“Itretre Trofë La Maca Ne Tingetinge i Akötresie,” Taane La Kovasio Ne Distrik 1996
1 Tro la porogarame ne la kovasio ne distrik ne la macatre celë a xatua së troa hetrenyi pala hi la tingetinge qathei Akötresie, nge tro fe eje a qejepengöne la hnëqa së ngöne la aqane troa xatuane la itre xaa atr matre tro angatre a öhne la tingetinge cili. Ame la taane la kovasio, ke, “Itretre tro fë la maca ne tingetinge i Akötresie.” Troa kuca eje e Normandie ngöne la uma ne Asabele qaane 13 utihë e 15 semitrepa, 1996. Hapeu, hane kö epuni nyiqaane mekune me hnëkë hnyawa matre troa sine asë la porogaram?
2 Porogarame Ne Köni Drai: Eje the huni la mejiune laka, jëne la kovasio hna troa kuca ngöne la macatre celë, tro fe epuni a hane kapa la ketre madrine ka tru, nge tro fe hë epuni a isa bëeke fë la ketre trenge egöcatre hna ahnyipixene hmaca. (2 Aqane l. ite jo. 7:10) Ame ngöne la macatre celë, tro së a kapa la ketre porogarame thatraqane la köni drai. Hapeu, hnei epuni kö hna hane hnëkë, me sipo drai ne mano kowe la itre maseta i epuni matre ijije troa hane sine lai porogarame ka pexej?
3 Hna fejane e hnine La Tour de Garde ne 15 febuare, 1996 la itre drai, memine la hnë troa kovasio asë ngöne la Pacifique sud. Ame göne la filiale së, ke, tro fe a kuca la ketre kovasio e Port-Vila qene Bislama. Troa kuca lai kovasio ngöne la uma ne Baselaia ne la ekalesia ne Port-Vila, qaane 30 ogas utihë 1 semitrepa, 1996.
4 Tro la porogarame a nyiqaane e 9 h 30 e nöjei drai, nge troa nyipune eje e sabathi e 4 h. Troa fe la itre qehnelö e 8 h. Hna nue hmekuje hi lo itre trene götraneqa troa canga lö hnine la hnë icasikeu ngo thaa tro pe angatre a canga ami göhnë ne la itre xan; troa treqene e fe jë la uma koi nöjei atr asë. Hapeu tro kö së a amamane la thiina ka loi kowe la itre qatr, me itre trejine me easë ka sin atr ka trene kucakuca, lo itre ka tro fë i beki maine itre ka ti ikatr, ene la troa nue la itre icea ngöne la itre götrane ne la iuma ne drai gaa thaa jole kö koi angatre troa lapaan? Pane mekune ju laka “Ihnimi . . . thaa ate thele ewekë i nyëne kö.”—1 Kor. 13:4, 5; Fil. 2:4.
5 Hapeu, Tro Kö Epuni a Idrei? Thupene la hna amamane la Ite Edomë 27:17, “Idei la fao hnei fao,” kola qaja hnene La Tour de Garde ne 15 ogas, 1993 ka hape: “Easë la itre jiane huliwa nyine tro pala hi a xöl. Ame la troa isapengöne memine la fen, ke, ene la troa amamane la ihnimi së koi Iehova memine la troa thele mekune thenge la lapaune së; qangöne lai, loi e tro së a ketre pengöne kö la aqane ujë së kowe la ka alanyimu.” Tro së a trongëne tuneka la eamo celë?
6 Tro pala hi së a thupëne matre thaa tro kö a ceitune la aqane ujë së memine la fen. Nge eje hi laka tro së a hune e hne së hna catre kuca la itre huliwa ka loi. (Tito 2:14) Celë hi matre hna cinyihane hnene La Tour de Garde ka hape: “Maine tro pala hi së a cememine la itre xaa atr ka hnimi Iehova, ke, atreine tro së a ixölekeu së me angatr—easë a iupi me ixatua troa ihnimikeu me kuca la itre huliwa ka loi.” Ame la kovasio ne distrik ke, ketre ewekë lai hna hnëkëne hnei Iehova matre tro së a idrei ngöne la ua. Thaa ijije kö tro së a paatre ngöne la kola nyiqane uti hë ngöne la kola nyipune la porogaram.
