“Matre Tro Sa Thele Ijin Ekaa?”
1 Ala nyimu la itre atr ka isa hnying tune la, hnene laka, mana la nöjei jol hnei angatr hna kuca ngöne la mele i angatr. Hna qaja ka hape, pëkö ketre ewekë the së ka nyipi ewekë catr nge hna sa tulun, tun la traem. Haawe, ekaa pekö la traeme ne troa kuca la itre xaa huliwa ka nyipi ewekë catr, tune la troa e me inin la Wesi Ula i Akötresie?—Fil. 1:10.
2 Ame la nyipi ewekë, tre, thaa ene kö la troa thel matre troa hul aqean la traem, ngo tro pe a atreine iën matre axeciën la hne së hna ajan troa kuca ka ijij ngöne la itre hnepe hawa ka eje the së. Hetreny asë hi së la 168 lao hawa ngöne la wiik, kola e la 100 lao hawa hna xom troa meköl me troa huliwa. Haawe, nemen la aqane tro së a xom la itre hawa munëne pe, matre troa kepe thangan ka loi qa ngöne itre ej? Kola ithuecatr ngöne Efeso 5:15-17 ka hape, tro së a thupën la aqan tro sa tro, “the tune kö la ite hmo, ngo tune ju la ite ka inamacan, kola anyipiewekën la nöjei ijin . . . , trotrohnin la aja i [“Iehova,” MN].” Kolo lai a amaman la enyipi ewekën la troa thel hnyawa la nöjei ijin troa kuca la itre ewekë ka sisitria hnei Iehova hna upi së troa kuca.
3 Hnei Iesu hna aceitunën la itre drai hnapin hne së hna melën, memin la hneijine i Noa ekö. (Luka 17:26, 27) Hna xom acon la mele ne la itre atr ne la hneijin cili, hnene la itre huliwa hna kuca ngone la nöjei drai. Ngo ame Noa tre, hnei angeic hna xom la traeme i angeic, troa can la aka ka tru, me troa hane cainöj. (Heb. 11:7; 2 Pet. 2:5) Hnei angeic hna öhne tune kaa la traem ne troa kuca la lue huliwa cili? Hnene laka, hnei angeic hna amë panën pala hi la aja i Akötresie, me drengethenge Nyidrë, me kuca la itre ewekë, “tune hi lai hnei angeice hna kuca.”—Gen. 6:22.
4 Nemen La Hna Troa Amë Panën? Hnei Iesu hna qaja ka hape: “Tha tro kö a mele la ate hnei areto hmekuje hi, ngo hnene la nöjei tenge ewekë asë ka xulu qa ngöne la ine ula i Akötesie.” (Mat. 4:4) Ame ngöne la nöjei wiik, kola “thawa la xen [ngöne la ua], edö [së] ngöne la ijin.” (Luka 12:42) Qa ngöne lai, nyipi ewekë pala hi tro së a isa ala caas a e lapaan la itre itus hne së hna kapa, me kuca la ketre porogaram ne ini, matre tro sa trotrohnine hnyawa, nge ketre matre troa hetre nyipi manathith hne së hna kapa qa ngön la göxen hna hamë së o drai. Ketre, pëkö hni ne ole së kowe la xeni ne la ua, e hne së hna xom ej, ceitun memin lo itre göxen hna xeni nyimenyim. Loi e tro pe la ole së a upi së troa ami ijin troa ini, me nyipiewekën hnyawa la itre huliwa ngöne la götran la ua.
5 Atreine hi tro la xeni ne la ua, a eatrongë së kowe la mele ka thaa ase palua kö. (Ioane 17:3) Nyipi ewekë koi së troa amë panën eje ngöne la trepene huliwa së hna hnëkën kowe la nöjei drai. Hapeu, hetre ijine tro kö së a ami göhnen la e Tusi Hmitrötre së ngöne la nöjei drai, me hnëkën la itre icasikeu i Keresiano? Nyipici, atreine hi së. Nge eje hi lai laka, tro ha “atraqatr la jun” hne së hna kapa qa ngöne laka, trotrohnine hë së la aja i Akötresie nge easë fe a eatrëne ej.—Sal. 19:7-11.