Kola Sa La Itre Hnyinge i Nyipunie
◼ Hapeu, tro kö a hane sija fe la etrun la itre ijine kuca la etid ne la fami, hnine lo rapor hne së hna hamën ngöne la nöjei pune treu kowe la ekalesia?
Maine kola xomiujine hnene la ketre Keresiano trahmanyi maine föe la ketre etid ne la fami nge eje fe thei angatr la itre nekönatr ka thaa bapataiso petre kö, haawe, ijije troa sija ngöne la rapor la caa hawa ngöne la wiik, me caa iwai hmaca ngöne la wiik, me caa etid ngöne la treu. Celë hi nyine tro lai a kuca ngacama tru catre hnei hawa ne etid, nge hna kuca ngöne la nyimu wiik, maine hna xomiujine la etid ne la itre nekönatr, angatr isa ala caas.—Wange ju la itus Notre ministère g. 104.
Maine ka bapataiso asë hi la itre atren la hnalapa, itre anyipici Iehova asë hë, haawe thaa tro kö a e la etid ne la fami hnine la rapor hna troa hamën e pune treu (tro hi a e la etid e maine ame la ketre nekönatr tre nyën a ini tusi ngöne lo lai hnaaluene itus thupene la hna bapataiso). Kola amekötine tune lai, pine laka, ame la rapor ne hna cainöj ne la ekalesia tre eje a pane amaman la hna kuca ha ngöne la hna cainöjën la maca ka loi me ngöne la hna inine la nyipici hnine la Tusi Hmitrötr kowe la itre atr ka thaa sa xepu petre kö me ka thaa xome petre kö la bapataiso matre troa nyihlue i Iehova. (Mat. 24:14; 28:19, 20) Ngo thaa kolo kö lai a wangacon me thaa nyipi ewekën la troa xomiujine pala hi la etid ne la fami.
Hnëqa ne la itre keme me thin troa etid kowe la itre nekö i angatr. Ame koi itre ka aja ixatua troa eköth maine troa akökötren la etidi angatr memine la fami, loi e tro angatr a sipo ixatua kowe la itre qatre thup. Maine pine laka hetrenyi la itre jol matre kolo pena a ajan hnene la ketre fami Keresiano hnine la ekalesia ka hmi, tro la ketre trejin a etid memine la nekö i nyidro trahmanyi maine jajiny ka thaa bapataiso petre kö, haawe, loi e troa ce ithanatane lai memine la atre thup perezida maine atre thupën la huliwa ne cainöj. Maine ka loi hi, haawe tro lai ka kuca la etid a e ngöne la rapor ne cainöj lai etid hna troa kuca ngöne la treu.
Thaa ewekë ka hmaloi kö la troa inin la itre nekönatr ngöne la itre jë i Iehova; troa mama hnyawa la trenge catr hna kuca memine la itre traeme hna xom ngöne lo rapor ne hna cainöj hna troa hamën ngöne la pune treu. (Deu. 6:6-9; Ite edomë 22:6) Loi e troa qaja aloine la itre keme me thin ka xome hnyawa la hnëqa i angatr ka tru catr, ene la troa hian la itre nekö i angatr “ngöne la ini me ihaji ne la Joxu.”—Efe. 6:4.