7 Tro La Atr Inamacane a Dreng: Ame la troa hetre hnangenyë ke, ketre ewekë lai ka tru alien, celë hi kepine matre loi e tro pala hi a thele troa huliwane hnyawa ej. Hna wangatrehmekune laka ngöne la kola drenge hnene la atr la kola ithahnata koi angeic, ke, sine hi la hnei angeice hna xolouth—ngacama angeice a mekune ka hape angeice a qatingenyëne hnyawa. Pine laka easë a melëne la ketre hneijine ka tiqa hnei ewekë nyine amenune la mekune së, haawe, ame ngöne la itre xaa ijine ke, jole koi së troa drenge aqeane hnyawa la kola ithahnata. Tuneka matre pane tupathe jë së troa thele troa drenge hnyawa la ka cile fë cainöje ngacama tru la atrene la icasikeu? Maine troa upi epuni troa qaja la itre mekune ka tru ne la porogarame ngöne la epuni a isa bëeke kowe la itre hnalapa i epun, hapeu atreine kö epuni troa edromëne itrej? Nemene la nyine tro së a kuca matre troa sisitria la aqane tro së a atreine drenge me thele la aqane troa hnangenyëne hnyawa la nöjei götrane ne la porogarame hna troa cile fë ngöne ijine kovasio?
8 Nyipi ewekë catre troa hetrenyi la ajane ka tru, pine laka thatreine kö tro la ahnahna qa thei Akötresie, ene la mekun, a tro loi e pë kö aja. Hanawange la ketre ceitun, maine tru la aja ne la atr kowe la ketre taane mekun, haawe, ketre tro fe hë a hmaloi koi angaeice troa xolouthe la itre mekune ka tru ne la ketre cainöj, maine ketre götrane la porogarame. Ngo, eje hi laka qanyine kö la trenge aja së troa hnangenyëne la itre mekune ka sisitria hna aijijë së troa hane drenge ngöne la itre kovasio ne distrik. Ame la aja së ka tru memine la aqane drenge hnyawa së la nöjei götrane la porogarame ne la kovasio ke, itre eje hi lai ka troa akökötrenyi së ngöne la ua me acatrene la mejiune së kowe la itre ewekë ka troa xulu. Ame ngöne la itre kovasio, ke, kola ini së la itre jë i Iehova, nge kolo fe a hamëne la itre ini ka ijije matre atreine së troa aeatrëne hnyawa la huliwa ne iamele. (1 Tim. 4:16) Pane mekune ju epun, maine epuni ju la ketre he hna ufe enyin. Ame la itre ewekë hnei Iehova hna thingehnaean, ke, kösë ketre iuhni ka catre catre nyine mejiune kow. Maine thaa tro kö la ketre atr a drenge hnyawa la porogarame thatraqane la itre keresiano, nge thaa xomehnöthe kö angeice la itre mekune i angeic, haawe, nemene la ewekë ka troa traqa koi angeic? Eje hi laka, thaa tro kö angeice a hane trotrohnine la itre eamo jëne iamele, memine la itre ini ka troa thupë angeice qa ngöne la meci ngöne la ua.—Heb. 2:1; 6:19.
9 Ngöne la itre götrane ka kösau ne la fene hnengödrai, kola isine hnene la itre trejine troa hane sine la nöjei icasikeu asë. Mingöminge me lolo e troa goeëne la aqane qatixenyëne angatre la itre mekune hna kapa ngöne la itre ijine kovasio. Ame ngöne itre xaa götran, ke, hna ajolëne la itre xaa atr troa drenge hnyawa la itre cainöje hnene laka tru la itre ka tro agö ngöne la ijine icasikeu. Ame itre xan, angatre a traqa hmitr. Ame mina fe ngöne la itre kovasio ka ase hë, jole catre troa drenge la porogarame ngöne la kola nyiqaane ej, pine laka alanyimu la itre ka tro agö ngöne la itre kuloar, memine fe e kuhu tröne la hnë icasikeu. Tha kolo kö lo itre trejine ka trene hnëqa, maine itre thine pena ka lö fë la itre nekö i angatre ka co la ka nyimejen. Tru menu pe hi lo itre atr ka porotrik. Ame ngöne la macatre celë, ke, tro la servisi hna hnëkëne troa ikep a hmekëne hnyawa la huliwa celë, nge kola mejiune laka e tro la ka elemekene la icasikeu a iupi troa ilapany, ke, loi e tro asë hi la itre atr a drengethenge. Eje hi laka troa hetre madrine atraqatre e hne së hna itrotrohni me ixatuanekeune la itre huliwa.
