Iamele
Itre Aqane Nyiqaane Ithanata Nyine Ixatua Göi Cainöje Trootro
Troa Huliwane Tune Kaa La Sinecetrone Celë
Nyimutre cahu itre aqane nyiqaane ithanata hna ce wange hë ngöne lo itre Huliwa Ne Baselaia hnapan. Xome jë itre ej ngöne la hna cainöj trootro, nge wange jë la itre thangan hnei epun hna kapa qa ngön. Amë hnyawa ju la sinecetron la Huliwa Ne Baselaia celë, matre troa xome hmaca ej elany, ngöne la easë a hnëkë troa cainöj.
Atreine hi tro së a ahlën la aja ne la ketre atr kowe la Wesi Ula i Akötresie, e thaa jole kö tro angeic a trotrohnin la maca hne së hna tro fë. Qaja jë la ketre hnying ka hmaloi troa trotrohnin, nge thupene lai, e jë la ketre xötr ne la Tusi Hmitrötr ka sa hmekun lai hnying. Maine jë tro së a tupath la itre mekun celë:
“Ame la nyipunieti a goeën la itre drai elany, hapeu, nyipunie a mejiun laka, troa loi maine troa ngazo pena? [Nue pi troa sa.] Hna ahnith hnei Tusi Hmitrötr la itre ewekë ka ngazo hne së hna öhn enehila hnedrai së, nge tune mina fe la ewekë ka troa traqa ngöne la pun.”—2 Tim. 3:1, 2, 5; Ite edomë 2:21, 22.
“Nyimutre la itre jol hna thel troa cile kow hnene la nöje së, tune la itre mec. Hapeu, atre fe hi nyipunie la hnei Akötresieti hna thingehnaean, ene laka tro Nyidrëti a apaatren la itre mec?”—Is. 33:24; Hna ama. 21:3, 4.
“Atre fe hi nyipunieti laka, hna ahnithe hë hnene la Tusi Hmitrötr, laka, tro pe hi a caasi elany la Baselaia ka troa musinën la fen asë?”—Dan. 2:44; Mat. 6:9, 10.
“Hapeue la mekuna i epun, nemen la mel elany ngöne la kola troa musinën hnei Iesu Keriso la fene hnengödrai?”—Sal. 72:7, 8.
“Nyimutre la itre atr ka akötr, tune la itre föe hna qanangazon, maine pine laka, isa hmi kö, maine thaa caa hane kupeine ngönetrei kö. Tune kaa la mekuna i Akötresieti kowe la itre aqane ujë ka ngazo cili?”—Ite Huliwa 10:34, 35.
“Atre hi së laka, hnei Iesu Keriso hna kuca la itre iamamanyikeu ka nyimutre ngöne la hneijine i nyidrë. Maine ijije hi tro nyipunie a sipo nyidrë troa hane kuca la itre xaa iamamanyikeu enehila, nemen la itre hnei epun hna ajan?”—Sal. 72:12-14, 16.
“Kola kucakuca la itre atr enehila troa dreng pala hi la itre jol. Angatre a ajan la itre nyin itre ej. Ngo tro sa xom ekaa la itre nyipi nyin la itre jol ka traqa koi së?”—2 Tim. 3:16, 17.
“Hapeu, trotrohnine kö nyipunie la alien la Baselaia hnei nyipunie hna thithi kow, ngöne la Thith Ne La Joxu?”—Hna ama. 11:15.
