Ijiji Së Asë Hi Troa Inine La Itre Atr
1 Thaa hnene hmekuje kö la itre trenge catre ne la caa atr la kola hane xötrethenge Iesu hnene la ketre atr. Iehova a jëne asë la itre ka “ce huliwa” me Nyidrë, matre troa xatuane la itre hnainin troa kökötr ngöne la götrane la ua. (1 Kor. 3:6-9) Easë a isa xatuane la itre ka xötrei atre la nyipici, thaa hnene hmekuje kö la itre mekune hne së hna hamën qa kuhu hni jëne la itre icasikeu i Keresiano, ngo hnene fe la aqane ujë së ka loi ka amamane hnyawa laka ce easë memine la uati hmitrötre i Akötresie ngöne la mele së. (Ioane 13:35; Gal. 5:22, 23; Efe. 4:22, 23) Nemene pala kö la itre xaa nyine tro sa kuca matre troa xatuane la itre ka xötrei atre la nyipici?
2 Tune Fe La Ekalesia: Loi e tro asë hi së a amamane la ihnimi së kowe la itre atr ka nyiqaane hane sine la itre icasikeu hnene la troa ibozu me angatr me ithanata me angatr qëmekene me thupene la icasikeu. Kola mekune hmaca hnene la ketre trahmanyi la nyidrëti a hane xötrei traqa troa icasikeu; öni nyidrë: “Tru catre kö hnei atr ka ihnim, ene la itre trehnyiwa hnenge hna iöhnyi memin ngöne la caa drai hune la itre atr hnenge hna iöhnyi memine ngöne la hming qaane lo eni a co. Eje hi laka, öhne hë ni la nyipici.” Hna bapataiso nyidrë, sevene lao treu thupene lo pane icasikeu hnei nyidrë hna hane sin.
3 Qaja aloine jë la ketre hnainin ngöne la angeic a kökötre ngöne la götrane la ua. Hapeu, angeice kö a xomihnin ahoeane la icilekeu? Angeice kö a hane sine pala hi la itre icasikeu? Angeice kö a catre thele troa hane hamë mekun? Angeice kö a hane sin la Ini Ne Cainöj Qaathei Akötresie, maine angeice fe hë a hane nyiqaane cainöje trootro? Qaja aloine jë la itre hnei angeice hna kuca matre troa kökötr ngöne la ua. Celë hi ka troa akeukawane la hni angeic me xatua angeic.—Ite edomë 25:11.
4 Tune La Atre Hamë Ini: Hnene la itre xaa ka cainöj hna xatuane la itre hnei angatr hna etid memin troa hane atre hnyawa la itre atren la ekalesia, angatr isa ala caas. Hnei angatr hna sipone kowe la itre xaa trejine troa ce tro me angatr matre troa kuca lai etid. Canga könëne jë la hnainin kowe la itre icasikeu ne la ekalesia. Ame ngöne la angeic a nyiqaane sine la itre icasikeu, thele jë troa tro sai angeic kowe la itre xan. Angeice kö a isi memine la ketre hna majemine kuca ka ngazo, tune la ufi sixa? Kolo kö a sewe angeic troa etid e hnine la hnalapa? Maine tro angeic a hane porotrike memine la ketre trejine ka atreine cile ekö kowe la jole cili, haawe, tro hë angeic a kapa la itre mekune ka troa xatua angeic.—1 Pet. 5:9.
5 Nyipi ewekë tro la ekalesia a ixatua ngöne la götrane la ua kowe la itre ka xötrei atre la nyipici. Ijiji së asë hi troa xatua angatr troa kökötr, hnene la hne së hna amamane la sipu ihnimi së koi angatr.