Kola Sa La Itre Hnyinge i Nyipunie
◼ Hapeu, ka loi kö e tro la Itretre Anyipicine i Iehova a ce thawa memine la itre xan la itre cainöj hna amë ngöne kaset nyine dreng maine pena hna fejan?
Eje hi laka, kola acatrene la lapaune së me ithuecatre koi së hnene la itre cainöj hna nyitrepene hnei Tusi Hmitrötr. (Ite hu. 15:32) Haawe, trotrohnine hi së laka easa ajane troa ce thawa la itre ithuemacany ka lolo cili memine la itre atr ka paatre ngöne la ijine icasikeu. Pine laka nyimutre la itre aparei enehila hna xome hnei atr nyine amë la itre miuzik me itre xaa ewekë ju kö, haawe, thaa ka jole hmaca kö troa xome la itre cainöj hnine itre ej me ce thawa itre ej memine la itre xan. Hetrenyi la itre xan ka amë hnyawa la itre cainöj hnine la itre kaset, tune lo itre cainöj hna cile fë ngöne lo itre macatre ka ase hë; nge angatr a hamëne maine amë hmaca hnine la itre xaa kaset thatraqane la itre sinee i angatr. Hetrenyi la itre xan ka eköth la itre site ngöne Ëternet, me amë ngön la itre cainöj matre troa aijijëne la itre atr ka ajan troa xome itre ej.
Eje hi laka, thaa hna wathebone kö troa xome matre drenge thupen la itre cainöje cili thatraqa së maine thatraqane pena la itre atrene la hnepe lapa së. Ketre, maine jë tro la itre qatre thup a wange hnyawa maine troa amë la itre cainöj hnine kaset thatraqane la itre trejine ka wezipo nge ka thaa ijije kö troa sine la itre icasikeu. Ngo hetrenyi la itre nyipi kepin matre thaa tro kö sa thawa trongëne la itre cainöj hna fejan ngöne pepa maine ngöne kaset pena.
Pine laka ame itre xaa ijin, hna hamëne la itre cainöj hmekune la itre aja ne la itre atrene la teritoar, haawe, ijije hi tro sa qeje pengöne menune la itre mekune hna qaja ngöne kaset; nge thaa tro hë sa wanga atrune la itre kepin matre hna hamëne la cainöje cili. Ketre, jole koi së troa atre hnyawa la atr ka cile fë la cainöj memine la drai cili, matre tro sa mejiune laka, thaa ka hekö catre kö la itre ithuemacany hna hamën nge ka nyipici. (Luka 1:1-4) Nge maine jë tro la itre xan a thele la iatrunyi hnene la hna thawa trongëne la itre cainöj hna fejane ngöne pepa maine ngöne kaset pena.—1 Kor. 3:5-7.
Kola catre hnene la hlue ka nyipici me ka inamacan troa thawa la göxeni ne la ua ngöne la nyipi “edö” me nyipi “ijin.” (Luka 12:42) Kolo fe lai a qaja lo itre hna hnëkën thatraqane la itre cainöj hna cile fë ngöne la itre ekalesia ne la Itretre Anyipicine i Iehova ne la nöj, memine lo itre cainöj nyine dreng ngöne ikaho, laka, hna amë ngöne Ëternet jw.org. Loi e tro sa mejiune laka tro la hlue cili ka nyipici me ka inamacan memine la Lapa Ne Xomi Meköti ne ej, a hamëne koi së la itre ewekë hne së hna ajane matre troa acatrene hnyawa la lapaune së.—Ite hu. 16:4, 5.