Mele Nyipici Jë Ngöne La Kola Upetrij La Ketre Sinee Së
1. Nemen la ketre ewekë ka troa tupath la Keresiano ka mele nyipici koi Iehova?
1 Atre hi së laka, ka ihnimi catr la itre atren la hnepe lapa. Nge troa ketre itupathi ka tru, ngöne la kola upetrij maine kola ketre sipu mekun troa nue la ekalesia, hnene la ketre trahmany maine föe ka faipoipo, maine ketre nekönatr, maine ketre kem maine thin, maine ketre sinee pena. (Mat. 10:37) Tune kaa la aqane tro la itre keresiano ka mele nyipici koi Akötresie, a ujë kowe lai sinee cili? Hapeu, troa ketre pengöne kö la aqane tro sa ujë kowe la ketre sinee hna upetrij, maine angeic a mele hnine la uma së. Ame la hnapan, tre, loi e tro së a wange hmaca la hna qaja hnei Tusi Hmitrötr ngöne la mekune cili, memine la itre trepene meköti hna troa trongëne mina fe hnene la itre hna upetrij, me kowe fe la itre ka troa ananyi angeic.
2. Thenge la hna qaja hnene la Tusi Hmitrötr, nemen la aqane ujë ne la itre Keresiano kowe la itre hna upetrij qa hnine la ekalesia?
2 Nemene La Aqane Troa Ujë Kowe La Ketre Atr Hna Helën: Kola upi së itre Keresiano hnene la Wesi Ula i Akötresie, troa thupën matre thaa tro kö a ce sinee memine la itre atr hna upetrij qa hnine la ekalesia, kola hape: “E hete ate thei nyipunie a hape, tejin, ngo ate nyi xetë, me meciun, me thithi kowe la idola, me cateqë, me iji ka hait, me thepe mo, [“the ce tro hmaca kö me angeic,” MN] the ce xeni kö me ite ka tune lai. . . . Helënepi qa thei nyipunie la ate ka ngazo.” (1 Kor. 5:11, 13) Hna qaja mina fe hnei Iesu ngöne Mataio 18: 17, ka hape: “Ame hna tun la [atr hna helën] koi ’ö la etheni me telona.” Atre hnyawa hi la itre ka drei Iesu laka, ame la itretre Iudra ne la ijine cili, tre, thaa ka ce mele kö angatr memine la itretre ethen, nge angatr a kötren la itre telona, ke kösë ame koi angatr, ke itre hna methinën. Qa ngöne lai, hnei Iesu hna inin la itretre drei nyidrë, ka hape, thaa tro kö a ce tro memin la itre hna upetrij qa hnine la ekalesia. —Wange ju la zonal, La Tour de Garde ne 15 Diseba 1981, götrane 18- 20.
3, 4. Nemen la hna wathebo së troa ce kuca memin la itre atr hna upetrij?
3 Kolo lai a hape, thaa tro kö la Keresiano ka mele nyipici, a ce tro memin la ketre atr hna upetrij qa hnine la ekalesia. Thaa ene hmekuje kö la troa ce tro. Ngo kolo fe a qaja hnene la Wesi Ula i Akötresie ka hape, ‘goi thaa tro fe së a ce xeni memine lai atr cili.’ (1 Kor. 5:11) Qa ngöne lai, loi e tro mina fe së a thupën matre, thaa tro kö së a caas memine la hna helën. Kolo lai a hape thaa tro kö sa ce tro me angeic troa ce xeni me lapa ezine hnagejë, maine troa ce feet, maine troa ce elo balo, maine troa itö, maine troa wai elo, maine troa ce xeni me angeic ngöne la hnalapa maine ngöne restora.