10 Nemene la itre mekune nyine ixatua koi së matre atreine së troa qatixenyëne la porogarame ne la kovasio, nge troa tru la itre mekune hne së hna xolouthe qa ngön? Nemene la itre hna qaja ha ngöne la itre macatre ka ase hë, a hna amexeje pala hi: (a) Troa amamane hnyawa la sipu aliene matre kola tro kowe la nöje hnë troa kovasio. Tha hnë tro kö a traqa itronyi troa mano, ngo kola troa drenge me xomi ini. (Deut. 31:12) Tupathe jë troa canga meköle ngöne la itre jidr. Maine tro epuni a traqa troa hane sine la kovasio nge kucakuca epun, ke, gufa ha koi epuni troa drenge hnyawa la itre hna troa qaja ngöne la itre ijine cili. (b) Isine jë troa canga traqa ngöne la hnë kovasio matre troa thele hnë acile la loto i epuni me göhnë qëmekene troa nyiqaane la porogaram. Ngo maine tro epuni a nyenyape thele göhnë nge kolo ha nyiqane la icasikeu, luzi hë koi epuni la itre xaa mekune hna cainöjë la kola nyiqaan. (c) Xomi not ju me cinyihane la itre mekune ka tru. Maine tro epuni a fejane asë la itre mekun, eje hi laka thaa tro hë epuni a drenge hnyawa la itre hna qaja. Ngöne la epuni a cinyiany, loi e troa xecie koi epuni laka thaa hnei epuni kö hna triane la itre xaa mekune ngöne laka tru la hnei epuni hna xomi not. (d) Ngöne la kola nyiqaane la ketre porogaramane ne la kovasio, ke, loi e tro së a canga hetrenyi la ajane troa dreng. Isa hnyinge ju ka hape, ‘Nemene la hnenge hna kapa qa ngöne la götrane celë ka troa aelëne la hninge troa madrine me hnimi koi Iehova? Nemene la ini hnenge hna troa kapa qa ngöne la götrane celë matre xatua ni troa melëne hnyawa la atr ka hnyipixe? Tro la ixatua celë a xatua ni tune ka matre tro ni a maca trootro ngöne la huliwa ne cainöj?’
11 Aqane Ujë Së a Amingömingöne La Huliwa Ne Cainöje Së: Hnei Paulo hna ithuecatre koi Tito tro angeice a ketre “nyine tulu ne la nöjei huliwa ka loi.” Maine troa pë ethanyine la ini hnei Tito hna hamën, ke, tro hë angeice a xatuane la itre xaa atr troa “alolone ngöne la nöjei ewekë asëjëihë la ini i Akötesie Ate amele së.” (Tito 2:7, 10) Ngöne la nöjei macatre kola amekunë së pala hi troa hetrenyi la ketre aqane ujë ka lolo ngöne la kola tro kowe la hnë kovasio maine ngöne la kola bëeke hmaca, ketre tune mina fe thene la itre trejine me easë e Numea ka kepe së ngöne la itre hnalapa i angatr, maine ngöne la hnë kovasio.