Itre Mekun Nyine Nyiqaan
Hanawang cahu itre hnying hna xom qa hnin la itre taan mekun hnin la itus, Comment raisonner, kolo fe a hamën la götran e hnin la itus, hna troa xom la itre mekun ka sa la itre hnying:
Pine nemen matre easë a qatre trootro me mec? (253)
Nemen la pengön la itre ka mec? (255)
Drei la itre nyipi kepin ka upi së troa lapaun koi Akötresie? (106)
Akötresieti kö a hane hnehengazon la itre ewekë ka traqa koi së itre atr? (107)
Hapeu ka mele Akötresie? (107)
Hapeu kolo asë hi a troa elë la itre atr hnengödrai eë? (61)
Hapeu, kola tro la ketre atr hnengödrai eë matre troa hetreny la nyipi mel elany? (62)
Pine nemen matre nyipi ewekë tro sa atre me xom la sipu ëje i Akötresie? (200)
Hapeu, Akötresieti kö Iesu Keriso? (205)
Nemen la hna troa kuca hnene la Baselaia i Akötresieti? (336)
Nemen la alien la mele ne la atr? (434)
Nemen la nyine troa kuca matre troa lolo la faipoipo së? (229)
Hapeu, hna kapa asë kö la itre hmi hnei Akötresie? (310)
Nemen la aqan troa atrehmekun la nyipi hmi hnene la ketre atr? (316)
Tune kaa la aqane ajojezin la fen asë hnei Satana? (368)
Pine nemen matre Akötresie a nue la iakötrë? (375)
Pine nemen matre tru catr la iangazo enehila? (237)
Drei la ka musinën la fen celë—Akötresie maine Satana? (250)
Itre Mekun Göi Troa Tro Fë La Boroshür Thele
“Maine jë caasi hi la mekune së, ene laka, nyimutre catr la itre atr ka lapaune koi Akötresie. Ame asë hi la itre atr ka lapaune koi Nyidrë, tre angatr a qaja ka hape, hetre hnei Akötresie hna thele the së. Ame la hna thaa kapa kö hnene la itre atr, tre, ene la mekun, kola hape, Nemen la hnei Akötresie hna thele the së?” Thupene lai, amamane jë la boroshüre Thele, nge xome jë la ini 1, nge ithanatane jë.
“Nyimutre la itre jol ka traqa kowe la itre hnepe lapa enehila, haawe, hane kö nyipunieti thel la nyine troa kuca matre troa hetreny la madrin e hnin la fami?” Thupen la hna sa, qaja jë ka hape, Akötresie a amaman hnine la Tusi Hmitrötr la nyipi jën madrin kowe la itre hnepe lapa. E jë la Isaia 48:17. Thupene lai, xome jë la ini 8 ngöne la boroshür Thele, nge amamane jë la itre xaa xötr hna hamën, ka troa xatuan hnyawa la nöjei atren la hnepe lapa.
“Tune kaa la mekune i epun, jëne inamacan la troa nue la Atre xupi së troa hamën koi së la atrehmekun ka nyipi ewekë koi së, matre troa hetre thangan ka loi e hnin la hnepe lapa së?” Thupen la hna sa la hnying, xome jë la boroshür Thele. Goeëne jë la ini 8, nge qaja jë ka hape, ej e hnin la boroshür la itre trepene meköt ne la Tusi Hmitrötr hna hamën koi angatr isa ala caas itre atren la fami. E jë la itre hnying ngöne la qaan la ini. Hnyingëne jë maine kola ajan hnene lai atr troa e la itre mekun ka sa lai itre hnying.
“Ej e hnin la boroshür celë la ketre aqan etid ka lolo catr, kola troa ce ithanatan la itre trepene ini qa hnin la Tusi Hmitrötr. Troa sa trongën ngöne la itre götran la itre hnying ka ajolën la itre atr ngöne la itre macatre ka nyimutre catr. Hanawang la ketre ceitun, Nemen la aja i Akötresie kowe la fen?” Fe jë la boroshür kowe la ini 5, nge e jë la itre hnying ngöne la qaan la ini. Hnyingëne jë kowe lai atr la hnying hnei angeic hna ajan troa ithanatan, nge e jë la (itre) paragaraf ka sa hmekun lai hnying, nge goeëne ju fe la itre xötr hna hamën. Qaja jë fe ka hape, atreine hi troa sa la itre xaa hnying, tun la aqane thele së la itre mekun ka sa lo lai hnying hne së hna ce wange hë. Sipone jë troa bëeke hmaca troa ithanatan la ketre hnying.
