Xötrethenge Keriso Jë Hnene La Hna Iatruny
1. Tune kaa la aqane iothekeune la taan la kovasio ne la macatre celë memine la troa iatruny?
1 Tusi Hmitrötr a qeje pengöi Iehova Atre Xupe la hnengödrai memine la fen, ka hape, hnei Nyidrëti hna xetrëne la atrun. (Sal. 104:1) Hnei Iesu pala hi hna ithanata me xome la itre aqane ujë ka atrune la Tretretro i nyidrë memine la itre hna amekötin hnei Iehova keme i nyidrë. (Ioane 17:4) Kola aijijë së isa ala caas troa xötrethenge la tulu i Iesu me atrunyi Iehova ngöne la itre ijine Kovasio Ne Distrik ka troa xulu; ame la taan, tre, “Xötrethenge Keriso Jë!”
2. Tune kaa la aqane troa atrunyi Iehova hne së, ngöne la easë a hnëkë hnyawa matre troa sine la nöjei drai ne asabele?
2 Troa Metrötrën La Hmi: Ijije hi tro sa atrunyi Iehova hnene la hna hnëkë matre troa hane sin la pui ne xeni ne la ua hnei Nyidrëti hna hnëkëne thatraqa së. Hane kö epuni ce ithanatane memine la maseta i epun me wange la itre nyine tro epuni a kuca matre troa hane sin la nöjei drai ne kovasio, ene mina fe lo Drai Ka Tru? Hnei epuni kö hna hnëkë matre troa canga traqa troa thele göhnë me ce nyima me thithi memine la itre atrene la icasikeu? Hnei epuni kö hna hnëkë matre troa ce xeni memine la itre trejin ngöne la hna asabele? Ame ngöne la kola könë së hnene la ciaman troa isa lapa göhnen, nge kola elone la miuzik nyine nyiqaan, loi e tro sa thupa la itre porotrike së me canga lapa, qëmekene troa nyiqaane la porogaram.
3. Nemene la ka amamane ka hape, maine tro sa drenge hnyawa ngöne itre ijine asabele, tre, kolo hi lai a atrune la hmi së?
3 Ame mina fe la easa drenge hnyawa la itre hna qaja, tre, easë hi lai a atrune la Tretretro së e koho hnengödrai. Thupene la hnene la ketre trahmanyi ka kuci zonal hna hane öhne la ketre kovasio ne distrik, hnei nyidrë hna cinyihane ka hape, hna hai hnene la itre atr ka sin la “elolone la aqane ujë ne la itre atr ka traqa troa asabele, laka, angatr a lapa thaup me drenge cememine la metrötr la itre hna qaja me amamane laka, hetre hni ne ajane i angatr kowe la itre mekun ngöne la götrane la ua.” Öni nyidrëti fe ka hape “tru catre la itre nekönatr . . . , ketrepengöne kö nge lolo catr la aqane ujë i nyudren, maine pena nyudren a xome la itre xötr hnine la Tusi Hmitrötr.” Ame la ijine icasikeu, tre, thaa ijine tro hmaca kö a porotrik, me ihamë ithuemacanyi jëne mobilis, maine xeni pena, maine troa tro ngöne la itre varad. Loi e troa ce lapa hnene la itre thöth memine la itre keme thine i angatr, matre troa xatua angatr troa kepe thangane hnyawa la porogaram. (Deu. 31:12; Ite edomë 29:15) Maine tro sa catre ujë tune lai, easë hi lai a amamane laka easë a metrötrën la itre xan, nge easa olene la xeni ne la ua nyine iamele hna hamëne koi së.
4. Pine nemen matre loi e tro sa thupëne la pengö së matre troa hetrenyi pala hi la metrötr me iatruny ngöne la easa sin la ijine kovasio?