12 Ame lo macatre hnapan, ke, hne së hna drenge hmaca la itre mekune nyine xatua së me akeukawanyi së, ngo loi e tro fe së a mekune me hane wangatrune la itre xaa götrane ne la mele ne la keresiano. Ame itre xaa ijin, ke, hna kapa hnene la itre trejine ne Numea la itre trejine qa ngöne la itre hnapet maine qa mëëke pena; angatre a nue la itre xaa hnahage ne la uma i angatre thatraqane la itre trejine ka traqa qa gaa nany. Qa ngöne la aja i angatre troa nyipi ewekëne la itre trejine me angatr, tru la hnei angatre hna itö thatraqane la itre hnei angatre hna troa kapa. Ngo, ame la engazone ke, saze mekune ju hi la itre hna könën, thaa ithuemacanyi pena kö angatre ka hape angatre a ajane troa lapa thene la itre sinee i angatre e Numea, maine thaa tro pena kö angatre a traqa troa hane sine la kovasio. Eje hi laka tro hë a hace la itre atrene asë la fami pine laka angatre a itreqe me hnëkë troa ikep. Tro la ihnimi së kowe la itre trejine me easë a upi troa hmeke thaa tro kö së a majemine la aqane ujë celë.—1 Korinito 13:5.
13 Ngo, eahuni a sipone catrëne kowe la itre ka aja uma göi asabele, tro angatre a kapa me xötrethenge hnyawa la itre hna amekötine koi angatr; maine ngöne la hnë tro angatre a lapa ngön. Maine troa traqa la ketre jole koi epuni nge uthihe ju hi epun, haawe, kola sipone matre tro epuni a canga thuemacane la itre ka troa kepe epuni memine fe lo servisi ka thewe hnalapa matre troa nue pena la hnalapa koi itre xan. Ngo loi e tro pala hi së a mekune ka hape celë fe ketre tro së lai a atre hnyawa la itre atr hnei epuni hna lapa then; ene kö e kapa epuni la hna athipe koi epun.
14 Nyipi ewekë koi së troa inine la itre nekö së troa trotrohnine laka ame la troa ujë tune la keresiano, ke, thaa ngöne kö la itre xaa hnepe ijine hmekuj. Tha hnene kö laka kolo ha tro e tröne la hnë kovasio, ke, tro ha ketre pengöne la aqane ujë. Ohe, thaa tro kö a lue qëmeke së ngöne la drai ka pexej. Loi e troa hetre emetrötrene la aqane ujë së ngöne la hnalapa së, maine thene pena la itre ka kepe së, maine e cahu gojeny, tune lo easë a ca lapa memine la itre trejine me easë matre troa kapa la ini qa thei Iehova ngöne la itre ijine icasikeu.—Isa. 54:13; 1 Pet. 2:12.
15 Ngacama pë hmaca kö xeni hna hamëne ngöne la kovasio, ngo tru catre pala kö la itre xaa ewekë nyine troa nyithupen. Ame hi la itre ahnahna hne së hna troa hamëne ke, thatraqane hi lai. Hna traqa troa hane sine la kovasio hnene la ketre söre memine la nekö i eahlo ka nango tru hë, nge thaa tru kö la manie i nyidro. Ngo, ngacama co hi la manie i nyidro, hnei nyidroti pe hna hane hamëne la hnei nyidroti hna hetrenyi nyine ahnahna. Eje hi laka, isa qanyi së kö isa alacasi troa mekune la hne së hna troa hamëne ngöne la götrane cili, ngo atre hnyawa hi huni laka epuni a kapa madrine la itre nyine amekunëne celë.—Ite Huliwa 20:35; 2 Kor. 9:7.
16 Kola Wangatrehmekunyi Së Qa Ngöne La Aqane Heetre Së: Kola qejeqeje së hnene la aqane heetre së, memine la aliene la hni së memine la hne së hna mekune thene la itre xaa atr. Kola mama xötreithe la itre thöth ka nango tru hë memine la itre ka tru, la itre aqane heetre ka thaa loi kö ngöne uma ne ini maine ngöne hnë huliwa pena. Ngöne la nöjei macatre, ke, kolo pala hi a ngazo catre la aqane heetr, kolo ha sasaithi tulu. Maine thaa hmeke kö së, ke, atreine hi tro së a nyitupune la aqane hetre ne la itre sinee së. Nyimutre la itre pengöne iheetre ka thaa loi kö troa hetrëne ngöne la easë a icasikeu troa hmi koi Akötresie. Atraqatre la madrine hna kapa ngöne la itre kovasio ka ase hë ngöne laka hetre ithuecatre hna hamëne jëne la porogarame, ngo kolo fe a qaja ka hape: “Hnenge hna ketre thele la kepine matre nyimutre la itre jajinyi ka amë la itre iheetre ka hopatr, ketre ka lailai la itre imano i angatr, nge hmelele la itre ihetre i angatre matre mama asë hi la ngönetrei i angatr.” Nyipici laka easë asë hi a ajane troa heetre ngöne la ijine kovasio tune la nyipi hlue keresiano, ketre tune fe ngöne la easë a ce porotrike memine la itre trejine thupene la porogaram. Tro pala hi së a öhnyi loi qa ngöne la hna trongëne la eamo hna hamëne hnei Paulo aposetolo kowe la itre keresiano, ene la troa alolone la “la ixete, me tro qahmihmi me metöt.”—1 Tim. 2:9.
