Tusi Bethela
Drei La Tusi Hun Koi Nyipunie Itretre Cainöj:
Easë a xejë la macatre ne huliwa ka hnyipixe, nge thaa tru menu kö hnei ka pionie Lapaa. Ame lo treu Mei hnapan, hna elë la itre ka pionie lapaa, 66 e Kaledonia nge 27 e Vanuatu. Haawe, lue Ini Thatraqan La Itre Pionie hna hnëkëne ngöne la lue nöje cili; kola troa xome lo itus Ka Hnyipixe.
Hetrenyi la ketre huliwa ka sisitria hna kuca matre troa haöthe la teritoare ne la filiale së hnene la maca ka loi. Qa ngöne lai 5 271 lao atr ka sin la Drai Ne Amekunën e Kaledonia, 1 943 e Tas nge 366 e Walis me Futuna. Ala nyimu catr la ka sin la Drai Ne Amekunën, troa aköni la etrun la itretre cainöj. Ame ngöne la nöjei treu, 2 000 lao etid hna kuca e Kaledonia, 110 e Walis me Futuna, nge 700 e Tas. Ame ngöne la filiale së, kola kapa pala hi la itre tusi ne la itre atr ka pi ajan troa hane etid.
Tru catr la itre ewekë hna kuca matre troa nyihnyawane hmaca la Iuma Ne Asabele së e Kaledonia hna hnen e Normandie. Hna acatrene hnyawa ha la hune uma me saze asë la itre poto ne la verada. Tru catr hnei nyine troa kuca. Nyimutre fe la itre ekalesia ka kuca la hnei angatr hna atrein, matre troa lolo la hnë tro angatr a hmi. Nyimutre la itre hna mekune troa kuca ngöne macatre celë e Kaledonia (Koumac, Voh, Pouembout, Montravel) me Walis. Celë hi matre kola aja atr troa ixatua. Hna ithuecatr kowe la itre ka trene metie ka ijije troa xatuane la Komite Ne Xupi Uma Ne La Nöj, troa nyialiene lo pepa ne sipo hna hape, Construction des Salles du Royaume—Questionnaire pour les volontaires (S-82), nge hamëne ju kowe la seketere ne la ekalesia. Eahuni a olene atraqatr la ixatua i epun.” Eahuni a olene fe la hnei nyipunieti asë hna xome la traem me atreine i epun ngöne lo itre macatre ka ase hë troa huliwa, a thaa ngöne hmekuje kö la Iuma Ne Asabele ngo ngöne fe la itre Uma Ne Baselaia ka isapengöne ngöne la teritoar ne la filiale së.
Ame e Wallkill, New York, nyimutre catr la itre atr ka traqa troa hane wang lo hnë feja itusi së, ke ase hë afenesin. Thupene la hna xötrei vizit hnene la ketre trejine qatre föe, öni eahlo: “Eni a madrin atraqatr la iuma! Nyimu hnenge hna troa qaja kowe la itre trejin ngöne la eni a bëeke kowe la hnalapang. Qanyi Iehova kö, ngo eni a mekune troa bëeke hmaca ngöne la nöjei macatre.”
Nyine qaja aloine la aqane catr huliwa la itre trejin matre troa akökötren la itre aja ne la Baselaia! Kola wanga atrune hnyawa mina fe la itre ahnahna manie matre troa sajuën la huliwa. (Ite edomë 3:9, 10) Epi tro Iehova a amanathithine pala hi la aqane caasi së troa ce huliwa matre troa “atrune la lolo i Nyidë.”—Efe. 1:12.
Itre trejine me nyipunie,
Filial Ne Kaledonia