4 Nge tune kaa göi troa ithanata memin la hna upetrij? Maine thaa Tusi Hmitrötre kö a amexeje asë la nöjei nyine troa kuca, ngo ame pe, kola xatua së hnene la 2 Ioane 10, troa trotrohnine hnyawa la aqane mekune i Iehova, hna hape: “E traqa ketre atre koi nyipunie, nge tha tro fë kö la ini celë, the kepe angeice kö kowe la itre uma i nyipunie, nge the italofa kö me angeic.” Kola qaja hnene la zonal, La Tour de Garde ne 15 Diseba 1981, götrane 25, ka hape: “Maine tro hi a ibozu, celë hi ketre jëne tro lai a porotrik memine la ketre hna upetrij, nge ketre, ame la pune lai, tre, troa nyiqaane aiasenyi së hmaca memine lai hna helën. Hapeu, ajane kö së troa nyiqaane tune lai memine la ketre atr hna upetrij qa hnine la ekalesia?”
5. Ame ngöne la kola upetrij la ketre atr qa hnine la ekalesia, nemen la pun koi angeic?
5 Ketre kola qaja hnene la zonal, La Tour de Garde ngöne la götrane 31, kola hape: “Eje hi lai laka, ame la kola sipu kuca la ngazo hnene la Keresiano, nge thupene lai kola upetriji angeic, hetre pune ka ngazo koi angeic: Thatreine kö troa kepe angeic hnei Akötresie; thaa ka hane sine hmaca fe kö angeic la madrin ka eje thene la itre atren la ekalesia i Keresiano; ce mele i ange trejin, ene la nöjei ce huliwa me ce madrin memine la itre sinee Keresiano.”
6. Hapeu, hna sawa la ketre Keresiano troa ce kuca la itre huliwa memin la ketre sinee i angeic hna upetrij, a ka ce mele me angeic hnine la uma ka caas? Qeje pengöne jë.
6 Ngöne La Hnalapa: Hapeu, kolo hë lai a hape, maine hna upetrij la ketre Keresiano ka mel hnine la hnalapa ka caas, memine la itre xaa atren la fami, thaa tro hmaca kö la itre xaa atren la hnepe lapa a ithanata me angeic, me ce xen, me hane ce kuca me angeic la itre xaa huliwa ne la hnalapa? Kola qaja hnene la zonal, La Tour de Garde ne 15 Eiperem 1991, ngöne la itre ithuemacanyi e kuhu fen, götrane 22, kola hape: “Maine kola ce mel hnene la ketre Keresiano hna upetrij memine la itre xaa atren la hnalapa, haawe, tro angeic a hane ce kuca memine la itre atren la fami la itre jol e hnine la hnalapa, me itre xaa huliwa ju kö.” Qa ngöne lai, isa qanyine kö la itre atren la hnepe lapa troa isa axeciën, maine thaa tro kö angatr a hane ce xeni memine la hna upetrij, maine troa kuca caasin la itre xaa huliwa ne la hnalapa. Ngo eje hi lai laka, thaa tro kö angatr a amaman kowe la itre trejin ka hape, ceitune pala hi la aqane ce mele i angatr enehila memine lai hna helën, me ekö lo thaa ase petre kö upetriji angeic.
7. Nemen la aqane saze la itre ewekë ngöne la götrane la ua, ngöne la kola upetrij la ketre atren la hnepe lapa?
7 Ngo eje hi laka, kola amamane hnyawa hnene la zonal, La Tour de Garde ne 15 Diseba 1981, götrane 28, la pengö së memine la itre hna upetrij, maine ka sipu tro trij la ekalesia: “Pë hmaca kö troa ce kuca me angeic la itre ewekë ngöne la götrane la ua. Aqane ujë lai hna troa wangatrune fe hnene la itre sipu sinee i angeic, a memine fe la itre atren la fami i angeic. . . . kolo lai a hape, tro ha saze la itre ewekë hna kuca hnine la hnalapa, ngöne la götrane la ua. Hanawang la ketre ceitun, maine hna upetrij la trahmany, troa jole kowe la föe i angeic me haa nekönatr, troa ce kuca me angeic la etid ne la fami, maine troa ce e la Tusi Hmitrötr, maine thithi pena. Maine angeic a ajan troa thith, maine ngöne la ijine xen, meköti tro angeic a thith, ke hnalapa i angeic. Ngo ame koi föe me haa nekönatr, atreine hi tro angatr a isa thithi thaup koi Akötresie. (Ite edomë 28:9; Sal. 119:145,146) Nge tune kaa kö e kola ajan hnene la hna upetrij ka lapa hnine la hnalapa, troa hane ce sin memine la fami la angatr a ce e me inin la Tusi Hmitrötr? Ijije hi troa nue angeic hnene la itre xaa atren la fami troa hane lapa dreng, ngo thaa tro kö angeic a tupath troa hane hamë ini koi angatr, maine troa hane qeje mekun göi hmi.”