17 Drei la ka troa waipengöne la ka qahmihmi, me “ixete ka loi?” Ame la troa qahmihmi ke, kola hape “pë kö hni ne pi hun me pi tru.” Kola qejepengöne hnene la dikisionere ka hape “ka thaa pi hune fë mekune kö.” Ngo thaa hnei Sasaiatri kö memine pena la itre qatre thup hna hamëne la ketre tulu göi aqane troa heetre me göi aqane troa ele ihe. Ngo, hapeu hetrenyi kö thene la keresiano la atreine troa waipengöne la aqane tro angeice a iëne la itre pengöne ihetr? (wange ju fe la Filipi 1:10.) Tha tro kö la aqane ele ihe së memine la aqane heetre së, a athixötrëne la itre xaa atr, hnene laka easë thele troa goeë së maine angazone pena la itre mekune së. Loi e troa qaja aloinyi së hnene laka lolo la hnene la itre atr hna öhne the së, ngo thaa tro pe së a mama kösë ketre atrene fen maine ka thele iwesitrë pena. Ngöne laka, easë la itretre tro fë la maca ka loi, nyipi ewekë tro së a thupëne la aqane heetre së, memine la aqane ele ihe matre tro pala hi së a atrunyi Iehova, me amingömingöne pala hi la organizasio i Nyidrë matre qaja aloine ej. Eje hi laka tro la itre keme me thine a hamë tulu ka loi kowe la itre neköi angatr, nge thupene lai, loi e tro angatre a thupëne hnyawa la aqane heetre ne la itre neköi angatr, ene la tro angatre a heetre hnyawa la ijine cili. Tro la itre qatre thupe a amamai tulu ka loi nge maine ijij, ke, loi e tro fe angatre a canga saqe troa hamëne la eamo ngöne la hni ka menyik.
18 Kamera, Me Kameskop, Me Nyine Arezistere: Hna nue troa huliwane la itre kamera me itre xaa aparei ju kö, ngo loi e tro së a metrötrëne la itre xaa atrene la kovasio. Maine easë a enije lapa e nyipine la icasikeu troa xupi atr hnene la kamera, ke thaa easë hmekuje kö a ajolëne la itre xane troa drenge la porogaram, ngo easë fe a ketre triane la itre xaa aliene ne ej. Atraqatre la thangane hne së hna kapa ngöne la itre ijine kovasio, hnene laka hne së hna tupathe troa catre drenge hnyawa la itre ka cile fë cainöj, me xomi not. Ma easë jë a troa arezistere kowe la ketre trejine me easë ka lapa hnuma hnene laka ka wezipo; ngo ijije tro së a drenge trongëne la porogarame ngöne la easë a isa bëeke kowe la itre hnalapa së, ke, pë kö traeme së elanyi troa drenge la hne së hna arezistere. Hna wathebone troa saane la itre aparei ngöne la itre pirize hna hnëkëne thatraqane kö la kovasio, nge thaa loi pena kö troa ithungigojenyi ngöne la hnë lö, me hnë tro, maine thunge pena la itre atr ka lapa matre thaa öhne hë angatre la itre ka cile fë cainöj.
