Loi e Itre Atr Ka Madrine Me Ka Catre Huliwa Së
1 Hnei Iesu hna qaja ka hape ngöne la ijine hlepëti nyidrë, ala nyimu catre la itre atr ka ‘tha ’te’ tune lo ijine i Noa. (Mat. 24:37-39) Celë hi matre thaa tro kö së a sesëkötr, e nyimutre la itre atr ka xele ma hane drenge la maca ka loi. Nemene la ka troa xatua së troa hetrenyi pala hi la madrine ngöne la huliwa ne cainöje së?—Sal. 100:2.
2 Ame la hnapan, ke loi e tro pala hi së a mekune laka, ame la maca memine la hnëqa hne së hna xome ke, itre ewekë i Akötresie itre ej. Ame la itre atr ka thaa drei së kö ngöne la hna cainöj, ngacama easë pala hi a catre troa xatua angatr, ke Iehova la hnei angatre hna xele ma wang. Mekune hnyawa kö së laka, Nyidrëti a madrine la aqane catre kuca hnyawa së la huliwa ne cainöj, nge celë hi ka troa xatua së lai, troa hetrenyi pala hi la madrine memine la manathith, ewekë hna kapa hnene la itretre catre kuca la huliwa i Akötresie.—Iako. 1:25.
3 Ame la hnaaluen, ke hetrenyi pala kö la itre xaa atr ka troa kapa la itre jëne iamele hna hamëne hnei Iehova. Haawe, ngacama tru catre kö la itre atr ka xele Iehova, ngo hetrenyi pala kö la itre atr hna aceitunëne me itre mamoe hna troa icasikeun, enehila, kola easenyi catre kowe la pun. Nyipi ewekë tro sa catre cainöj, me tro kowe la “nöjei lapa memine la nöjei hnalapa” troa thele “la ate loi thiina e cili.”—Mat. 10:11-13.
4 Loi e Eje The Së La Aqane Wai Ewekë Ka Loi: Pë hë mejiune ne la itre atr qa ngöne la aqane ujëne la hmi ka thoi. Ame itre xane ke, “kucakuca ha angat, me isa ije hë” hnene la fene ka ngazo. (Mat. 9:36) Maine jë nyimutre la itre hna akötrëne hnene la pë huliwa, maine ketre sine mec, maine hnene laka thaa lapa xetietë kö. Maine tro së a trotrohnine hnyawa la itre hace cili hna melëne hnene la itre atr, haawe tro ha xatua së troa cile huti pala hi ngöne la huliwa së. Catre pi së troa mekune hnyawa la itre nyine tro sa nyiqaane qaja, ene la itre jole hna melëne hnene la itre atr ngöne la teritoare së. Xatua angatre jë troa trotrohnine ka hape, Baselaia i Akötresieti hmekuje hi la nyin kowe la nöjei jole së enehila. Xome jë la itre xötre ne la Tusi Hmitrötr, memine la itre mekune ka ijije troa ithahnatane qa hnine la itre itus, matre troa ketr la itre hni angatre hnene la maca ka loi.—Heb. 4:12.
5 Loi e tro pala hi la itretre catre tro fë la Wesi ula i Akötresie, a mekune hnyawa ka hape: “Ame la madine qathei Iehova te egöcate [së] lai.” (Neh. 8:10) Thaa ijije kö troa paatre la madrine së. “Maine loi la uma cili, loi e troa traqa la manene la thithi nyipunie kow’ ej; ngo maine tha loi kö, loi e hmaca koi nyipunie la manene la thithi nyipunie.” (Mat. 10:13) Iehova a ahnyipixene pala hi la madrine së memine la trenge catre së, matre tro së a catre xomihni ahoeany ngöne la huliwa së ka hmitrötr, nge nyidrëti a amanathithine la aqane mele nyipici së koi Nyidrë.