“Nemen la kepin matre tru catr la isi ngöne la itre hna ini? Hapeu, thangane hi la hna thaa inin la itre nekön hnene la itre kem me thin? Maine pena hna löth la aqane mele i angatr hnei Diabolo?” Nue pi troa sa. Maine kola qaja hnene la atr ka hape, hnei Diabolo hna ajojezin la mele i angatr, haawe, e jë la Hna Amamane 12:9, 12. Qaja amamane jë la hna kuca hnei Diabolo ngöne la fen asë, ngöne laka angeic a sem la gomegom. Thupene lai, fe jë la boroshür Thele, ngöne la ini 4, nge hnyingëne jë kowe lai atr maine jë ase hë angeic hane thele ka hape, ka xulu qa kaa lae Diabolo. E jë me ithanatan la itre pane mekun ne la lue paragaraf. Maine kola qaja hnene lai atr ka hape ame la kepin la itre isi ngöne la itre uma ne ini, tre, qa ngöne laka, “thaa hna inine kö la itre nekön hnene la itre kem me thin, haawe, e jë la 2 Timoteo 3:1-3, nge amamane jë la itre thiina ka ngazo ka akökötren la jole cili. Thupene lai, fe jë la boroshür Thele, ngöne la ini 8, nge e jë la paragaraf 5, me sisedrën la porotrik.
“Hapeu aqane mekun ka loi la troa nue Akötresie troa hamën la atrehmekun hne së hna ajan troa eköth la mele ne la hnepe lapa së, matre tro pala ej a tro loi?” Thupen la hna sa, xome jë la boroshür Thele. Fe jë kowe la ini 8, nge qaja jë ka hape hetrenyi e hnin la itre trepene meköt qa hnin la Tusi Hmitrötr, thatraqan la nöjei atren la fami. Sipone jë troa iamacanyin la aqan troa ce xom la boroshür memin la Tusi Hmitrötr, matre troa kepe thangan ka loi qa ngön.
“Nyimutre catr la itre jol hne së hna qëmeke kow ngöne la hneijine së enehila, tune kaa, ijije kö tro la thith a hamën koi së la ixatua ka sisitria thatraqan la itre jole cili? [Nue pi troa sa.] Nyimutre la itre atr ka qaja ka hape, kola hamën koi angatr hnene la thith, la trenge catr e kuhu hni angatr. [E jë la Filipi 4:6, 7.] Ngo maine jë troa mekun hnene la atr ka hape, thaa hna drenge kö hnei Akötresie la itre thithi angeic. [Fe jë la boroshür, Thele kowe la ini 7.] Kola qejepengön hnene la boroshür la aqan tro sa kepe thangan ka loi qa ngön la thith.”
“Hnei eahuni hna ce ithanatan memin la itre atr ka lapa ezi hun, la kepin matre nyimutre catr la itre hmi ka isapengön e cailo fen. Ngo kola öhn laka, caasi hi la Tusi Hmitrötr. Tune kaa la mekune i epun, pine nemen matre kola isazikeu la itre hmi? [Nue pi troa sa. Fe jë la boroshür Thele, kowe la ini 13, nge e jë la itre pane hnying.] Maine tro nyipunie a e la ini celë, tro hë epuni a kapa la itre mekun ka lolo ka sa la itre hnying cili.”
Thupen la hna hamën la itre zonal, La Tour de Garde me Réveillez-vous ! sipone jë troa pane e koi nyidrë la ketre paragaraf ka co. Maine ka loi hi, haawe, fe jë la boroshür Thele kowe la ini 5. Amamane jë la itre hnying hna hamën ngöne la qaan la ini, me sipo angeic troa dreng la itre mekun ka sa la pane hnying, ngöne la epuni a e la pane paragaraf. Thupene la hna e la paragaraf, hnyinge jë, me treqen la mekun ka sa lai hnying. Hamëne jë la boroshür, nge maine angeic a kapa, haawe thele jë troa bëeke hmaca troa ce ithanatan me angeic la itre mekun ka sa pena ha lo lai lue xaa hnying ngöne pala hi la ini hna ce nyiqaan ithanatane hë.