19 Göhnë: Eahuni a öhne laka hna trongëne la itre ithuemacanyi ngöne lo ami göhnë. Ame lo macatre hnapan, nyimutre catre la itre ka xötrethenge la ithuemacanyi celë: TRO HMEKUJE HI A AMI GÖHNENE LA ITRE ATR NE LA FAMI EPUNI ME ITRE XAA ATR KA CE TRO ME EPUNI HUNE LA LOTO I EPUN. Ma epuni jë a öhne laka thaa nyine hnehengazone menune hmaca kö lai, pine laka alanyimu catre la itre ka xötrethenge la itre ithuemacanyi cili. Nge hetre ewekë kö ka sisitria, ene laka epuni a drengethenge, celë hi ka amadrinë Iehova lai memine la ‘hlue ka nyipici me ka inamacan,’ lo ka hamëne la xeni ne ua.—Mata. 24:45.
20 Kola elë trootro la etrune la itre trejine me easë ka wezipo catr. Angatre traqa hune la itre icea i angatre nyine ukun, nge eje hi laka angatre a ajane tro la itre atrene la fami i angatre a thupë angatre me nyihnyawa angatr. Itre xane a lapa fë la itre drösinöe i angatre thatraqane la itre meci ka eje thei angatr, tune la itre meci ne wenethëhmi, maine meci ne öne pena. Kola ketr la itre hni së ngöne la easë a öhne ngöne la hna kovasio la itre trejine me easë së cili föe me trahmany, pë kö triane angatre la ketre drai ne kovasio; catre la aja i angatre troa kapa la xeni ne la ua. Ngo, ame itre xaa ijin, kola traqa la meci kowe la itre xaa atr ngöne la hna kovasio, nge pë kö atrene la fami maine atre ne la ekalesia a troa hamëne la ixatua ka ijij. Maine troa traqa la ewekë cili, ke, kola hëne la servisi ne la itre ka inyië hnene la itre ka elemekene la kovasio matre troa nyiapesane lai trejine a tro pital. Ame la pane atrekë hnëqane la itre ka hetre mecine hë, ke, kolo kö lo itre atrene la fami, memine lo itre sinee pena. Ame la servisi ne la kovasio ka pane hamë ixatua, ke, thaa hna acile kö troa thupëne la itre ka traqa fë kucakuca. Maine ka tru la meci ne la ketre atr ne la fami i epun, ke, kola sipo epuni troa thupëne matre thaa tro kö angeice a lapa caasi wanga troa thaasesëkötrë së hnene la itre ewekë hna thaa hnëkëne kö ngöne la kovasio. Ketre, pë kö hnahage hna hnëkëne ngöne la hnë kovasio kowe la itre ka allergie, nge thaa ijiji angatre kö troa ce lapa memine la itre xaa atr ngöne la iuma ne drai. Haawe, tro la itre qatre thupe a thele troa canga wange hnyawa la itre ka trene mec ngöne la ekalesia, me hnëkë matre troa nyihnyawa angatre qëmekene la troa nyiqane la kovasio.
21 Hnëkëne Ju Göi Xeni Kowe La Ijine Kovasio: Nyimutre la itre ka qaja aloine la nöjei thangane ka loi hna kapa qa ngöne laka kola isa traqa fë xen. Hna cinyihane hnene la ketre trejine trahmanyi ka hape: “Eni a öhne hnyawa laka atraqatre la thangane ka loi ngöne la ua hnenge hna kapa qa ngöne lai hna amekötine cili. Ame asë la itre hawa cili, memine la trenge catre, ke, hna nue enehila kowe la itre ewekë ngöne la ua. Tha ase kö ni drenge la kola qaja angazone lai.” Hna cinyihane hnene la ketre trejine föe ka hape: “Jëne la tulu hnei epuni hna hamën, nyipunie itre trejine a ithuecatre kowe la nöjei keresiano asë troa isa waipengö së me thele jëne troa xomehnöthe la mele së me aelëne la huliwa së qa thei Akötresie.” Hna cinyihane hnene la ketre atre thupe ka wange trongëne la itre ekalesia göne la servisi ne hamë xeni ekö, öni nyidrë: “Alanyimu catre la itre trejine ka triane la porogarame ka pexeje ne la asabele, hnene lo aqane kuca hnapan.” Ame göne la xeni hna traqa fë hnene la itre trejine, kola cinyihane hnene la ketre qatre thupe ka hape: “Angatre hi a traqa fë la hnei angatre hna ajan, nge thaa angatre kö a cile wengë troa xome ej.” Hna xomihnine hnene la ketre sör, me cinyihane ka hape: “Thupene la icasikeu, ke, tingeting, thaa tru menu kö la iluilu, nge madrine la itre ialamekene la itre atr.” Nyipici, atreine hi tro së isa alacaasi a traqa fë la ka ijije matre nyine tro hi a thue egöcatre së kowe la hnaipajö. Alanyimu la ka qaja ka hape tru la traeme i angatre troa hane iöhnyi memine la itre sinee i angatr.
