne la traeme me trengecatre i angatre thatraqane la huliwa i Akötresie. Co hi maine pë pena kö thangane la lapaune i angatre ngöne la mele i angatre o drai, hna amamane hnene la aqane imelekeu i angatre me itre xan, maine pena ngöne la itre ewekë hnei angatre hna aja kow ngöne la mele i angatr. Hnene laka, paatre kö la aja ka catre ne la nyipi lapaun, ame hna upi angatre hnene la itre hene hmi troa ‘qaja koi angatre la ka menyik,’ me qaja mekötine koi angatre laka ijije hi la itre hnepe huliwa hnei angatre hna kuca. (Isa. 30:10) Hna iele angatre hnene la itre keme ne hmi ngöne la kola ‘qalothe (NW) la ite hnangenyë i angatr,’ me amë hutine la mekune ka kucakuca, me geny.—2 Tim. 4:3.
4 Ejehi laka tha hna tune kö lai, ngöne la nöje i Iehova! Hawe, nyipi ewekë tro palahi së a hetrenyi la trenge catre ka ijij, matre atreine trongën, me kuca la itre huliwa thatraqane la hmi së. Loi e tro sa kuca o drai la nöjei ewekë thenge la hne së hna lapaune kow. Pine laka, atraqatre la madrine hna troa kapa jëne la nyipici, nyipiewekë tro së a “aköte atraqat,” matre troa aeatrëne la itre hna amekötine koi së. (Ce wange ju me 1 Thesalonika 2:2.) Ijije ju hi la itre hnëqa ne la itre atr hna melëne ngöne la nöjei drai, troa apë ijinë angatr. Ngo ame pe, tha tro kö a ajolë së hnene la itre ewekë celë troa amë panëne la itre huliwa ne Baselaia.—Mata. 6:33.
5 Ame la itre hnëqa hna athipe koi së ngöne la huliwa i Iehova, ke, hetre thangane ka tru, nge ka sisitria catre itr’ej, matre kola upi së troa ‘anyipi ewekëne la nöjei ijin’ ene la troa xome la traeme qa ngöne la itre xaa hna ajan, me huliwaan’atrun’eje kowe la itre ewekë ne ua. (Efe. 5:16) E atre hi së laka easë a amadrinë Iehova jëne la thiina së ka ijiji Akötresie, memine la aja së qa kuhu hni së, ke, kola upi së troa huliwa catre palahi. E tro së a mekune la itre manathithi hne së hna kapa hë enehila, memine la itre ewekë ka mingöminge ka troa xulu, ke, kola akökötrene la aja the së troa “huliwa, me catr” ngöne la itre huliwa ne Baselaia.—1 Tim. 4:10.
6 Loi e Troa Nue La Mele Së Matre Hujën’Ej: Alanyimu la itre atr enehila ka thele panëne la itre ewekë me huliwa ne ngönetrei, ke, ka sisitria lai koi angatre hune la nöjei ewekë asë. Nge, pëkö engazone lai koi angatr, nge kola anyipicine hnei aqane thele angatre la itre nyine xen, me nyine ij, me nyine xeetrën. (Mata. 6:31) Ame la aliene la mele i angatr, ke, ene la troa kepe thangane ka loi qa ngöne la mele celë, me troa ‘hetrenyi la nöjei ewekë ka loi thatraqane la itre macatre ka calemi matre troa mano, me xen, me ij, me ce madrin.’ (Luka 12:19) Ame kowe la itre atrene la itre xaa hmi, ke, tha ajane kö angatre tro la hmi i angatr’a iupi troa huliwa catr; angatr’a mekune laka kola wangesixa angatre lai, ngöne laka, qanyi së isa wai ewekë. Ketre tha kapa kö angatre la mekun, ene laka troa nuetrije la aja mo, maine troa trotrije la mele cili, me kötrene la itre huliwa ka ngazo. Nge pine laka catre la mekune cili thei angatr, nyipi jole koi angatre troa sipu hujëne la mele i angatr, angatr’a mekune ka hape, tha nyipi ewekë kö, maine huliwa ka gufa.
7 Tha ceitune kö la isa aqane goeëne së. Ame easë, Wesiula i Akötresie a adraiëne la itre mekune së matre caasi hë la aqane mekune së me Nyidrë, nge tha ceitu kö memine la mekunai atr. (Isa. 55:8, 9) Hetrenyi the së la itre mekune hne së hna ajane troa traqa kow, nge ka sisitria kö hune la itre aja ne ngönetrei. Ame la itre mekune ka sisitria, lo hna cile kow, e celë fene hnengödrai me e koho hnengödrai, ke, ene la troa kapa la emekötine la musi Iehova, memine la ehmitrötrene la atresiwa i Nyidrë. Ka tru catre koi Nyidrë la itre mekune celë, matre ame koi Iehova, ame la nöjei nöj’asë, “kösë pëkö xajawa i nyidë.” (Isa. 40:17) Celëhi matre ame la itre atr ka ajane troa mel thenge la sipu mekuna i angatr, nge ka tha nyipiine la aja i Akötresie, ke, itre hmo angatr.—1 Kor. 3:19.
