Hane Kö Epuni Hnyinge Kowe Lo Itre Atr Hna Atre Hnene La Hnainin?

Maine hetre atr hnei epuni hna etidin, hapeu matre hnyingë angeic maine hetre sine ce elo i angeic maine sinee i angeic, maine itre atr pena hnei angeice hna atre ka ajane troa hane atrepengöne la hnei Tusi Hmitrötr hna inin? Tro jë angeic a hamën la itre ëje ka nyimutre. Maine hna nue së hnene la hnainin, ijije tro sa qaja la ëje i angeice kowe la itre atr hne së hna vizitën matre hnyingë angatr maine aja i angatre kö troa hane inine la Tusi Hmitrötr. Qaja jë ka hape, “Atraqatre la madrine i [Qaja jë la ëje ne la hnainin] troa inine la Tusi Hmitrötr, nge angeic a meku nyipë ka hape, ma aja i nyipëti fe troa hane kepe thangane la ketre etide fe ka pëkö thupen.” Thupene lai, amacane jë la aqane troa xomiujine la etid jëne la itus Ini Tusi Hmitrötr, thaa tro pe a aqean.

Maine hetre etidi epuni ka kökötre ngöne la ua, xatua angeice jë troa qejepengöne la aqane trongene la etid kowe la itre sine ce elo i angeic, maine sinee i angeic ka hetre hni ne ajan. Ijije fe tro angeic a könë angatr troa hane sine la etidi angeic. Maine pena, ijije tro angeic a kuca matre tro epuni a isapui me angatre matre troa amacane la aqane trongene la etid. Maine tro epuni a kuca tune lai, epuni lai a xatuane la hnainin troa nyiqaane ce thawa me itre xaa atr la atrehmekune i angeic qa hnine la Tusi Hmitrötr.

Jëne la itre hnei epuni hna vizitëne lapaan, ijije tro epuni a ketr la itre xaa atr hnei angatre hna atre, ngacama thaa ajane petre kö angatre troa inine la Tusi Hmitrötr. Ame ngöne la epuni a hamën lo itus Ini Tusi Hmitrötr, hnyingë angatre jë ka hape, “Hetre xaa atr kö hnei epuni hna atre ka ajane troa kapa la itusi celë?”

Pine laka saqe hë la itre ijine la pun, easa ajan troa tupath la nöjei aqane xatuane la itre atr troa dreng me kapa la maca ka loi. Hane kö epuni tupath troa ketr la itre atr hna atre hnene la ka etid me epun?