Porogaram Ka Hnyipixe Ne La Asabele Ka Ketre Pengön Ka Caa Drain

Nyimutre la itre ithuemacany ngöne la itre hnedrai së ngöne la aqane troa thupëne hnyawa la wenethëhmi së, matre tro pala hi së a egöcatr nge thaa tro kö a canga mec. Ceitune fe hi lai memine la wenethëhmi së ngöne la götrane la ua, laka ka nyipi ewekë catr troa thupëne ej. Drei la eloine la taan la Porogaram Ka Hnyipixe Ne La Asabele Ka Ketre Pengön Ka Caa Drain, hna troa nyiqaane kuca e Semitrepa 2003, hna hape: “Nyihlue i Iehova Jë Së Hnene La Hni Ka Pexej.” (1 A. l. ite jo. 28:9) Nemene la itre ithuemacanyi hne së hna troa kapa me lapa treqen?

Tro la atre thupën la sirkoskripsio a ithanatan la mekune hna hape, “Xatuane Jë La Itre Xan Troa Nyihlue i Iehova Hnene La u Ka Ajan.” Troa ce ithanatan memine la itre xan la madrin hnei angatr hna kapa qa ngöne la hna hane nyipiewekën la itre xaa atr, me inine la Tusi Hmitrötr memine la itre ka ajan troa hane nyihlue i Iehova. Eje hi laka, troa ithuecatr, me akeukawan asë la itre ka sin la asabele hnene la pane cainöj hna troa cile fë hnene la trejine ka iwai, hna hape, “Thupëne Kö Së La Itre Hni Së Ngöne La Fene Celë Ka Gomegome.” Troa nyipune la icasikeu e hmakany hnene la cainöj ne Bapataiso.

Ame e hnaipajö, troa ce wang la aqane troa hane xatuan la itre xaa atr, jëne la cainöj hna hape, “Loi e Tro Sa Saath La Ime Së Troa Ixatua.” Tune kaa la aqane troa thupën hnene la itre keme me thin la hni ne la itre nekö i angatr, qa ngöne la itre ihuline la fen ka ngazo, me xatua nyudreni fe troa qale catre koi Iehova? Jëne la cainöj hna hape, “Xatuane Jë La Itre Nekö i Nyipunie Troa Madrine Koi Iehova,” tro fe a hamën la itre mekune ka lolo nyine ixatua me iamacanyin la aqane troa trongëne lai.

Hapeu, easë kö a hane xome la nöjei ewekë ka lolo hnei Iehova hna hnëkën, matre troa thupën la itre hni së ngöne la ua, nge tro eje a egöcatre pala hi nge thaa tro kö a kucakuca? Troa kuca hnene la trejine ka iwai la cainöj tixenuë, hna hape, “Catre Pi Së Troa Nyihlue i Iehova Hnene La Hni Ka Pexej,” kola troa amamane hnyawa la foa lao götrane ka nyipi ewekë catr maine easë ajan troa cile catre pala hi ngöne la götrane la ua. Nemen la etrun la traem me trenge catr hne së hna xome göi troa catre thith, me troa inine la Wesi Ula i Akötresie, me troa catre cainöj, me troa caasi pala hi memine la itre xaa Keresiano? Hapeu, ijije kö tro sa akökötrene la aqane mele së ngöne la itre hnepe götrane cili?

Iehova a könë së me hape: “Nuepi la hni ’ö kowe la ini, me lue hnangenyë i ’ö kowe la ite tenge ewekë ka inamacan.” (Ite edomë 23:12) Nyiqaane hnëkë jë hë enehila matre ijij troa hane sin la drai ka lolo catre cili, ijine kola troa kapa la itre ini qa hnine la Tusi Hmitrötr. Maine tro sa kuca tune lai, eje hi lai laka, tro ha ithuecatre koi së troa nyihlue i Iehova hnene la hni ka pexej memine la u ka ajan.