Loi e Tro Sa Xötrethenge La Meköt i Iehova
1 “Iehova a ajane la meköt.” (Sal. 37:28) Celë hi matre maine hnei Nyidrëti hna amekötine hë laka, tro Nyidrëti a apaatren la fene celë ka thaa meköti kö, ngo hnei Nyidrëti hna pane thuemacane la itre atr. (Mar. 13:10) Kolo hi lai a aijijëne la itre atr troa ietra me troa mele pe. (2 Pet. 3:9) Easë kö a hane thele troa xötrethenge la aqane meköti Iehova? Hapeue la easë a goeën la hleuhleu memine la akötr thene la itre atr e cailo fen, kolo kö a upi së hnene la itre ewekë cili troa hane ce thawa memine la itre xaa atr la mejiun ne la Baselaia? (Ite edomë 3:27) Maine easë a ajane la meköt, eje hi lai laka, tro lai a upi së troa catre cainöjëne la maca ka loi.
2 Thaa Tro Kö Së a Ië Hna Hnim Ngöne La Easë a Cainöj: Maine thaa tro kö së a iwangatrehmekunyi atr ngöne la easë a qaja trongëne la aja i Akötresie, easë hi lai a amamane ka hape easë a “kuca la meköt.” (Mika 6:8) Loi e tro sa thupëne matre thaa tro kö la itre aliene hni së a canga uku së, troa jelengazon la itre atr qa ngöne la itre ewekë hne së hna öhne thei angatr. (Iako. 2:1-4, 9) Iehova la ka “ajane la nöjei ate asëjëihë troa mele me wangate hmekune la nyipici.” (1 Tim. 2:4) Atreine hi troa saze la mele ne la itre atr hnene la Wesi Ula i Akötresie, ene la nyipici. (Heb. 4:12) Maine tro sa wangatrune lai ewekë cili, tro hë eje a upi së troa ithanata memine la itre atr cememin la mejiun, ngacama ame itre xan, tre hnei angatr ekö hna xele ma drei së.
3 Hnene la ketre trejine föe ka huliwa hnine la ketre setroa hna xouen ngöne la ketre ijin, la ketre atr ka traqa lapa troa itö ngöne la magazë. Ngo ame ju hi ngöne la ketre ijin, hnei eahlo hna tupath troa hane qaja koi angeic lo Paradraiso hna thingehnaean hnei Akötresie. Canga öni nyidrëti ju hi ka hape, thaa ka lapaune kö nyidrë kowe la itre ifejicatre, nge hnene fe laka nyidrëti a sin lo itre trongene lo itre atr ka nango icilekeu me mus, nge ka xomi doroge fe nyidrë. Ngo thaa hnei eahlo kö hna cile hnö troa sisedrën la ithanata. Ame ngöne la ketre drai, hnei nyidrë hna hnyingë eahlo la mekune i eahlo ngöne la ihnaihe i nyidrë; ene pe hnei eahlo hna sa lai hnying jëne la itre mekune ka eje hnine la Tusi Hmitrötr. (1 Kor. 11:14) Sesëkötre pi kö föe la kola traqa caa drai thupen hnene lo lai trahmany, ase hë icinyi me xöje ahopatren lo ihe! Hnei nyidrë hna sipon troa inine la Tusi Hmitrötr; kola xomiujine pë hë la etid i nyidrë hnene la ketre trejine trahmany, nge nyidrëti a kökötre trootro uti hë la nue nyidrëti la mele i nyidrë me xome la bapataiso. Tru catr la itre atr ka tui nyidrë, ene laka angatr a nyihlue i Iehova enehila, nge angatr a olene la aqane ujë ne la itre trejin laka, thaa hnei angatre kö hna ië hna hnim, ngo angatre pe a catre troa xatuane la nöjei atr troa kapa la maca ne Baselaia.
4 Easenyi hë matre apaatrene pi Iehova la itre atr ka thaa kuca kö la meköt qaa celë fen. (2 Pet. 3:10, 13) Xoxopatre pe hi la ijin, celë hi matre, loi e tro sa catre troa xötrethenge la tulu ne meköt i Iehova, troa aijijën la itre atr asë troa mele pe ngöne la kola apaatren elanyi la fene ka thaa meköti kö hna musinën hnei Satana.—1 Ioane 2:17.