22 Eje hi laka ketre pë kö servisi ne hamë xeni ngöne la macatre celë. Loi e tro epuni a xome la hnepe menetre nyine troa wange hmaca lo Huliwa ne Baselaia ne mei 1995, paragarafe 26, göi itre mekune ka ijije, ene la itre nyine xeni ka loi kowe la ngönetrei hna troa traqa fë kowe la kovasio. Kolo hmaca amekunë së fe laka, thaa tro kö a traqa fë e hnine la uma ne kovasio, la itre galasiere me gorok. Troa traqa fë la galasiere ka co matre ijije troa liine eje e kuhu fene itre icea i epun. Ketre ijije hi la traeme hna nue göi troa xeni me iji la itre hnei epuni hna traqa fë. Tune ngöne lo itre ijine icasikeu së hnine la itre uma ne Baselaia, thaa loi kö e troa xeni ngöne la itre ijine kolo ha kovasio. Qa ngöne lai, easë amamane la metrötre së kowe la hna hnëkëne thatraqane la hmi, memine la xeni ne ua hna hamë së.
23 Easenyi hë matre nyiqaane jë la pane kovasio ne distrik, ame la taan, ke, “Itretre Trofë La Maca Ne Tingetinge i Akötresie.” Hapeu, ase kö epuni hnëkë hnyawa matre troa hane traqa matre kapa me ithuemadrinene la itre trejine me epun, me hane kapa la itre ewekë ka loi ngöne la ua ngöne la köni drai ka pexej? Eahuni a thithi koi Iehova matre tro Nyidrëti a amanathithi epuni pine la aqane catre i epuni troa hane sine la kovasio celë.
[Hna eköhagen götran 6]
Nyine Amekunë Së Göi Kovasio Ne Distrik
Bapataiso: Tro la itre atr ka thele bapataiso a lapa ngöne la itre göhnë hna hnëkëne thatraqai angatr, qëmekene la kola nyiqaane la icasikeu e hmakanyi ne mecixen. Hna öhne hë, laka hetre itre ka traqa fë hnaheetre ka thaa ihmeku kö memine la ijine cili, qa ngöne lai, kola apuingazone la bapataiso. Celë hi matre, tro la nöjei ka thele bapataiso a xome la itre iheetre ka ijije kowe la drai cili, me hnëkëne la ca itrawel. Loi e troa xecie hnyawa kowe la itre qatre thupe ka ce wange memine la itre ka thele bapataiso lo itre hnyinge e hnine la itus Notre ministère, laka trotrohnine hnyawa hi la itre mekune celë. Thupene la cainöje ne bapataiso memine la thith, tro la perezida ne la sisio a qaja la itre hna amekötine kowe la itre ka troa xomi bapataiso, nge easë pë hë a ce nyima jë. Nge ngöne la xötre tixenuë ne la nyima, ke, tro la itre ka thupëne la hna icasikeu a tro fë la itretre thele bapataiso kowe la hnë troa bapataiso. Ame la bapataiso, ke, hatre ne la mele hne së hna isa hamën, isa easë caasi kö me Iehova, celë hi matre thaa loi kö e troa itrohmaeë me ie i wanakoimë hnei itre ka xomi bapataiso e kuhu hnine la tim.