Itre Mekun Göi Troa Tro Fë La Itus Atrehmekune
Cile xome jë la Tusi Hmitrötr, nge qaja jë ka hape: “Eahuni a pane ce thawa enehila memin la itre atr ne la götrane i epun, la ketre xötr qa hnin la Tusi Hmitrötr. Hna cinyihan ka hape . . .” E jë la Ioane 17:3, nge thupene lai hnyingëne jë ka hape: “Hapeu, epuni a öhne la ewekë hna thingehnaean koi së, e eje the së la nyipi atrehmekun? [Nue pi troa sa.] Troa thel ekaa la atrehmekun celë?” Thupen la hna sa la hnying, amamane jë la itus, Atrehmekune, nge qaja jë ka hape: “Kola köjan hnene la itusi celë la atrehmekun ka troa eatrongën la atr kowe la mel ka thaa ase palua kö. Ej a sa la itre hnying hna majemin thel hnene la itre atr, gön la pengön la Tusi Hmitrötr.” Amamane jë la itre alien la itus, nge hnyingëne jë kowe lai atr, maine ase jë fe hë angeic hane thele ewekë ngöne la itre taan mekun celë.
“Hapeu, hnei nyipunieti kö hna isa thel maine Akötresieti a hane wangatrun maine hnehengazon la thiina ka thaa meköti kö memin la akötr ka haöth la fen enehila, a tune mina fe la itre sipu akötre së? [Nue pi troa sa.] Kola qaja koi së hnei Tusi Hmitrötr ka hape, Akötresie a hnimi së, nge Nyidrëti a troa xatua së ngöne la itre ijine easë a latresi me akötr.” E jë la itre xaa xötr ne la Salamo 72:12-17. Fe jë la itus, Atrehmekune kowe la mekene 8, nge amamane jë ka hape, ej a hamën la itre mekun ka keukawa nyine troa sa la ketre hnying ne la itre atr ka nyimutre catr, hna hape, Pine nemen matre Akötresieti a nue la akötr? Maine ijij, ithanatane jë la itre xaa mekun qa hnin la Tusi Hmitrötr, hna eköth ngöne la itre paragaraf 3 koi 5, maine kuca tune jë pena lai ngöne la kola iwai hmaca.
“Ala nyimu catre së itre ka trene sinee ka meci hë. Hane kö epuni thel maine jë ijije hmaca troa hane iöhnyi me angatr? [Nue pi troa sa.] Hnei Iesu hna amaman hnyawa ka hape, atreine troa amelen hmaca la itre sinee së qa hna mec. [E jë la Ioane 11:11, 25, 44.] Maine nyipici laka, itre iamamanyikeu lai hna kuca ha hnei Iesu, a itre hadredre macatre hë, ngo kolo pe a amaman hnyawa la hnei Akötresieti hna thingehnaean troa eatrëne lai thatraqai së.” Fe pi la itus Atrehmekune kowe la iatr ne la götran 85, nge e jë la itre mekun ka qejepengön la iatr. Thupene lai, amamane jë la iatr ne la götran 86, nge qeje mekune jë ngön. Nyitrepene jë la iwai hmaca ne la wiik ka troa xulu, nge hnyingëne jë ka hape: “Ajane kö epun troa atre la kepin matre kola tru trootro la itre atr uti hë la meci angatr?” Bëeke hmaca jë troa ithanatan la meken 6.
“Hane kö epun thel la kepin matre kola ajan catrën hnene la itre atr troa mele aqeany?” Thupen la hna sa, fe jë la itus Atrehmekune kowe la mekene 6, nge e jë la paragaraf 3. Ithanatane jë la itre xötr hna hamën. Xome jë la lue hnying ngöne la pune lai paragaraf, nge hnyingë angeice jë maine angeic a ajan troa hane atre la itre mekun ka sa lai itre hnying. Maine ajane hi angeic, haawe, ithanatane jë la itre hnepe paragaraf thupen.
“Eahuni a hnyingën kowe la itre atr maine angatre jë kö a hane lapaun kowe la . . .” E jë la Genese 1:1, nge thupene lai hnyinge jë ka hape: “Hapeu, epuni kö a hane kapa la mekune celë?” Maine kola kapa hnei angeic, haawe qaja jë ka hape: “Ketre eni mina fe. Ngo tune kaa la mekune i epun, maine nyipici laka, hnei Akötresie hna xup la nöjei ewekë asë, Nyidrëti kö la atrekë zön cahu ngazo enehila?” Thupen la hna drenge hnyawa la mekun ne la atr, e jë la Ate Cainöj 7:29. Fe jë la itus Atrehmekune, kowe la mekene 8, nge e jë la paragaraf 2. Maine thaa kapa kö angeic la Genese 1:1, upi angeice jë troa wang la enyipicin laka, ka mele la Atre Ixup.—Wange ju la itus Comment raisonner götran 72-74.