4 Pengö Së a Atrunyi Akötresie: Nyimutre la itre ka olene la itre mekune ka amexeje hmaca lo ketre cainöj ne la kovasio ne distrik ne lo macatre hnapan hna hape, “Loi e Eje Thene La Keresiano La Metrötr Ngöne La Nöjei Ijin,” kola amamane hnyawa laka, loi e tro la itre hlue i Akötresie a thele troa hetrenyi la iatruny me metrötr, ngöne la aqane heetr me aqane isej. Ame ngöne la macatre celë, loi e tro hmaca së a wanga atrune hnyawa la ewekë cili. Kola amamane hnene la pengö së la itre aliene hni së koi Iehova, memine fe la ëje hne së hna xom, ene la troa Itretre Anyipici Nyidrë. Loi e tro pala hi së a heetr ceitune me itre ka “thina ka ijiji Akötresie.”—1 Tim. 2:9, 10.
5. Nemene la aqane tro sa thupëne la pengö së matre troa hetrenyi la metrötr ngöne la itre ijine easa tro agö me ngenu ngöne la nöj hna hnen ngön la asabele?
5 Hapeu, tro hmekuje hi sa amamane la metrötre me iatrunyi së ngöne la easë a sine la asabele? Mekune hnyawa kö së laka, nyimutre la itre atr e tröne la hna hnen la kovasio ka troa goeë së memine la itre sine pepa hne së hna acatren ngöne la itre iheetre së. Canga tro hi la itre atr a wanga atrehmekunyi së ngöne la ka ala nyim. Celë hi matre, ame mina fe ngöne la itre ijine nango mano, maine easa tro troa xen thupene la hna asabele, haawe, loi e tro sa heetr thenge laka, itre hlue i Akötresie ka traqa troa hane sin la kovasio ne la itre Keresiano, nge thaa loi kö troa wanga ahmalohmaloeëne menune pala ha la aqane troa heetr. Drei kö la engazone elanyi la aqane troa anyipicine kowe la itre atr ka ala nyim! Ka madrine Iehova ngöne la kola mama jëne la pengö së la hnëqa hne së hna xom itre hlue i Nyidrë.
6. Nemene la itre thangane ka lolo hne së hna kapa qa ngöne la hne së itre Keresiano hna iatruny?
6 Itre Thangane Ka Loi: Maine troa hetrenyi the së la iatrunyi me metrötre ne la Keresiano ngöne la itre ijine kovasio së, haawe, tro mina fe hë a itre ijine lai troa anyipicine hnyawa kowe la itre atr ka goeë së me hane cainöje koi angatr. Ame ngöne la kola fenesi la ketre kovasio, hna qaja hnene la ketre trahmanyi ka huliwa ka hape: “Thaa hane kö ni öhne la itre atr ka ujë tune la. Hetrenyi la itre hnei Akötresieti hna thele the së, nge epuni hnyawa hi lai la itre atr cili.” Ame la easa iatruny, tre, easë hi lai a amamane laka easa imetrötrekeu me ihnimekeu, me atrunyi Iehova. (1 Pet. 2:12) Kolo fe lai a amamane ka hape, easa xoue Akötresie nge hetre hni ne ole së kowe la Tretretro së Atre ini së. (Heb. 12:28) Catre pi së troa iatruny, nge easa treqene la Kovasio Ne Distrik hna hape, “Xötrethenge Keriso Jë!”
[Bokis blong pija long pej 5]
Nyine Amekunë Së Göi Kovasio Ne Distrik
◼ Traem Ne Icasikeu: Troa nyiqaane la porogaram e 9 h 20, ngöne la köni drai. Troa fe la itre qëhnelö e 8h e hmakany. Ame ngöne la kola elone lo miuzik ne la Baselaia nyine nyiqaan, loi e tro asë hi së a ilapany, ene pe easa metrötrën la kola nyiqaan la icasikeu. Troa fenesi la icasikeu e 17 h 05 e Drai Ka Tru me Mecixen, nge 16 h 10 e Sabath.
◼ Hna Acili Loto: Pine laka hna nyifegone hi la itre hnë acili loto, haawe, thaa tru kö e itre xaa ijin la itre hnë acile itre ej. Celë hi matre, loi e troa nyialiene hnyawa la itre loto, ngo thaa ala caasi kö maine luetre e caa loto.
