Cainöjëne Jë La Maca Ne Baselaia
1 “Qânge troa cainöjëne la maca ka loi ne la Baselaia i Akötesie kowe la ite xa lapa pena; ke hna upi ni thatraqane lai.” (Luka 4:43) Hnei Iesu hna amamane hnyawa jën la itre hnepe hnëewekë celë, la taan la huliwa ne cainöje i nyidrë, ene la Baselaia i Akötresie. Easë mina fe enehila a tro fë la maca ka qaja la Baselaia, tune la hna ahnithe hë ngöne la Mataio 24:14, kola hape: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj; ame hna traqa pi la pun.” Nemen la itre trenge nyipici göi Akötresie, ka nyipi ewekë troa dreng hnene la itre atr?
2 Kola musi enehila la Baselaia i Akötresie qaa hnengödrai, nge easenyi hë tro ej a nyihnan la itre musi asë e celë fen. Hna upe triji Diabolo hë lo qaa hnengödrai, nge kolo ha melën enehila hnene la fene ka ngazo celë, lo itre drai hnapin. (Hna ama. 12:10, 12) Tro ha apaatren epine palua la fene ka ngazo i Satana, ngo thaa tro kö a enijën la Baselaia i Akötresie. Tro ej a cile huti paluakö.—Dan. 2:44; Heb. 12:28.
3 Tro la Baselaia a aejën la itre nyipi aja ne la nöjei atr asë ka drengethenge. Tro ej a apaatren la akötr ka xulu qa ngöne la isi, me ihumuth, me iaxösisi, me jiin. (Sal. 46:8, 9; 72:12-14) Tro ha mana la xen. (Sal. 72:16; Is. 25:6) Ame kowe la itre ka kucakuca, memine la itre xaa meci ju kö, tre, itre nyine tro pë hë a qaja ngo pë hmaca kö troa akötrën la atr hnene itre ej. (Is. 33:24; 35:5, 6) Pine laka, kola kökötre trootro la itre atr troa pexej, tro ha paradraiso la fen, nge tro la itre atr a ce mele hnyawa.—Is. 11:6-9.
4 Easë a amaman ka hape easë a ajan troa itre jinin la Baselaia i Akötresie, nge kola mama qa ngöne la aqane mele së enehila. Loi e troa hetre thangan la maca ne Baselaia ngöne la mele së, me ngöne fe la itre aja së, me itre ewekë hne së hna amë panën ngöne la mele së. Hanawang la ketre ceitun, maine nyipici laka, qa së troa huliwa kowe la itre atren la lapa së, ngo thaa tro pi kö së a nue la itre mo troa he la itre aja ne la Baselaia. (Mat. 13:22; 1 Tim. 5:8) Ngo nyipi ewekë tro pe së a thupën la eamo hna hamën hnei Iesu, kola hape: “Ngo pane thele jë nyipunie la baselaia i Akötesie, me thina ka meköti anganyidë; nge troa hamëne fe koi nyipunie la nöjei ewekë cili [ka nyipi ewekë kowe la mel].”—Mat. 6:33.
5 Ka nyipi ewekë e tro la itre atr a dreng me trongën la maca ne Baselaia, e ijine petre kö. Epi xatua angatr hne së troa huliwa tune lai, ene la troa “iele angate kowe la ite ewekë ne la baselaia i Akötesie.”—Ite Huliwa 19:8.