8. Nemen la hnëqa ne la itre keme me thin Keresiano, kowe la nekö i angatr ka co hna upetrij, nge ka ce mel me angatr ngöne la hnalapa?
8 Maine nekönatr la hna upetrij, hnëqa i keme me thine pala hi troa thupë angeic. Kola qaja hnene la zonal, La Tour de Garde ne 15 Nofeba 1988, götrane 20, kola hape: “Tro pala hi angatr a ithua i angeic, me heetrë angeic, me thupë angeic, nyipi ewekë troa ini angeic me haji angeic hnene la Wesi Ula i Akötresie. (Ite Edomë 6: 20-22;29:17) Loi e tro la itre keme me thin a thele troa etid me angeic, ngacama hna upetriji nyën. Maine jë tro hë angeic a kepe thangan la hna ce etid me angeice hmekuj. Qanyi angatre kö troa axeciën maine tro angeic a hane ce kuca memine la fami lo lai etid ne la hnepe lapa.” —Wange ju fe la zonal, La Tour de Garde ne 1 Okotropa 2001, götrane 16-17.
9. Nemen la ifego ngöne la aqane tro sa wang la ketre sinee së hna upetrij, nge ka mel e trön la hnalapa së?
9 Itre Sinee Ka Isa Lapa Kö Me Easë: Kola qaja hnene la zonal, La Tour de Garde ne 15 Eiperem 1988 götrane 28, ka hape, “Isapengöne kö la aqane tro sa ujë kowe la hna upetrij maine ka sipu mekune troa nue la ekalesia ka mele e tröne la hnalapa. Maine jë ijije hi troa hnöth, nge thaa tro kö a ithanata memine la sinee cili. Nge maine hetrenyi la itre ewekë ka upi së troa ithanata me angeic, loi e troa tuluth,” thenge la hna amekötin hnei Akötresie, ene laka, “thaa tro kö a ce tro me angeic,” ene la atre kuca la ngazo nge thaa ka ietra kö. (1 Kor. 5:11, MN) Loi e tro la Keresiano ka mele nyipici a thel troa neën la troa ce tro memine la ketre sinee, e kola öhne laka thaa nyipi ewekë kö, maine ngöne la pengön la huliwa. —Wange ju la zonal, La Tour de Garde ne 15 Diseba 1981, götrane 29-30.
10, 11. Nemen la nyine tro la Keresiano a mekune hnyawa, qëmeken troa nue la ketre sinee hna upetrij qa hnin la ekalesia, troa bëeke hmaca kowe la hnalapa?
10 Kola amamane koi së hnene la zonal, La Tour de Garde la ketre jol, kola hape: “Nge tune kaa kö e kola upetrij la ketre nekön trahmany, maine ketre kem maine thin qa hnine la ekalesia, a ka mel e trön la hnalapa, nge enehila angeice hmaca ha a ajan troa bëek kowe la hnalapa? Loi e tro la fami a axeciën hnyawa la nyine troa kuca, thenge la pengöne lai atr hna helën qa hnine la ekalesia. Hanawang la ketre ceitun, maine jë ka wezipo maine thatreine hë troa ketre sipu mele caas, ke jole göi manie, maine kola uti ipië trootro la mele ne lai kem maine thin. Tune la hna qaja hnei Tusi Hmitrötr, nge thiina ka loi la tro la itre nekön Keresiano a thupë angatr. (1 Tim. 5:8) . . . Troa axeciën la nyine kuca thenge la itre ka nyipi ewekë kowe lai kem maine thin, thenge fe la aqane ujë i angeic, memine fe la aqane hnehengazone hnene la keme ne la hnalapa, la mele ne la itre atren la lapa ngöne la götrane la ua.” —La Tour de Garde ne 15 Diseba 1981, götrane 27.
