Olene Jë La Ihnimi Gufa Iehova
Kola Troa Amekunën La Meci Keriso e 24 Maac
1. Tune kaa la aqane amamane Iehova la ihnimi Nyidrëti koi së?
1 Hna qaja hnene la atre cinyihane la Salamo ka hape: “Loi e tro angat’ a ole koi Iehova ngöne la ihnimi nyidë, me ite huliwa nyine hai nyidë kowe la ite nekö i at.” (Sal. 107:8) Ka sisitria catr la ihnimi gufa i Akötresie, thaa Nyidrëti hmekuje kö a goeëne la itre atr cememine la thiina ka menyik. Kola mama hnyawa lai ngöne la itre trenge ewekë ne iatruny qaathene la uati hmitrötr, kola hape: “Ihnimi cilie, Iehova fe, la ate e ni draië.” (Sal. 94:18) Drei la hatren la ihnimi gufa Iehova, ene laka hnei Nyidrëti hna hamën la Nekö i Nyidrëti ka caas thatraqa së!—1 Ioane 4:9, 10.
2. Nemene la aqane tro sa amamane la hni ne ole së koi Iehova?
2 Ame ngöne la kola easenyi catr la Drai Ne Amekunën la meci Keriso, tune kaa la aqane tro sa olene kowe la “Akötesie ate ihnim”? (Sal. 59:17) Loi e tro asë hi së a thele troa ami ijin troa thele mekun ngöne lo itre drai tixenuë i Iesu ekö e celë fen. (Sal. 143:5) Ka loi mina fe troa e lo porogaram ne e Tusi Hmitrötr hna hnëkën thatraqane la Drai Ne Amekunën, hna hamën ngöne lo sine tus, Examinons les Écritures chaque jour — 2005, nge maine ijij, e jë fe la itre xaa mekun hna xome qa hnine la itre mekene 112-16 ne la itus Atr Ka Tru Ne La Fene Hnengödrai. Pane mekune ju la itre xötr hnei epuni hna e, nge the ajolëne kö hnei itre xaa ewekë. (1 Tim. 4:15) Ame la easë a thele mekune ngöne la Wesi Ula i Akötresie ngöne la thith, tre, thaa kolo hmekuje kö lai a nyi ecatren la itre hni së, ngo easë mina fe lai a amamane la ihnimi së koi Iehova.—Mat. 22:37.
3, 4. (a) Tune kaa la aqane tro sa xötrethenge la aqane ujë ne la itre trejin ne Liberia? (b) Drei la hnei epuni hna troa könën kowe la Drai Ne Amekunën?
3 Xatuane Jë La Itre Xan Troa Hane Olene Koi Akötresie: Ame ngöne lo macatre hnapan, 6 760 607 lao ka sine la Drai Ne Amekunën e cailo fene hnengödrai. Ame ngöne la ketre lapa e Liberia, hna cinyihan hnene la itre trejine la ketre tusi kowe la hene la traon, me thuemacanyi nyidrë la aja ka eje thei angatr troa hane atrun la Jidri Ne Pui Ne Xeni Ne La Joxu ngöne la traone i nyidrë. Hnene la hene nöj hna nue la itre trejine troa hnen la icasikeu ngöne la ketre hna feni balo, nge thuemacane la itre atrene la traon, me könë angatr matre troa hane sin lai icasikeu. Ngacama faifi hi lao ka cainöj ngöne lai lapa, ngo ala 636 lao atr ka sin la Drai Ne Amekunën!
4 Ketre tune mina fe, easë a thele troa xatuan la itre atr ka ala nyimu matre tro angatr a hane ce atrun me easë la Drai Ne Amekunën. Tune kaa matre cinyihane la ëjene la itre atr hnei epuni hna ajan troa könën? Jëne la itre iatr ne la itre götran tixenuë ne la zonal Réveillez-vous ! ne 8 Maac me La Tour de Garde ne 15 Maac, kolo fe a könën la itre xaa atr kowe la ijine cili. Loi e troa xome fe la itre pepa ne ihë kowe la Drai Ne Amekunën. Cinyihane hnyawa jë la traem memine la hnë troa icasikeu ngöne lai pepa, nge hamëne jë kowe la nöjei atr hnei epuni hna troa hën. Ame ngöne la kola easenyi la 24 Maac, wange hmaca ju la itre atr hnei epuni hna könën me ce ithanatan la itre nyine troa kuca.
5. Tune kaa la aqane tro sa xatuan la itre hnainin matre tro angatr a hane sin la Drai Ne Amekunën?
5 Tune kaa la aqane tro sa xatuan la itre hnainin ka thaa hane petre kö traqa troa hane sine la itre icasikeu, matre tro angatr a hane kepe thangane ka loi qa ngöne la icasikeu ka tru cili? Xome jë la itre hnepe menetr ngöne la nöjei etid, matre troa eköthe thei angatre la hni ne ole kowe la enyipiewekën la drai cili. Hetrenyi la itre mekune ka lolo catr hnine la zonal La Tour de Garde ne 15 Maac 2004, götrane 3-7, me itus Comment raisonner, götrane 241-5.
6. Pine nemen matre nyipi ewekë troa lolo la aqane kapa së la itre atr ka traqa troa hane sin la Drai Ne Amekunën?
6 Loi e Troa Kapa La Itre Atr Ka Traqa: Ame ngöne la Drai Ne Amekunën, loi e troa easenyine la itre atr ka traqa me ibozu me angatr. (Rom. 12:13) Thele jë matre troa ce lapa memine la itre hnei epuni hna könën, nge loi e troa hetre Tusi Hmitrötre me nyima i angatre fe. Nge loi e tro fe së a hetrenyi e kuhu hni së la ajan troa kapa madrin la itre trejin ka thaa cainöje hmaca kö, trahmanyi me föe, ene lo itre ka catre thel troa hane sin la icasikeu. Maine jë tro la nyipi ihnimi së a xatua angatr troa hane nyiqaane caasi hmaca memine la ekalesia. (Luka 15:3-7) Epi tro sa thele ngöne la ijine ka hmitrötre cili, troa xatuane asë la itre atr matre tro fe angatr a hane caasi me easë troa olene koi Iehova la “ihnimi nyidë nyine hain.”—Sal. 31:21.