Atraqatre La Huliwa Hna Kuca Hnene La Itre Drikona
1 Hanawange la aqane qeje itre drikona hnene la itus Organisés pour bien remplir notre ministère, götrane 58; hna hape, “Loi e tro fe angatre a amamane ka hape, itre ka meköti angatr, ka catre cainöjëne la Baselaia, nge kola thele loi thatraqane la nöjei atrene la ekalesia.” Eje hi laka, nyipi ewekë tro sa xötre thenge la tulu hna hamëne hnene la itre drikona. Maine tro së a ce huliwa me angatr, memine la itre qatre thup, haawe, troa tro “tru jë la ngönetei mate adraiëne ngöne la ihnim.”—Efe. 4:16.
2 Nyipi ewekë la huliwa ne la itre drikona hnine la ekalesia. Loi e troa mekune hnyawa hne së la itre hnëqa asë ka eje thei angatr: ene la troa thupëne la itre ahnahna hna hamëne hnene la itre trejin, tune mina fe la itre itus, me itre zonal, me itre abonnements, me itre götrane hna troa cainöje ngön; angatre mina fe a kapa la itre atr; me cilëne la ika ho ne la ekalesia; me nyihnyawane la Uma ne Baselaia. Angatre a sine la Ini ne Cainöje Trootro Qa Thei Akötresie. Ame itre xan, angatre a hane kuca la itre cainöje kowe la ka ala nyim, maine hane xomiujine la itre xaa icasikeu ne la ekalesia. Ceitune la itre drikona memine la itre götrane la ngönetrei, laka, angatre a kuca la itre huliwa ka nyipi ewekë koi së.—1 Kor. 12:12-26.
3 Maine troa ce huliwa hnyawa hnene la itre drikona memine la itre qatre thup, kösë itre trejine ka ixomexatuanekeune la itre hnëqa ne la ekalesia, laka, kola itrotrohni ithahnata, me imetrötrekeu, haawe, tro fe hë la itre xaa trejine a nyitipune la aqane huliwa cili. (Kol. 2:19) Maine tro angatre a xome hnyawa pala hi la itre hnëqa hna hamëne koi angatr, me hane wangatrune me xomexatuane la itre hace ne la nöjei trejine asë, haawe, troa mama la huliwa i angatre hnine la ekalesia, ngöne laka, eje a kökötre ngöne la götrane la ua.
4 Nemene la nyine tro së a kuca matre troa amamane la ole së kowe la itre huliwa hna catre kuca hnene la itre drikona? Loi e tro së a nyipi ewekëne la itre hnëqa hna hamëne koi angatr, nge maine troa sipo ixatua, the hmitre kö së troa xemine lai, me thele troa hane ce huliwa me angatr. Loi e tro fe së a qaja, maine kuca la itre ewekë nyine amamane koi angatre ka hape, easë a madrine la itre huliwa hnei angatre hna kuca. (Ite edomë 15:23) Ijije tro së a amamane la nyipi ole së, kowe la itre trejine ka catre huliwa thatraqai së asë.—1 Thes. 5:12, 13.
5 Kola ami trepene hnene la Wesi Ula i Akötresie, la hnëqa, memine itre ewekë hna thele thene la drikona. (1 Tim. 3:8-10, 12, 13) Nyipi ewekë catre kowe la ekalesia, la aqane ahmitrötrëne angatre la huliwa hna hamë angatr. Ijije tro pala hi së a ithuecatre koi angatr, pine laka, angatre asë hi a catre troa “huliwa i Joxu.”—1 Kor. 15:58.