Thele Jë Troa Könëne La Itre Atr Troa Ini Tusi Hmitrötr Me Easë
1. Kola hapeue la troa trongëne la hna amekötine hnei Iesu ngöne Mataio 28:19, 20?
1 Hnei Iesu hna upi së troa “inine la nöjei nöj . . . , me ini angat.” (Mat. 28:19, 20) Haawe, loi e tro pala hi sa thele troa nyiqaane inine la Tusi Hmitrötr memine la itre atr, ngo thaa ene hmekuje kö ngöne lo drai hna sa thatraqane lai. Maine jë troa xatua së hnene la itre mekune celë.
2. Drei la hne së hna troa könën matre troa hane inine la Tusi Hmitrötr me easë?
2 Könëne Jë La Itre Atr Troa Inine La Tusi Hmitrötr Me Easë: Maine tro pala hi sa thele troa könën la itre atr troa inine la Tusi Hmitrötr me easë, tre, itre ijine lai ka ijije troa kapa hnene la ala caas. (Ate cai. 11:6) Hapeu, hnei epuni kö hna thele troa sipone mekötine kowe la ketre atr troa inine la Tusi Hmitrötr? Ame ngöne la ketre ekalesia ne Etazini, hna thele hnene la itre trejin ngöne la treu ka pexej, troa sipone mekötine kowe itre atr troa inine la Tusi Hmitrötr me angatr. Drei la madrine i angatr troa nyiqaane la 42 lao ini Tus! The mekune kö laka, atre hi la itre atr ka hni ka ajan hnei epuni hna cainöje kow, laka, epuni a ajane troa ini Tusi Hmitrötr me angatr. Haawe, tune kaa matre troa könë angatr troa inine la Tusi Hmitrötr ngöne la epuni a iwai hmaca? Maine xele angatr troa ini Tusi Hmitrötre me epun, tre, thaa ka ngazo kö lai. Loi e tro pala hi epuni a thele troa akökötrene la aja thei angatr. Hapeu, ase kö epun hnyingëne kowe la itre atr ka lapa ezi epun, me itre sine huliwa i epun, me itre sine ce ini me epun, maine aja i angatre jë fe kö troa hane inine la Tusi Hmitrötr me epun? Ketre, ijije hi tro epuni a hnyingëne kowe la itre hnainin, maine hetre sinee i angatre jë fe kö me itre atrene la fami ka ajane troa inine la Tusi Hmitrötr.
3. Nemene la jia ne huliwa ka troa xatua epun troa nyiqaane inine la Tusi Hmitrötr memine la itre atr, nge eue la tro epuni a hamën ej?
3 Ketre Jia Ne Huliwa Ka Lolo: Hetrenyi së la ketre jia ne huliwa ka lolo ka troa xatua së troa nyiqaane inine la Tusi Hmitrötr memine la itre atr, tune la tarak Ajane Kö Nyipunie Troa Atre Hnyawa La Nyipici? Loi e troa hamëne kowe la itre atr ka kapa la itre itusi së maine pena ka thipëne itre ej. Ijije tro fe a hamëne la tarak cili ngöne la itre götran hna huliwa ngön hnene la itre atr, maine e cahu gojeny, maine ngöne la kola iupi fë la ketre tus, maine pena ngöne la kola iwai hmaca. Ketre, ijije hi troa hane amë fe itre ej ngöne la itre hnalapa ka pë atren. Ka loi e troa ce xome me epun ngöne la epuni a xomi kar, maine itö pena, maine ngöne la epuni a tro troa huliwa? Kola nango qeje pengöne ngöne la pune la tarak, la itre hna amekötin göi troa inine la Tusi Hmitrötr, nge eje mina fe a qaja la itus Ini Tusi Hmitrötr.
4. Tro epuni a xome tune kaa la tarak Aja i Nyipunieti Kö Troa Atre Hnyawa La Nyipici matre troa nyiqaane inine la Tusi Hmitrötr memine la ketre atr?
4 Thupene la hna hamëne la tarak kowe la atr, maine jë tro epuni a wanga atrune la itre hnying ka eje ngöne la pane götran, me hnyinge koi angeic, ka hape, “Ame ngöne la itre hnyinge celë, nemene la ka ketri nyipëti hnyawa?” Thupene lai, ce wange jë epon la mekune ka sa lai hnying hnine la tarak, nge e jë maine qeje pengöne pena la pune la tarak ka amamane la itre hna amekötine göi troa inine la Tusi Hmitrötr. Amamane jë koi angeic la itre ithuemacany ka ej e hnine la itus Ini Tusi Hmitrötr me hamë angeic, nge isa pui jë matre troa bëeke hmaca troa sisedrëne la porotrik.
5. Pine nemene matre loi e tro pala hi sa thele troa könëne la itre atr troa inine la Tusi Hmitrötr me easë?
5 Hetrenyi pala kö ngöne la götrane hne së hna cainöje ngön la itre atr ka ajane troa atre la nyipi ini hna hamën hnene la Tusi Hmitrötr. Maine tro pala hi sa thele troa könëne la itre atr troa inine la Tusi Hmitrötr me easë, haawe, tro ha nyimu ijine ka troa aijijë së troa melëne la manathithi ka tru, ene la troa xatuane la itre xaa atr troa trongëne la gojenyi ne tro kowe la mel.—Mat. 7:13, 14.