Itre Tulu Ne Mele Nyipici
1 Hetrenyi la ketre ewekë ka hnyipixe, ene la ketre aqane cainöj ngöne la drai ka pexej, hna nyiqaane eköth ngöne la macatre 1937—troa pionie hut. Hnene la itre trahmanyi me föe ka macaj ngöne la huliwa ne cainöj ne la Keresiano, hna kapa la itre hna amekötin göi troa tro troa cainöj ngöne la itre götran hna upi angatre kow hnene la organizasio. Ame hë enehila itre macatre ka nyimutre thupene lai, kola catre mele nyipici hnene la itre pionie hut, nge itre tulu pala hi nyine xötrethenge.—Heb. 6:12.
2 Angatr a Elemekene La Huliwa: Ame ngöne la xötrei, hna elemekene hnene la itre pionie hut la huliwa ne cainöj; angatr a cainöje trootro jëne la itre phonographe kösë ikaho. Angatre fe a amë hnine la itre kaset nyine dreng la itre mekun nyine troa ce ithanatan ngöne la kola iwai hmaca. Ewekë lai hna kuca ngöne la itre traone ka tru, gaa hetre ekalesia ha. Ame hë thupen, hna upe la itre pionie hut kowe la itre götran gaa aja ka cainöjëne la Baselaia. Hnei angatr hna catre wange pala hi la itre atr ka kapa la maca ne Baselaia, me etid me angatr. Ame hë la thangan la hnei angatr hna catre huliwa, tre, itre hadredre la etrune la itre ekalesia ka hnyipixe hna acil. Hnene la aqane catre angatr cainöjëne la maca ka loi, ene pe kola kökötre enehila la huliwa ne la organizasio. (Is. 60:22) Kolo pala hi a nyipi ewekë catr la huliwa ne la itre pionie hut, ene laka, kola ketr hnene la maca ka loi hna cainöjën, “la nöjei ate asëjëihë e celë fen.”—Kol. 1:23.
3 Itre Tulu Nyine Xötrethenge: Nyimutre la itre macatre ne xome hnene la itre pionie hut la huliwa ne cainöj ngöne la mele i angatr ka pexej. Hetrenyi la nöjei ewekë ka isapengön hna melën hnene lai itre trahmanyi me föe cili ka mele nyipici, ene pe kola ahmadradrane fe la lapaune i angatr. (1 Pet. 1:6, 7) Hnei angatr hna sipu nue la itre aqane mele ka lolo catr ngöne la ngönetrei, matre troa cainöj ngöne la itre götrane gaa aja ixatua. Ame itre xan enehila, tre, qatre hë nyudren nge hetrenyi la itre sine mec, maine kola cile pena kowe la itre xaa jole ka tru. (2 Kor. 4:16, 17) Ngo tro “angat a wa e qatë hë.” (Sal. 92:14) Angatr a mejiune koi Iehova me kapa la itre manathith qaathei Nyidrë.—Sal. 34:8; Ite edomë 10:22.
4 Nyipi ewekë tro sa qaja aloine la itre pionie hut. Maine ej e hnine la ekalesia i nyipunie la itre pionie hut, thele ijine jë troa ce lapa me porotrike me angatr me kepe thangane la itre hnei angatr hna melëne hë ekö. Amamane jë la hni ne ole i nyipunie kowe la itre huliwa hnei angatr hna kuca, angatr itretre cainöj ka mele nyipici. Loi e troa ithuecatre së hnene la aqane cile huti angatr ngöne la huliwa i angatr. Tro ha kepe angatr hnei Iehova, angatr itre ka xome la tulu ne lapaune ne la itre pionie hut; nge tro Iehova a amanathithi angatr, pine laka, “aja i nyidë la itete kuca la nyipici.”—Ite edomë 12:22.