11 Hna qaja fe göne la nekönatr hna upetrij ngöne pala hi lai hna cinyihan, ka hape: “Ame ngöne la itre xaa ijin, hna kapa hnene la itre keme me thin Keresiano tro la nekö i angatr hna upetrij qa hnine la ekalesia, a bëeke hmaca kowe la hnalapa, pine laka, ka wezipo angeic maine ka kucakuca la mekun. Ngo loi e tro la itre keme me thin a waipengöne hnyawa la pengöne la mele ne la nekö i angatr. Hapeu, ka mele caasi ekö lai nekönatr, nge enehila thatreine hë? Maine pena, kolo hi a pi ajan troa bëek, ke ma hmaloi la mel ngöne la hnalapa i kem me thin? Tune kaa la thiina i angeic memine la aqane ujë i angeic? Hapeu, tro kö angeic a traqa fë la ‘leven’ e hnine la hnalapa? —Gal. 5:9.”
12. Nemen la itre manathith hna kapa qa ngöne la hna amekötin thatraqane la atr hna upetrij?
12 Itre Manathith e Hne Së Hna Mele Nyipici Koi Iehova: Maine tro sa trongën hnyawa la itre hna amekötin qa hnine la Tusi Hmitrötr göne la itre hna upetrij, me kötren la itre ka kuci ngazo nge ka xele ma ietra, eje hi lai laka, tro hë së a kapa la itre manathith. Kolo hi lai a thupën la ekalesia matre tro pala hi a wië, nge troa mama ka hape, easë a cilëgöline la itre hna amekötin ka draië hna hamën hnine la Tusi Hmitrötr. (1 Pet. 1:14-16) Kola thupë së mina fe, wanga pui ngazo pi fe së. (Gal. 5:7-9) Kolo mina fe lai a aijijën la ka kuca la ngazo, troa kapa hnyawa la ihaji, ka troa xatua angeic troa eën la “wene tingeting ene la thina ka meköti koi angat’ ange hna inine hnene lai.” —Heb. 12:11.
13. Nemen la hna kuca hnene la ketre fami, nge nemen la thangane lai?
13 Thupene la hna dreng la ketre cainöj ngöne la asabele ne la sirkoskripsio hnene la ketre trejin trahmany memine la sipu xa i angeic, hnei nyidroti hna wangatrehmekune laka, nyipi ewekë tro nyidroti a saze la aqane tro nyidroti a ujë kowe la thine i nyidro, ka ketre mele kö, nge hna upetrij a sikisi hë lao macatre. Thupene lai asabele, hnene la trahmany hna hën la thine i nyidro, me qaja amamane hnyawa koi eahlo la ihnimi nyidro koi eahlo; hnei angeic hna qejepengöne ka hape, thaa tro hmaca kö angeic a troa ithanata me eahlo, ngo ngöne hmekuje pe hi e kola mama ka hape hetre ewekë ka nyipi ewekë catr troa ithanatan. Thaa qea ju kö, nge eahlo ha hane nyiqaane troa sin la itre icasikeu, nge kolo fe ha hane kepe eahlo hmaca hnine la ekalesia. Ketre, hna nyiqaane fe hnene la trahmanyi eahlo ka thaa hmi kö troa hane etid, uti hë la xome nyidrë la bapataiso.
14. Pine nemen matre loi e tro sa sajuën cememine la nyipici la hna amekötin göne la itre hna upetrij qa hnine la ekalesia?
14 Maine tro së a nyipici kowe la hna amekötin hnine la Tusi Hmitrötr göi itre hna upetrij qa hnine la ekalesia, eje hi lai laka, easë a amaman la ihnimi së koi Iehova, me sa kowe lo atre qaja angazo Nyidrë. (Ite edomë 27:11) Nge eje hi lai, laka, tro pena Iehova a kepe së me amanathithi së. Hna cinyihan hnei Davita göi Iehova, ka hape: “Nge thaa hnenge hna ena la ite wathebo i nyidë. Tro cilieti a hnim kowe la ate hnim.” —2 Sam. 22: 23, 26.