“Ishinejë Eö La Ishi Ka Loi Ne La Lapaun”
1 Hnei Paulo aposetolo hna qaja catrëne koi Timoteo troa “ishine la ishi ka loi ne la lapaun.” (1 Tim. 6:12) Hlemu loi hë nyidrë hnene la aqane melëne nyidrë la itre trenge ewekë celë. Qatre hë nyidrë, nge thaa hna enijëne pi kö la lapaun, öni nyidrë, ase hë nyidrëti ishine la isi ka loi. (2 Tim. 4:6-8) Hnei nyidrëti pala hi hna catre trongëne la itre aqane troa cainöj, paatre kö thei nyidrë la xoue atr ngo hetrenyi pe la xomihni ahoeany. Maine tro sa xome la tulu i nyidrë, haawe, tro ha xecie koi së laka, easë fe a hane kuca asë la hne së hna atrein, ngöne la ishi thatraqane la lapaune së.
2 Kuca Asë Jë La Hna Atrein: Hnei Paulo hna catre cainöj. (1 Kor. 15:10) Loi e tro mina fe së a hane thele la nöjei atr ka hetre hni ne ajane ngöne la teritoare së. (Mat. 10:11) Maine jë troa canga ilë e sine hmakany, matre troa itronyi memine la itre atr ngöne la itre gojeny. Maine tro pena a cainöje e hnaipajö hej, maine e heji lapa, hmekune lo itre atr a isa bëeke koi isa hnalapa i angatr.
3 Loi e tro sa atreine hnöthe la itre aja së, me hnëkë hnyawa matre thaa tro kö së a traqa hmitre ngöne la itre hna icasikeu göi cainöj ne la itre atrene la ini tusi së. Drei la hna kuca hnene la itre xaa atrene la Bethela ne Etazini, laka, caa hawa ne tro angatre a nyenyapëne la gojeny, matre traqa pi ngöne la itre ekalesia hnei angatre hna troa ce cainöje memin e itre mecixeni me sabath. Haawe, easë a haine fe la itretre cainöje me itre fami hnine la ekalesia së, laka, ngacama nango nanyi la itre hnalapa, ngo ka traqa pala hi angatre ngöne la traem. Itre tulu lai ka lolo, ngöne la troa eatrëne hnyawa la itre hawa hna amekötin, me eköthe hnyawa la mel.
4 Loi e troa hetre aja the së troa wange pala hi la itre atr asë ka drei së. Ketre tune fe la easë a cainöje ngöne la nöjei ijin, me tro fë la itre itus e cahu gojeny, laka, loi e tro pala hi së a thele troa cinyihane la itre hnei angatre hna lapa ngön, me itre numero ne telefon. Nge thupene lai, troa iwai hmaca me thele troa nyiqaane etid.
5 The Mano Kö Së Cainöj: Paulo la ketre atre cainöje lapaa, nge ka pexeje angeice ngöne la huliwa cili. (Rom. 15:19) Tune kaa fe nyipunie? Ka cainöje pala hi nyipunie? Epuni pala kö a hane cainöje trootro ngöne la treu celë? Loi e troa thele hnene la itre ka xomiujine la itre Ini Tus, troa isa wange la itre atrene itre ej, me xatua angatre troa hane cainöje fe ngöne la treu Ogas. Tro fe hë angatre a hane xatua nyipunie.
6 Maine tro sa xötrethenge la tulu i Paulo, ngöne la troa pexeje la aqane tro fë la maca ka loi, tro fe hë së a hane “ishine la ishi ka loi.”