Itre Qatre Thupe a Elemekene La Huliwa—Atre Thupëne La Huliwa Ne Cainöj
1 Kola wangatrune hnyawa hnene la atre thupëne la huliwa ne cainöj, la aqane kökötre ne la evangelia ngöne la teritoare hna athipe thatraqane la ekalesia. Haawe, sisitria la hnëqa i nyidrë ngöne laka, nyidrëti a troa xatua së troa eatrëne hnyawa la hnëqa së, ene la troa cainöjëne la maca ka loi. Ka catre nyidrëti tro fë la evangelia, nge kola elemekene la nöjei ewekë hna amekötine göne la huliwa ne cainöje trootro. Pine laka, ka maca nyidrë troa hamë ini koi itre ka cainöj, haawe nyidrëti a hane xatuane la itretre cainöje asë matre tro fe a atreine tro fë hnyawa la maca ka loi.—Efe. 4:11, 12.
2 Kolo fe a wange hnyawa hnene la qatre thupe celë la huliwa ne la itre drikona ka cilëne la itre hnë hamë itus, me zonal, me teritoar. Hnëqa i nyidrëti fe la troa goeëne hnyawa la etrune la itre itus, me itre zonal, me itre pepa ne sipo, matre troa hetrenyi pala hi thatraqane la huliwa e nöjei treu. Nyidrëti a acaa goeëne hmaca ngöne la macatre la itre teritoar, matre troa xome lo itre hnalapa asë hna wathebone troa cainöje ngön, nge nyidrëti a iëne jë la itre trejine ka ijije troa kuca la itre hnalapa cili.
3 Hnëqai nyidrëti fe la troa wange hnyawa la itre götrane hnë cainöj, tune la itre setroa, me itre gojeny, me itre numero hna troa telefone kow. Nyidrëti a hmekëne me hnëkëne la itre nyine troa kuca, matre troa amekötine la itre icasikeu göi cainöje ngöne la wiik, nge tune mina fe la itre ijine mano. Nyidrëti fe a goeëne hnyawa la hna huliwa, göi itre etid. Nyidrëti fe a thele la itre aqane troa hamëne la ixatua ngöne la götrane la ua, kowe lo itre trejine ka nanazije maine itre ka thaa cainöje hmaca kö. Nyidrëti fe a thele troa atrepengöne hnyawa la huliwa ne la itre pionie, elemekene la porogarame hna hape, Itre Pionie a Xatuane La Itre Xan.
4 Pine laka, nyidrëti la ketre atrene la Kometre ne Huliwa, haawe, nyidrëti a hamëne ngöne la isa Ini Tusi ne la ekalesia, la itre xaa mekune ka sisitria thatraqane la huliwa. Loi e thaa tro pi kö epuni a triane la nyidrëti a troa wange la gurupe i epun, me hane thele troa ce cainöje me nyidrë.
5 Loi e tro asë hi la itre atrene la ekalesia a catre troa ce huliwa hnyawa me drenge thenge la itre hna amekötine hnene la atre thupëne la huliwa ne cainöj. Maine tro së a huliwa tune lai, haawe, tro hë së a kökötre me atreine troa inine hnyawa la itre atr, nge troa hetrenyi fe the së la madrine ka tru troa kuca la hnëqa së, ene la huliwa ne cainöj.