8 Hetre itre ewekë thatraqane la ngönetrei ka nyipiewekë, me itre xaa ewekë fe thatraqane la itre huliwa ne Baselaia, ngo ame pe, ke, tha kolo kö lo hnei Tusi Hmitrötre hna hëne ka hape “nöjei ewekë ka nyipi ewekë catr (NW).” (Fil. 1:10) Easë a trongëne la hna qaja hnei 1 Timoteo 6:8, la easë a tuluthe hi la aja së kowe la itre ewekë thatraqane la ngönetrei, me troa nyigöhnene ngöne la hni së la ‘ite ewekë ka tha mama kö ka epine palua.’—2 Kor. 4:18.
9 E tro palahi së a catre nyialiene la he së hnene la itre mekune i Akötresie, nyipici, tro pehi a co la göhnene la itre mo ne ngönetrei. E tro së a mekune la itre hnei Iehova hna kuca ha koi së, memine la itre manathithi hnei Nyidrëti hna thingehnaeane thatraqane la itre drai ka troa xulu, nyipici tro lai a amejëne la aja së, ene la troa hujëne la mele së matre kuca la hnei Nyidrëti hna amekötine koi së. (Mareko 10:29, 30) Loi e tro së a hamëne la mele së koi Nyidrë. Maine paatre ju la iqejeloi memine la ihnimi Nyidrë, ke, tha ijiji së kö troa hetre mele ka loi, me ngöne la itre drai ka troa xulu. Hawe, easë a isa drenge laka, loi e tro së a ketre hamëne la mele së, pine laka am’asë la itre ewekë hne së hna kuca ngöne la huliwa i nyidrë, ke, ‘qa së troa kuca.’ (Luka 17:10) Am’asë la itre hna upi së troa kuca koi Iehova, ke, loi e troa kuca ngöne la hni ka pexej, me atrehmekune hnyawa laka troa “tru la hne së hna menue.”—2 Kor. 9:6, 7.
10 Kola Ajane Enehila La Itre Atr Ka Saene Göi Huliwa: Ngöne la qaan, ke, hnene la ekalesia ne la itre keresiano hna huliwa catre ngöne la ijine tru la huliwa. Qëmekene troa apatrene triji Ierusalema lo macatre 70 T.I., ke, pexeje la aqane huliwaane la cainöje trootro. Ngöne la ijine cili, hnene la itretre drei Iesu hna “cate hnene la wesi ula.” (Ite Huliwa 18:5) Pine laka kola kökötre nyimenyime la ekalesia, nyipiewekë troa inine hnyawa la itretre cainöj, memine la itre ka troa thupëne la ekalesia matre atreine hnyawa angatre hamëne la ixatua ka ijij. Kola ajane fe la itre atr ka atreine ithahnata memine la itre atr ka cilë musi ne la fen, memine la itre ka atreine huliwa göi troa xawaane me ce thawa la itre mo ka ijije hna ajane hnene la itre atr ne la ekalesia. (Ite Huliwa 6:1-6; Efe. 4:11) Xalaithe hi la ka cilëne la itre hnëqa ka mama, nge alanyimu kö la angetre cilëne la itre hnëqa ka sihngödr. Ngo, ame pe, ce angatr’asë hi a ‘cat,’ matre ce huliwa ngöne la hni ka pexej.—Luka 13:24.
11 Ngacama co catre petrekö la itre huliwa ngöne la itre hadredre lao macatre, ngo thupene jëhi la hnei Iesu hna cile ngöne la Baselaia lo macatre 1914, kola mejë fe la huliwa ka tru thatraqane la Baselaia. Ame petrekö ngöne lo xötrei, ke, ala xalaithehi la ka atrehmekune hnyawa ka hape troa kökötre trootro la etrune la itre atr ka troa huliwa kowe la itre mo ne la Baselaia, ene la itre milio lao ka ixatua qa ngöne la nöjei götrane ne la fen’asë.
12 Ame enehila, hnene la organizasio hna kapa la itre ahnahna së troa huliwaan’asë itr’eje ngöne la nöjei götrane huliwa ne Baselaia. Nyimenyime la aqane kökötre la huliwa ne Baselaia ngöne la nöjei götran’asë. Pine laka ka nyipiewekë catre la traeme së, kola upi së lai troa catre huliwaane la nöjei ewekë së matre aeatrëne la hnëqa së. Kola easenyi trootro la pune la fene celë, nge easë a mekune fe laka tro fe a atraqatre catre la huliwa. Hna thuecatrene la itre hlue i Iehova troa hamëne la mele i angatre kowe la huliwa ka sisitria ne iacasinekeun.
