Ithue Mejiune Jë Kowe La Ka Pë Ewekë
1 Hnei Iesu hna hane nyipine la itre ka pë ewekë. Hetrenyi la itre ijine nyidrëti a kuca la itre iamamanyikeu me hamë ixatua ngöne la götrane la ngönetrei, me aloine la meci ne la itre atr, ngo ame la ka nyipi ewekë catre koi nyidrë, tre, ene la troa qaja la “maca ka loi” kowe la itre ka pë ewekë. (Mat. 11:5) Hetre thangane catre enehila la huliwa ne cainöj ne la Keresiano kowe la itre ka pë ewekë me kowe la itre xan.—Mat. 24:14; 28:19, 20.
2 Nyipi Mejiun: Hna lapaa ahnithe hnene la itre hene hmi kowe la itre ka pë ewekë ka hape, maine tro angatr a catre hame kowe la hmi, eje hi lai laka, tro hë angatr a hetre manie. Ngo Tusi Hmitrötre pe a inine ka hape, Baselaia i Akötresieti hmekuje hi la ka troa apaatrene la pë ewekë, me nyinyin la nöjei jole hna cile kow hnene la atr. (Sal. 9:18; 145:16; Is. 65:21-23) Maine tro sa amamane kowe la itre ka pë ewekë la nyipi ini hna hamëne hnei Tusi Hmitrötr, haawe, tro hë së a hamëne la mejiun me xatua angatr troa aejëne la aja ka eje thei angatr, ene la troa atre Akötresie me thili koi Nyidrë.—Mat. 5:3.
3 Ame ngöne lo hneijine i Iesu, tre, hna methinëne la itre ka pë ewekë hnene la itre Faresaio, me jelë angatr ka hape, ‘am-ha·’aʹrets, maine “itre neköi dro.” Ngo “nyipi ewekë” la aqane goeëne Iesu la “madra i angatr,” maine mele i angatr. (Sal. 72:13, 14) Ijije hi tro sa xötrethenge la tulu i Iesu, me ‘amamane laka easa kapa’ la itre ka pë ewekë hnene la hna thiina ka menyik me hane wanga atrunyi angatr me hane hnehengazone la itre jole ka eje thei angatr. (Ite edomë 14:31) Thaa tro pi kö sa goeën me qaja angazone la itre atr ka mel ngöne la itre götrane ka pë ewekë gaa easenyi së; maine troa cile hnö troa cainöje koi angatr. Ala nyimu catr thene la itre atr ka pë ewekë ka kapa la maca ne Baselaia.
4 Xatuane Jë Enehila La Itre Ka Pë Ewekë: Maine tro fe sa inine la itre trepene meköti qa hnine la Tusi Hmitrötr kowe la itre ka pë ewekë ngöne la teritoare së, tre, tro ha xatua angatr matre troa nango co la itre thangane ka ngazo ne la mele ne pë ewekë enehila. Drei la ketre ceitun, Tusi Hmitrötr a wathebone la troa iji menu la kahaitr, me elo mani, me geny, me ufi sixa, me itre xaa ewekë ju kö ka apë ewekëne la itre atr. (Ite edomë 6:10, 11; 23:21; 2 Kor. 7:1; Efe. 5:5) Kola ithuecatre hnei Tusi Hmitrötr troa nyipici me huliwa hnene la “hni ka pexej” ene la itre thiina ka lolo catr hna thele hnene la itre maseta. (Kol. 3:22, 23; Heb. 13:18) Eje hi laka, ame la kola goeëne la ketre rapor, nyimutre la itre maseta ka amë panëne la itre thiina ka tune la troa nyipici me pë ethan, tre, itre thiina lai hna wanga atrun hnei angatr ngöne la angatr a iëne la itre ka troa huliwa koi angatr.
5 Ketre tui Iehova, laka, Nyidrëti fe a hane hnehengazone la akötre ne la itre ka pë ewekë. Easenyi hë matre amelene jë hnei Iesu Keriso la “itre ka pë ewekë ka teije koi Nyidrë.” (Sal. 72:12) Haawe, ketre hnëqa ka lolo catre la troa hane tro fë la maca ne mejiune qa hnine la Tusi Hmitrötr, pine laka, ketre maca lai ka troa akeukawane la hni ne la itre xan, ene mina fe lo itre ka pë ewekë.