Porogaram Ne Asabele Ne Sirkoskripsio Ka Hnyipixe

Kola ajane hnene la fen tro sa mejiune ka hape, ka troa cile huti epine palua la fene celë. Ngo thaa celë kö la hna qaja lai hnene la Wesi Ula i Akötresie. (1 Ioane 2:​15-​17) Ej a xatua së troa trotrohnine laka, ka gufa la troa nyinyape thele la ‘itre trenga mo e celë fen.’ Kola troa acatrene la lapaune ne la nöje i Akötresie hnene la asabele ne sirkoskripsio ne la macatre ne huliwa 2007; ame la taan, tre, “Amëjë . . . La Trenga Mo e Koho Hnengödrai.”​—Mat. 6:​ 19, 20.

Kolo fe a hane qaja la pi aja mo ne ngönetrei ngöne Efeso 2⁠:2 ceitune me “ate musinën e caha nyipin ene la [“ua,” MN] ate huliwa hnine la ite ka tha idei.” Ceitune hi la enyi hne së hna manon, laka eje e cailo, memine la “[“ua,” MN] ne fen” ka haöthe la fen celë. (1 Kor. 2:​12) Pine laka atraqatre la menen ej, kola qeje ej ka hape “ate musinën.” Troa xatua së hnene la asabele ne sirkoskripsio ka troa xulu, troa neëne la itre mekune ne la fen göi aja mo ne ngönetrei, nge troa amë hnyawa ngöne la itre he së la itre nyine troa amë panën. (Mat. 6:​33) Ketre, troa xatua së hnene lai porogaram ne asabele, troa mejiune koi Iehova ngöne la easë a catre xome la huliwa ne cainöj ngacama easë a cile kowe la itre jole me itre itupath.

Loi e troa sine asë la lue drai ne asabele, nge troa “nyipine catëne” la nöjei ini hna hamën. (Heb. 2⁠:⁠1) Fejane jë la itre hnepe mekune nyine tro nyipunieti a isa trongëne hnyawa ngöne la mele i epun me ngöne la hna cainöje trootro. Maine tro sa sine la asabele qa ngöne la qaan uti hë la pun, haawe, tro ha atrenamo së ngöne la götrane la ua; ke, tro ha ithuecatre koi së me acatrene la lapaune së troa catre ‘xeen la itre trenga mo e koho hnengödrai’!