13 Nemene La Nyine Troa Kuca? Ijije tro së a qaja ka hape kola “cate troa huliwa i Joxu.” (1 Kor. 15:58) Ngöne la itre teritoare ka nyimutre, ke, traqa ha kowe la meledrai, ijine menue hë, ngo xalaithe hi la itre ka huliwa. Hawe, kola könë së troa catre cainöje ngöne la itre teritoare së, ngo tro fe së a hane catre huliwa ngöne la itre götrane ka aja ixatua.
14 Lolo e troa goeëne la aqane isa huliwa catre ne la itre temoë ngöne la nöjei pengöne huliwa e celë fen. Angatr’a saene kowe la huliwa ne itre xupi uma ne hmi, maine itre asabele pena, angatre fe a hamë ixatua ngöne la itre ijine akötr, nge angatr’a traqa lapa troa nyidrawaane la uma ne baselaia. Ame ngöne la huliwa celë, ke, loi e troa tro qa ngöne la uma ne icasikeu, me amë hnyawaane la itre ewekë ngöne la itre sipu göhnen. Ame la ka eatrëne la itre huliwa ngöne la itre götrane ka co, ke, angeic’a amamane laka trotrohnine hnyawa angeice la trenge ewekë i Iesu hna cinyihane ngöne Luka 16:10: “Ame la ate nyipici kowe la ewekë ka co cat, ate nyipici fe kowe la ewekë ka tru; nge angeice la ka tha meköti kö kowe la ewekë ka co cat, kete tha meköti kö kowe la ewekë ka tru.”
■ Loi e Tro Së a Sajuëne La Itre Huliwa Ne La Ekalesia Së: Nyipici laka, ame la nöjei ekalesia, ke, ka ce tro memine la organizasio e celë fen, nge itr’ej’a isa kapa la itre hna amekötiine qa thene “hlue ka nyipici me ka inamacan,” hna hnëkëne thatraqane la itretre cainöj’asë. (Mata. 24:45) Ketre troa mama qa ngöne la hna isa huliwa me hna atreine kuca hnene la itre temoë, laka, kola aeatrëne hnene la ekalesia la itre hna amekötin. Kola wangatrune la mekune hnene la ekalesia, ene la troa cainöjëne la maca ka loi ngöne la itre teritoaren’ej, me troa inine la itre atr ka xötrei traqa, me xatua angatre troa kökötre ngöne la ua. Nyipiewekë tro së isa alacasi a hane sine la huliwa cili. Loi fe tro së a amë hutine la itre ewekë hne së hna ajane troa aeatrëne göi troa isa ini Tusi Hmitrötr, troa qejemekune ka loi ngöne la itre icasikeu, me xatuane la itre atr ka aja ixatua ngöne la ekalesia. Ngöne la nöjei götran, hetre itre ijine ka ijije koi së troa hane amamane laka hetre aja së troa nue la mele së koi Akötresie.
■ Tro La Itre Ka Hetre Hnëqa Troa Thupe a Amamai Tulu: Hnei Iehova hna iëne la itre qatre thupe troa elemekene la nöjei ekalesia. (Ite Huliwa 20:28) Celëhi la itre atr ka hetre ajane troa cilëne la hnëqa celë. (1 Tim. 3:1) Am’asë la nöjei trejine hnine la ekalesia, ke, ijiji angatre troa hetrenyi la itre hnëqa ka tru. Alanyimu la itre trejine ka kökötre ngöne la ua, nge angatr’a ajane troa eatrongë angatr, me ajane troa xatua angatre hnene la itre qatre thupe ne la ekalesia. Loi e tro angatr’a isa catre inine la Tusi Hmitrötr, memine lo itre itusi së. Loi fe tro angatr’a amamane la aja i angatre troa drengethenge la itre qatre thupe hna iëne hnene la uati hmitrötr, me nyitipune la lapaune i angatr, me eënyine la itre thina ka eje thene la itretre thup.—Heb. 13:7, 17.
