Itre Kem Me Thin—Inine Jë La Itre Nekö i Nyipunie Qaan La Angatr a Nekönatr
1 “Inine jë la nekönate thenge la jë i nyën; nge e qate hë tha tro kö nyën’ a jea qa ngön.” (Ite edomë 22:6) Itre kem me thin, maine thaa ajane kö epun matre tro la itre nekö i epuni a “jea qa ngön” la nyipici, eu la troa nyiqaane ini angatr? E nekönatr petre kö nyudren!
2 Ame ngöne la Paulo a qeje Timoteo ka hape hna ini angeic ngöne la götran la ua qaan “e nekönate,” ke, kola hape, qaan e medreng petre kö. (2 Tim. 3:14, 15) Celë hi matre, hnei Timoteo hna kökötr uti hë la ketre thupëtresij ka maca angeic ngöne la götran la ua. (Fil. 2:19-22) Itre kem me thin, loi e tro fe nyipunie a nyiqaan troa hamën kowe la itre nekö i nyipunie “e nekönate” petre kö nyudren, la ini ka nyipi ewekë matre tro nyudren a ‘kökötre trootro xajawa i Iehova.’—1 Sam. 2:21.
3 Hamëne Jë La Tim Ka Ijij Matre Tro Angatr a Kökötr: Ceitun la itre nekönatr memin la itre feja, laka loi e troa fie lapaan itre ej, matre troa tru trootro uti hë la itre isinöe; ame itre nekönatr asë, nyipi ewekë troa hamë nyudren hnyawa pala hi la timi ne nyipici qa hnin la Tusi Hmitrötr, matre tro angatr a kökötre me itre hlue angatr ka macaj. Ame la pane aqan troa inin la itre nekönatr la nyipici, me xatua angatr troa imele nyipicikeu me Iehova, tre, ene la troa inin pala hi la Tusi Hmitrötr cememin la hnepe lapa. Ngo loi e tro la itre kem me thin, a wange hnyawa la isa eqean la ini hna hamën, thenge la itre macatren la isa nekönatr. Ame koi itre nekönatr ka co, tre, ka loi kö la troa anyimua kuca la ini ngo thaa tro pe a aqean la traem, hun la troa isa acaa kuca itre ej, nge aqean menune pala ha.—Deu. 11:18, 19.
4 Thaa tro pi kö së a wangacon la atrein thene la itre nekönatr troa canga trotrohnin la itre hna inin. Qaja jë koi angatr la aqane mel ne la itre atr hna qejepengön hnin la Tusi Hmitrötr. Nue angatre pi troa desën la itre iatr hna melën me hna qejepengön hnin la Tusi Hmitrötr, maine elon pena la itre ewekë ka traqa ekö. Loi e troa wange fe la itre video me dreng la itre kaset, tune lo itre daram hna qeje pengön hnin la Tusi Hmitrötr. Loi e troa hamën la ini e hnin la fami, thenge la itre macatre memin la isa aqane atrein trotrohnin ne la itre nekönatr. Loi e troa hmaloi la itre pane ini, thaa tro kö a tru menu pala ha; ngo eje hi lai laka, ame la kola tru trootro la nekönatr, haawe ketre kolo mina fe a atraqatre trootro me kökötr la ini hna troa hamën. Loi troa aisapengönën, nge troa hetre madrin troa ce thawa la ini qa hnin la Tusi Hmitrötr. Maine nyipunie a mekun tro la itre nekö i nyipunie a “ajan” la Wesi Ula, haawe, loi e tro nyipunie a kuca matre troa ketre ijin ka lolo la ijine ini tus.—1 Pet. 2:2.
5 Loi e Troa Hane Wangatrunyi Angatr e Hnin La Ekalesia: Ami trepene hnyawa ju la itre mekun hna troa eatrën trongën hnene la itre nekö i epun, matre tro nyudren a hane nyipi ewekën hnyawa la itre hna kuca e hnin la ekalesia. Nemen la pane mekun nyine troa eatrën? Hna qaja hnene la ketre trefën ka lue nekönatr ka co, ka hape: “Hna nyiqaan ini nyidroti troa lapa hnyawa e hnin la Uma Ne Baselaia.” Thupene lai, kola xatuan la lue nekönatr troa hamë mekun e hnin la itre icasikeu, thenge la itre trenge ithanata hnei nyidro hna isa eköth, matre troa nyiqaane hnëkë troa eatrën la ketre mekun, ene la troa hane kuca la itre xötreqa ngöne la Ini Ne Cainöje Trootro Qaathei Akötresie. Ame ngöne la hna cainöj trootro, hetrenyi la itre mekun hna troa eatrën, ene la troa hamën la ketre tarak, troa e la ketre xötr, maine troa xom la ketre aqane nyiqaane ithanata matre troa tro fë la ketre zonal, me troa hane thelejën troa porotrik memin la itre atr hna cainöje kow.
6 Hamëne Jë La Ketre Tulu Ka Lolo: Hapeu, hna drei epuni kö ngöne la nöjei drai hnene la nekö i epun, e qeje Iehova, me thithi koi Nyidrë? Hane kö angatr öhnyi epun e inin la Wesi Ula i Nyidrë, me sin la itre icasikeu, me hane cainöj trootro, me madrin troa kuca la aja i Akötresie? (Sal. 40:8) Nyipi ewekë tro angatr a kuca lai, nge tro fe nyipunie a ce kuca me nyudren la itre ewekë cili. Hnene la ketre nekö jajiny hna qaja la thine i angeic, laka, hnei eahlo hna hetrun la sikis lao nekönatr matre tro nyudren a hane anyipici Akötresie, önin la jajiny ka hape: “Ame la ka ketr la itre hni hun, tre, ene la tulu hna hamën hnei nenë, hetre thangane catre kö la maca hna hamën jën la tulu ne lapaune i eahlo, hun la itre trenge ewekë.” Hna qaja hnene la ketre trefën ka foa lao nekönatr, ka hape: “ ‘Hne huni hna amë panë Iehova ngöne la mele hun,’ a thaa göi qaja hmekuje kö, ngo celë hi aqane tro xome hun la mele hun.”
7 Itre kem me thin, canga nyiqaane jë me inin la itre nekö i nyipunie e co petre kö nyudren, me ini angatr la nyipici qa hnin la Wesi Ula i Akötresie, me amë trongën thatraqai angatr la itre mekun nyine troa eatrën, me hamë tulu ka lolo koi angatr. Maine tro nyipunie a kuca la itre ewekë celë, eje hi lai laka, tro hë nyipunie a hetrenyi la madrin ka tru!