“Tro Ni a Ate Tune Ka e Pëkö Ate Troa Amekötine Koi Ni?”
1 Hnei Filipo atre tro fë evangelia hna hnyingëne kowe la ketre eunuka ne Aithiope, maine trotrohnine jë fe kö angeice la hnei angeice hna e hnine la Wesi Ula i Akötresie, nge hna sa hnene la trahmanyi ka hape: “Tro ni a ate tune ka e pëkö ate troa amekötine koi ni?” Atraqatre la madine i Filipo troa xatua nyidrë troa trotrohnine la maca ka loi göi Iesu, ene pe canga hane ju hi lai trahmanyi xome la bapataiso. (Ite Huliwa 8:26-38) Kola drengethenge hnei Filipo lo hnëqa hna upi angeice troa kuca hnei Keriso, ene la troa ‘inine la nöjei nöj’ asëjëihë, me bapataiso angat.’—Mat. 28:19, 20.
2 Loi e tro sa drengethenge tui Filipo, ene la troa inine la itre atr. Ngo nyipici laka, thaa hne së kö hna majemine öhne thene la itre atr ka etidi me easë, la aqane kökötre nyimenyime ne la Eunuka ne Aithiope. Celë hi ketre wanaithihlë ka uti kowe la hmi i angetre Iudra, nge ka catre angeice e la Tusi Hmitrötr; hnei angeice hna kepe Filipo nge ame hi la hna thele thei angeic, ke ene la troa kapa laka, Iesu hi lo Mesia hna thingehnaean. Eje hi laka, ketre itupathi ka tru koi së e itre xaa ijin, ngöne la easë a etid memine la itre atr ka thatrepengöne kö la Tusi Hmitrötr, nge hna inine angazone hnene la itre hmi ka thoi, maine hna thue ehnefëne hnene la itre jole ne la mel. Nemene la ka troa xatua së troa eatrongë angatre hnyawa, matre hane fe angatre hujëne la mele i angatre koi Akötresie, me xome la bapataiso.
3 Loi e Troa Atrehmekune La Itre Aja Ne La Hnainine Ngöne La Ua: Hna ithahnatane hnene la sinecetrone la Huliwa Ne Baselaia ne Ogas 1998, la eqeane la traeme ne tro sa etid memine la itre atr, ngöne la boroshür, Thele, me itus, Atrehmekune. Hna ithuecatre me hape: “Nyipi ewekë troa wange hnyawa la aqane troa xomiujine la ini tus, matre troa hamëne la ka ijij, thenge la aqane mele memine la hna atreine trotrohnine hnene la hnainin. . . . Loi e tro së a thupëne matre thaa tro kö a nyimenyimëne la etid, me thele troa canga afenesine la itus. Nyipi ewekë tro asë hi a hetrenyi hnene la nöjei hnainin, la trepene ka catre thatraqane la ewekë ka hnyipixe, hnei angeice hna lapaune kow hnine la Wesi Ula i Akötresie.” Qa ngöne lai, loi e troa thupëne matre thaa tro kö a canga sesë troa xome la itus Atrehmekune, me mekune troa wange nyimenyimëne memine la hnainin ngöne la sikisi lao treu. Ame itre xaa hnainin, ke thaa ijije kö la sikisi lao treu, angatre pala kö a aja ixatua matre troa kökötre uti hë la troa bapataiso. Ame ngöne la easë a etid memine la itre atr ngöne la nöjei wiik, xome jë la nöjei traeme ka ijij matre troa xatuane la hnainine troa trotrohnine me kapa la itre ini qa hnine la Wesi Ula i Akötresie. Ame ngöne la itre xaa ijin, ijije hi troa kuca la caa mekene ne la itus Atrehmekune, ngöne la luetre maine köni wiik. Kolo hi lai a aijijë angatr troa e me trotrohnine hnyawa la itre xötre ne la Tusi Hmitrötre hna hamën.—Rom. 12:2.
4 Ngo nemene la nyine troa kuca, e ase jë së afenesine la itus Atrehmekune, nge easë a öhne laka, thaa lualai hnyawa pala kö la nyipici thene la hnainin, maine thaa pexeje petre kö la aja i angeice troa xöle kapa hnyawa la nyipici, me hane nue la mele i angeice koi Akötresie? (1 Kor. 14:20) Nemene fe la nyine tro sa kuca matre troa eatrongë angeice ngöne la gojenyi ne tro kowe la mel?—Mat. 7:14.
5 Hamëne Jë La Itre Hna Ajane Hnene La Hnainin Ngöne La Ua: Maine kola mama laka, hmitre kökötre la ketre atr ngöne la atrehmekun, nge hetre madrine i angeice kowe la itre ini hna kapa, haawe, sisedrëne jë la etid ngöne la ketre itus, thupene lo lai boroshür, Thele, memine la itus, Atrehmekune. Thaa nyipi ewekë kö lai ngöne la nöjei etid asë, ngo maine ijij, sisedrëne jë la etid hnene la itus, Paix véritable, maine Unis dans le culte, maine Parole de Dieu. Ala nyimu la itretre cainöj, ka hetrenyi pala kö la itre itusi cili, atreine hi troa sipo angatr, e pë hë e hnine la ekalesia. Caasi hmekuje hi la itusi ka ijije troa komaadëne e Brooklyn, ene la itus, Parole de Dieu. Ngo eje hi lai laka, tro pala hi a pane nyiqaane etid ngöne la boroshür, Thele me ngöne la itus, Atrehmekune. Ngacama hna bapataisone hë la hnainine qëmekene troa xejë la hnaaluene itus, ngo thaa tro kö a hmaca troa e pala hi la etid ngöne rapor, me itre iwai hmaca, me itre hawa ne etid.
6 Hapeu, kolo lai a hape, ame koi itre hna xötrei bapataison, ka ini ngöne la caa itus, ke tro hë angatre a hane kapa enehila la ketre ixatua jëne la hnaaluene itus? Ohe. Kolo hmekuje hi a amekötine lai, kowe lo itre ka nanazij, maine thaa kökötre pena kö ngöne la nyipici, ene pe angatre a ajane troa xatua angatr. Loi e troa pane iatrene memine la atre thupëne la huliwa ne cainöj, maine troa etid memine la ketre atr hna bapataisone hë. Ngo maine hetrenyi la itre atr hne së hna atre ka etidi hë ekö ngöne la itus, Atrehmekune, ngo thaa hane kö kökötre me axeciëne troa nyihlue i Akötresie me bapataiso, haawe, ma loi e tro sa tro troa hnyingë angatr, maine kola ajane troa xejë hmaca la etid.
7 Hatrene ihnimi la troa sikusikune la itre atr ka etid me easë. Ame la aja së ke, ene la troa xatuane la hnainine troa trotrohnine hnyawa la nyipici e hnine la Wesi Ula i Akötresie. Haawe, tro hë angeice a cile catre ngöne la nyipici, me nue la mele i angeice koi Iehova, me nyihatrene lai hnene la bapataiso ngöne tim.—Sal. 40:8; Efe. 3:17-19.
8 Mekune hi nyipunieti lo ewekë ka traqa kowe la eunuka ne Aithiope, thupene lo hna bapataiso nyidrë? Ceitune me ketre atre drei Iesu, “hnei angeice hna tro madine ngöne la jë i angeic.” (Ite Huliwa 8:39, 40) Epi troa atraqatre pala hi la madrine së, memine la itre atr hne së hna eatrongëne hnyawa ngöne la gojenyi ne la nyipici, me ce nyihlue i Iehova Akötresie—enehila uti hë epine palua!