“Hapeu, nyipici laka, qa ngön la engazon la aqane saze nyimenyim enehila la thiina ne la itre atr, haawe, nyipi ewekë tro së a hetre ini ka troa wenë iujin hnyawa la mele së? [Nue pi troa sa.] Ngacama hna cinyihane hë ekö catr la Tusi Hmitrötr, ngo ej a hamën la eamo ka lolo thatraqan la mele së enehila me itre hnepe lapa së.” Thupene lai fe jë kowe la mekene 2 ne la itus Atrehmekune, nge e jë la paragaraf 10, memin la pane xötrehnëewekë ne la paragaraf 11, nge xome ju fe la 2 Timoteo 3:16, 17.
“Ajane kö nyipunie troa atre la itre ewekë ka troa traqa elany koi së me kowe la fen? [Nue pi troa sa.] Caasi hi la hnëewekë hna xom hnei Tusi Hmitrötr matre troa qaja la itre drai elany, kola hape—Paradraiso! E cili hi lo hnei Akötresieti hna amë la pane trefën thupen la hnei Nyidrëti hna xupi nyidro. Hanawang la aqane qejepengön la Paradraiso cili.” Fe jë la itus Atrehmekune kowe la götran 8, nge e jë la paragaraf 9, fene la hna cinyihan acon hna hape, “Mele Ngöne Paradraiso.” Thupene lai, ithanatane jë la itre mekun ne la paragaraf 10, nge e jë la xötr hna hamën, Isaia 55:10, 11. Sipone jë troa sisedrën la porotrik, me qaja la pengön la Paradraiso hna troa acile hmaca elany, hna qejepengön ngöne la paragaraf 11-16.
Maine epuni a bëek hmaca troa wang la itre atr ka xom la itre zonal, La Tour de Garde me Réveillez-vous ! qaja jë koi angatr ka hape:
“Ame lo traqa hnapane ni, hneng hna hamë nyipëti lo ketre zonal, La Tour de Garde la ëjen. Maine jë epuni a öhne lo taan hna cinyihan apexejen, hna hape, La Tour de Garde annonce le Royaume de Jéhovah. Enehila, eni a ajan troa pane qaja la pengön la Baselaia cili, memine la alien ej kowe la mele i nyipunie me hnepe lapa i nyipunie.” Thupene lai, fe jë la boroshür, Thele ngöne la ini 6, nge e jë me ithanatane ej maine hetre ijin kowe lai atr troa drei së.
“Ame lo traqa hnapane ni, hneng hna amë pe la itre zonal, La Tour de Garde me Réveillez-vous ! Itre ej a akökötren la metrötre së kowe la Tusi Hmitrötr, memin la itre hna amekötin thatraqan la thiina së. Eni a bëeke hmaca troa amaman koi epun la nyine troa xatua epun matre troa trotrohnin la Wesi Ula i Akötresie, ke, eni a mekun laka, ketre ewekë la ka sisitria catr kowe la mel ne la nöjei atr.” Amamane jë la boroshür Thele, me sipon troa nyiqaan ini tusi ngön.
Ame ngöne la easë a tro fë la itre itus ka 192 lao götran hna kapa hë ekö, pane tupathe ju la aqane nyiqaane ithanata celë:
“Tru catr la itre ewekë hna kuca enehila matre troa sisitria catr pala hi la ini. Tune kaa la mekune i epun, nemen la pengöne ini hna troa xom hnene la ketre atr, matre hetrenyi la ketre madrin ka tru, nge hetre thangan ka loi thatraqan la mel? [Nue pi troa sa. [E la Ite Edomë 9:10, 11.] Ame la itusi celë [hamëne jë la taane la itus hnei epuni hna tro fë] hna nyitrepene ej hnei Tusi Hmitrötr. Ej a amaman la sipu atrehmekun, göi troa mele epine palua.” Amamane ju la ketre ceitun hnine la itus, nge upi angeice jë troa hane e ej.