Baj: Kola sipone matre troa isa athipe ngöne ihetre la itre baji hna hnëkëne thatraqane la kovasio ne macatre 1996; troa athipe amamane itreeje ngöne la kovasio, me ngöne la easë a tro kowe la hna kovasio, me ngöne la easë a bëeke qa hna kovasio. Celë hi ka troa nyijë së e itre xaa ijine troa qaja la maca ka loi ngöne la itre jë së. Troa xome la itre baj memine la itre karte nyine qejepengö së ngöne la ekalesia i epun. The treqene kö ngo canga sipone jë qëmekene la ijine kovasio la itre karte i epuni me fami epun. The thëthëhmine kö lo karte hna hape “Instructions médicales.”
Hnalapa: MAINE HNEI EPUNI HNA IXELË ME KETRE JOL, ke, kola sipo epuni laka thaa tro kö a luelue troa qajaqaja kowe la atre thupe atrekë hnëqane la servisi ne hamë hnalapa ngöne la kovasio matre tro nyidrë a thele troa xatua epun. Tro la itre seketere ne la itre ekalesia a akötrehneine troa canga iupi fë lo itre pepa ne sipo hnalapa, me thue hnalapa, ngöne lai aderesi ne lai kovasio. E maine epuni a mekune troa nue la hnalapa hna ahnithe koi epun, loi e tro epuni a canga thuemacane la fami ka itreqe memine la serevisi ne hamë uma, matre troa thatraqai itre xane pena.
Itre Nyine Uku Medreng: Hna wathebone troa traqa fë la itre nyine uku medrenge ngöne la itre hnë icasikeu ka tru. Hnene la angetrekë hnëqane la sekirite hna wathebone troa amë itre eje nyipine la itre kuloar, me ngöne la itre cane uma trootro, maine akawane pena la itre icea. Eje hi laka, maine troa ipepetrenyi la ka alanyimu ke, troa iaeatrë hnene la itre nyine uku medreng, thaa medrenge hmekuje kö ngo itre atr fe ka troa kei hnene itre ej. Haawe, kola sipo epuni matre thaa tro kö a traqa fë itre ej ngöne la hnë kovasio. Ngo, thaa hna wathebone kö lo neköi cea i nekönatr, pine laka ijije tro la itre keme me thine a ati nyëne hune icea ezi angatr.
Serevi Voloter: Eje hi laka pë hë servisi ne hamë xen, haawe alanyimu la itre ka huliwa ekö ngöne la servisi cili ka öhne laka ijije tro angatre a huliwa ngöne la itre xaa götran. Hapeu hetre hnepe ijine i epuni kö troa ixatua ngöne la ketre servis, e ijine kovasio? Nyine madrine la troa huliwa thatraqane la itre trejin, ngacama itre hnepe hawa ka co hi. E maine epuni a ajane troa ixatua, ke, kola sipo epuni troa thuemacane la serevis voloter, ngöne la hna kovasio. Ijije tro fe la itre nekönatre ka thaa 16 petre kö lao macatre a hane ixatua, ngo tro pe nyudreni a ce huliwa me keme me thine i angeic, maine ketre ka nyipi atr hë.
Itre Nyine Troa Hmekën: E tro së a hmekëne la itre jole qëmekene tro itre eje a fetra, ke, easë hë lai a neëne troa traqa la ngazo. Tro fe a hmekëne la itre ka atrekënö, maine itre atr ka ngazo thina, angatre a treqene troa patre la itre atr matre troa atrekënö la itre ewekë hnine la itre uma. Loi e tro pala hi a xecie koi epuni laka hnei epuni hna kiine la itre qëhnelö ne la itre loto i epun, nge thaa tro pi kö a amë amamane la ketre ewekë hna piine hnene la itre atr. Ame ngöne la nöjei icasikeu ka tru, ke, kolo hi lo ijine hnene lo itre ka iwanakoime menu hna iëne troa kuca la itre mekune i angatr. Ketre thaa loi kö troa amë menune la itre mo ka tru thupene hune la itre icea. Pine laka ame la itre ka traqa troa hane sine la kovasio ke, thaa itre keresiano hmekuje kö, nyipi ewekë catre tro së a hmekëne me xötrethenge la itre wekë cili nyine amekunë së.