■ Loi e Troa Xome La Huliwa Ne Pionie: Ame la pane hnëqa ne la ekalesia, ke, ene la troa cainöjëne la maca ka loi. (Mata. 24:14) Drei lai manathithi katru ngöne la kola xome hnene la itre trejine la huliwa ne pionie! Ejehi laka tro fe hë a saze la aqane mel. Nyipiewekë troa saze la itre xaa ewekë thei angatre matre troa sisedrëne palahi ngöne la huliwa ne cainöje trootro ka ketre pengön. Ngo nyipici laka, ame la itre ka cile catre palahi ngöne la hnëqa celë, nge tha hna nue kö eje thupene la ca macatre, nge thupene la itre hnepe kucakuca ka traqa, ke, angatr’a öhne hnyawa e cili la manathithi ka tru qa thei Iehova. Qa ngöne la ihnimine la itre qatre thup, nge hnene laka itre ka macaje angatr, atreine tro angatr’a hamë ixatua kowe la itre pionie, me ithuecatre koi angatre jëne la itre trenge ewekë, maine jëne pena la aqane ujë i angatr. Drei lai mekune ka loi e troa amamane hnene la itre thöthi ngöne la angatr’a xome la huliwa ne pionie e fenesi hë hna ini! Ceitune hi lai memine la itre thupëtresije ka ajane troa xome la huliwa ne pionie lapa, hna aijijë angatre qa ngöne laka hnei angatre hna acone la itre hawa ne huliwa mani thatraqai angatre kö. Drei la madrine ka tru hna kapa hnene la ketre keresiano ka nue la mele i angeice troa hane sine la huliwa ne iacasinekeune hnei Iehova hna anyimenyimëne enehila!—Isa. 60:22.
■ Loi e Tro Së a Hane Ixatua Ngöne La Kola Xupi Uma Ne Icasikeu, Me Nyidrawaane Itr’Ej: Hna xupe la itre hadredre lao uma ne Baselaia enehila, memine la itre uma ne asabele. Tru la ka hain, pine laka hna kuca asë la huliwa hnene la itre trejine me easë ka saene troa hamëne la traeme me itre hna atreine hnei angatr, nge tha hna nyithupei angatre kö. (1 A.L. ite jo. 28:21) Itre thouzane lao ka huliwa ngöne la hni ka ajan’a nyihnyawaane la itre uma hna xup, me kuca la nöjei huliwa hna upi angatre troa kuca. (2 A.L. ite jo. 34:8) Pine laka, ame la huliwa cili, ke, ketre götrane ne la hnëqa ka hmitrötr, hawe ame la itre ka sipu saene ngöne la hni ka ajan, ke, tha angatre kö a ajane troa nyithupei angatr, tune laka tha angatre kö a ajane troa nyithupei angatre la kola cainöje trootro ngöne la itre hnalapa, me kola hamë cainöje pena ngöne la ekalesia, maine ixatua pena ngöne la ijine asabele. Ame la itre ka ixatua, ke, angatr’a saen, me nue apexejene hnyawaane la ixatua i angatr, ngöne la angatr’a hnëkë, matre hane fe angatre xupe la itre uma ne icasikeu nyine troa atrunyi Iehova. Angatre fe a hamë ixatua la angatr’a nyialiene la itre pepa qa thene la mus, me e la itre hna ithingë, me wange la itre ewekë ka co thupen, me e la etrune la itre thupene materiel hna ajan. Tha hnene kö la itre hlue i Iehova ka huliwa nyipici hna sili xaa ehnef, maine thelejëne troa kepe thangane la itre huliwa hnei angatre hna kuca, pine laka ame la itre hna atreine hnei angatr, maine itre ewekë i angatre pena, ke, hna nu’asë koi Iehova. (Goeëne ju la Huliwa ne Baselaia ne 1992, götrane 4, paragarafe 10.) Ame ngöne la huliwa celë, ke, kola ajane la itre ka huliwa catr, nge ka hamëne la itre huliwa ka loi “hna kuca hniine kösë koi Iehova.”—Kol. 3:23.
15 Nemene la ewekë ka amamane laka, pëkö nöje ka tune la nöje Iehova? Ene la ajane troa hamën. Ame la angatr’a ham, ke, atraqatre kö la aliene hune la mani maine mo—angatr’a “hujë angate xane kö.” (Sal. 110:3) Drei la aliene la easë a nue la mele së koi Iehova. Easë a sipu öhnyi loi qa ngöne la itre huliwa së. Easë a wangatrehmekune hnyawaane laka “sisitia la manathith,” nge “tru la hne së hna menue” pine laka ame la hne së hna kuca, ke, troa të koi së. (Ite Huliwa 20:35; 2 Kor. 9:6; Luka 6:38) Ame la ka hamëne koi së la manathithi ka tru, ke, Tretretroti e koho hnengödrai, ene Iehova; Nyidrëti hi la ka “ajane troa hamëne madin.” (2 Kor. 9:7) Tro Nyidrëti a nyijun’atrune koi së la hne së hna huliwa, me hamëne la itre manathithi ka troa epine palua. (Mal. 3:10; Rom. 6:23) Hawe, maine kola mama koi epuni ngöne la ketre ijine laka, ijije tro epuni a hane cilëne la ketre hnëqa ngöne la huliwa i Iehova, hapeu tro jë kö epun a isa saen, me sa tui Isaia ka hape: “Inieti la, upengënieti jë”?—Isa. 6:8.