◼ Göi Göhnë Hnine Iuma Ne Drai: Tro hmekuje hi a ami göhnene la itre ka ce tro me easë hnine la loto ka caas, maine ka ce mele pena me easë.
◼ Xeni Hnaipajö: Ka lolo catr troa xeni la itre göxeni hna hnëkën ngöne la hnë kovasio maine troa traqa fë pena, hune la troa tro trije la hnë drai troa xomi xen ngöne la ijine mano e hnaipajö. Ijije troa amë la ketre neköi ka lepanyi epuni fene la icea. Thaa hna nue kö troa traqa fë ngöne la hnë asabele la itre glasiere ka tru, me itre ver ka kaqakaqa, me kahaitr.
◼ Itre Ahnahna: Tru catr la manie hna xom matre nyi jiane la kovasio ne distrik. Ijije hi tro sa amamane la madrine së troa hane hamë ahnahna thatraqane la huliwa e cailo fen, hnine la Uma Ne Baselaia maine ngöne la hna kovasio. Maine kola hamë chèque, loi e troa sija la hna hape “AEB Normandie.”
◼ Itre Eatr Me Itre Sine Mec: Maine kola traqa la ketre ewekë ngöne la ijine kovasio, canga wange ju lai ketre trene hnëqa easenyi së matre tro angeic a hëne nyimenyimën lo Pane Ixatua troa wai së.
◼ Ikaho: Thaa tro kö a saan la itre ikaho maine ketre ewekë pena ngöne la tirisite me ikaho ne la iuma ne kovasio, nge thaa tro kö a ajolën la itre atren la icasikeu hnene la itre ewekë cili.
◼ Intérêt à suivre : Ame la pepa hna hape, Personne qui demande à être visitée (S-43), tre, göi troa hamëne la itre ithuemacanyi ngöne la itre atr ka drenge hnyawa la easë a cainöj ngöne la nöjei ijin ngöne la ijine asabele. Tro la itretre cainöj a canga wange matre troa xome trongëne la caas maine lue pepa. Hetrenyi la itre pepa cili thene la atrekë hnëqan la itre itus. Maine ase hë nyialiene la itre pepa, haawe, troa hamëne kowe la atre cilëne la itre itus maine kowe pena la seketere ne la ekalesia i epun, ngöne la epuni a bëeke kowe la hnalapa i epun. — Wange ju la Huliwa Ne Baselaia ne febuare 2005, g. 6.
◼ Itre Hna Hnëkë Göi Uma Me Göi Loto: Kola qaja hnei Ite Edomë 3:27 ka hape: “The cipane kö la loi e ate kë ewekën, e atein’ eö troa kuca.” Nemene la ewekë ka loi me ka ijije tro epuni a kuca ngöne la kovasio? Kola troa traqa kowe la kovasio hnene la itre trejin qa ngöne la itre götrane ka nyimutre ne la nöj. Troa canga wange göi uma me loto. Maine jë troa aja ixatua göi loto maine göi uma hnene la itre trejine ka qatre hë, me itre sine wezipo, me itre ka cainöj ngöne la drai ka pexej, me itre xane ju kö. Ame la pane hnëqa ne la itre sinee, tre, ene la troa thupëne la itre atr ka tune lai. (1 Tim. 5:4) Ngo maine thaa ijiji angatre kö troa kuca, tro pena la itre trejin a thele troa ixatua. (Gal. 6:10) Loi e tro la itre trejin ka xomiujine la itre Ini Tus a ce wang memine la gurupe Iehovaangatr la itre ka aja ixatua, matre troa xecie hnyawa laka, hna canga hnëkë hnyawa ha thatraqane la kovasio.
◼ Hna hnëkën la itre pepa ne sipo uma thatraqane la itre trejine ka sine la kovasio. Loi e tro angatre a nyialiene la itre pepa Iehovaangatr, me canga hamën itre ej. Tro la Kometr Ne La Huliwa Ne Cainöj Ne La Ekalesia a goeëne la itre trejin ka ijij. Ketre hna amekötine la thatraqane la itre trejin ka pë ethan, me itre nekö Iehovaangatr ka loi thiina.