Maine hnei epun hna öhn la ketre aqan nyiqaane ithanata ka lolo troa ahlën la aja ne la itre atr, haawe, xome lapaane jë ej! Ngo loi e troa xom ej hmekun la itus hna troa tro fë ngöne la treu.
Itre Xaa Itus
Hetrenyi la itre xaa aqan nyiqaane ithanata thatraqan la itre xaa itus me boroshür, troa xom itre ej jën la Index des publications de la Société Watch Tower:
Itre Aqan Nyiqaane Ithanata
Itre Itus Hna Amë Wengën
Troa Qaja Mekötin
Tupathe jë troa xom cahu ketre aqan troa qaja mekötin la tronge së, matre troa nyiqaane etid memin la itre atr:
“Hapeu, atre fe hi epun laka, atreine hi troa xom la hnepe menetr troa sa la ketre hnying ka nyipi ewekë jën la Tusi Hmitrötr? Hanawang la ketre ceitun . . .” Thupene lai, hamëne ju la ketre hnying ka mama ngöne la qaan la ketre ini e hnin la boroshür Thele, nge ka troa ketr la hni ne la itre atr.
“Tro sa pane goeën la aqan troa tro xom la ini tus ka pë thupen. Troa xom la faif lao menetr ne troa iamacanyin. Hapeu, ijije kö la faifi lao menetr?” Maine ka loi hi, haawe, xome jë la ini 1 hnin la boroshür Thele, matre troa iamacanyin la etid, me e hmekuj la caas maine lue xötr hna iën qa hnin la Tusi Hmitrötr. Thupene lai, hnyinge jë ka hape: “Eu la epuni a troa pane nue la 15 lao hnepe menetr, matre ijij tro së a kuca pena la ketre ini?”
“Nyimutre la itre atr ka trene Tusi Hmitrötr, ngo thatre kö angatr ka hape, ej a qatreng la itre mekun ka sa la itre hnying, hne së asë hna pi atre thatraqan la mele së. Maine tro sa xom la itre jiane huliwa nyine ixatua [boroshür Thele maine itus Atrehmekune] troa etid, me xom la caa hawa ngöne la wiik, haawe, atreine hi tro sa kapa la itre ini ka nyitrepen la Tusi Hmitrötr, ngöne hi la itre treu ka xalaith. Eni a ajan troa amaman koi nyipunie la aqane trongen la etid.”
“Eni a troa hane hnyingë epun, maine aja i epuni fe troa inin la Tusi Hmitrötr, nge pëkö thupen. Maine ijij, tro ni a pane amamai epun ngöne hi la itre hnepe menetr ka co, la aqane ini Tusi Hmitrötr ne la itre fami ngöne la 200 lao nöj ka tru. Atreine hi tro sa xom la ketre taan mekune cili, matre troa nyitrepen la porotrike së. [Amamane jë la itre aliene mekun ne la itus Atrehmekune.] Nemen la taan mekun hnei epun hna ajan troa ithanatan?” Nue pi la atr troa ketre iën. Xome jë lai taan hna iën, nge nyiqaane etid jë qa ngön la pane paragaraf.
“Eni a inin la Tusi Hmitrötr memin la itre atr, nge ijiji eni pala kö troa hane etid kowe la itre xaa ka pi ajan troa ini tus. Eahuni a xom la jiane huliwa celë, matre troa etid kowe la itre atr. [Amamane jë la itus Atrehmekune.] Itre treu ka xalaithe hi troa etid, nge kola troa hamën la itre mekun ka sa la itre hnying, tun la hna hape: Pine nemen matre Akötresie a nue la akötr? Pine nemen matre easë a tru trootro uti hë la meci së? Nemen la ewekë ka traqa kowe la itre atr hne së hna hnim ka meci hë? Nge tune kaa la aqane tro së a qale catr koi Akötresie? Ajane kö epun, tro ni a pane amaman la aqan troa wang la ketre ini?”