Ini Ne Cainöj Trootro Qaathei Akötresie Göi Macatre 2002
1 Thaa nyipi ewekëne kö hnene la itre atr ka ala nyim la troa atrein ithanata. Ngo eje hi laka, ahnahna qaathei Iehova la troa atreine troa ifekeune la itre mekun. Kola aijijë së troa ithanata memin la itre xaa atr, me troa hane qaja amaman la itre mekune së memin la itre aja së. Ngo ame la ka nyipi ewekë, tre, atreine tro sa troa atruny Akötresie jën ej.—Sal. 22:22; 1 Kor. 1:4-7.
2 Jën la Ini Ne Cainoj Trootro Qaathei Akötresie, hna inin la itre nekönatr, me trahmany, me föe troa cainöjën la ëje i Iehova. (Sal. 148:12, 13) Ame ngöne la porogaram ne ini thatraqai 2002, kola troa hnëkën la nyimu topik qa hnin la Tusi Hmitrötr, nge ijij tro së a kepe thangan qa ngöne itre ej, me huliwane itre ej ngöne la hna cainöj trootro. Maine tro së a hnëkë kowe la ini me hane sine ej me qeje mekun, haawe, tro hë së a akökötren la atrehmekune së memin la atreine së ceitun me itretre inine la Wesi Ula i Akötresie.—Sal. 45:1.
3 E Jë La Tusi Hmitrötr o Drai: Maine eje pala hi la Tusi Hmitrötr the së, atreine hi tro së a xome la traem ka ijij matre troa e ej. Atreine hi tro së a xom la itre xaa hnepe menetr ngöne la drai, matre troa e la Tusi Hmitrötr. Drei la manathith ka tru e troa e la caa götran ka pexej ngöne la nöjei drai, nge e hne së hna kuca lai, tre atreine hi tro sa traqa kow la porogaram ne e Tusi Hmitrötr hna hnëkën thatraqane la Ini!—Sal. 1:1-3.
4 Pine laka atreine së troa e hnyawa la Tusi Hmitrötr, haawe kola xatua së troa ketr la hni ne la itre ka drei së, me upi angatr troa atruny Iehova. Loi e tro la itre trejin ka kuca la Xötreqa N. 2, a anyimua e ej, me tupath troa nango e catrën. Tro la atre thupën la ini a qaja aloin la hnainin, me hamë ixatua matre troa atreine e hnyawa pala hi la Tusi Hmitrötr.
5 Xome Jë La Itus Comment raisonner: Hna nyitrepen la xötreqa N. 3 me N. 4 ngöne la itus Comment raisonner. Loi e tro së a thel troa xometrongëne pala hi la itusi cili, ngöne la hna cainöj trootro, ke, troa hetre thangan ka loi la jiane huliwa cili ngöne la huliwa së. Loi e troa iëne hnyawa hnene la itre trejin föe la itre jëne cainöj ka troa ihmeku hnyawa me hetre thangane ka loi ngöne la götrane i angatr. Loi e tro fe la atre thupën la ini a wange hnyawa la aqane hamë ini hnei angatr me aqane huliwane angatr la itre xötr ne la Tusi Hmitrötr.
6 Epi tro pala hi la Ini Ne Cainöj Trootro Qaathei Akötresie a xatua së asë troa huliwan hnyawa pala hi la ahnahna hna hamën koi së hnei Akötresie, ene la troa atreine ithanata matre troa cainöjën pala hi la maca ka loi, me troa atruny Iehova, Akötresi së Kapucatin asë!—Sal. 34:1; Efe. 6:19.